ஒரே நாடு... ஒரே சட்டம்! - வரும் கூட்டத்தொடரில் நிறைவேற்றத் துடிக்கும் பா.ஜ.க

மு த்தலாக் சட்டம், காஷ்மீர் சிறப்பு அந்தஸ்து நீக்கம் என அடுத்தடுத்த சர்ச்சை மசோதாக்களை நிறைவேற்றிய மத்திய அரசு, அடுத்து பொது சிவில் சட்டத்தையும் வரும் நாடாளுமன்றக் கூட்டத்தொடரில் நிறைவேற்றும் வேலையில் தீவிரமாகியிருக்கிறது. நவம்பர் மாத மத்தியில் நாடாளுமன்ற குளிர்காலக் கூட்டத்தொடர் தொடங்கியதுமே, பொது சிவில் சட்ட மசோதாவை ராஜ்ய சபா மற்றும் லோக் சபா இரண்டிலும் நிறைவேற்ற முடிவுசெய்துள்ளது.

. கடந்த ஐந்து ஆண்டுகள் பா.ஜ.க தனிப்பெரும் கட்சியாக ஆட்சியில் இருந்தபோதே, இந்தச் சட்டங்களைக் கொண்டுவர முயற்சிகள் எடுக்கப் பட்டன. கட்சியின் சில மூத்த தலைவர்கள், ‘அவசரப்பட வேண்டாம்’ என்று சொன்னதால், கிடப்பில் போடப்பட்டன. 2019-ல் மீண்டும் அசுரபலத்துடன் ஆட்சியைப் பிடித்ததும் தங்களது அறுபது ஆண்டுகாலத் திட்டமான இந்தச் சட்டங்களை உடனடியாக நிறைவேற்ற வேண்டும் என்று நாக்பூர் ஆர்.எஸ்.எஸ் தலைமை அறிவுறுத்தியுள்ளது. எனவே, முதல் நாடாளுமன்றக் கூட்டத்தொடரிலேயே முத்தலாக் சட்டத்தையும் காஷ்மீர் சிறப்பு அந்தஸ்து ரத்து சட்டத்தையும் நிறைவேற்றிவிட்டனர். அடுத்து, பொது சிவில் சட்டம் காத்திருக்கிறது.

. இந்தியாவுக்கான அரசியல் அமைப்புச் சட்டம் இயற்றப்பட்டபோது, கிரிமினல் சட்டங்கள் மற்றும் சிவில் சட்டங்கள் அனைத்து மதத்தினருக்கும் பொதுவானதாக வகுக்கப்பட்டன. சில தனிச்சட்டங்கள் மட்டும் மதங்களுடன் தொடர்புடையதாக வகுக்கப்பட்டன. அதன் அடிப்படையில் இந்து, முஸ்லிம், கிறிஸ்துவர்களுக்கு எனத் தனிச்சட்டங்கள் உள்ளன. சமணர்கள், பெளத்தர்கள், சீக்கியர்கள் ஆகியோர் இந்து மதச் சட்டத்துக்குள் வரையறுக்கப்பட்டனர். 2012-ம் ஆண்டு காங்கிரஸ் ஆட்சியில், சீக்கியர்களுக்கு மட்டும் தனி திருமணச்சட்டம் கொண்டுவரப் பட்டது.

. குற்றவியல் மற்றும் தண்டனைச் சட்டம் அனைவருக்கும் பொதுவாக இருந்தாலும் திருமணம், மண முறிவு, தத்தெடுத்தல், சொத்துரிமை போன்றவற்றில் ஒவ்வொரு சமூகத் துக்கும் தனித்தனிச் சட்டம் உருவானது. அதே நேரம், 1949-ல் இயற்றப்பட்ட இந்திய அரசியல் அமைப்புச் சட்டத்தில் ‘வழிகாட்டு நெறிமுறைகள்’ என்ற தலைப்பில், 44-வது பிரிவில் ‘பொது சிவில் சட்டம் என்ற நிலையை, தேவைப்பட்டால் சட்டம் ஆக்கலாம்’ என்ற பரிந்துரையும் சொல்லப் பட்டுள்ளது. அப்படிச் செய்யப்பட்டால் சிறுபான்மை மதத்தினர் உட்பட அனைத்து மதத்தினருக்கும் பொதுவான சட்டமாக அது அமையும். ஆனால், இஸ்லாமியர்களின் ஷரியத் அடிப்படையிலான திருமணம் மற்றும் ஜீவனாம்சம் ஆகியவற்றை முற்றிலும் தடைசெய்யும் விவகாரமாகவே பொது சிவில் சட்டத்தை இஸ்லாமியர்கள் பார்க்கிறார்கள்.

கணவனால் விவாகரத்து செய்யப்பட்ட மனைவியும் குழந்தைகளும் ஜீவனாம்சம் பெறும் உரிமை, இஸ்லாமிய ஷரியத் சட்டத்தில் இல்லை. பொது சிவில் சட்டத்தில் ஜீவானம்சம் உண்டு. கிறிஸ்துவச் சமூகத்தில் மணவிலக்குக்கு பல சிக்கல்கள் உள்ளன. அதையும் இப்போது ஒரு சட்டமாக்கப்போகிறார்கள். சொத்துகளில் ஆண் - பெண் இருவருக்கும் சம உரிமை, தத்தெடுப்பதில் சட்ட உரிமை ஆகியவை கொண்டுவரப்படுகின்றன. “முஸ்லிம் பெண்களின் பாதுகாப்பே இந்தச் சட்டம். ஒரே நாட்டில் ஒருவர் இரண்டு திருமணம் செய்துகொண்டால் குற்றம்; இன்னொருவர் செய்துகொண்டால் குற்றமில்லை என்கிற முரண்பாட்டை எப்படி ஏற்றுக்கொள்ள முடியும்?’’ என்று கேள்வி எழுப்புகிறார்கள் இந்தச் சட்டத்துக்கு ஆதரவானவர்கள்.

. முத்தலாக் சட்டத்துக்கும் பொது சிவில் சட்டத்துக்கும் அடிப்படையே ஷாபானு வழக்குதான். 1985-ம் ஆண்டு உச்ச நீதிமன்றம், ‘ஷாபானுவுக்கு மாதம்தோறும் 179 ரூபாய் ஜீவனாம்சம் வழங்க வேண்டும்’ என உத்தரவிட்டது. முஸ்லிம் சட்ட வாரியம் மற்றும் இஸ்லாமிய அமைப்புகள், அன்றைய பிரதமர் ராஜீவ் காந்தியைச் சந்தித்து முறையிட்டன. ‘இஸ்லாமியர்களின் அடிப்படை உரிமையில் நீதிமன்றம் தலையிட்டது தவறு’ என்று வாதிட்டன. அதன் தொடர்ச்சியாக, ‘முஸ்லிம் பெண்கள் திருமணச் சட்டம் - 1986’ என்ற சட்டத்திருத்தம் கொண்டுவரப்பட்டது.

அதேபோல் ஜிதேந்திர மாதுர் என்பவர், முதல் மனைவி இருக்கும்போது இரண்டாவதாக ஒரு பெண்ணைத் திருமணம் செய்துகொள்ள இஸ்லாமிய மதத்துக்கு மாறினார். இதுகுறித்த வழக்கு உச்ச நீதிமன்றத்துக்கு வந்தபோது, ‘திருமணத்துக்காக மதம் மாறியது செல்லாது’ என அறிவித்தனர். இந்தத் தீர்ப்பை முஸ்லிம் சட்டவாரியமும் ஆதரித்தது. அப்போது உச்ச நீதிமன்றம், `இந்திய அரசு ஏன் பொது சிவில் சட்டத்தை அமல்படுத்த தயக்கம் காட்டுகிறது?’ என்று கேள்வி எழுப்பியது. 2010-ம் ஆண்டிலும் பொது சிவில் சட்டத்தைக் கொண்டுவர வேண்டும் என்ற நிர்பந்தத்தை மத்திய அரசுக்கு உச்ச நீதிமன்றம் கொடுத்தது.

. முஸ்லிம் தனிநபர் சட்டம் போன்றே, இந்து சட்ட மசோதாவை 1951-ம் ஆண்டு கொண்டுவரும் முயற்சி நடந்தது. அன்றைய பிரதமர் நேரு, சட்ட அமைச்சராக இருந்த அம்பேத்கரிடம் இதைக் கேட்டுக்கொண்டார். இதன்மூலம் பல்வேறு இந்து சமூகங்களையும் ஒரே குடையின்கீழ் கொண்டுவந்துவிட முடியும் எனக் கருதப்பட்டது. இந்துக்கள் பெரும்பான்மை என்பதால், முதலில் அவர்களுக்கு இதைக் கொண்டுவந்து விட்டால், படிப்படியாக மற்றச் சமூகங் களுக்கும் கொண்டுவருவது எளிது எனத் திட்டமிடப்பட்டது. அம்பேத்கரின் வரைவு மசோதாவுக்கு, பெரும்பாலான இந்து சமூகத்தினரிடம் இருந்து கடும் எதிர்ப்பு கிளம்பியது. ராஜேந்திர பிரசாத் உள்ளிட்டோர் இதற்கு எதிர்ப்பு தெரிவித்தனர். திட்டம் கைவிடப்பட்டது. அப்போது தொடங்கிய பொது சிவில் சட்டக் கோரிக்கை, இப்போது உச்சத்துக்கு வந்து நிற்கிறது.

மத்திய சட்டத்துறை, இதற்கான வேலைகளை கடந்த மூன்று வாரங்களாகத் தீவிரப்படுத்தி யுள்ளது. முத்தலாக் ஏற்கெனவே நிறைவேற்றப் பட்டாலும், பொது சிவில் சட்டம் கொண்டுவந்தால் மட்டுமே முத்தலாக் சட்டத்தின் நடைமுறைகளை முழுமையாகச் செயல்படுத்த முடியும் என்று ஆர்.எஸ்.எஸ் தரப்பிலிருந்து சொல்லப்பட்டுள்ளது. `இதற்கு முஸ்லிம்கள் தரப்பில் எதிர்ப்பு தெரிவித்தால், காஷ்மீர் பிரச்னைபோல் நீதிமன்றத்தை நாடி வழக்கு தொடரட்டும். நாம் பார்த்துக் கொள்ளலாம்’ என்றும் ஆர்.எஸ்.எஸ் தரப்பு, பா.ஜ.க-வுக்கு அறிவுறுத்தியுள்ளது.

. சமூகச் செயற்பாட்டாளர் அ.மார்க்ஸ், ‘`முஸ்லிம் சட்டத்தில் மட்டும்தான் பெண்களுக்கு அநீதி இழைக்கப்பட்டுள்ளது என்ற தோற்றத்தை உருவாக்குகின்றனர். இன்றும்கூட இந்து மதக் கணவன் ஒருவன், `தன் மனைவி தன் பெற்றோருடன் இருக்க மறுக்கிறாள்’ என்று சொல்லி அவளை விவாகரத்து செய்ய கோர முடியும். கூட்டுக்குடும்பம் என்ற பெயரில் மொத்த மக்கள்தொகையில் கிட்டத்தட்ட 80 சதவிகிதம் உள்ள இந்துக்கள் வரிச்சலுகை பெறுவதால், ஆண்டுக்கு பல லட்சம் கோடி வரி இழப்பு ஏற்படுகிறது. இந்து தனிநபர் சட்டம் திருத்தப்பட்ட பிறகும், பல தார மணம் இந்து சமூகத்தில் அதிகமாகவே இருக்கிறது. முஸ்லிம் சமூகத்தின் தலாக் மற்றும் ஜீவானம்சத்தில் குளறுபடி இருப்பதாகச் சொல்லப் பட்டாலும், இன்று நீதிமன்றங்கள் இதற்கு சரியான பதிலடிகளைக் கொடுத்து வருகின்றன. எனவே, பொது சிவில் சட்டம் எதற்குத் தேவை என்பதைவிட, யாருக்காக இப்போது கொண்டு வரப்படுகிறது என்பதைப் பார்க்க வேண்டும்’’ என்றார்.

. சட்டமன்ற உறுப்பினர் தமிமுன் அன்சாரி, ‘‘எல்லா மதங்களும் ஒன்றல்ல... ஒவ்வொரு மதத்துக்கும் ஒவ்வொரு வழிபாட்டுமுறையும் சட்ட விதிமுறை களும் உள்ளன. மணிப்பூர் இந்து திருமண முறையும் தமிழ்நாடு இந்து திருமண முறையும் ஒன்றல்ல. கோவா கிறிஸ்துவர் களின் நடைமுறையும் கேரள கிறிஸ்துவர் களின் நடைமுறையும் ஒன்றல்ல. இவற்றை ஒன்றாக்குவது தேன்கூட்டில் கை வைப்பது போன்றது. இது நாட்டுக்கே பேராபத்தாக அமையும்’’ என்றார்.

பா.ஜ.க மாநிலச் செயலாளர் கே.டி.ராகவனோ, ‘‘அரசியலமைப்புச் சட்டத்தின் வழிகாட்டு நெறிமுறைகளில், இந்தப் பொது சிவில் சட்டம் பற்றி தெளிவாகச் சொல்லப் பட்டுள்ளது. எங்களது தேர்தல் அறிக்கையிலும் சொல்லியுள்ளோம். மதச்சார்பற்ற நாட்டில் மதத்தின் அடிப்படையில் எப்படி சட்டம் இருக்க முடியும்? ‘இந்துக்களின் சட்டமே பொது சிவில் சட்டமாக்கப்படுகிறது’ என்று சொல்கி றார்கள். அது தவறு. அனைத்து மதச் சட்டங் களிலும் உள்ள நல்ல விஷயங்களை உள்ளடக்கியே இந்தச் சட்டம் உருவாக்கப்படுகிறது’’ என்றார்.

- லியானா

ஒரே நாடு... ஒரே சட்டம்! - வரும் கூட்டத்தொடரில் நிறைவேற்றத் துடிக்கும் பா.ஜ.க

ஜூனியர் விகடன் டீம்