Published:Updated:

`குரூப்-1 உள்ளிட்ட அரசுப் பணிகளுக்கான நேர்முகத் தேர்வுகள் ரத்து!' - ஆந்திர அரசு அதிரடி

ஜெகன் மோகன் ரெட்டி
ஜெகன் மோகன் ரெட்டி

ஆந்திராவில் குரூப்-1 உள்ளிட்ட அரசுப் பணிகளுக்கான தேர்வுகளில் இனி நேர்முகத் தேர்வுகள் இடம்பெறாது என்று அந்த மாநில அரசு அறிவித்துள்ளது.

ஆந்திர முதல்வர் ஜெகன்மோகன் ரெட்டியின் தலைமையில் 2019-ம் ஆண்டு அரசுப் பணிகளுக்கான நியமனம் மற்றும் தேர்வு முறைகள் குறித்த விரிவான உயர்மட்டக் கூட்டம் நடைபெற்றது. அதில், ஆந்திர பொதுச்சேவை ஆணையத்தின் உயரதிகாரிகள் பலரும் கலந்துகொண்டனர். அந்தக் கூட்டத்தில், ஆந்திராவில் அரசுப் பணிகளுக்கான தேர்வுகளில் நேர்முகத் தேர்வை ரத்துசெய்வது தொடர்பாகக் கலந்தாலோசிக்கப்பட்டு முக்கியத் தீர்மானம் நிறைவேற்றப்பட்டது.

இந்தநிலையில், மாநிலத்தில் குரூப் -1 உள்ளிட்ட அனைத்து அரசுப் பணிகளின் ஆட்சேர்ப்பு தேர்வுகளில் இனிமேல் நேர்முகத் தேர்வுகள் நடத்தப்படாது என்றும், அதற்கு பதிலாக எழுத்துத் தேர்வுகள் மட்டுமே நடைபெறும் என்றும் ஆந்திர அரசு அறிவித்துள்ளது. முன்னதாக, அரசுப் பணிகளில் சேர விரும்புவோர் நேர்முகத் தேர்வின்போது அரசு அதிகாரிகளுக்கு, சட்ட விரோதமாக லஞ்சம் கொடுத்து அரசுப் பணிக்குத் தேர்வாகிவிடுவதால், தகுதி இருந்தும் வேலை கிடைக்காமல் போய்விடுவதாக ஏராளமானோர் முன்வைத்த குற்றச்சாட்டின் அடிப்படையில் ஜெகன்மோகன் அரசு இந்த முடிவை எடுத்திருப்பதாகக் கூறப்படுகிறது.

நேர்முகத் தேர்வு
நேர்முகத் தேர்வு
Representaional Image

இந்த அறிவிப்பின் மூலம், ஆந்திர மாநிலத்தில் அரசுப் பணியாளர் தேர்வாணையத்தின் கீழ் நடத்தப்படும் அனைத்துத் தேர்வுகளிலும் இனி நேர்முகத் தேர்வுகள் நடக்காது என்பது உறுதியாகியிருக்கிறது. அரசுப்பணிக்கான ஆள் சேர்ப்பு நடைமுறையின் மீதான வெளிப்படைத் தன்மையையும், நம்பிக்கையையும் உறுதி செய்வதற்காக மேற்கொள்ளப்பட்டுள்ள மாநில அரசின் இந்த முடிவுக்கு மக்கள் மத்தியில் பெரும் வரவேற்பு கிடைத்துள்ளது.

அடுத்த கட்டுரைக்கு