`உடனே அறிவித்தால் கூட்டம் எப்படி வரும்?' - ப.சிதம்பரம் கைது போராட்டம் குறித்து விஜயதரணி

ப.சிதம்பரம் கைதுக்கு எதிரான போராட்டத்தில் காங்கிரஸாரைக் காண முடியவில்லை என்ற குற்றச்சாட்டு எழுந்துள்ளது. அதுமட்டுமன்றி, சிதம்பரம் கைது விவகாரத்தை தி.மு.க-வினர் பெரியதாக அலட்டிக்கொள்ளவில்லை என்கிறார்கள். பெயரளவுக்கு டி.கே.எஸ்.இளங்கோவனை வைத்துக் கண்டன அறிக்கை வெளியிட்டுள்ளனர். `ப.சிதம்பரம் சட்டவல்லுநர், வழக்கை எப்படி எதிர்கொள்வதென்று அவருக்குத் தெரியும்’ என்று ஸ்டாலின் பேசியுள்ளார்.

இதுதொடர்பாக தி.மு.க தரப்பில் விசாரித்தபோது, ``மத்தியில் காங்கிரஸ் ஆட்சியிலிருக்கும்போதுதான், 2ஜி விவகாரத்தில் வழக்கு பதிவு செய்யப்பட்டது. இந்த விவகாரம் தீவிரமடையும்போது, `மத்திய தகவல் தொழில்நுட்பத்துறை அமைச்சராக இருந்த ஆ.ராசா ராஜினாமா செய்ய வேண்டும்’ என்று குடியரசுத் தலைவர் பிரணாப் முகர்ஜி மூலம் கருணாநிதிக்கு அழுத்தம் கொடுத்தவர் சிதம்பரம்.

2ஜியை மையமாக வைத்து தி.மு.க-வை பலவீனப்படுத்தியவர் சிதம்பரம். 2012-ம் ஆண்டு சென்னை காமராஜர் அரங்கில் நடந்த புத்தக வெளியீட்டு விழாவில், கருணாநிதி, ரஜினி, கமல், வைரமுத்து உள்ளிட்டோர் கலந்துகொண்டனர். இந்த விழாவில் பேசிய கமல், `வேட்டி கட்டிய தலைவர் ஒருவர் பிரதமராக வர வேண்டும்’ என்று பேசினார். அப்போது கருணாநிதியும் இதை ஆமோதித்துப் பேசினார்.

அந்தவகையில், ப.சிதம்பரத்துக்காக குரல் கொடுத்தது தி.மு.க தான். ஒருவேளை 2014-ல் மக்களவைத் தேர்தல் ரேஸில் பிரதமர் பட்டியலில் சிதம்பரத்தின் பெயரும் இடம்பெற்றிருந்தது. ஆனால், சிதம்பரமோ, தமிழகத்தில் தி.மு.க-வை பலவீனப்படுத்தி காங்கிரஸை முன்னிலைப்படுத்தப் பார்த்தார்’ என்கிறார்கள் தி.மு.க நிர்வாகிகள்.

ஆனால், இந்த விவகாரம் தொடர்பாகப் பேசும் காங்கிரஸ் நிர்வாகிகள், `தனது ஆதரவாளர்களுக்குக்கூட பெரிதாக எதுவும் செய்யாதவர் ப.சிதம்பரம். மத்தியில் இருக்கும்போது, தமிழகத்தின் நலன்கள் மீது பாராமுகமாகவே இருந்தார். தமிழக காங்கிரஸூக்கும் அவர் எதுவும் செய்யவில்லை” என்கின்றனர்.