Published:Updated:

`ஆந்திராவை எப்படி மாற்றப் போகிறேன் தெரியுமா?!’ - அமெரிக்காவில் மனம் திறந்த ஜெகன்

கலிலுல்லா.ச

எந்த ஒரு ஏழைத் தாயும் தன் மகனைப் பள்ளிக்கு அனுப்ப முடியாத நிலையில் தவிக்கக் கூடாது. மதுவால் எந்தவொரு குடும்பமும் பாதிக்கப்படாத ஆந்திராவைக் கட்டமைக்க வேண்டும் என்பதையே நான் விரும்புகிறேன்.

jagan mohan reddy
jagan mohan reddy

ஆந்திரா மாநில முதல்வர் ஜெகன்மோகன் ரெட்டி அமெரிக்காவுக்குச் சுற்றுப்பயணம் மேற்கொண்டுள்ளார். கடந்த 3 நாள்களாக அங்கிருக்கும் அவர், பல்வேறு நிகழ்ச்சிகளில் கலந்துகொண்டு உரையாற்றியிருக்கிறார். அந்தவகையில் அமெரிக்காவில் வசிக்கும் தெலுங்கு மக்கள் ஏற்பாடு செய்த கூட்டத்தில் பேசினார்.

jagan mohan
jagan mohan

அப்போது பேசிய அவர், ``தற்கொலை செய்துகொள்ளாத விவசாயிகள் வாழும் மாநிலமாக ஆந்திராவை உருவாக்குவதே என் கனவு. மாநிலத்தில் உகந்த கட்டமைப்புடன் கூடிய சிறந்த பள்ளிகளை உருவாக்கி, அதில் மாணவர்கள் கல்வி கற்பதைக் காண வேண்டும். அனைத்துக் கிராமங்களும் பச்சைப் பசுமையுடன் மாற வேண்டும். பழையபடி மீண்டும் விவசாயத்தில் முழுக் கவனம் செலுத்தப்பட வேண்டும். பயிர்க்கடன் உள்ளிட்ட பிரச்னைகளால் எந்தவொரு விவசாயியும் உயிரிழக்கக் கூடாது என்பதுதான் என் கனவு. அனைத்துத் துறைகளிலும் சாதனையாளர்களாக மாணவர்களை உருவாக்கும்பொருட்டு, கிராமப்புறத்திலுள்ள பள்ளிகளில் சிறந்த கட்டமைப்பை உருவாக்க வேண்டும்.

ஆந்திராவில் உள்ள ஒவ்வொரு ஏழைக்கும், அரசு பொது மருத்துவமனைகளில் உலகத்தரம் வாய்ந்த மருத்துவம் கிடைக்க வேண்டும் என்பதுதான் என்னடைய விருப்பம். எந்த ஏழையும் தங்க இடமில்லாமல் அனாதையாக்கப்படக் கூடாது; எந்த ஒரு ஏழைத் தாயும் தன் மகனைப் பள்ளிக்கு அனுப்ப முடியாத நிலையில் தவிக்கக் கூடாது. மதுவால் எந்தவொரு குடும்பமும் பாதிக்கப்படாத ஆந்திராவைக் கட்டமைக்க வேண்டும் என்பதை நான் விரும்புகிறேன்.

andhra cm
andhra cm

மாநிலத்தில் ஆட்சியைக் கைப்பற்றிய பின்னர் வரலாற்று சிறப்பு வாய்ந்த 19 மசோதாக்களை நிறைவேற்றியுள்ளோம். நீதித்துறையிலும் வெளிப்படைத்தன்மையை கொண்டுவந்துள்ளோம். ஆந்திரா அரசு உங்களுடையது என்பதை மறந்துவிடாதீர்கள். தேர்தலில் நான் வெற்றிபெற நீங்கள் கொடுத்த ஆதரவை மறக்கமாட்டேன். தற்போது உங்களிடம் ஒரு கோரிக்கை வைக்கிறேன். மாநிலம் செழிக்க அரசுடன் கைகோக்க வேண்டும்; ஜிடிபியில் மட்டுமல்ல; மனித வளர்ச்சிக்கும்கூட” என்றார் உறுதியான குரலில்.