Published:Updated:

அடங்காத கொரோனா 2-ம் அலை: பொதுத்தேர்வுகள் தள்ளிவைப்பு, ரத்து... எது சரி, ஏன்?

பத்தாம் வகுப்பு பொதுத்தேர்வு
பத்தாம் வகுப்பு பொதுத்தேர்வு

12-ஆம் வகுப்பு பொதுத்தேர்வு கட்டாயம் நடத்தப்படும் என தமிழக பள்ளிக்கல்வித்துறை அமைச்சர் கூறியுள்ளார். கொரோனா பெருந்தொற்றின் இரண்டாவது அலையின் தீவிரம் இன்னும் குறையாத சூழலில் தேர்வுகள் நடத்தப்பட வேண்டுமா அல்லது ரத்து செய்ய வேண்டுமா?

தமிழக முதல்வர் மு.க.ஸ்டாலின் தலைமையில் புதிதாகப் பொறுப்பேற்றுள்ள தமிழக அரசு, தேசிய கல்விக்கொள்கை தமிழகத்தில் நிறைவேற்றப்படாது; தமிழகத்துக்குத் தேவையான தடுப்பூசிகள் வெளிநாட்டிலிருந்து இறக்குமதி செய்யப்படும்; ஊரடங்கு காலத்தில் இரண்டு தவணையாக ரூபாய் 4,000 நிவாரண நிதி வழங்கப்படும்; பெண்களுக்குப் பேருந்துப் பயணம் இலவசம்; ஆக்ஸிஜன் தயாரிப்புக்கு முன்வரும் நிறுவனங்களுக்கு மானியம்... எனப் பல்வேறு அதிரடி நடவடிக்கைகளை மேற்கொண்டுவருகிறது. தமிழக முதல்வர் மட்டுமல்ல, அமைச்சர்களும் துறைசார்ந்த செயலாளர்களும் பல்வேறு நடவடிக்கைகளை எடுத்துவருகின்றனர். இந்த கொரோனா பெருந்தொற்றுக் காலத்தில் தடுப்பு நடவடிக்கையைப்போலவே, கல்வி சார்ந்தும் பல்வேறு அதிரடி நடவடிக்கைகளை கவனமாக எடுக்க வேண்டிய சூழலில் தமிழக அரசு இருக்கிறது. கடந்த ஓராண்டாக எந்த வகுப்பும் நடைபெறாமல் ஜீரோ கல்வியாண்டாகக் கழிந்த நிலையில் தற்போது 12-ம் வகுப்பு மாணவர்களுக்குப் பொதுத்தேர்வு நடத்துவது குறித்து விவாதங்கள் ஆங்காங்கே எழுந்தவண்ணம் இருக்கின்றன. `தேர்வு நடக்கும்’ என்றும், `இல்லை அதை ரத்து செய்ய வேண்டும்’ என்றும் குழப்பங்கள் ஆங்காங்கே எழுந்துகொண்டிருக்கின்றன.

அன்பில் மகேஷ்
அன்பில் மகேஷ்

பள்ளிக்கல்வித்துறை அமைச்சர் அன்பில் மகேஷ் பொய்யாமொழி ``தமிழகத்தில் 12-ம் வகுப்பு பொதுத்தேர்வைக் கட்டாயம் நடத்த வேண்டும் எனக் கல்வியாளர்கள் கருத்து தெரிவித்துள்ளனர். ஆகவே, கொரோனா பரவல் குறைந்த பிறகு 12-ம் வகுப்பு பொதுத்தேர்வு கட்டாயம் நடத்தப்படும். இது குறித்து முதல்வருடன் ஆலோசனை நடத்தி அறிவிப்பு வெளியிடப்படும்” என்றார்.

ப்ளஸ் டூ தேர்வு நடத்துவதில் பள்ளிக்கல்வித்துறை தீவிரம்... என்ன காரணம்?

கொரோனா தொற்று பரவலின் இரண்டாவது அலை தீவிரமாகிக்கொண்டிருக்கும் இந்தச் சூழலில் பொதுத்தேர்வுகள் குறித்த பேச்சுகள் அவசியம்தானா... தேர்வுகளைத் தள்ளிவைக்க வேண்டுமா அல்லது ரத்து செய்ய வேண்டுமா... அரசு செய்ய வேண்டிய நடவடிக்கைகள் குறித்து கல்வியாளர் பிரின்ஸ் கஜேந்திரபாபுவிடம் பேசினோம்...

``தேர்வு நடக்குமா, நடக்காதா, எல்லோரும் தேர்வில் தேர்ச்சி என்று அறிவிப்பார்களா என்ற குழப்பங்கள் ஏற்படாமல், அதைத் தவிர்க்கவும் முற்றுப்புள்ளி வைக்கவும்தான் கட்டாயம் 12-ம் வகுப்பு பொதுத்தேர்வு நடத்தப்படும் என அரசு அறிவித்திருக்கிறது. அரசு கண்டிப்பாகத் தேர்வு நடத்தும் என்பதைத்தான் நாம் தற்போது புரிந்துகொள்ள முடிகிறது. மேல்நிலைப் பள்ளிக்கல்வி என்பது கல்லூரிச் சேர்க்கைக்கான தகுதி. அதற்குத் தேர்வு நடத்தாமல் பொதுவாக அனைவரும் தேர்ச்சி பெற்றனர் என்று அறிவித்துவிட்டால் எதன் அடிப்படையில் மாணவர்கள் சேர்க்கை நடைபெறும். தமிழகம் தவிர இன்ன பகுதியில் இருக்கும் பல்கலைக்கழகங்களில் எதன் அடிப்படையில் இவர்களுக்கான வாய்ப்புகள் அமையும்... அகில இந்திய அளவில் நுழைவுத்தேர்வுகள் நடத்தப்படுமா... அப்படியென்றால், அது மாணவர்களுக்கு இன்னும் கூடுதல் சுமையாகத்தானே அமையும்? 11-ம் வகுப்பு முடித்திருக்கிறார்கள். ஒரு கல்வியாண்டே நடைபெறவில்லை. ஆனால், பாடநூல்களை வீட்டுக்கே கொடுத்தனுப்பி ஆன்லைன் மூலமோ, இடையில் ஒருசில வாரங்களோ வகுப்புகள் நடத்தப்பட்டுள்ளன. இப்படியிருக்கும்போது மாணவர்கள் எந்த அளவுக்குப் பாடத்தைப் படித்துப் புரிந்துகொண்டிருக்கிறார்கள் என்பது மிகப்பெரிய கேள்வி. எனவே, அந்தப் பாடங்களை எந்த அளவுக்குப் படித்துப் புரிந்து வைத்திருக்கிறார்கள் என்பதை அறிய தேர்வுக்கு முன் 15 நாள்கள் தொடர் வகுப்புகள் நடத்த வேண்டும். அந்த அடிப்படையில் இப்போதைக்குத் தேர்வு நடத்த முடியாது.

பிரின்ஸ் கஜேந்திரபாபு
பிரின்ஸ் கஜேந்திரபாபு

அனைவருக்கும் சமவாய்ப்பற்ற ஆன்லைன் வழியிலும் தேர்வுகள் நடத்த முடியாது. இன்னும் தமிழகத்தின் கடைக்கோடி கிராமங்கள் வரை தொலைத் தொடர்போ, இணைய இணைப்போ முறைப்படி கிடைப்பதில்லை. இணையவழியில் தேர்வு நடத்துவதும் சாத்தியமில்லை. நோய்த் தொற்று அபாயம் குறைந்திருக்கிறது, தேர்வு நடத்தலாம் என்று சுகாதாரத்துறை அறிவித்த பின்னர்தான் நேரடித் தேர்வுகளை அரசு நடத்த முடியும்” என விளக்கினார்.

மேலும், ``சுகாதாரத்துறை அறிவித்த பின்னர் தேர்வு நடத்த வேண்டுமென்றால், குறைந்தது ஒரு மாதத்துக்கு முன்பாவது தேர்வு அட்டவணையை அரசு வெளியிட வேண்டும். தேர்தல் நடத்துவதற்கு முன்பாக 15 நாள்கள் வகுப்புகள் சமூக இடைவெளியுடன் நடத்த வேண்டும். அதன் பிறகு தேர்வு எழுதவைப்பதுதான் மாணவர்களுக்கு மன அழுத்தத்தைக் குறைத்து, நல்ல சூழலில் தேர்வு எழுதும் வாய்ப்பை ஏற்படுத்தும். இதனால் கல்லூரியில் சேர்க்கை நடத்துவதோ, கல்லூரிக்கான கல்வி ஆண்டோ தள்ளிப்போகாதா என்ற கேள்வி எழுவது இயல்பு. ஒரு பேரிடர் காலத்தில், ஒரு வைரஸ் உருமாறி பல்வேறு அலைகளாகத் தொற்று மேலும் தொடரும் என்று மருத்துவர்கள் கூறிவரும் வேளையில் கல்வியா, உயிரா என்ற கேள்வி எழுகிறது இல்லையா? மாணவர், குடும்பம், சமூக உளவியல் எல்லாம் சேர்ந்தது. இது நிர்வாகரீதியிலான ஏற்பாடு இல்லை. கல்வியியல் சார்ந்தது. இரண்டு மூன்று கல்வியாண்டு நிச்சயமாகத் தள்ளிப்போகத்தான் செய்யும். அடுத்தடுத்த கல்வியாண்டுகளை இரண்டு அல்லது மூன்றாண்டுகளுக்குத் தள்ளி ஆரம்பிக்க வேண்டிய சூழல்தான் அடுத்த நான்கு ஆண்டுகளுக்கு ஏற்படத்தான் செய்யும். தொடர்ந்து மனித சமூகம் பல்வேறு சிக்கல்களை, பேரிடர்களைக் கடந்து பல்வேறு மாற்றங்களைச் சந்தித்துத்தான்வருகிறது.

மரத்தடி வகுப்புகள்
மரத்தடி வகுப்புகள்

தொழில்நுட்பம் வளரும்போது அதற்குரிய சவால்களும் அதிகரிக்கத்தான் செய்யும். அவற்றை எதிர்கொண்டுதான் மனித சமூகம் முன்னேறி வந்திருக்கிறது. இன்றைய காலத்தில் நமக்கு இருக்கும் சவாலாகத்தான் இந்தப் பெருந்தொற்றுக் காலத்தை எடுத்துக்கொள்ள வேண்டும். விஞ்ஞான மற்றும் தொழில்நுட்ப வளர்ச்சிகளின் துணைகொண்டு, இந்த நோய்த்தொற்றை எதிர்கொண்டு அதன் பின்னர்தான் தேர்வு நடத்த வேண்டும். ஊரடங்கு முடிந்த பின்னர்தான் கொரோனா எந்த அளவு குறைந்துள்ளது என்பது தெரியும். அதன் பிறகு ஒரு மாதம் கழித்துத்தான் தேர்வு குறித்து யோசிக்க வேண்டும்” என்றார்.

அடுத்த கட்டுரைக்கு