Published:Updated:

ஹெச்.ராஜாவிடம் பணிந்துபோனதா தமிழக பா.ஜ.க? - சீறும் சிவகங்கை மாவட்ட நிர்வாகிகள்....

ஹெச்.ராஜா
பிரீமியம் ஸ்டோரி
ஹெச்.ராஜா

வருமானத்துக்காகக் காய்கறிக் கடை நடத்திவரும் நான், தேர்தல் காலத்தில் இரண்டு மாதங்கள் கடையை அடைத்துவிட்டு இரவு பகலாகக் கட்சி வேலை செய்தேன்

ஹெச்.ராஜாவிடம் பணிந்துபோனதா தமிழக பா.ஜ.க? - சீறும் சிவகங்கை மாவட்ட நிர்வாகிகள்....

வருமானத்துக்காகக் காய்கறிக் கடை நடத்திவரும் நான், தேர்தல் காலத்தில் இரண்டு மாதங்கள் கடையை அடைத்துவிட்டு இரவு பகலாகக் கட்சி வேலை செய்தேன்

Published:Updated:
ஹெச்.ராஜா
பிரீமியம் ஸ்டோரி
ஹெச்.ராஜா

“காரைக்குடி தொகுதியில் தேர்தல் செலவுகளுக்காகக் கொடுக்கப்பட்ட பணத்தில் ஹெச்.ராஜா 4 கோடி ரூபாய் ஊழல் செய்துவிட்டார்” என்று சிவகங்கை மாவட்ட பா.ஜ.க நிர்வாகிகள் கூறிய குற்றச்சாட்டை விசாரித்த அந்தக் கட்சியின் தலைமை, புகார் கூறிய நிர்வாகிகளைக் கட்சியைவிட்டு நீக்கியிருப்பது தமிழக பா.ஜ.க-வில் சலசலப்பை ஏற்படுத்தியிருக்கிறது. இதையடுத்து, ஹெச்.ராஜாவிடம் தமிழக பா.ஜ.க பணிந்துபோனதா என்ற கேள்வி கமலாலய வட்டாரத்தில் எழுந்துள்ளது.

சில வாரங்களுக்கு முன்பு பா.ஜ.க நிர்வாகிகள் மற்றும் ஆதரவாளர்கள் கலந்துகொண்ட ட்விட்டர் ஸ்பேசஸ் நிகழ்வில் பேசிய நடிகர் எஸ்.வி.சேகர், “தேர்தல் செலவுகளுக்காக பா.ஜ.க வேட்பாளர்களுக்குக் கோடிக்கணக்கில் பணம் கொடுக்கப்பட்டிருக்கிறது. தேர்தல் முடிந்துவிட்ட நிலையில், அந்தப் பணத்துக்கான செலவுக் கணக்கை வேட்பாளர்கள் கொடுக்க வேண்டும் இல்லையா?” என்று கேள்வி எழுப்பியிருந்தார். இந்த உரையாடல் வெளியே கசிந்ததை அடுத்துதான் ஹெச்.ராஜா மீதான ஊழல் குற்றச்சாட்டை சிவகங்கை மாவட்ட பா.ஜ.க நிர்வாகிகள் சிலர் கொடுத்தனர். தொடர்ந்து ஹெச்.ராஜா மீது விசாரணை, புகார் கொடுத்தவர்கள் கட்சியிலிருந்து நீக்கம் என அடுத்தடுத்து அதிரடிகாட்டியிருக்கிறது தமிழக பா.ஜ.க.

ஹெச்.ராஜாவிடம் பணிந்துபோனதா தமிழக பா.ஜ.க? - சீறும் சிவகங்கை மாவட்ட நிர்வாகிகள்....

ஹெச்.ராஜா மீது புகார் கூறியவர்களில் ஒருவர், காரைக்குடி பெருநகர பா.ஜ.க முன்னாள் தலைவர் சந்திரன். அவரிடம், “ஹெச்.ராஜா மீது ஆதாரமற்ற புகாரைக் கூறினீர்களா?” என்று கேட்டதுதான் தாமதம்... மனிதர் பொங்கித் தீர்த்துவிட்டார்.

“தேர்தல் முடிந்ததுமே ‘எனக்கு 4 கோடி ரூபாய் நஷ்டமாகிவிட்டது’ என்று ஹெச்.ராஜாதான் சொன்னார். ஆனால், அப்படிச் சொன்ன பிறகுதான் காரைக்குடியில் அவரது பழைய வீட்டுக்கு முன்புறம் புதிதாக 10 சென்ட் இடம் வாங்கியிருக்கிறார். பழைய வீட்டையும் இடித்து, புதிதாகக் கட்டிவருகிறார். எருமைப்பட்டியிலும் புதிதாக இடம் வாங்கி, தோட்டம் அமைத்து அங்கும் ஒரு வீட்டைக் கட்டிக்கொண்டிருக்கிறார். ‘தேர்தல் செலவுகளால் நஷ்டமாகிவிட்டது’ என்று சொன்னவருக்கு இப்படிப் புதிது புதிதாக இடம் வாங்கவும், வீடு கட்டவும் எங்கிருந்து பணம் வந்தது?

வருமானத்துக்காகக் காய்கறிக் கடை நடத்திவரும் நான், தேர்தல் காலத்தில் இரண்டு மாதங்கள் கடையை அடைத்துவிட்டு இரவு பகலாகக் கட்சி வேலை செய்தேன். அவ்வளவு ஏன்? தேர்தல் முடிந்த பிறகும்கூட, ஹெச்.ராஜா பற்றி அவதூறாகக் கருத்து பதிவிட்டதற்காக லோக்கல் காங்கிரஸ் கட்சியினரோடு நாங்கள் சண்டையிட்டுக்கொண்டிருந்தோம். ஆனால், ஹெச்.ராஜாவோ கட்சியிலிருந்து கொடுக்கப்பட்ட பணத்தை, பெயரளவுக்கு மட்டும் செலவு செய்துவிட்டு, ‘கட்சி நிர்வாகிகள் சரிவர வேலை செய்யாததே என் தோல்விக்குக் காரணம்’ என்று எங்கள் மீதே பழியைப்போட்டார்.

இதனால்தான், கட்சித் தலைமைக்கு நாங்கள் புகார் அனுப்பினோம். ‘ஹெச்.ராஜா ஊழல் செய்துவிட்டார்’ என்று நாங்கள் கொடுத்த புகாரின் அடிப்படையில்தான் கட்சியும் விசாரணைக்குழு அமைத்தது. மாநில அமைப்புச் செயலாளர் கேசவ விநாயகம், பொருளாளர் எஸ்.ஆர்.சேகர் அடங்கிய இந்தக் குழுவினர் விசாரணை நடத்துவதற்கான மண்டப ஏற்பாடுகளைக்கூட நான்தான் செய்திருந்தேன். ஆனாலும் ‘நாங்கள் கூப்பிட்டால் உள்ளே வாங்க... அதுவரை வெளியே வெயிட் பண்ணுங்க...’ என்று சொல்லிவிட்டனர்.

பின்னர் மாவட்ட நிர்வாகிகள் ஒவ்வொருவரையும் வரவழைத்து விசாரித்தவர்கள், ஹெச்.ராஜாவிடமும் விசாரித்திருக்கிறார்கள். கடைசிவரை என்னை அழைத்து விசாரிக்கவே இல்லை. ஆனாலும் ‘விசாரணை முடிந்துவிட்டது’ என்று கூறி விசாரணைக்கு வந்த ஹெச்.ராஜாவின் காரிலேயே ஏறிக் கிளம்பிவிட்டது விசாரணைக் குழு. அப்போதே, ‘ஹெச்.ராஜா மீது எந்த நடவடிக்கையும் இருக்காது’ என்பது எனக்குத் தெரிந்துவிட்டது. எதிர்பார்த்ததுபோலவே, புகார் கூறிய நிர்வாகிகள் அனைவரையும் கட்சியின் அடிப்படை உறுப்பினர் பதவியிலிருந்தே நீக்கிவிட்டனர்.

‘ஹெச்.ராஜாவைப் பகைத்துக்கொள்ள வேண்டாம்’ என்று தமிழக பா.ஜ.க ஒருதலைப்பட்சமாக முடிவெடுத்து, அவரிடம் பணிந்துபோய்விட்டது. அதனால்தான் குற்றச்சாட்டு கூறிய எங்களை ஒரு வார்த்தைகூட விசாரிக்காமலேயே கட்சியைவிட்டு நீக்கிவிட்டனர். கட்சியில் இருக்கும்போதே, ஹெச்.ராஜாவும் அவரின் ஆதரவாளர்களும் எங்களை கார் ஏற்றிக் கொலை செய்துவிடுவதாக மிரட்டிக்கொண்டிருந்தனர். இப்போது கட்சியிலும் இல்லாத சூழலில், எங்கள் உயிரைப் பாதுகாப்பதற்காக காங்கிரஸ் கட்சியில் இணைந்துவிட்டோம்!’’ என்றார் சோகமாக.

இந்த விவகாரத்தை அடுத்து சிவகங்கை மாவட்ட பா.ஜ.க தலைவர் செல்வராஜும் ராஜினாமா முடிவை எடுத்துவிட்டதாக நமக்குத் தகவல் கிடைக்கவே... அவரிடமும் பேசினோம். “கட்சித் தலைமையிலிருந்து விசாரிக்க வந்த குழு, இரு தரப்பிலும் முழுமையாக விசாரணை நடத்தி, முடிவை அறிவித்திருந்தால் நன்றாக இருந்திருக்கும். ஆனால், அப்படி நடக்கவில்லை. அதனால், நானும் எனது ராஜினாமா முடிவை வாட்ஸ்அப் வழியாக கட்சித் தலைமைக்கு அனுப்பிவிட்டேன். ஆனாலும், அதிகாரபூர்வமாகக் கடிதம் எதுவும் கொடுக்கவில்லை. இப்போதும் மாவட்டத் தலைவர் பொறுப்பிலிருப்பதால், இதற்குமேல் என்னால் விரிவாகப் பேச இயலாது’’ என்று சுருக்கமாக முடித்துக்கொண்டார்.

ஊழல் குற்றச்சாட்டு மற்றும் கொலை மிரட்டல்கள் குறித்து ஹெச்.ராஜாவின் விளக்கத்தைப் பெறுவதற்காக அவரது அலைபேசி எண்ணில் தொடர்பு கொண்டோம். தொடர்ந்து நமது அழைப்பை அவர் ஏற்காததை அடுத்து, குறுஞ்செய்தி அனுப்பியிருக்கிறோம். அதற்கும் பதிலில்லை.

ஹெச்.ராஜாவும் கட்சித் தலைமையும் முழுமையாக விளக்கம் தராதவரை முணுமுணுப்புகள் ஓயாது!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism