Published:Updated:

வாய் தவறி ஏதேனும் வார்த்தை வந்திருக்கலாம்! - ஒப்புக்கொள்கிறார் விஜிலா சத்யானந்த்

விஜிலா சத்யானந்த்
பிரீமியம் ஸ்டோரி
விஜிலா சத்யானந்த்

ஜெயலலிதாவின் தலைமைப் பண்பால் ஈர்க்கப்பட்டு அ.தி.மு.க-வுக்குள் வந்தவள் நான்.

வாய் தவறி ஏதேனும் வார்த்தை வந்திருக்கலாம்! - ஒப்புக்கொள்கிறார் விஜிலா சத்யானந்த்

ஜெயலலிதாவின் தலைமைப் பண்பால் ஈர்க்கப்பட்டு அ.தி.மு.க-வுக்குள் வந்தவள் நான்.

Published:Updated:
விஜிலா சத்யானந்த்
பிரீமியம் ஸ்டோரி
விஜிலா சத்யானந்த்

‘‘திராவிடக் கொள்கைகளில் உறுதியாக இருப்பவர்கள் செல்லவேண்டிய இடம் கமலாலயம் அல்ல; அறிவாலயம்’’ என்று அதிரிபுதிரியாக அறிவித்தபடி தி.மு.க-வில் இணைந்திருக்கிறார் அ.தி.மு.க முன்னாள் எம்.பி விஜிலா சத்யானந்த். வழக்கம்போல், பிரிந்து வந்துவிட்ட கட்சிமீது அடுக்கடுக்கான குற்றச்சாட்டுகளையும், வந்துசேர்ந்த இடத்தை வாழ்த்துவதுமாகச் செயல்பட்டுவரும் விஜிலா சத்யானந்திடம் பேசினோம்...

‘‘அ.தி.மு.க-வில் மேயர், எம்.பி., மகளிரணிச் செயலாளர் எனப் பல்வேறு பொறுப்புகளை அனுபவித்த நீங்கள், திடீரென தி.மு.க-வில் இணைந்தது துரோகம் இல்லையா?’’

‘‘ஜெயலலிதாவின் தலைமைப் பண்பால் ஈர்க்கப்பட்டு அ.தி.மு.க-வுக்குள் வந்தவள் நான். 2006-ல் அ.தி.மு.க எதிர்க்கட்சியாக இருந்தபோதும், தெருத் தெருவாகக் கட்சிக் கூட்டங்கள் நடத்தி, கடுமையாக உழைத்திருக்கிறேன். எனவே, 2011-ல் என்னை மேயர் வேட்பாளராக்கினார் ஜெயலலிதா. மேயர் பொறுப்பிலும் என் பணியைக் கண்டு பாராட்டிய ஜெயலலிதா, 2014-ல் ராஜ்ய சபா எம்.பி-யாக்கினார். 2016-ல் கட்சியின் மாநில மகளிரணிச் செயலாளராகவும் நியமித்தார். ஆனால், அவரின் மறைவுக்குப் பிறகு கட்சியில் மகளிருக்கான முக்கியத்துவம் குறைந்துவிட்டது.

ஜெயலலிதா காலகட்டத்தில், பொதுக்குழு, செயற்குழுவில் மகளிருக்குத்தான் முதல் வரிசை ஒதுக்கப்படும். ஆனால், இன்றைக்கு மகளிரணியைக் கடைசி வரிசைக்கு மாற்றிவிட்டார்கள். கட்சியில் அவர்களுக்கு உரிய அங்கீகாரமும் கொடுக்கப்படவில்லை. வெறுமனே கூட்டங்களுக்கு ஆட்களைத் திரட்டிவரும் பணிக்கு மட்டுமே மகளிரணியினரைப் பயன்படுத்தினார்கள். ஆக, ஜெயலலிதா இல்லாத அந்த வெற்றிடத்தை ஒவ்வொரு நொடியும் நாங்கள் உணர்ந்தோம். அந்த வேதனை எங்கள் மனதை வருத்தியெடுத்தது. இந்த நேரத்தில், புதிதாகப் பதவியேற்ற தி.மு.க அரசின் செயல்பாடுகள் பெண்களுக்கு அளித்துவரும் முக்கியத்துவம் என்னை ஈர்த்தது. எனவே தி.மு.க-வில் இணைந்துவிட்டேன்.’’

வாய் தவறி ஏதேனும் வார்த்தை வந்திருக்கலாம்! - ஒப்புக்கொள்கிறார் விஜிலா சத்யானந்த்

‘‘மூன்று மாதங்களுக்கு முன்பு, ‘பெண்களை இழிவாகப் பேசிவிட்டனர்’ என தி.மு.க-வை மிகக் கடுமையாகச் சாடிவிட்டு, இப்போது அதே தி.மு.க ‘பெண்களுக்கு முக்கியத்துவம் தருகிறது’ என்று சொல்வது சந்தர்ப்பவாதம் இல்லையா?’’

‘‘அப்படியில்லை... பொதுவாகத் தேர்தல் பிரசாரங்களின்போது, எதிரெதிர் கட்சியினர் எப்படி விமர்சித்துக்கொள்வார்கள் என்பதெல்லாம் உங்களுக்கே தெரியும். ஆனால், தேர்தல் முடிந்து ஆட்சிப் பொறுப்புக்கு வந்த பிறகு, தி.மு.க-வின் செயல்பாடு எப்படியிருக்கிறது என்பதைப் பார்த்தறிந்த பிறகுதான் நான் தி.மு.க-வில் என்னை இணைத்துக் கொண்டிருக்கிறேன். எனவே, இதில் சந்தர்ப்பவாதம் என்று ஏதுமில்லை.’’

‘‘2021 சட்டமன்றத் தேர்தலில், உங்களுக்கு சீட் கொடுக்கவில்லை என்பதால்தான் நீங்கள் கட்சியைவிட்டு வெளியேறிவிட்டதாகச் சொல்கிறார்களே?’’

‘‘நான் சீட் கேட்டிருந்தது உண்மைதான். ஆனால், சீட் கிடைக்கவில்லை என்பதற்காகக் கட்சியைவிட்டு வரவில்லை. அரசியலில் நாம் இருக்கும்போது, நாலு பேருக்கு நல்லது செய்ய வேண்டுமென்றால், ஏதாவது ஒரு சிறிய பதவியாவது நமக்கு வேண்டும். ‘தமிழ்நாடு சிறுபான்மையினர் நல ஆணைய’த்தில் ஓர் உறுப்பினர் பதவிகூட எனக்கு வழங்கப்படவில்லை. கொடுத்திருந்தால் சிறுபான்மையின மக்களுக்கு மிகப்பெரிய உதவியாக இருந்திருப்பேன்.’’

‘‘பதவி கிடைக்காததால், கட்சியைவிட்டு வெளியேறிவிட்டதாகச் சொல்வதே நியாயமானதுதானா?’’

‘‘அ.தி.மு.க-வில் எம்.பி-யாக நான் செய்த பணிகளை மதித்து எனக்கு மீண்டும் ராஜ்ய சபா எம்.பி பதவியைக் கொடுத்திருக்க வேண்டும். ஏற்கெனவே லோக்சபா தேர்தலில் நின்று தோற்றுப்போன கே.பி.முனுசாமிக்கு மறுபடியும் ராஜ்ய சபா எம்.பி பதவி கொடுக்கிறார்கள். அந்தப் பதவிக்காலம் இருக்கும்போதே, மறுபடியும் அவருக்குச் சட்டமன்றத் தேர்தலில் போட்டியிடவும் வாய்ப்பு கொடுக்கப்படுகிறது. ஏற்கெனவே இருக்கிற எம்.பி பதவியை ராஜினாமா செய்துவிட்டு அவரும் தேர்தலில் போட்டியிடுகிறார். ஒரே ஆளுக்கு இத்தனை பதவிகளைக் கொடுக்கிற அ.தி.மு.க., என் போன்று திறம்படப் பணியாற்றுபவர்களுக்கு ஒரு பதவியைக்கூடக் கொடுக்காமல் இருப்பது எந்தவகையில் நியாயம்?’’

வாய் தவறி ஏதேனும் வார்த்தை வந்திருக்கலாம்! - ஒப்புக்கொள்கிறார் விஜிலா சத்யானந்த்

‘‘அ.தி.மு.க-வில் மகளிரணியினருக்கு அங்கீகாரம் கொடுக்கப்படவில்லை என்று எப்படிச் சொல்கிறீர்கள்?’’

‘‘ஜெயலலிதா இருந்தவரையிலும் மகளிரணியினருக்கு ‘தலைமைச் செயற்குழு உறுப்பினர்’ என்ற அங்கீகாரத்தை அளித்துவந்தார். ஆனால், அவர் மறைந்த பிறகு மகளிரணியினருக்குக் கட்சிப் பொறுப்புகள் எதுவும் வழங்கப்படவில்லை. திருநெல்வேலி மாவட்ட மகளிரணிச் செயலாளராக யாரை நியமிக்க வேண்டும் என்பதைக்கூட என்னிடம் கலந்தாலோசிக்காமல் நியமனம் செய்கிறார்கள். அப்படியென்றால், அவரைவைத்துக்கொண்டு நான் எப்படி கட்சி வேலை செய்ய முடியும்? கட்சிக்காக உண்மையாக உழைக்கும் பெண்கள் வறுமையில் வாடுகின்றனர். குறைந்தபட்சம் அவர்களின் குடும்பத்தினரில் யாராவது ஒருவருக்கு சத்துணவுத் திட்டத்தில் அல்லது ரேஷன் கடைகளில் என ஏதாவது ஒரு வேலைவாய்ப்பு கிடைக்க ஏற்பாடு செய்ய வேண்டும். இப்படி, மகளிரணியினரின் எந்தக் கோரிக்கையுமே ஏற்றுக்கொள்ளப்படாதபோது, அந்த மகளிரை வைத்துக்கொண்டு நான் எப்படி கட்சி வேலை வாங்க முடியும்?’’

‘‘ `உண்மையான திராவிடன் செல்லவேண்டிய இடம் அறிவாலயம்தான்; கமலாலயம் அல்ல’ எனக் கூறுகிற நீங்களே கடந்த காலங்களில் தி.மு.க தலைமையைச் சாதி குறித்தெல்லாம் மிகக்கடுமையாக விமர்சித்திருக்கிறீர்களே?’’

‘‘சில சமயங்களில், வாய் தவறி ஏதேனும் வார்த்தை வந்திருக்கலாமே தவிர, சாதிரீதியாக நான் யாரையும் அவமதித்துப் பேசியதில்லை. என்னுடைய படிப்புச் சான்றிதழில்கூட ‘இந்தியன் - கிறிஸ்டியன்’ என்று மட்டும்தான் குறிப்பிட்டிருக்கிறேன். சாதிய உணர்வே என்னிடம் கிடையாது.’’