Published:Updated:

சென்னை; விதிகளை மீறி கட்டப்பட்ட கல்லறை: நடவடிக்கை எடுக்குமா மாநகராட்சி?

சர்ச்சைக்குறிய மூலக்கொத்தளம் கல்லறை
சர்ச்சைக்குறிய மூலக்கொத்தளம் கல்லறை

சென்னை ராயபுரம் அருகேயுள்ள மூலக்கொத்தளம் சுடுகாட்டில், மாநகராட்சி விதிகளை மீறி கல்லறை அமைக்கப்பட்டுள்ளதாகப் புகார்கள் எழுந்துள்ளன. உண்மை என்ன?

சென்னை மாநகராட்சிக்கு உட்பட்ட மூலக்கொத்தளம் பகுதியிலுள்ள சுடுகாட்டில், விதிகளை மீறி வீடுபோல் கல்லறை கட்டப்பட்டுள்ளதாகப் புகார் எழுந்துள்ள. அந்தப் பகுதி கொரோனா தொற்றால் உயிரிழந்தவர்களை அடக்கம் செய்வதற்காக ஒதுக்கப்பட்டது என்றும், அடக்கம் செய்யப்பட்டவர்களின் உறவினர்கள் அங்கே சமாதி அமைக்க விரும்பினால் 9,000 ரூபாயைக் கட்டணமாக வசூலித்துக்கொண்டு ஆறடி நீளம், மூன்றடி அகலத்தில் சமாதி அமைத்துக்கொள்ள மாநகராட்சி சார்பில் அனுமதி வழங்கப்பட்டுவருகிறது. இந்தநிலையில், மூலக்கொத்தளத்தைச் சேர்ந்த வசந்தா என்ற பெண்ணுக்கு அமைக்கப்பட்ட, விதிகளை மீறி பத்தடி நீளம், எட்டடி அகலத்தில், கல்லறை கட்டப்பட்டுள்ளது.

சர்ச்சைக்குரிய கல்லறை
சர்ச்சைக்குரிய கல்லறை

சமாதியை அமைத்தவர் அந்தப் பகுதியைச் சேர்ந்த தி.மு.க-வின் முக்கியப் பிரமுகர் ஒருவரின் துணையுடன்தான் அமைத்துள்ளார். மாநகராட்சி நிர்வாகிகள், ஆளுங்கட்சியினர் என்பதால் அதைக் கண்டுகொள்ளவில்லை என்றும், சுமார் 7 லட்சம் ரூபாய் வரை லஞ்சத்தைப் பெற்றுக்கொண்டும்தான் அனுமதி அளித்துள்ளார்கள் என்றும் அந்தப் பகுதி மக்கள் புகார் தெரிவிக்கின்றனர். இது குறித்து விசாரணையில் இறங்கினோம்...

`4 கோடி ரூபாயில் வீடு; தேர்தல் பணம்?!’ - ஹெச்.ராஜா மீது பாயும் காரைக்குடி நகர பா.ஜ.க தலைவர்!

இது குறித்து மாநகராட்சி அதிகாரி‌களிடம் விசாரித்தபோது “மூலக்கொத்தளம் சுடுகாட்டில், ஆறு அடி நீளம் மூன்றடி அகலத்தில் கல்லறை அமைக்கத்தான் மாநகராட்சி அனுமதித்துள்ளது. ஆனால், வீடுபோல் பெரிய அளவில் கல்லறை கட்டப்பட்டுள்ளது எனப் புகார்கள் வந்துள்ளன. மாநகராட்சியின் அனுமதியின்றி, விதி மீறி கல்லறை கட்டப்பட்டிருந்தால், கல்லறை இடிக்க நடவடிக்கை எடுக்கப்படும். மேலும், அது குறித்து விளக்கம் கேட்டு அந்தப் பகுதி பொறுப்பாளருக்கு நோட்டீஸும் அனுப்பப்பட்டுள்ளது. விதிகளை மீறி கல்லறையைக் கட்டியதாகக் காவல் நிலையத்திலும் புகார் அளிக்கப்பட்டுள்ளது. விசாரணை செய்து, தவறு செய்தவர்கள் மீது உரிய நடவடிக்கை எடுக்கப்படும். விதி மீறிக் கட்டப்பட்ட கல்லறையை மாற்றவும் நடவடிக்கை எடுக்கப்படும். அவர் எந்தக் கட்சியைச் சேர்ந்தவர் என்பதெல்லாம் எங்களுக்குத் தெரியாது. கல்லறை கட்டுவதற்கு மாநகராட்சி ஊழியர்கள் பணம் வாங்கினார்களா இல்லையா என்பது குறித்தெல்லாம் விசாரணைக்குப் பின்னர்தான் சொல்ல முடியும். தற்போதைக்கு முறைகேடாக எப்படிக் கல்லறை கட்டப்பட்டுள்ளது என்பது குறித்து முதற்கட்ட விசாரணை சென்றுகொண்டிருக்கிறது” என்றனர்.

சென்னை மாநகராட்சி
சென்னை மாநகராட்சி

கொரோனா நோய்த் தொற்றால் இறந்தவர்களின் உடல்களைப் புதைப்பதற்கு இடம் இல்லாத நிலையில், வீடுபோல் கல்லறையைக் கட்டியுள்ள சம்பவம், சென்னை ராயபுரம் பகுதியில் பெரும் பரபரப்பை ஏற்படுத்தியுள்ளது. மாநகராட்சி நடவடிக்கை எடுக்க வேண்டும் எனவும், கல்லறையை இடிக்க வேண்டும் எனவும் கோரிக்கைகள் எழுந்துள்ளன.

அடுத்த கட்டுரைக்கு