Published:Updated:

அஸ்ஸாமில் அசத்திய பா.ஜ.க!

சர்வானந்தா சோனோவால் - மோடி
பிரீமியம் ஸ்டோரி
சர்வானந்தா சோனோவால் - மோடி

பா.ஜ.க வெற்றிபெற்றுவிட்டாலும், முதல்வர் நாற்காலியில் அமரப்போவது யார் என்கிற கேள்வி தற்போது எழுந்துள்ளது.

அஸ்ஸாமில் அசத்திய பா.ஜ.க!

பா.ஜ.க வெற்றிபெற்றுவிட்டாலும், முதல்வர் நாற்காலியில் அமரப்போவது யார் என்கிற கேள்வி தற்போது எழுந்துள்ளது.

Published:Updated:
சர்வானந்தா சோனோவால் - மோடி
பிரீமியம் ஸ்டோரி
சர்வானந்தா சோனோவால் - மோடி

மேற்கு வங்கத்தில் எதிர்பார்த்த வெற்றி பா.ஜ.க-வுக்குக் கிடைக்கவில்லை. கேரளாவில் ஒரு தொகுதியில்கூட அந்தக் கட்சி ஜெயிக்கவில்லை. அதேசமயம், அஸ்ஸாம் மாநிலத்தில் இரண்டாவது முறையாகப் பெற்றிருக்கும் வெற்றி பா.ஜ.க-வுக்கு உற்சாகத்தை அளித்திருக்கிறது.

ஒரு காலத்தில் அஸ்ஸாம் மாநிலம், காங்கிரஸ் கட்சியின் கோட்டையாக இருந்தது. மத்தியில் பா.ஜ.க அதிகாரத்துக்கு வந்ததிலிருந்து, வடகிழக்கு மாநிலங்களில் ஆட்சியதிகாரத்தைக் கைப்பற்ற வேண்டும் என்ற முயற்சியில் தீவிரமாக இருந்த அந்தக் கட்சி, 2016 சட்டமன்றத் தேர்தலில், தருண் கோகோய் தலைமையிலான 15 ஆண்டுக்கால காங்கிரஸ் ஆட்சிக்கு முடிவுகட்டியது.

இந்தநிலையில்தான் கடந்த ஐந்தாண்டுக் காலம், சர்வானந்தா சோனோவால் தலைமையிலான அஸ்ஸாமின் பா.ஜ.க அரசு பல்வேறு சவால்களை எதிர்கொண்டது. தேசிய குடிமக்கள் பதிவேடு மற்றும் குடியுரிமைத் திருத்தச் சட்டம் ஆகியவற்றுக்கு எதிராகப் பெரும் போராட்டங்கள் வெடித்தன. இது, பா.ஜ.க அரசுக்கு நெருக்கடியை ஏற்படுத்தினாலும், சோனாவால் அரசு பிரச்னைகளை லாகவமாகக் கையாண்டு போராட்டங்களைக் கட்டுப்படுத்தியது.

நடந்து முடிந்த தேர்தலுக்கான பா.ஜ.க கூட்டணியிலும் சில பிரச்னைகள் நீடித்தன. கடந்த தேர்தலில் பா.ஜ.க கூட்டணியிலிருந்த போடோ மக்கள் முன்னணி, இந்த முறை காங்கிரஸ் கூட்டணிக்குச் சென்றுவிட்டது. காங்கிரஸ் தலைமையில் உருவான மெகா கூட்டணி, பா.ஜ.க-வுக்குப் பெரும் சவாலாக அமைந்தது. இதனால், போடோ பகுதியில் செல்வாக்கு பெற்ற யூ.பி.பி.எல் என்கிற ஐக்கிய மக்கள் விடுதலை கட்சி போன்ற சில கட்சிகளுடன் கூட்டணி அமைத்து, பா.ஜ.க தன்னை பலப்படுத்திக்கொண்டது. ஒருவழியாக தேர்தல் முடிவுகளில் மொத்தமிருக்கும் தொகுதிகளான 126-ல் 74-க்கும் மேற்பட்ட தொகுதிகளைக் கைப்பற்றியிருக்கிறது பா.ஜ.க. இந்த வெற்றிக்குப் பின்னால் பல காரணிகள் இருக்கின்றன.

அஸ்ஸாமில் அசத்திய பா.ஜ.க!

காங்கிரஸ் கட்சியில் மக்கள் செல்வாக்குமிக்க தலைவராக விளங்கிய தருண் கோகோய் மறைவுக்குப் பிறகு, அவருக்கு நிகரான செல்வாக்குகொண்ட தலைவர்கள் யாரும் காங்கிரஸில் இல்லை. இது பா.ஜ.க-வுக்கு பலம். அஸ்ஸாமில் சி.ஏ.ஏ-வுக்கு எதிராக நடைபெற்ற போராட்டத்திலிருந்து ஏ.ஜே.பி (அஸ்ஸாம் ஜாட்டியா கட்சி), ஆர்.டி (ராய்ஜோர் தள்) என இரண்டு புதிய கட்சிகள் உருவாகின. பா.ஜ.க-வைத் தோற்கடிக்க வேண்டும் என்ற நோக்கத்துடன் தேர்தலில் களமிறங்கிய இந்த இரு கட்சிகளும், எதிர்க்கட்சிகளின் வாக்குகளை கணிசமாகப் பிரித்தன. இதுவும் பா.ஜ.க-வின் வெற்றிக்குச் சாதகமாக அமைந்துவிட்டது.

பா.ஜ.க வெற்றிபெற்றுவிட்டாலும், முதல்வர் நாற்காலியில் அமரப்போவது யார் என்கிற கேள்வி தற்போது எழுந்துள்ளது. சர்வானந்தா சோனோவால் மீண்டும் முதல்வர் ஆவாரா என்ற சந்தேகம் தேர்தலுக்கு முன்பிருந்தே எழுப்பப்பட்டது. காரணம், தேர்தலின்போது முதல்வர் வேட்பாளராக அவர் அறிவிக்கப்படவில்லை. அதேசமயம், சோனோவால் அமைச்சரவையில் நிதியமைச்சராக இடம்பெற்றிருந்த ஹிமந்தா பிஸ்வா சர்மா, பா.ஜ.க தலைமையால் நம்பிக்கைக்குரிய தலைவராகப் பார்க்கப்படுகிறார். அவர்தான் அஸ்ஸாமின் புதிய முதல்வராவர் என்கின்றன வடகிழக்கிலிருந்து வரும் தகவல்கள்.

மேற்கு வங்கம் மற்றும் தமிழகத் தேர்தல்களின் முடிவுகளை ஒப்பிட்டால், அஸ்ஸாம் தேர்தல் முடிவுகள் பா.ஜ.க-வுக்கு ஆறுதல் தந்திருக்கின்றன என்றே சொல்ல வேண்டும்!