Published:Updated:

கொடுத்த வாக்கை நிறைவேற்றுவாரா ஸ்டாலின்? - அரசு மருத்துவர்களின் ஊதிய உயர்வு கோரிக்கை

அரசு மருத்துவர்களின் ஊதிய உயர்வு கோரிக்கை
பிரீமியம் ஸ்டோரி
அரசு மருத்துவர்களின் ஊதிய உயர்வு கோரிக்கை

ஒட்டுமொத்த அரசு மருத்துவர்களும் போராட்டத்தில் இறங்கியும்கூட, அவர்களின் கோரிக்கைகளை எடப்பாடி பழனிசாமி அரசு ஏற்கவில்லை.

கொடுத்த வாக்கை நிறைவேற்றுவாரா ஸ்டாலின்? - அரசு மருத்துவர்களின் ஊதிய உயர்வு கோரிக்கை

ஒட்டுமொத்த அரசு மருத்துவர்களும் போராட்டத்தில் இறங்கியும்கூட, அவர்களின் கோரிக்கைகளை எடப்பாடி பழனிசாமி அரசு ஏற்கவில்லை.

Published:Updated:
அரசு மருத்துவர்களின் ஊதிய உயர்வு கோரிக்கை
பிரீமியம் ஸ்டோரி
அரசு மருத்துவர்களின் ஊதிய உயர்வு கோரிக்கை

“அடுத்து தி.மு.க ஆட்சிதான் வரப்போகிறது. உங்கள் கோரிக்கைகள் நிச்சயம் நிறைவேற்றப்படும்”

- கடந்த ஆண்டு அக்டோபரில் ஊதிய உயர்வு உள்ளிட்ட நான்கு முக்கியமான கோரிக்கைகளுடன், சென்னை ராஜீவ் காந்தி பொது மருத்துவமனை முன்பு ‘சாகும்வரை உண்ணாவிரதம்’ இருந்தனர் அரசு மருத்துவர்கள். பல தலைவர்கள் அவர்களுக்கு ஆதரவைத் தெரிவித்தனர். அப்போதைய எதிர்க்கட்சித் தலைவர் ஸ்டாலின் 2020, அக்டோபர் 28-ம் தேதி அங்கு சென்று, மருத்துவர்களின் அருகில் சம்மணமிட்டுத் தரையில் அமர்ந்து இப்படி உறுதி கொடுத்தார்.

கொடுத்த வாக்கை நிறைவேற்றுவாரா ஸ்டாலின்? - அரசு மருத்துவர்களின் ஊதிய உயர்வு கோரிக்கை

ஒட்டுமொத்த அரசு மருத்துவர்களும் போராட்டத்தில் இறங்கியும்கூட, அவர்களின் கோரிக்கைகளை எடப்பாடி பழனிசாமி அரசு ஏற்கவில்லை. ‘உடனடியாகப் பணிக்குத் திரும்பாவிட்டால் புதிய மருத்துவர்கள் நியமிக்கப்படுவார்கள்’ என்று மிரட்டியதுடன், 118 மருத்துவர்களை அதிரடியாகப் பணியிடமாற்றம் செய்தது அ.தி.மு.க அரசு.

ஸ்டாலின் சொன்னதுபோலவே ஆட்சிக்கு வந்துவிட்டது தி.மு.க. கொரோனாவுக்கு எதிரான போரின் தளபதிகளான அரசு மருத்துவர்கள், தங்கள் கோரிக்கைகளை இன்னமும் மனதில் சுமந்து, முதல்வரின் பதிலுக்காகக் காத்திருக்கிறார்கள். அரசு மருத்துவர்களின் போராட்டத்தைத் தலைமை தாங்கி நடத்திய டாக்டர் லெட்சுமி நரசிம்மன் கடந்த ஆண்டு மாரடைப்பால் மரணமடைந்தார். அவரின் மனைவி அனுராதா சமீபத்தில் அமைச்சர் மா.சுப்பிரமணியனைச் சந்தித்திருக்கிறார். அனுராதாவிடம் பேசினோம்.

கொடுத்த வாக்கை நிறைவேற்றுவாரா ஸ்டாலின்? - அரசு மருத்துவர்களின் ஊதிய உயர்வு கோரிக்கை

“முந்தைய அ.தி.மு.க ஆட்சியில் ஒட்டுமொத்த அரசு மருத்துவர்களும் போராடியபோது, அரசின் அணுகுமுறை மிக மோசமாக இருந்தது. பழிவாங்கும் நடவடிக்கையாக 40 பெண் மருத்துவர்கள் உட்பட 118 மருத்துவர்களைப் பணியிட மாற்றம் செய்தார்கள். அந்தப் போராட்டத்தை முன்னின்று நடத்திய என் கணவர் லெட்சுமி நரசிம்மன், தன் பணியிட மாற்றத்தைக் குறித்துக்கூட கோரிக்கை வைக்காமல், குறைந்தபட்சம் பெண் மருத்துவர்களின் மாற்றத்தை ரத்துசெய்யக் கோரி ஆட்சியாளர்களை நாடினார். ஆனால் நடக்கவில்லை. கடுமையான மன உளைச்சலும் மன அழுத்தமும் ஏற்பட்டு அவர் மரணமடைந்தார். நீதிமன்றத் தலையீட்டுக்குப் பிறகுதான், பல மருத்துவர்கள் பழைய இடங்களுக்கு மாற்றப்பட்டனர்.

ஆட்சி மாற்றம் ஏற்பட்ட பிறகு, அரசு மருத்துவர்களின் கோரிக்கை தொடர்பாக முதல்வருக்கு மனு ஒன்றை அனுப்பினேன். அது மக்கள் நல்வாழ்வுத் துறைக்கு அனுப்பப்பட்டு, அமைச்சரின் உதவியாளர் என்னிடம் பேசினார். ‘அமைச்சர் மா.சுப்பிரமணியன் ஜூன் 7-ம் தேதி நாமக்கல் வருகிறார். அங்கு அவரைச் சந்தியுங்கள்’ என்றார். நாமக்கல் சென்று அமைச்சரிடம் மனு அளித்தேன். தி.மு.க ஆட்சியில் அரசு மருத்துவர்களின் கோரிக்கைகள் நிறைவேற்றப்படும் என்கிற நம்பிக்கையில் இருக்கிறோம்” என்றார்.

என்னென்ன கோரிக்கைகள் என்பது குறித்து அரசு மருத்துவர்களுக்கான சட்டக்குழுவின் தலைவர் டாக்டர் பெருமாள் பிள்ளையிடம் பேசினோம்.

“சுகாதாரத்துறையில் இந்தியாவிலேயே முன்னணி மாநிலமாகத் திகழ்ந்துவரும் தமிழ்நாட்டில், அரசு மருத்துவர்களுக்கு மற்ற மாநிலங்களைவிட குறைவாகவே ஊதியம் வழங்கப்படுகிறது. அரசு மருத்துவர்களுக்கு ஊதிய உயர்வை மறு ஆய்வு செய்வது தொடர்பாக, 2009-ம் ஆண்டு தி.மு.க ஆட்சியில் ஓர் அரசாணை வெளியிடப்பட்டது. அதன்படி 2017-ம் ஆண்டு நடைபெற வேண்டிய மறு ஆய்வு நடைபெறவில்லை. அதனால் ஊதிய உயர்வு கிடைக்கவில்லை. எனவேதான், 2018-ம் ஆண்டு முதல் போராட்டத்தில் இறங்கினோம்.

அனுராதா - பெருமாள்பிள்ளை
அனுராதா - பெருமாள்பிள்ளை

கடந்த ஒன்றரை ஆண்டுகளாக, கொரோனாவால் பாதிக்கப்பட்ட மக்களின் உயிரைக் காப்பாற்றுவதற்காக உயிரைப் பணயம்வைத்து அர்ப்பணிப்புடன் பணியாற்றிவருகிறோம். தொற்று ஏற்பட்டு, பணியிலிருந்த நான்கு அரசு மருத்துவர்கள் இதுவரை உயிரிழந்திருக்கிறார்கள். ‘கொரோனா நேரத்தில் பல சிரமங்களுடன் பணியாற்றும் அரசு மருத்துவர்களின் ஊதியத்தை இரண்டு மடங்காக உயர்த்துவதாக’ அரியானா அரசு அறிவித்துள்ளது. கர்நாடகாவில் போராட்டத்தைத் தொடங்குவதற்கு முன்னரே ஊதியக் கோரிக்கை நிறைவேறியது. தெலங்கானாவில் போராட்டம் தொடங்கிய 24 மணி நேரத்தில் ஊதிய உயர்வு வழங்கப்பட்டுவிட்டது. ஆனால், தமிழகத்தில் அரசு மருத்துவர்களைக் கண்டுகொள்ளவே இல்லை.

‘நீதிமன்ற குமாஸ்தாவின் ஊதியத்தைவிட அரசு மருத்துவர்களின் ஊதியம் குறைவாக இருக்கிறதே...’ என்று உயர் நீதிமன்றமே வேதனையுடன் குறிப்பிட்டது. அரசு மருத்துவர்களுக்கு உரிய ஊதியம் தரப்பட வேண்டும் என்று உயர் நீதிமன்றம் பல முறை வலியுறுத்தியும், மாநில அரசு கண்டுகொள்ளவில்லை. அப்போது போராட்டத்தில் எங்களைச் சந்தித்த மு.க.ஸ்டாலின், எங்கள் கோரிக்கைகளை நிறைவேற்றுவதாக உறுதியளித்தார். அது நிறைவேறும் என்ற நம்பிக்கை இருக்கிறது.

பணியிட மாற்றம் மற்றும் முதுகலைப் பட்டம் முடித்தவர்களுக்கு வழங்கப்படும் போஸ்ட்டிங் ஆகியவற்றுக்கு முந்தைய ஆட்சியில் வெளிப்படையான கவுன்சலிங் நடக்காத நிலையில், புதிய ஆட்சியில் அது வெளிப்படையாக நடக்க ஆரம்பித்திருக்கிறது. அது எங்களுக்குப் பெரும் நம்பிக்கையை அளிக்கிறது. 2009-ம் ஆண்டு தி.மு.க ஆட்சியில் வெளியிடப்பட்ட அரசாணை 354-ஐ நிறைவேற்ற வேண்டும் என்பது எங்கள் முக்கியமான கோரிக்கை. இது தொடர்பாக முதல்வரைச் சந்திப்பதற்கு முடிவுசெய்திருக்கிறோம்” என்றார்.

பி.பி.இ உடை அணிந்து, கொரோனா வார்டுக்குள் சென்று மருத்துவர்களுக்கு நம்பிக்கையூட்டினார் ஸ்டாலின். அதேபோல, தங்களின் கோரிக்கைகளையும் நிறைவேற்றுவார் என்ற நம்பிக்கையோடு களத்தில் கொரோனாவோடு போராடிக்கொண்டிருக்கிறார்கள் மருத்துவர்கள். நல்லது நடக்கட்டும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism