Election bannerElection banner
Published:Updated:

அமித் ஷா: ஒரு கி.மீ தூரம்... ஒரு மணிநேரம்; களைகட்டும் பிரசாரம்! - உற்சாகத்தில் பொன்.ராதாகிருஷ்ணன்

அமித் ஷா
அமித் ஷா

செட்டிக்குளம் பகுதியிருந்து வேப்பமூடு காமராஜர் சிலை வரை சுமார் ஒரு கிலோமீட்டர் தூரம் திறந்த வாகனத்தில் பிரசாரம் மேற்கொள்கிறார். ஒரு கிலோமீட்டர் தூரத்தையும் கடந்து செல்ல ஒரு மணி நேரம் ஒதுக்கப்பட்டிருக்கிறது.

கன்னியாகுமரி நாடாளுமன்றத் தொகுதி இடைத்தேர்தல் வேட்பாளராக முன்னாள் மத்திய அமைச்சர் பொன்.ராதாகிருஷ்ணன் அறிவிக்கப்பட்டிருக்கிறார். இந்தநிலையில், மத்திய உள்த்துறை அமைச்சர் அமித் ஷா நாளை கன்னியாகுமரி மாவட்டத்துக்குப் பிரசாரத்துக்கு வருகிறார். நாளை காலை 10 மணியளவில் திருவனந்தபுரத்திலிருந்து ஹெலிகாப்டர் மூலம் நாகர்கோவிலிலுள்ள மறவன் குடியிருப்பு ஆயுதப்படை மைதானத்துக்கு வருகிறார் அமித் ஷா. அங்கிருந்து நேராக சுசீந்திரம் தாணுமாலய சுவாமி கோயிலில் சுவாமி தரிசனம் செய்கிறார். மேலும் சுசீந்திரத்தில் `வெற்றிக்கொடியேந்தி வெல்வோம்’ என்ற தலைப்பில் பா.ஜ.க வேட்பாளர் பொன்.ராதாகிருஷ்ணனை ஆதரித்து வீடுகளில் துண்டுப்பிரசுரம் விநியோகித்து பிரசாரம் செய்கிறார்.

அதன் பின்னர் செட்டிக்குளம் பகுதியிலிருந்து வேப்பமூடு காமராஜர் சிலை வரை சுமார் ஒரு கிலோமீட்டர் தூரம் திறந்த வாகனத்தில் பிரசாரம் மேற்கொள்கிறார். ஒரு கிலோமீட்டர் தூரத்தையும் கடந்து செல்ல ஒரு மணி நேரம் ஒதுக்கப்பட்டுள்ளது. இந்த ஒரு கிலோமீட்டர் தூர சாலையில் கன்னியாகுமரி மாவட்டத்திலுள்ள பா.ஜ.க தொண்டர்கள், ஒரு லட்சம் பேரை நிறுத்தி அமித் ஷாவுக்கு வரவேற்பு அளிக்க திட்டமிட்டிருக்கிறார் நாடாளுமன்ற இடைத்தேர்தல் வேட்பாளர் பொன்.ராதாகிருஷ்ணன்.

பொன்.ராதாகிருஷ்ணன்
பொன்.ராதாகிருஷ்ணன்

இதற்காக ஒவ்வொரு ஒன்றியத்திலும் கட்சியினரைத் திரட்டும் பணி தீவிரமாக நடந்துவருகிறது. ஒரு கிலோமீட்டர் தூரத்தில் எந்தப் பகுதியில், எந்த ஒன்றியத்தைச் சேர்ந்த தொண்டர்கள் நிற்க வேண்டும் என்ற அறிவிப்பும் வழங்கப்பட்டிருக்கிறது. அமித் ஷா தொண்டர்களையும், பொதுமக்களையும் சந்திக்க ஏதுவாக சிறப்பு வடிவமைப்புடன் ஒரு லாரி ஏற்பாடு செய்யப்பட்டிருக்கிறது. சாலைப் பிரசாரம் முடிவடையும் வேப்பமூடு பகுதியில் அமித் ஷா உரையாற்றுகிறார். அமித் ஷா வேப்பமூடு பகுதியிலுள்ள காமராஜர் சிலைக்கு மாலை அணிவிக்கவிருப்பதாகவும் கூறப்படுகிறது.

Election Updates: இழுபறி முடிந்தது - காங்கிரஸுக்கு 25 தொகுதிகள், கன்னியாகுமரி நாடாளுமன்றத் தொகுதி ஒதுக்கப்பட்டது

அதன் பிறகு வடசேரி பகுதியிலுள்ள உடுப்பி ஹோட்டலுக்குச் செல்லும் அமித் ஷா, அங்கு கட்சி நிர்வாகிகளிடம் ஆலோசனை நடத்துகிறார். அமித் ஷா தங்கவிருக்கும் உடுப்பி ஹோட்டல் நேற்று முதலே போலீஸ் கட்டுப்பாட்டுக்குள் வந்துவிட்டது. அமித் ஷாவின் ஆலோசனைக் கூட்டத்தில் கலந்துகொள்ளவிருக்கும் நிர்வாகிகளுக்கு ஏற்கெனவே கொரோனா பரிசோதனை மேற்கொள்ளப்பட்டிருக்கிறது. இந்த ஆலோசனைக் கூட்டத்தில் கன்னியாகுமரி நாடாளுமன்ற இடைத்தேர்தல் மற்றும் தமிழக சட்டசபைத் தேர்தலில் பா.ஜ.க-வின் வெற்றிக்கான வியூகங்கள் குறித்து அமித் ஷா நிர்வாகிகளிடம் ஆலோசிக்கவிருக்கிறார்.

அமித் ஷா
அமித் ஷா

நாளை மதியம் 2 மணி வரை நிர்வாகிகளுடன் ஆலோசனை நடத்தும் அமித் ஷா, பின்னர் திருவனந்தபுரம் புறப்பட்டுச். செல்கிறார். `கன்னியாகுமரி நாடாளுமன்ற இடைத்தேர்தலில் வெற்றிபெறுபவர் மத்திய அமைச்சராக வருவார்’ என ஏற்கெனவே பா.ஜ.க பிரசாரம் செய்துவருகிறது. எனவே, முன்னாள் மத்திய அமைச்சர் பொன்.ராதாகிருஷ்ணன் வெற்றிபெற்றால் மீண்டும் மத்திய அமைச்சர் ஆவார் என்ற உத்வேகத்தில் குமரி பா.ஜ.க தொண்டர்கள் பணியாற்றுகிறார்கள்.

Election bannerElection banner
அடுத்த கட்டுரைக்கு