Published:Updated:

செய்தி - மக்கள் தொடர்புத்துறையில் இந்தி... `இரட்டை வேடம் போடுகிறதா திமுக?’ - அமைச்சரின் பதில் என்ன?

முதல்வர் ஸ்டாலின்

``ஒரு பக்கம் இந்தித் திணிப்பு என்று கூறி தமிழுக்குப் போராடுவதுபோல் நடிப்பது... மறுபக்கம் இந்தியில் திமுக தலைவரை விளம்பரப்படுத்துவது என இரட்டை வேடம் போடுகிறது திமுக.” - ஓ.பன்னீர்செல்வம்.

செய்தி - மக்கள் தொடர்புத்துறையில் இந்தி... `இரட்டை வேடம் போடுகிறதா திமுக?’ - அமைச்சரின் பதில் என்ன?

``ஒரு பக்கம் இந்தித் திணிப்பு என்று கூறி தமிழுக்குப் போராடுவதுபோல் நடிப்பது... மறுபக்கம் இந்தியில் திமுக தலைவரை விளம்பரப்படுத்துவது என இரட்டை வேடம் போடுகிறது திமுக.” - ஓ.பன்னீர்செல்வம்.

Published:Updated:
முதல்வர் ஸ்டாலின்

ஆண்டுதோறும் ஏப்ரல் 14-ம் தேதி அம்பேத்கரின் பிறந்தநாள் கொண்டாடப்பட்டுவருகிறது. அதையொட்டி, இந்த ஆண்டு முதல் அம்பேத்கர் பிறந்தநாள் ‘சமத்துவ நாள்’ என்று கொண்டாடப்படும் என சட்டப்பேரவையில் அறிவித்த முதல்வர் ஸ்டாலின், ஒவ்வொருவரும் அன்றைய தினம் உறுதிமொழி ஏற்றுக்கொள்ள வேண்டும் என்றும் குறிப்பிட்டார்.

சட்டமன்றத்தில் 110 விதியின் கீழ், இவ்வாறு அம்பேத்கர் குறித்து முதல்வர் பேசிய தகவல்கள் செய்தித்துறை மூலம் செய்தியறிக்கையாக மீடியாக்களுக்கு அனுப்பப்படும். தமிழக அரசின் அறிக்கைகள் தமிழில் மட்டுமே வெளிவரும், சில ஆங்கில வார்த்தைகளுக்கு மட்டும் அடைப்புக்குறிப்பில் ஆங்கிலத்தில் எழுதப்பட்டிருக்கும். இந்த நிலையில் அம்பேத்கர் குறித்த அறிக்கையை செய்தித்துறை இந்தியில் மொழிபெயர்த்து வெளியிட்டது என்ற ஒரு புகைப்படம் சமூக வலைதளங்களில் சுற்றிக்கொண்டிருக்கிறது. அதை ட்விட்டரில் எடுத்துப்போட்டு, `அது வேற... இது வேற’ என கமென்ட்டையும் அடித்திருக்கிறார் நடிகை கஸ்தூரி.

அம்பேத்கர்
அம்பேத்கர்

இது குறித்து அ.தி.மு.க ஒருங்கிணைப்பாளர் ஓ.பன்னீர்செல்வம் வெளியிட்டுள்ள அறிக்கையில், ``தமிழ் மொழியை வளர்ப்பது என்பது பிற மொழி பேசுபவர்களைத் தமிழ் கற்றுக்கொள்ள வழிவகை செய்வதும், பெரும் மாநிலங்களிலுள்ள மக்கள் தமிழ் மொழியைக் கற்றுக்கொள்ளத் தேவையான வசதிகளை ஏற்படுத்திக் கொடுப்பது போன்றவையாகும்.

ஆனால், தமிழக முதல்வர் தன்னை வளர்த்துக்கொள்ளும் பணியில், தன்னை ஈடுபடுத்திக்கொள்ளும் பணியில்... இந்தி மொழியை வளர்த்துவருகிறார் எனத் தகவல்கள் வருகின்றன. தமிழ்நாடு முதலமைச்சர் ஸ்டாலின் தேசிய தலைவராகப் பிரபலப்படுத்திக்கொள்ள வேண்டும் என்பதற்காக, குறிப்பாக வட மாநிலங்களில் அவர் புகழ் பெற வேண்டும் என்பதற்காக, தமிழ்நாடு சட்டப்பேரவையில் விதி 110-ன் கீழ் வெளியிடப்படும் அறிவிப்புகள் இந்தியில் மொழி பெயர்க்கப்பட்டு, செய்தி மக்கள் தொடர்புத்துறை சார்பில் வெளியிடப்படுகின்றன.

ஒட்டுமொத்த விகடனுக்கும் ஒரே ஷார்ட்கட்!

பன்னீர்செல்வம்
பன்னீர்செல்வம்

மேலும் தொல்லியல்துறை இணையதளத்தில் இந்தி மொழியில் அறிவிப்புகள் இருப்பதாகவும் பத்திரிகையில் செய்தி வந்துள்ளது. இந்தி மொழியில் வெளியிடப்பட்ட செய்திக்குறிப்பு ஒன்றும் பத்திரிகையில் பிரசுரமாகியுள்ளது. ஒரு பக்கம் இந்தித் திணிப்பு என்று கூறி தமிழுக்குப் போராடுவதுபோல் நடிப்பது... மறுபக்கம் இந்தியில் தி.மு.க தலைவரை விளம்பரப்படுத்துவது என இரட்டை வேடம் போடுகிறது தி.மு.க.

தன்னை விளம்பரப்படுத்திக்கொள்வதற்கு, பேரறிஞர் அண்ணா கூறிய இரு மொழிக் கொள்கையில் ஒன்றான ஆங்கிலத்தைப் பயன்படுத்துவதற்கு பதில் ஏன் இந்தியை தி.மு.க தலைவர் பயன்படுத்துகிறார் என்று மக்கள் கேட்க ஆரம்பித்திருக்கிறார்கள். ஒருவேளை ஊருக்குத்தான் உபதேசம் போலும்” என்றிருக்கிறார்.

விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

இது பற்றி செய்தித்துறை வட்டாரத்தில் விசாரித்தபோது, ``அம்பேத்கர் குறித்த முதல்வரின் அறிக்கை இந்தியில் வெளியிடப்படவில்லை. சில நியூஸ் கார்டுகளை அவ்வப்போது இந்தியில் கொடுத்துக்கொண்டிருக்கிறோம். அதை நாங்கள் மறுக்கவில்லை. அதுவும், நாட்டு மக்கள் அனைவருக்கும் தமிழக முதல்வரின் திட்டங்கள் குறித்த செய்தி சென்று சேர வேண்டும் என்கிற உயரிய எண்ணத்தில்தான் கார்டு வடிவில் ஆங்கிலத்திலும் இந்தியிலும் வெளியிடுகிறோம். அதில் ஒரு கார்டாக அம்பேத்கர் குறித்த செய்தி வந்திருக்கலாமே தவிர, செய்தி அறிக்கையாக வரவில்லை” என்றனர்.

முதல்வர் ஸ்டாலின்
முதல்வர் ஸ்டாலின்

தி.மு.க தரப்பில் கேட்டபோது, “இரு மொழிக் கொள்கைதான் எப்போதுமே நம் கொள்கை. தமிழை எப்படி நாம் வடக்கில் இருப்பவர்களிடம் கொண்டு சென்று திணிக்க முடியாதோ, அதுபோல, இந்தியை தென் மாநிலங்களில் உள்ளவர்களிடம் திணிக்கக் கூடாது. தவிர, விரும்பி இந்தியைப் படிப்பவர்கள் படிப்பதற்கு அனுமதிக்கலாம். அரசின் திட்டங்கள் குறித்த செய்திகளை மொழிபெயர்ப்பதில் தவறில்லை. அதேசமயம், இந்தித் திணிப்பு என்ற விவகாரத்தில் தி.மு.க எப்போதுமே உறுதியாக உள்ளது!” என்றார்கள்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

தமிழக பா.ஜ.க துணைத் தலைவர் வி.பி.துரைசாமியிடம் இது பற்றிக் கேட்டபோது, ``இந்தி பேசுபவர்கள்தான் நாட்டில் அதிகமாக இருப்பதால், இந்திதான் தொடர்பு மொழி என்றார் அமித் ஷா. அதை தி.மு.க அரசு ஏற்றுக்கொண்டதாகவே தெரிகிறது. அதனால்தான், அரசின் திட்டங்களை இந்தியில் கொடுக்கிறார்கள்போல. இது அப்பட்டமான இரட்டை வேடம். தேர்தலுக்கு முன்பு ஒரு முகமும், பின்பு ஒரு முகமும் காட்டுகிறது தி.மு.க” என்றார்.

வி.பி.துரைசாமி
வி.பி.துரைசாமி

இந்த விவகாரம் தொடர்பாக திமுக செய்தித் தொடர்பாளர்களைத் தொடர்புகொண்டபோது, ``அமைச்சர் தங்கம் தென்னரசு இது தொடர்பாக அறிக்கை வெளியிட்டிருக்கிறார். அதற்கு மேல் நாங்கள் பேசுவது முறையானதாக இருக்காது” என்பதோடு முடித்துக்கொண்டனர்.

அமைச்சர் தங்கம் தென்னரசு தனது அறிக்கையில், ``அதிமுக-வின் உட்கட்சித் தேர்தலுக்கான அறிவிப்பு வந்தவுடனேயே, நாளும் அறிக்கை ஒன்றினை வெளியிட்டு அந்தக் கட்சியில் தன்னுடைய இருப்பைப் பிரபலப்படுத்திக்கொள்ளும் முயற்சியில் அதன் ஒருங்கிணைப்பாளர் ஓ.பன்னீர்செல்வம் ஈடுபட்டிருக்கின்றார் என்பதை நாடு நன்றாக அறியும்.

தன்னை அதிமுக-வில் முன்னிலைப்படுத்தி, பிரபலப்படுத்திக்கொள்ள அவர் எடுக்கும் இத்தகைய பகீரதப் பிரயத்தனங்கள் குறித்து எங்களுக்குக் கவலை ஏதும் இல்லை. ஆனால், இன்றைக்கு இந்தியத் திருநாட்டில் உள்ள முதலமைச்சர்களில் முதன்மையானவர் எனப் பல்வேறு அரசியல் தலைவர்களும், ஊடகங்களும், இந்திய அரசியலை உன்னிப்பாக கவனித்துவரும் அரசியல் நோக்கர்களும் நம்முடைய முதலமைச்சரைப் போற்றுவது கண்டு மனம் பொறுக்காமல், சொத்தை வாதம் ஒன்றைத் தூக்கிக்கொண்டு, அதன்பேரில் அறிக்கை ஒன்றையும் வெளியிட்டு ஓ.பன்னீர்செல்வம் குளிர்காய முற்பட்டிருக்கிறார்.

தங்கம் தென்னரசு
தங்கம் தென்னரசு

உள்துறை அமைச்சர் அமித் ஷா, `ஆங்கிலத்துக்கு பதிலாக இந்தியைப் பயன்படுத்துங்கள்’ என்று சொன்னவுடனேயே, நம்முடைய முதலமைச்சர், `உள்துறை அமைச்சரின் இந்தக் கருத்து இந்தியாவின் ஒற்றுமைக்கு வேட்டுவைக்கும் செயல்’ என்றும், `ஒற்றை மொழி என்பது ஒற்றுமைக்கு உதவாது; ஒருமைப்பாட்டையும் உருவாக்காது’ எனவும் தமிழர்களின் உணர்வுகளைப் பிரதிபலிக்கும் வண்ணம் தனது நிலைப்பாட்டை உறுதிபடத் தெரிவித்தார்.


ஆனால், இன்றைக்கு மொழிப் பிரச்னையை எடுத்துக்கொண்டு வீராவேசமாக அறிக்கைவிடும் ஓ.பன்னீர்செல்வம், சட்டமன்றத்தில் தனக்குப் பக்கத்திலேயே எதிர்க்கட்சித் தலைவராக அமர்ந்திருக்கும் அதிமுக-வின் இணை ஒருங்கிணைப்பாளர் எடப்பாடி பழனிசாமி, உள்துறை அமைச்சரின் இந்தக் கருத்து குறித்துத் தனக்கு ‘ஒன்றுமே தெரியாது’ என நழுவிக்கொண்டதை மட்டும் ஏன் வசதியாக மறந்துவிட்டார் எனத் தெரியவில்லை. உண்மையான தமிழ் உணர்வும் அக்கறையும் இருக்குமானால் எடப்பாடி பழனிசாமியின் இந்தப் பாசாங்குச் செயலைத்தான் ஓ.பன்னீர்செல்வம் கண்டித்திருக்க வேண்டுமே அல்லாமல், முதலமைச்சர் மீது உள்நோக்கம் கற்பிக்க முனைந்திருப்பது கண்டனத்துக்குரிய செயலாகும்” என்றார்.

தொடர்ந்து, ``அறிவியல் அடிப்படையிலான ஆய்வுகள் மற்றும் தரவுகளின் வாயிலாக மூவாயிரம் ஆண்டுகளுக்கு மேற்பட்ட தமிழின் தொன்மையையும், தமிழ்ச் சமூகத்தின் பண்பாட்டு விழுமியங்களையும் அறிந்துகொள்ளும் வகையில் தொல்லியல் துறையில் ஒரு மறுமலர்ச்சியை முதலமைச்சர் உருவாக்கியிருக்கின்றார்.

இத்தகைய ஆய்வு முடிவுகளையும், அவை சார்ந்த அறிவிப்புகளையும் சமூகநீதி சார்ந்த முன்னெடுப்புகளையும் தமிழ் கூறும் நல்லுலகமும், ஆய்வு நெறி சார்ந்த அறிஞர் பெருமக்கள் மட்டுமன்றி இந்திய அளவில் வெகுமக்களும் தெரிந்துகொள்ள வகை செய்யும் வண்ணம்தான் செய்தி- மக்கள் தொடர்புத்துறை பல்வேறு மொழிகளில் மொழியாக்கம் செய்து இணையத்தில் வெளியிட்டுள்ளது.

சட்டப்பேரவையில் முதல்வர் ஸ்டாலின்
சட்டப்பேரவையில் முதல்வர் ஸ்டாலின்

அதிமுக ஆட்சிக்காலத்தில் பதினெண் கீழ்க்கணக்கு நூல்களில் திருக்குறள் தவிர்த்து ஏனைய நூல்கள் இந்தி மொழியில் மொழிபெயர்க்கப்பட்டு அன்றைய முதலமைச்சரால் 19-02-2019 அன்று வெளியிடப்பட்டதை ஓ.பன்னீர்செல்வம் மறந்திருந்தாலும் இத்தகைய அறிக்கைகளை வெளியிடும் முன்னர் தனது பழைய நண்பர், அன்றைய தமிழ் வளர்ச்சித்துறை அமைச்சரிடமாவது கேட்டுத் தெரிந்துகொள்ள வேண்டும் எனக் கேட்டுக்கொள்கிறேன்” என்றிருக்கிறார் விரிவாக.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism