விஐபி தொகுதி: ஆத்தூர்... பெரியசாமிக்குப் பிரச்னை இல்லை!

“எளிதில் அணுகக்கூடியவர், கோரிக்கைகளை ஓரளவு நிறைவேற்றக்கூடியவர்” என்று பெயரெடுத்திருக்கும் தி.மு.க துணைப் பொதுச்செயலாளரான ஐ.பெரியசாமிக்கு திண்டுக்கல் மாவட்டம், ஆத்தூர் தொகுதியில் நல்ல செல்வாக்கு இருக்கிறது. கடந்த மூன்று முறையாகத் தொடர்ந்து ஆத்தூர் தொகுதியில் வெற்றிபெற்றுவரும் ஐ.பெரியசாமி, தற்போது மீண்டும் தி.மு.க சார்பில் போட்டியிடுகிறார். எதிரணியான அ.தி.மு.க-வில் கூட்டணிக் கட்சியான பா.ம.க-வுக்கு சீட் கொடுக்கப்பட்டுள்ளது. மாநிலப் பொருளாளர் திலகபாமா களமிறக்கப்பட்டிருக்கிறார்.

‘‘தொகுதிக்குள் அதிக செல்வாக்குள்ள நபராக இருக்கும் ஐ.பெரியசாமிக்கு எதிராக, தங்கள் கட்சி வேட்பாளரைக் களமிறக்காமல் கூட்டணிக்குத் தொகுதியை ஒதுக்கியிருக்கிறது அ.தி.மு.க’’ என்ற விமர்சனம் வைக்கப்படுகிறது. அதேநேரத்தில், ‘‘தென் மாவட்டங்களில், பா.ம.க-வுக்கு ஒரு எம்.எல்.ஏ இருக்க வேண்டும் என்ற கனவை நான் நனவாக்குவேன்’’ என்று சூளுரைத்திருக்கிறார் வேட்பாளர் திலகபாமா. ஆனால், கூட்டணிக் கட்சியான அ.தி.மு.க நிர்வாகிகள், திலகபாமாவுக்குப் பெயரளவில்கூட ஒத்துழைப்பு வழங்காமல் போக்குக் காட்டுகிறார்களாம். ‘பா.ம.க மாவட்டச் செயலாளரே திண்டுக்கல் தொகுதியில் போட்டியிடும் திண்டுக்கல் சீனிவாசன் பின்னால் சுற்றிக்கொண்டிருக்கிறார்’ என்ற விமர்சனமும் வைக்கப்படுகிறது. இதைப் பற்றியெல்லாம் கவலைப்படாமல், தொடர்ந்து தேர்தல் பணிகளில் ஈடுபட்டுவருகிறார் திலகபாமா.

குடகனாறு பிரச்னை காரணமாக, ஆத்தூர் தொகுதியிலுள்ள செம்பட்டி, சீவல்சரகு, சித்தையன்கோட்டை உள்ளிட்ட 10-க்கும் மேற்பட்ட பகுதிகளில் ஐ.பெரியசாமிக்கு எதிரான அலை உள்ளது. இதைத் தனக்குச் சாதகமாகப் பயன்படுத்திக்கொள்ளும் திலகபாமா, ‘‘குடகனாறு பிரச்னை குறித்து நேரடியாக என்னோடு விவாதிக்கத் தயாரா?’’ என ஐ.பெரியசாமிக்குச் சவால் விடுத்துப் பிரசாரம் செய்கிறார். இதனால், அப்செட் ஆகியுள்ள ஐ.பெரியசாமி தரப்பினர், ‘‘திலகபாமா டெபாசிட்கூட வாங்கக் கூடாது” எனக் கட்சி நிர்வாகிகளிடம் உத்தரவிட்டிருக்கிறார்களாம். அதனால், தேர்தல் வேலைகளில் வேகம் காட்டிவருகிறார்கள் தி.மு.க நிர்வாகிகள்.

“காவிரி கூட்டுக்குடிநீர்த் திட்டத்தை ஆத்தூர் தொகுதிக்கு உட்பட்ட கிராமங்களுக்கு விரிவுபடுத்தும் பணியின் ஒரு பகுதியாக பைப் லைன் அமைக்க, தனது சொந்தப் பணத்தைச் செலவு செய்துவருகிறார் ஐ.பெரியசாமி. இது மக்கள் மத்தியில் ஐ.பெரியசாமிக்கு நல்ல பெயரை சம்பாதித்துக் கொடுத்திருக்கிறது. இதுபோல அவர் தொகுதிக்குச் செய்த நல்ல விஷயங்களை மக்களிடம் கொண்டுசென்றாலே போதும்” என்று நம்பிக்கையாகப் பேசுகிறார்கள் பெரியசாமி தரப்பினர்.

அ.ம.மு.க சார்பில் செல்வகுமார் களம் இறக்கப்பட்டுள்ளார். அ.தி.மு.க வாக்குவங்கியிலுள்ள முக்குலத்தோர் வாக்குகளை செல்வகுமார் பிரிக்கும்பட்சத்தில், அது திலகபாமாவுக்குப் பின்னடைவாக அமையும். அ.தி.மு.க நிர்வாகிகளின் ஒத்துழைப்பு இல்லாததும், திலகபாமாவுக்கு மைனஸாக உள்ளது. இதனால், ஐ.பெரியசாமிக்குச் சாதகமான சூழலே தொகுதியில் நிலவுகிறது!