கழுகார் பதில்கள்

வண்ணை கணேசன், பொன்னியம்மன்மேடு.

பொங்கல் பண்டிகையை போலீஸாருடன் முதல்வர் வித்தியாசமாகக் கொண்டாடியிருக்கிறாரே?

. தன்னை விவசாயி என்று சொல்லிக்கொள்பவர், தேர்தல் நேரத்தில் போலீஸுடன் பொங்கலைக் கொண்டாடியதன் மூலம், நாட்டுக்கு எப்படி விவசாயி முக்கியமோ அதேபோல, தேர்தலுக்கு போலீஸ் முக்கியம் என்று உணர்த்துகிறார்போல!

. சா.சொக்கலிங்க ஆதித்தன், ரோஸ்மியாபுரம்.

எந்தக் கட்சி அதிக பயத்தில் இருப்பதாக நினைக்கிறீர்கள்?

. தேர்தல் வந்தால், எந்தக் கட்சிக்குத்தான் பயம் இருக்காது!?

. எம்.ஃபாரூக், காயல்பட்டினம்.

பிரதமர் நரேந்திர மோடியின் தாடியும் மீசையும் நாளுக்கு நாள் பெரிதாகிக்கொண்டே வருகிறதே?

. இந்தியாவில் அதுவாவது வளரட்டுமே ஃபாரூக்... விடுங்களேன்!

. @ஜெயப்பிரகாஷ், அரண்மனைப்புதூர்.

புதுச்சேரி முதல்வர் நாராயணசாமிக்கும் கவர்னர் கிரண் பேடிக்கும் நடக்கும் பனிப்போர் எப்போது முற்றுப்பெறும்?

. கிரண் பேடி பா.ஜ.க-வாகவும், நாராயணசாமி காங்கிரஸாகவும் இருப்பதைத் தவிர்த்துவிட்டு கிரண் பேடி ஆளுநராகவும், நாராயணசாமி முதல்வராகவும் பொறுப்புணர்ந்து செயல்படத் தொடங்கினால் இந்தப் பனிப்போர் முற்றுப்பெறும். அதிலும் ஆளுநர், மக்கள் பிரதிநிதிகளின் செயல்பாடுகளுக்கு முட்டுக்கட்டை போடாமல் இருந்தால் மக்கள் வாழ்வு மேலும் வளம்பெறும்.

. எம்.சண்முகம், கொங்கணாபுரம்.

`கிராமசபை என்ற பெயரில், தி.மு.க கூட்டம் சேர்க்கிறது’ என்கிறாரே எடப்பாடி பழனிசாமி?

. இந்த... ரத்தம் - தக்காளிச் சட்னி காமெடி உங்களுக்கும் தெரியும்தானே!

. மேட்டுப்பாளையம் மனோகர், கோவை-14.

இன்னமும் பா.ம.க-வும் தே.மு.தி.க-வும் சட்டமன்றத் தேர்தல் பரப்புரைகளை ஆரம்பிக்காததன் காரணம் என்ன?

. அவசரப்படறீங்களே மனோகர்... தேர்தல் பிரசாரம்லாம் ஆரம்பிக்கறதுக்கு முன்னாடி வண்டிக்குப் பெட்ரோல் போட வேண்டாமா!

. இரா.ரெங்கசாமி, வடுகப்பட்டி.

இன்றுள்ள கட்சிகளில் சுவாரஸ்யமான அரசியல் கட்சி எது?

. மீம் கிரியேட்டர்களுக்கு கன்டென்ட் கொடுப்பதில், இன்றைக்கு இருக்கும் எந்தக் கட்சியும் ஒன்றுக்கொன்று சளைத்ததில்லை!

. கணேசன், பொன்னியம்மன்மேடு, சென்னை.

‘தமிழகத்தில் தாமரை மலரும். மற்ற மாநிலங்களைப்போல தமிழ் மண்ணையும் மாற்றுவோம்’ என்ற ஜெ.பி.நட்டாவின் நம்பிக்கை?

. நம்பிக்கைதானே பாஸ் வாழ்க்கை!

. @ஆர்.சுந்தரராஜன், சிதம்பரம்.

“அ.தி.மு.க-வின் இரட்டை இலைக்கு வாக்கு சேகரிக்கும்விதமாக, ஜோ பைடன் இரண்டு விரல்களைக் காட்டுகிறார்” என்கிறாரே அமைச்சர் ராஜேந்திர பாலாஜி?

. மக்கள் பணிகளைவிட்டுவிட்டு இப்படி எதற்கும் உதவாத கோமாளித்தனமான பேச்சுகளால், மக்களின் வெறுப்புணர்வையே இவர்கள் சம்பாதித்துக்கொண்டிருக்கிறார்கள்!

. சீர்காழி சாமா, ஸ்ரீரங்கம்.

நடிகர் வடிவேலு அரசியலுக்கு வருவாரா?

. அவரது முகபாவனைகளைக் கொண்டு உருவாக்கப்படும் மீம்ஸ்களால், நம் அரசியல்வாதிகள் புரட்டியெடுக்கப்படுவதைத்தான் அன்றாடம் பார்க்கிறோமே... தனியாக வேறு அரசியலுக்கு வர வேண்டுமா என்ன?

. @டி.ஜெய்சிங், கோயம்புத்தூர்.

சசிகலாவை திடீரென முதல்வர் பழனிச்சாமி சந்திக்க நேர்ந்தால், இருவரும் என்ன பேசிக்கொள்வார்கள்?

. மல... நல்லாருக்கியா மல!

. கிடையூர் மாணிக்கம், சங்ககிரி, சேலம்.

`அ.தி.மு.க-விலுள்ள அண்ணன் தம்பிகளுக்கு இடையேயான பிரச்னைகளை, பேசித் தீர்த்துக்கொள்வோம்’ என்று ஓ.பி.எஸ் கூறியிருக்கிறாரே?

. அண்ணன் தம்பி பிரச்னைகள் அவர்களை மட்டும் பாதித்தால் பரவாயில்லை... மக்களையும் பாதிக்கும்போதுதான் விமர்சனங்களுக்கு உள்ளாகின்றன!

. @மணிகண்டன், கூடுவாஞ்சேரி.

சொந்தப் பணத்தில் சூனியம் வைத்துக்கொள்ளும் அரசியல்வாதிகள் யாரும் உண்டா?

. சொந்தப் பணம்லாம் எங்க பாஸ்? எல்லாம் மக்கள் பணம்தான்!

. மூர்த்தி பாலகிருஷ்ணன், அனுப்பானடி, மதுரை .

அதிகாரத்தில் இருந்த சசிகலா... அதிகாரத்தில் இல்லாத சசிகலா... என்ன வித்தியாசம்?

. அவர் எப்போது அதிகாரத்தில் இருந்தார்? ‘அதிகாரத்துடன்’தானே இருந்தார்!

. கேள்விகள் அனுப்ப வேண்டிய முகவரி: கழுகார் பதில்கள், ஜூனியர் விகடன்,757, அண்ணா சாலை, சென்னை-600 002.

kalugu@vikatan.com என்ற இமெயிலுக்கும் அனுப்பலாம்!