Published:Updated:

பதவி பறிப்பால் கவலையில்லை. ஆனால், கருத்தைத் திரும்பப்பெற மாட்டேன்!

கே.பி.ராமலிங்கம்
பிரீமியம் ஸ்டோரி
News
கே.பி.ராமலிங்கம்

அதிரடிக்கும் கே.பி.ராமலிங்கம்

‘கொரோனா தடுப்பு நடவடிக்கைகள் குறித்து ஆராய்ந்து நடவடிக்கை மேற்கொள்ள, அனைத்துக் கட்சிக் கூட்டத்தைக் கூட்ட வேண்டும்’ என தி.மு.க தலைவர் ஸ்டாலின் அறிக்கை வெளியிட்டார். இந்தச் சூழலில், ‘அனைத்துக் கட்சிக் கூட்டம் அவசியமற்றது. மக்களைக் காப்பாற்ற, பிரதமரும் முதல்வரும் சிறப்பாகச் செயல்படுகின்றனர்’ என அறிக்கைவிட்டு அதிரடி கிளப்பினார் தி.மு.க மாநில விவசாய அணிச் செயலாளர் கே.பி.ராமலிங்கம்.

அதையடுத்து அவரது பதவியைப் பறித்ததோடு மட்டுமல்லாமல், அவரை கட்சியிலிருந்து தற்காலிகமாக நீக்கியுள்ளது தி.மு.க தலைமை. இந்தச் சம்பவம் தி.மு.க வட்டாரத்தில் பரபரப்பை ஏற்படுத்தியுள்ள நிலையில், கே.பி.ராமலிங்கத்தைச் சந்தித்துப் பேசினோம்...

“இந்தச் சூழலில் யாரும் அரசியல் செய்ய வேண்டாம் என்பதை எனது ஆலோசனையாகச் சொல்லியிருந்தேன். அரசியல் கட்சிகளைப்போல் ஒவ்வொரு சங்கமும், ‘எங்களிடம் ஆலோசனை செய்ய வேண்டும்’ என்று கேட்டால் நிலைமை என்னவாகும்? இத்தாலியைப்போல் இந்தியாவும் மோசமாகிவிடாதா? எனவேதான் இந்த இக்கட்டான சூழலில் அனைத்துக் கட்சிக் கூட்டம் தேவையற்றது, அவசியமில்லாதது என்றேன்.

உயிருக்கு பயந்து நாம் அனைவரும் வீட்டில் முடங்கி இருக்கிறோம். மக்கள் பணி செய்ய வேண்டிய இடத்தில் உள்ள முதல்வர், அவரின் அமைச்சர்கள், அதிகாரிகள் அனைவரும் என் அறிவுக்கு எட்டியவரை சிறப்பாகவே செயல்படுகின்றனர். 144 தடை உத்தரவில் வேளாண் பணிகளுக்கு விலக்கு அளித்திருப்பது முதல்வரின் ஆளுமைத்திறனைக் காட்டுகிறது. அதற்காக அனைத்து விவசாயச் சங்கங்கள் சார்பில் அவரைப் பாராட்டுகிறேன். இந்த இக்கட்டான தருணத்தில் அவர்களிடம் குறைகளைப் பார்க்காமல் நிறைகளைப் பாராட்ட வேண்டும். அரசியலையெல்லாம் ஓரத்தில் தூக்கிப் போட்டுவிட்டு ஆக்கபூர்வமாகச் செயல்பட வேண்டும் என்ற பொது நோக்கத்துடன்தான் அப்படி அறிக்கை வெளியிட்டேன்.

1991-ம் ஆண்டிலிருந்து நான் தி.மு.க மாநில விவசாய அணியில் பொறுப்பில் இருந்தேன். தற்போது என் பதவி பறிக்கப்பட்டிருக்கிறது. என் திறமையை அறிந்த தலைவர் கலைஞர், எனக்கு பதவி கொடுத்தார்.

கே.பி.ராமலிங்கம்
கே.பி.ராமலிங்கம்

ஸ்டாலின் என் பதவியைப் பறித்து தற்காலிகமாக என்னை கட்சியிலிருந்து நீக்கியுள்ளார். யாருக்கு பதவி கொடுக்க வேண்டும், யாருடைய பதவியைப் பறிக்க வேண்டும் என்பது ஒரு தலைவரின் உரிமை. என் பதவியைப் பறித்ததற்காகவும் என்னை தற்காலிகமாக நீக்கியதற்காகவும் நான் வருத்தப்படவில்லை. உண்மையை உரக்கச் சொல்பவன்தான் தி.மு.க தொண்டன். ஆகவே, என் கருத்தைத் திரும்பப் பெற மாட்டேன். இந்தச் சூழலில் மனிதாபிமானமற்ற முறையில் அரசியல் செய்ய மாட்டேன்” என்றார் தீர்க்கமாக.