Published:Updated:

உத்தரப்பிரதேசம்: கியான்வாபி மசூதியில் சிவலிங்கம்? - சர்ச்சையும் பின்னணியும்!

கியான்வாபி மசூதி

கியான்வாபி மசூதியில் மேற்கொள்ளப்பட்ட ஆய்வில், மசூதியின் உள்ளே இருந்த செயற்கைக் குளத்தில் சிவலிங்கம் கிடைக்கப்பெற்றதாகக் கூறி, ஹரிஷங்கர் ஜெயின் என்ற வழக்கறிஞர் நீதிமன்றத்தை அணுகினார்.

உத்தரப்பிரதேசம்: கியான்வாபி மசூதியில் சிவலிங்கம்? - சர்ச்சையும் பின்னணியும்!

கியான்வாபி மசூதியில் மேற்கொள்ளப்பட்ட ஆய்வில், மசூதியின் உள்ளே இருந்த செயற்கைக் குளத்தில் சிவலிங்கம் கிடைக்கப்பெற்றதாகக் கூறி, ஹரிஷங்கர் ஜெயின் என்ற வழக்கறிஞர் நீதிமன்றத்தை அணுகினார்.

Published:Updated:
கியான்வாபி மசூதி

உத்தரப்பிரதேச மாநிலம், வாரணாசியில் காசி விஸ்வநாதர் கோயிலுக்கு அருகே கியான்வாபி என்ற மசூதி உள்ளது. இந்த மசூதி வளாகத்தின் வெளிப்புறச் சுவரில் சிங்கார கௌரி அம்மன் சிலை உள்ளது. ஆண்டுக்கு ஒரு முறை மட்டுமே அம்மனுக்கு பூஜைகள் நடத்தப்பட்டுவருகின்றன. இந்நிலையில், சிங்கார கௌரி அம்மனுக்கு தினமும் பூஜை நடத்த அனுமதிக்க வேண்டும் என்று ஐந்து பெண்கள் வாரணாசி நீதிமன்றத்தில் கடந்த ஆண்டு வழக்கு தொடர்ந்தனர். முன்னதாக கியான்வாபி மசூதியிலுள்ள கோயிலை மறுசீரமைக்க வேண்டும் என 1991-ம் வாரணாசி மாவட்ட நீதிமன்றத்தில் மனுத்தாக்கல் செய்யப்பட்டது. இதை எதிா்த்து சன்னி வக்பு வாரியம், அஞ்சுமன் இந்தஜாமியா மஸ்ஜித் ஆகியவை தொடுத்த வழக்கில் மாவட்ட நீதிமன்ற உத்தரவுக்கு அலகாபாத் உயர் நீதிமன்றம் தடைவிதித்தது.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

இந்நிலையில், கியான்வாபி மசூதியின் சுவரிலுள்ள சிலைகளை வழிபட அனுமதிக்கக் கோரி தாக்கலான மனுவை விசாரணைக்கு எடுத்துக்கொண்டது. இதை விசாரித்த மாவட்ட நீதிபதி ரவிகுமாா் திவாகா், மசூதியை அளவிட்டு வீடியோ பதிவுசெய்து மே 17-ம் தேதிக்குள் அறிக்கை தாக்கல் செய்ய உத்தரவிட்டார். மேலும், இந்தப் பணிகளை மேற்கொள்ளக் குழு அமைத்து கடந்த 12-ம் தேதி உத்தரவிட்டார். இந்த ஆய்வை மேற்கொள்ளக் கூடாது என்று மசூதி நிர்வாகமான அஞ்சுமன் இந்தஜாமியா மசூதி கமிட்டி சார்பில் வாரணாசி நீதிமன்றத்தில் மனுத்தாக்கல் செய்யப்பட்டது. ஆனால், அந்த மனு நிராகரிக்கப்பட்டது. இதனால், வாரணாசி நீதிமன்ற உத்தரவை எதிர்த்து அஞ்சுமன் இந்தஜாமியா மசூதி கமிட்டி உச்ச நீதிமன்றத்தில் மனுத்தாக்கல் செய்தது. இந்த மனுவை விசாரித்த நீதிமன்றம், ``இன்னும் வழக்கு தொடர்பான ஆவணங்களைப் பார்க்காததால், இப்போது கள ஆய்வுக்குத் தடை விதிக்க முடியாது" என்று கூறியது. எனினும் மனுவை அவசரமாக விசாரிக்க வேண்டும் என்ற கோரிக்கையை நீதிபதிகள் ஏற்றுக்கொண்டனர்.

கியான்வாபி மசூதி
கியான்வாபி மசூதி

இந்நிலையில் மசூதியில் கடந்த சனிக்கிழமை தொடங்கி மூன்று நாள்களாக நடந்த ஆய்வு நேற்று (16-ம் தேதி) நிறைவுபெற்றது. இந்த ஆய்வில் வழக்கறிஞர் ஆணையர் அஜய்குமார் மிஸ்ரா, சிறப்பு வழக்கறிஞர் விஷால் சிங், துணை வழக்கறிஞர் அஜய் பிரதாப் சிங், மனுதாரர்கள், அவர்களின் வழக்கறிஞர்கள் ஆகியோர் என மொத்தம் 36 பேர் இருந்தனர். ஆய்வின்போது எதுவும் அசம்பாவிதம் நடைபெற்றுவிடக் கூடாது என்பதால் முன்னெச்சரிக்கை நடவடிக்கைக்காக மசூதியிலிருந்து ஒரு கிலோமீட்டர் தொலைவு வரை போலீஸார் பாதுகாப்புப் பணியில் ஈடுபடுத்தப்பட்டனர்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

அதன்படி, நடைபெற்ற ஆய்வில் மசூதியின் உள்ளே இருந்த செயற்கைக் குளத்தில் சிவலிங்கம் கிடைக்கப்பெற்றதாகக் கூறி, ஹரிஷங்கர் ஜெயின் என்ற வழக்கறிஞர் நீதிமன்றத்தை அணுகினார். மேலும், மசூதி வளாகத்துக்குள் உள்ள அந்தக் குறிப்பிட்ட பகுதியை சீல் வைக்குமாறும், அந்தப் பகுதிக்குள் ஆட்கள் செல்வதைத் தடுக்க வேண்டும் என்றும் கோரிக்கை விடுத்தார். அதன்படி, வளாக பகுதியைப் பூட்டி சீல் வைக்க பனாரஸ் மாவட்ட ஆட்சியருக்கு நீதிமன்றம் உத்தரவிட்டது. இதனையடுத்து, ஆட்கள் யாரும் உள்ளே சென்றுவிடாமல் தடுக்க வளாகப் பகுதி சீல் வைக்கப்பட்டு, பாதுகாப்பு ஏற்பாடு செய்யப்பட்டுள்ளது. ஆனால், ஆய்வின்போது சிலை எதுவும் கிடைத்ததாக ஆய்வுக்குழுத் தரப்பில் எந்தத் தகவலும் வெளியிடப்படவில்லை. அதேபோல, ஆய்வுப் பணிகள் முழுவதையும் வீடியோ பதிவுசெய்து, அது குறித்து எந்தத் தகவலையும் வெளியிடக் கூடாது என்று நீதிமன்றம் கூறியிருந்தது.

ஞானவாபி  மசூதி
ஞானவாபி மசூதி

தற்போது வெளியான இந்தத் தகவலை மசூதி நிர்வாகம் மறுத்துள்ளது. மேலும், குளத்துக்குள் இருப்பது சிவலிங்கம் இல்லை என்றும், அந்தக் குளம் மசூதிக்கு வருபவர்கள் தொழுகைக்கு முன்பு தங்களைத் தூய்மைப்படுத்திக்கொள்வதற்கான செயற்கை நீரூற்று அமைப்புகொண்டது என்று மசூதி தரப்பு தெரிவித்துள்ளது. இதையே ஏ.ஐ.எம்.ஐ.எம் தலைவர் அசாதுதீன் ஒவைசியும் தெரிவித்துள்ளார். பிரதமர் மோடியின் தொகுதியான வாரணாசியில் நடைபெறும் இந்தச் சம்பவம் நாடு முழுவதும் பெரும் அதிர்வலைகளை ஏற்படுத்தியிருக்கிறது. இந்த விவகாரம் குறித்து உச்ச நீதிமன்றத்தில் நடைபெறும் வழக்கின் போக்கை வைத்தே அடுத்தகட்ட விவரம் தெரியவரும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism