Published:Updated:

குற்றப் பின்னணி கொண்டவருக்கு அடைக்கலம் தருகிறதா பா.ஜ.க?

எல்ஃபின் ராஜா
பிரீமியம் ஸ்டோரி
News
எல்ஃபின் ராஜா

திருச்சியில் களைகட்டும் எல்ஃபின் ராஜா சர்ச்சை

சமீபத்தில் திருச்சியைச் சேர்ந்த `அறம் மக்கள் நலச்சங்க’த்தின் தலைவர் ராஜா பா.ஜ.க-வில் இணைந்தார். அடுத்த சில நாள்களிலேயே ராஜா, அவரின் தம்பி ரமேஷ் மற்றும் ஆதரவாளர்கள் ஒன்பது பேர்மீது திருச்சி கண்டோன்மென்ட் காவல் நிலையத்தில் வழக்கு பதிவு செய்யப்பட்டது.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

இதையடுத்து, குற்றப் பின்னணி கொண்டவர்கள் தங்களைத் தற்காத்துக்கொள்ள பா.ஜ.க-வில் இணைவதாகச் சர்ச்சை எழுந்துள்ளது.

இது குறித்து புதுக்கோட்டையைச் சேர்ந்த சத்தியமூர்த்தி என்பவர் நம்மிடம் பேசினார். “ராஜாவும், அவரின் தம்பி ரமேஷும் `எல்ஃபின்’ என்ற நிறுவனத்தை நடத்துகின்றனர். இந்த நிறுவனம் மளிகைப் பொருள்கள் தொடங்கி ரியல் எஸ்டேட் வரை பல தொழில்களில் ஈடுபட்டது. பிறகு, ‘அறம் மக்கள் நலச்சங்கம்’ என்று ஆரம்பித்தனர். அதன் பிறகே அவர்கள்மீது முறைகேடு புகார்கள் கிளம்பின.

சத்தியமூர்த்தி - ராஜ்குமார் - திருவேங்கடம் யாதவ் - ரமேஷ்
சத்தியமூர்த்தி - ராஜ்குமார் - திருவேங்கடம் யாதவ் - ரமேஷ்

புதுக்கோட்டையைச் சேர்ந்த என் நண்பர் ராஜ்குமாரிடம் 45 லட்சம் ரூபாயை ஏமாற்றப் பார்த்தார்கள். காவல் நிலையத்தில் புகார் கொடுத்தோம். புகாரின் அடிப்படையில், திருச்சி கண்டோன்மென்ட் காவல் நிலையத்தில் ராஜா, அவரின் தம்பி ரமேஷ் உட்பட ஒன்பது பேர்மீது வழக்கு பதிவு செய்துள்ளனர். பிறகு பணத்தை செட்டில் செய்துவிட்டார்கள். ரமேஷ் விடுதலைச் சிறுத்தைகள் கட்சியில் இருக்கிறார். அதை வைத்துக்கொண்டு பல பஞ்சாயத்துகளில் ஈடுபடுகிறார். அவரின் அண்ணன் ராஜா, குற்றப் பின்னணியிலிருந்து தற்காத்துக்கொள்ள தற்போது பா.ஜ.க-வில் தஞ்சம் அடைந்துள்ளார்” என்றார்.

பா.ஜ.க-வின் ஸ்ரீரங்கம் நகர முன்னாள் பொருளாளர் திருவேங்கடம் யாதவ், “எல்ஃபின் நிறுவனத்தில், `5,000 ரூபாய்க்கு மளிகைப் பொருள்கள் வாங்கினால், தினமும் 40 ரூபாய் வீதம் 100 நாள்களுக்கு வங்கிக் கணக்கில் போடப்படும்’ என்றார்கள். அதில் சேர்ந்தேன். சரியாகப் பணம் தந்தார்கள். அதனால், அவர்களின் அடுத்த திட்டமான ரியல் எஸ்டேட் தொழிலில் 4.5 லட்சம் ரூபாய் முதலீடு செய்தேன். அதற்கு எந்த ஆவணமும் தரவில்லை. பல மாதங்களாகியும் லாபம் தரவில்லை. பணத்தைத் திருப்பிக் கேட்டால், ‘பணமே வாங்கவில்லை’ என்கிறார்கள். இது குறித்து காவல்துறையில் புகார் கொடுத்தும் நடவடிக்கை இல்லை’’ என்றார்.

எல்ஃபின் ராஜா
எல்ஃபின் ராஜா

ராஜாவின் தம்பி ரமேஷிடம் இது குறித்து விளக்கம் கேட்டோம். “எங்கள்மீது கூறப்படும் புகார்கள் அனைத்தும் பொய்யானவை. ராஜ்குமார் என்பவர் 30 லட்சம் ரூபாய் கட்டிவிட்டு 45 லட்சம் ரூபாய் கட்டியதாகப் பொய் சொல்கிறார். மெச்யூரிட்டி டைம் முடிவதற்குள் ரெளடி கும்பலை வைத்து மிரட்டி, பணம் கேட்கிறார். அந்தப் பிரச்னையைச் சரிசெய்து விட்டோம். எங்களிடமிருந்து பணம் பிடுங்குவதற்காகப் பலர் எங்களை மிரட்டுகின்றனர்” என்றார்.

பா.ஜ.க மாநிலப் பொதுச்செயலாளர் கே.எஸ்.நரேந்திரனிடம் பேசினோம். “நீங்கள் சொல்லும் தகவல்களை விசாரிக்கிறோம். குற்றப் பின்னணி கொண்டவர்களுக்கு பா.ஜ.க ஒருபோதும் துணை போகாது” என்றார்.