ஒற்றை தலைமைக்கு ரூட் போடும் எடப்பாடி! - கோட் சூட் அரசியல்... லீடர்ஷிப் பில்ட் அப்...

‘லண்டனை வென்ற சோழனே...’, ‘பக்கிங்ஹாம் படைவீரனே...’, ‘நியூயார்க் நாயகனே...’ - முதல்வர் எடப்பாடி பழனிசாமியை வரவேற்று இதுபோன்ற பேனர்களை விரைவில் நாம் எதிர்பார்க்கலாம். ஆளுமைமிக்க தலைவராகத் தன்னைக் காட்டிக்கொள்ள, பில்ட் அப் அரசியலைக் கையிலெடுத்துள்ளார் எடப்பாடி.

ஆகஸ்ட் 28-ம் தேதி, அரசு முறைப் பயணமாக வெளிநாடு புறப்பட்டுச் சென்றார் முதல்வர் எடப்பாடி பழனிசாமி. கிரீன்வேஸ் சாலையில் உள்ள அவரது இல்லத்திலிருந்து சென்னை விமானநிலையம் வரையிலும் தொண்டர்களின் அணிவகுப்பு, பட்டையைக் கிளப்பியது. கிட்டத்தட்ட இரண்டு மணி நேரம், போக்குவரத்து நெரிசலில் சென்னை ஸ்தம்பித்தது. இதற்கெல்லாம் உச்சமாக, விமானநிலையத்துக்கு வந்த எடப்பாடி பழனிசாமியின் காலில் கட்சி நிர்வாகிகள் தொப் தொப்பென விழுந்து தங்கள் விசுவாசத்தைக் காட்டினர்.

. இப்போதெல்லாம் எடப்பாடி செல்லும் பாதையெங்கும், பத்து அடிக்கு ஒரு காவலர் பாதுகாப்புக்கு நிறுத்தப்படுகிறார். கெடுபிடிகள் அதிகரிக்கப்பட்டுள்ளன. ``இவை எல்லாமே, தன்னை முன்னிலைப்படுத்துவதற்காக எடப்பாடி செய்யும் ‘பிராண்டிங்’ எனப்படும் ‘லீடர்ஷிப் பில்ட் அப்’ அரசியல்தான்’’ என்கின்றனர் கட்சியின் உள்விவரங்களை அறிந்தவர்கள்.

. இதுகுறித்து அ.தி.மு.க சீனியர்களிடம் பேசினோம். ‘‘எம்.ஜி.ஆர்., ஜெயலலிதா, கருணாநிதி போன்ற தலைவர்கள், ஆளுமை அரசியல் மூலம்தான் தங்களை ஒரு தலைவராக அடையாளப்படுத்திக்கொண்டனர். என்னதான் எடப்பாடி பழனிசாமி முதல்வராக இருந்தாலும், அவரை கட்சிக்குள்ளேயே தலைவராகப் பார்க்கும் மனப்பான்மை இன்னும் உருவாகவில்லை. மக்களும் அவரை முதல்வராக முழுமனதுடன் ஏற்றுக்கொள்ளவில்லை.

. இரண்டு மாதங்களுக்கு முன்னர், அரசியல் தலைவர்களை விளம்பரப்படுத்தும் பிராண்ட் ஆலோசனைக் குழு ஒன்று, முதல்வரின் நெருங்கிய உறவினரைச் சந்தித்தது. அவர்கள் கொடுத்த ஐடியாவின்படிதான், கட்சி நிர்வாகிகள் எடப்பாடியின் காலில் விழும் வைபவம் நடந்தது. அதில் முன்னாள் அமைச்சர்கள் எஸ்.பி.சண்முகநாதன் மற்றும் அப்துல் ரஹீம், அ.தி.மு.க அமைப்பு சாரா அணியின் கமலக்கண்ணன், மூத்த செய்தித் தொடர்பாளர் நிர்மலா பெரியசாமி என, பல சீனியர்களும் முதல்வரின் காலில் விழுந்தனர். இதன்மூலம் எடப்பாடியும் ஜெயலலிதாவைப் போன்ற தலைவர்தான் என வெளிக்காட்ட முயற்சி செய்கிறார். லண்டனில் கோட் சூட் அணிந்து எடப்பாடி வலம்வருவதும் இந்த டீம் கொடுத்த ஐடியாதான்’’ என்றவர்களிடம், ‘‘கோட் சூட் அணிவதில் அரசியல் லாபம் என்ன இருக்கிறது?’’ என்றோம்.

. ‘‘வேட்டி சட்டையிலேயே சுற்றிக்கொண்டிருந்த தி.மு.க தலைவர் மு.க.ஸ்டாலின், எதற்காக ‘நமக்கு நாமே’ சுற்றுப்பயணத்தில் கலர் கலராக உடை அணிந்தார்? இளைஞர்களுடன் தங்களை இணைத்துக்கொள்ளும் உத்திதான் அது. லண்டனில் கோட் சூட் அணிந்தபடி, எடப்பாடி வலம்வந்த காட்சிகள், இணையத்தில் பெரும்கவனத்தை ஈர்த்துள்ளன. இவை எல்லாமே ஒற்றைத் தலைமையின்கீழ் கட்சியை தன் கட்டுப்பாட்டுக்குள் கொண்டுவர பயன்படும் என எடப்பாடி கருதுகிறார்’’ என்றனர்.

. ஜெயலலிதாவின் மறைவுக்குப் பிறகு முதல்வராகப் பதவியேற்ற ஓ.பி.எஸ்., எளிமையான மனிதராகவே வலம்வந்தார். வெளியூர்களுக்கு காரில் பயணம் செய்யும்போது, சாலையோரம் உள்ள தோப்புகளில் தரையில் அமர்ந்து சாப்பிடும் பழக்கம் அவருக்கு இன்றும் உண்டு. எளிமைக்கு எடப்பாடியும் சளைத்தவரல்ல. தன்னை ஒரு விவசாயி என அடையாளப்படுத்திக் கொள்ளவே அவர் பெரிதும் விரும்புகிறார். எளிய மக்களுடன் அமர்ந்து பேசுவது, அவர்களின் குறைகளைக் கேட்பது என்று பயணித்த எடப்பாடியின் ரூட், இன்று மாறியுள்ளது.

. முதல்வருக்கு நெருக்கமான தென்மாவட்ட மூத்த அமைச்சர் ஒருவரிடம் பேசினோம். ‘‘உளவியல்ரீதியாக மற்றவர்களிடம் இருந்து மாறுபட்டு நின்றால்தான், தலைவனாகப் பரிணமிக்க முடியும். எளிய விவசாயி என்பது, மக்களைக் கவரவும், ஜெயலலிதா பாணி படாடோபம் என்பது அதிகாரம்மிக்க ஆளுமையாக வெளிக்காட்டவும் என இரட்டைக் குதிரைகளை வண்டியில் பூட்டியுள்ளார் எடப்பாடி. இதன் மூலம் கட்சியின் ஒற்றைத் தலைமைக்கு, தானே தகுதியானவன் என்பதை வெளிப்படுத்த முயற்சி செய்கிறார். அதற்கு, ‘பிராண்டிங்’ எனப்படும் ‘லீடர்ஷிப் பில்ட் அப்’ அரசியல் எடப்பாடிக்குத் தேவைப்படுகிறது. வெளிநாடு சுற்றுப்பயணத்தில் உள்ள எடப்பாடி இந்தியா திரும்புவதற்குள், அவர் கோட் சூட்டில் வலம்வரும் படங்களை தமிழகத்தில் வைரலாக்கி, அவரை ஆளுமைமிக்க தலைவராக முன்னிறுத்தும் முயற்சியும் நடைபெறுகிறது” என்றார்.

உண்மையில் கேரளத்தைப் பார்த்து முதல்வர் எடப்பாடி பழனிசாமி கற்றுக்கொள்வதற்கு ஏராளம் உள்ளன. அங்கு முதல்வர்கள் ஆட்டோ தொடங்கி பேருந்து, தொடர்வண்டி என்று பொது போக்குவரத்தில் மக்களோடு மக்களாகப் பயணிப்பது சகஜம். எடப்பாடி வெளிநாடு கிளம்பிய அன்று ஒருவேளை அவர் மெட்ரோ ரயிலில் பயணித்திருந்தால், போக்குவரத்து ஸ்தம்பித்திருக்காது. மக்களின் மனதிலும் ஒருவேளை இடம்பெற்றிருக்கலாம். முதல்வர் எடப்பாடி அவர்களே... அட்லீஸ்ட், நடிக்கவாவது செய்யுங்கள்!

ஒற்றை தலைமைக்கு ரூட் போடும் எடப்பாடி! - கோட் சூட் அரசியல்... லீடர்ஷிப் பில்ட் அப்...

ந.பொன்குமரகுருபரன்Follow