Published:Updated:

கூட்டணிக்கே குண்டுவைத்த ரங்கசாமி... சுயேச்சைக்கு ஆதரவளித்த நாராயணசாமி...

ரங்கசாமி
பிரீமியம் ஸ்டோரி
ரங்கசாமி

புதுச்சேரியில் புது டிசைன் அரசியல்!

கூட்டணிக்கே குண்டுவைத்த ரங்கசாமி... சுயேச்சைக்கு ஆதரவளித்த நாராயணசாமி...

புதுச்சேரியில் புது டிசைன் அரசியல்!

Published:Updated:
ரங்கசாமி
பிரீமியம் ஸ்டோரி
ரங்கசாமி

பா.ஜ.க கூட்டணியிலிருக்கும் என்.ஆர்.காங்கிரஸ், கூட்டணிக் கட்சிகளான பா.ஜ.க மற்றும் அ.தி.மு.க-வுக்கு எதிராகவே தனது நிர்வாகிகளை சுயேச்சையாகக் களமிறக்கி, அதிரவைத்துள்ளது. எதிர்முனையிலோ, ‘எங்களுக்கு 15 தொகுதிகள் வேண்டும்’ என்று தி.மு.க-விடம் கறார் காட்டிய காங்கிரஸ், இப்போது வேட்பாளர் பற்றாக்குறையால் ஏனாம் தொகுதியில் சுயேச்சை வேட்பாளருக்கு ஆதரவளிக்கும் பரிதாப நிலைக்குத் தள்ளப்பட்டிருக்கிறது!

பா.ஜ.க-வின் தேசிய ஜனநாயகக் கூட்டணியில் என்.ஆர்.காங்கிரஸ் 16 தொகுதிகளிலும், பா.ஜ.க ஒன்பது தொகுதிகளிலும், அ.தி.மு.க ஐந்து தொகுதிகளிலும் போட்டியிடுகின்றன. மதச்சார்பற்ற கூட்டணியில் காங்கிரஸ் 15 தொகுதிகளிலும், தி.மு.க 13 தொகுதிகளிலும், வி.சி.க மற்றும் இந்திய கம்யூனிஸ்ட் தலா ஒரு தொகுதியிலும் போட்டியிடுகின்றன. கூட்டணிக்காகக் கடைசிவரை காத்திருந்த பா.ம.க., 10 தொகுதிகளில் வேட்பாளர்களை சுயேச்சையாகக் களமிறக்கிய நிலையில், திடீரென்று மார்ச் 22-ம் தேதி 10 பேரையும் வாபஸ் வாங்கவைத்ததுடன், பா.ஜ.க-வுக்கும் ஆதரவு தெரிவித்துள்ளது.

கூட்டணிக்கே குண்டுவைத்த ரங்கசாமி... சுயேச்சைக்கு ஆதரவளித்த நாராயணசாமி...

எந்தத் தொகுதியில், யார் போட்டியிடுகிறார்கள் என்பதை சம்பந்தப்பட்ட வேட்பாளர்களுக்குக்கூட தெரிவிக்காமல் ரகசியம் காத்த ரங்கசாமி, கட்சி நிர்வாகிகள் அனைவரும் சுயேட்சையாக மனுத் தாக்கல் செய்து, வேட்புமனு தாக்கலுக்கான இறுதிநாள் முடிந்த பிறகே தனது வேட்பாளர் பட்டியலை வெளியிட்டார். தவிர, மாற்றுக் கட்சிகளிலிருந்து விலகிவந்த தீப்பாய்ந்தான், வெங்கடேசன், பைரவசாமி ஆகியோருக்கு சீட் கொடுக்க முடியவில்லையே என்று கையைப் பிசைந்துகொண்டிருந்த பா.ஜ.க., ரங்கசாமியின் இந்த முடிவால் நொந்துபோனது.

இது போதாதென்று, பா.ஜ.க போட்டியிடும் மூன்று தொகுதிகளிலும், அ.தி.மு.க போட்டியிடும் இரண்டு தொகுதிகளிலும் தனது கட்சி நிர்வாகிகளை சுயேச்சைகளாகக் களமிறக்கி, கூட்டணிக்குள்ளேயே குண்டு வீசியிருக்கிறார் ரங்கசாமி. ‘இதென்ன புது டிசைனாக இருக்கிறதே?’ என்று உஷ்ணமான பா.ஜ.க தலைமை நிர்வாகிகள், இது குறித்து ரங்கசாமியிடமே கேட்க... அவரோ, ‘ஆன்மிகத்தின் அடிப்படையில் அவர்களை ஆசீர்வதித்தேன்’ என்று கூலாகச் சொல்லி குழப்பியிருக்கிறார்.

இதில் மேலும் டென்ஷனான பா.ஜ.க-வும் அ.தி.மு.க-வும், “சுயேச்சைகளாகக் களமிறங்கியிருப்பவர்கள் அனைவரும் உங்கள் கட்சியின் முன்னாள் அமைச்சர்கள், எம்.எல்.ஏ-க்கள், நிர்வாகிகள். அவர்கள் உங்கள் பெயரைத்தான் சொல்கிறார்கள். இப்படிச் செய்தால் வாக்குகள் சிதறி எதிரணிக்குச் சாதகமாகிவிடாதா.... இதுதான் கூட்டணி தர்மமா?” என்று கேட்க அதற்கும் மெளனத்தையே பதிலாக அளித்தாராம் ரங்கசாமி. இந்த விவகாரம் அமித் ஷாவின் கவனத்துக்கும் செல்ல... “எனக்கு ஒன்றும் புரியவில்லை, அமைதியாக இருங்கள்... பார்த்துக்கொள்ளலாம்” என்று கூறியிருக்கிறார். ரங்கசாமியின் மெளன வியூகத்தை விளக்கும் அவரின் ஆதரவாளர்கள், “தேர்தலுக்குப் பிறகு எங்கள் கூடாரத்தைக் கலைக்க பா.ஜ.க முயலும். அப்படி ஒரு நிலை வந்தால், இந்த சுயேச்சைகள் எங்களுக்குப் பக்கபலமாக இருப்பார்கள்” என்று கண் சிமிட்டுகிறார்கள்.

இங்கே இப்படியென்றால், மதச்சார்பற்ற கூட்டணியில் 15 தொகுதிகளைக் கேட்ட தி.மு.க-வுக்கு கறார் காட்டி 13 தொகுதிகளை ஒதுக்கிவிட்டு, 15 தொகுதிகளில் போட்டியிடுவதாக அறிவித்தது காங்கிரஸ். ஆனால், திரும்பிப் பார்த்தால் வேட்பாளர்களைக் காணோம். தேடித் தேடிப் பார்த்துவிட்டு, கடைசியில் கட்சி அலுவலகத்தில் மிக்ஸர் சாப்பிட்டுக்கொண்டிருந்தவர்களையும், என்.ஆர்.காங்கிரஸ் கட்சியிலிருந்து வந்த வைத்தியநாதன் உள்ளிட்டவர்களையும் வேட்பாளர்களாக அறிவித்தது காங்கிரஸ். அப்படியும் ஏனாம் தொகுதிக்கு வேட்பாளர் கிடைக்கவில்லை... வேறு வழியில்லாததால், அங்கு சுயேச்சை ஒருவருக்கு ஆதரவு அளிக்கும் நிலைக்குத் தள்ளப்பட்டிருக்கிறது காங்கிரஸ்.

ரங்கசாமியின் குடைச்சலைத் தாண்டியும் தேர்தல் பிரசாரம், பூத் கமிட்டிகள் அமைப்பது என காரைக்காலுக்கும் புதுச்சேரிக்கும் ஹெலிகாப்டரில் உற்சாகமாகப் பறந்துவருகிறார்கள் பா.ஜ.க நிர்வாகிகள். ஆனால், காங்கிரஸ் கட்சியின் வேட்பாளர்களையும், கொடியையும்தான் தேட வேண்டியிருக்கிறது. இது பற்றிக் கேட்டால், “கட்சி சார்பில் தேர்தலுக்கு நிதியும் கொடுக்கவில்லை. கடந்த ஐந்தாண்டுகளில் அமைச்சர் பதவிகளில் சம்பாதித்தவர்கள் அமைதியாக இருந்தால் நாங்கள் எப்படித் தேர்தலை சந்திப்பது? முதல்வரும் மௌனமாக இருக்கிறார். தேர்தல் அறிக்கை தயாரிப்பதற்கான வேலையைக்கூட இன்னும் தொடங்கவில்லை” என்று குமுறுகின்றனர் காங்கிரஸ் தொண்டர்கள்.

கூட்டணிக்கே குண்டுவைத்த ரங்கசாமி... சுயேச்சைக்கு ஆதரவளித்த நாராயணசாமி...

இதற்கிடையே ‘புதுவை மக்களின் குற்றப் பத்திரிகை’ என்ற பெயரில் பா.ஜ.க வெளியிட்டிருக்கும் கையேட்டில், ‘புதுச்சேரி முன்னாள் முதல்வர் நாராயணசாமி மற்றும் அவரின் மகன்மீது பல்வேறு ஊழல் குற்றச்சாட்டுகள் உள்ளன. ஆதிதிராவிட மக்கள் மேம்பாட்டுக்காக ஒதுக்கப்பட்ட நிதியில், முறைகேடாக உயர் மின் அழுத்த கோபுரங்கள் அமைக்கப்பட்டுள்ளன. மத்திய அரசு வழங்கிய 15,000 கோடி ரூபாய் மக்களுக்குச் சென்று சேரவில்லை’ என்று குறிப்பிடப்பட்டுள்ளது. இதற்கு பதிலடி கொடுத்த காங்கிரஸ் எம்.பி வைத்திலிங்கம், “கடந்த ஐந்தாண்டுகளில் புதுச்சேரியின் மொத்த பட்ஜெட்டைக் கூட்டினாலும் 15,000 கோடி ரூபாய் வராது. பா.ஜ.க-வின் குற்றச்சாட்டு உண்மையாக இருந்தால், முதலில் கிரண் பேடியைக் கைதுசெய்யுங்கள். தலைமைச் செயலாளர், நிதித்துறைச் செயலாளர் ஆகியோரை மாற்றிவிட்டு விசாரணை நடத்துங்கள்” என்று சொல்லியிருக்கிறார்.

புதுச்சேரி என்றாலே அரசியலிலும் புது டிசைன்தான்போல!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism