Published:Updated:

பினராயி விஜயனுக்கு குட்டு! - பரபரக்கும் கேரளாவின் புது அமைச்சரவை

ஷைலஜா டீச்சர்
பிரீமியம் ஸ்டோரி
ஷைலஜா டீச்சர்

மருமகனுக்கு பதவி... ஷைலஜா டீச்சருக்கு நோ...

பினராயி விஜயனுக்கு குட்டு! - பரபரக்கும் கேரளாவின் புது அமைச்சரவை

மருமகனுக்கு பதவி... ஷைலஜா டீச்சருக்கு நோ...

Published:Updated:
ஷைலஜா டீச்சர்
பிரீமியம் ஸ்டோரி
ஷைலஜா டீச்சர்

‘முற்றிலும் புதியவர்கள்’ என்ற முழக்கத்தோடு, 21 புதிய அமைச்சர்களுடன் பினராயி விஜயன் தலைமையிலான அரசு கேரளாவில் பதவியேற்றுள்ளது. அமைக்கப்பட்டுள்ள புதிய அமைச்சரவை குறித்த விமர்சனங்கள் `அவிட’ தேசத்தில் அனலடிக்கின்றன. குறிப்பாக, பினராயி விஜயனின் மருமகனுக்குப் பதவி கொடுத்தது, கடந்த ஆட்சியில் சுகாதாரத்துறை அமைச்சராக இருந்த கே.கே.ஷைலஜா டீச்சருக்கு அமைச்சர் பதவி மறுக்கப்பட்டது இரண்டும் பெரும் சர்ச்சையாகியுள்ளன. மேலும், பினராயி விஜயன் தன்னை ஒற்றை பிம்பமாக முன்னிறுத்துகிறாரா என்கிற கேள்வியும் புகைய ஆரம்பித்திருக்கிறது.

மே 2-ம் தேதியே தேர்தல் முடிவுகள் வெளியாகிவிட்டாலும், கொரோனா தடுப்பு நடவடிக்கைகளில் தீவிரம்காட்டிய பினராயி விஜயன் பதவியேற்க தாமதமானது. புதிய அரசின் பதவியேற்பு மற்றும் அமைச்சரவை குறித்து முடிவுசெய்ய, மே 17-ம் தேதி எல்.டி.எஃப் கூட்டணி நிர்வாகிகள் கூட்டம் திருவனந்தபுரத்தில் நடந்தது. அதில் சி.பி.எம் கட்சிக்கு 12 அமைச்சர்களும், கூட்டணிக் கட்சிகளுக்கு ஒன்பது அமைச்சர் பதவிகளும் ஒதுக்கப்பட்டன. சி.பி.எம் கட்சிக்கு ஒதுக்கப்பட்ட 12 அமைச்சர்களில் ஷைலஜா டீச்சர் நிச்சயம் இடம்பெறுவார் என எதிர்பார்க்கப்பட்டது.

 பினராயி விஜயனுக்கு குட்டு! - பரபரக்கும் கேரளாவின் புது அமைச்சரவை

எதிர்பார்க்கப்பட்ட ஷைலஜா டீச்சர்!

கேரளத்தில் நிபா வைரஸ் பரவல் சமயத்திலும், கொரோனா வைரஸ் காலத்திலும் மிகவும் சாமர்த்தியமாகச் செயல்பட்டு சர்வதேச கவனத்தை ஈர்த்தவர் கே.கே.ஷைலஜா. கொரோனா பரவலைத் தடுக்க ‘பிரேக் தி செயின்’ என்ற திட்டத்தை அறிமுகப்படுத்தி கைகழுவுதல், சமூக இடைவெளியைக் கடைப்பிடித்தல் ஆகியவற்றின் மூலம் தொற்றின் தொடர்பை அறுக்கச் செய்த இவரின் முன்னெடுப்புகள் பயனளித்தன. கொரோனா தொற்றின் தாண்டவம் மீண்டும் தொடரும் இந்தச் சமயத்தில், மீண்டும் ஷைலஜா சுகாதாரத்துறை அமைச்சராக நியமிக்கப்படுவதில் எந்தச் சிக்கலும் எழாது என்றே பொதுமக்களும் கருதினர்.

ஆனால், மே 18-ம் தேதி யார் யாருக்கு அமைச்சர் பதவி வழங்கலாம் என்பது குறித்து ஆலோசிப்பதற்காகக் கூடிய சி.பி.எம் மாநிலக்குழுக் கூட்டத்தில் நிறைவேற்றப்பட்ட ‘முதல்வர் பினராயி விஜயன் தவிர்த்து அமைச்சரவையில் புதியவர்களுக்கு மட்டும் வாய்ப்பு கொடுத்தால் போதும்’ என்ற தீர்மானத்தின் மூலம் ஷைலஜாவை ஒதுக்கிவிட்டார்கள். இந்தத் தீர்மானத்தின் பின்னணியில் முதல்வர் பினராயி விஜயன் இருப்பதாகச் சொல்கிறார்கள் கேரள அரசியல் நோக்கர்கள்.

அச்சுதானந்தனுடன் நடந்த அதிகாரப்போர்!

‘‘2006-ல் வி.எஸ்.அச்சுதானந்தன் முதல்வராக இருந்த சமயத்தில், பினராயி விஜயன் சி.பி.எம் மாநிலச் செயலாளராக இருந்தார். அந்தச் சமயத்தில் ஆட்சி அதிகாரத்தில் இருக்கும் வி.எஸ்.அச்சுதானந்தன் ஒரு முடிவு எடுத்தால், கட்சி அதிகாரத்தில் இருக்கும் பினராயி விஜயன் அதற்கு நேரெதிரான முடிவை எடுப்பார். இதனால், ஆட்சிக்கும் கட்சிக்கும் இடையே பிணக்கோடுதான் அந்த ஐந்து ஆண்டுகளும் கழிந்தன. 2011 சட்டமன்றத் தேர்தலில், கட்சியில் இருந்த அதிகாரத்தைப் பயன்படுத்திய பினராயி விஜயன், வி.எஸ்.அச்சுதானந்தனுக்குப் போட்டியிட சீட்டே வழங்கவில்லை. இது பொதுமக்களிடையே கொந்தளிப்பை ஏற்படுத்தியது. மக்களின் அதிருப்தியைச் சமாளிக்க முடியாமல், மீண்டும் பொலிட்பீரோ உறுப்பினர்கள் கூடி, அச்சுதானந்தனுக்கு சீட் வழங்கி தீர்மானத்தை நிறைவேற்றினார்கள். பினராயி விஜயனுக்கும் அச்சுதானந்தனுக்கும் இடையே நடந்த அதிகாரப்போர் காரணமாக அந்தத் தேர்தலில் சி.பி.எம் கூட்டணி தோல்வியடைந்தது. காங்கிரஸ் ஆட்சியைப் பிடித்தது.

மீண்டும் ஷைலஜா!

அதன் பிறகு அச்சுதானந்தன் மெல்ல ஓரங்கட்டப்பட்டார். கடந்த 2016 தேர்தலில் சி.பி.எம் கூட்டணி வெற்றிபெற்ற பிறகு, பினராயி விஜயன் முதல்வராகித் தனிப்பெரும் தலைவரானார். ஒக்கி புயல், மழை வெள்ள பாதிப்பு ஆகிய சமயங்களில் சிறப்பாகச் செயல்பட்டதால், மக்களின் பாராட்டைப் பெற்றார். அதே சமயம், நிபா வைரஸ், கொரோனா வைரஸ் தொற்று சமயத்தில் திறம்பட செயல்பட்டதாக சுகாதாரத்துறை அமைச்சர் கே.கே.ஷைலஜா டீச்சர் இந்தியாவைத் தாண்டி சர்வதேச அளவில் பேசப்பட்டார். கடந்த சி.பி.எம் ஆட்சியில் பினராயி விஜயனுக்கு அடுத்தபடியாக செல்வாக்குமிக்க ஆளுமையாக ஷைலஜா டீச்சர் வளர்ந்தார். ஆனால், தனக்கு நிகராக மற்றொரு தலைவி உருவாவதை பினராயி விஜயன் விரும்பவில்லை. அதனால்தான் கடைசி சமயத்தில் கட்சித் தீர்மானம் என்ற ஆயுதத்தைப் பயன்படுத்தி ஷைலஜா டீச்சரை வீழ்த்திவிட்டார்.

விஜயனுக்குக் குட்டுவைத்த தலைமை!

தேர்தலில் இரண்டாவது முறையாக வெற்றிபெற்றதும், இந்த வெற்றிக்குக் காரணம் ‘கேப்டன் பினராயி விஜயன்’ என்று கட்சியினர் புகழ்ந்தார்கள். கம்யூனிஸ்ட் கட்சியில் தனிமனித துதி இல்லை என்பதால், டெல்லி தலைமை பினராயி விஜயனுக்குக் குட்டுவைத்தது. டெல்லியில் வெளியாகும் பீப்பிள்ஸ் டெமாக்ரசி (Peoples Democracy) கம்யூனிஸ்ட் இதழில் வெளியான தலையங்கத்தில், ‘கேரளத்தில் எல்.டி.எஃப் மீண்டும் வெற்றிபெற்றதை, தனிமனித வெற்றி எனச் சுருக்க மீடியாக்கள் முயல்கின்றன அது கூட்டு முயற்சி’ எனக் கூறப்பட்டிருந்தது. இந்தத் தலையங்கம் சி.பி.எம் அரசியல் தலைமைக்குழு உறுப்பினர் பிரகாஷ் காரத் எழுதியதாகச் சொல்லப்பட்டது. அவர் மீடியாவைச் சாடினாலும், மறைமுகமாக பினராயி விஜயனுக்குத்தான் குட்டுவைத்தார்’’ என்றார்கள் கேரள அரசியல் நோக்கர்கள்.

 பினராயி விஜயனுக்கு குட்டு! - பரபரக்கும் கேரளாவின் புது அமைச்சரவை

மருமகனுக்குப் பதவி!

ஒரு பக்கம் ‘ஷைலஜா டீச்சருக்கு அமைச்சர் பதவி வழங்க வேண்டும்’ என சமூக வலைதளங்கள் மூலம் பிரசாரத்தை மக்கள் முன்னெடுத்து வருகிறார்கள். அதேசமயம், முதல்வர் பினராயி விஜயனின் மருமகன் (மகள் வீணா விஜயனின் கணவர்) முகமது ரியாஸுக்கு அமைச்சர் பதவி வழங்கியிருப்பதையும் சமூக ஊடகங்களில் விமர்சிக்கிறார்கள்.

கட்சியின் முடிவு இது!

சி.பி.எம் நிர்வாகி ஒருவரிடம் பேசியபோது, ‘‘சி.பி.எம் கட்சிக்கென பல கொள்கைகள் உள்ளன. தொடர்ந்து இரண்டு முறை எம்.எல்.ஏ-வாக இருந்தவர்களுக்கு சீட் இல்லை என்பது கட்சியின் கொள்கை முடிவு. அதனால், சபாநாயகராக இருந்த ராமகிருஷ்ணன் உட்பட சிட்டிங் எம்.எல்.ஏ-க்கள் 33 பேருக்கு இந்தத் தேர்தலில் சீட் வழங்கப்படவில்லை. தாமஸ் ஐசக், ரவீந்திரநாத், சுதாகரன், இ.பி.ஜயராஜன், ஏ.கே.பாலன் ஆகிய ஐந்து அமைச்சர்களுக்கும் போட்டியிட வாய்ப்பு வழங்கப்படவில்லை. பினராயி விஜயனின் மருமகன் என்பதால் முகம்மது ரியாஸுக்கு அமைச்சர் பதவி கொடுத்திருப்பதாகச் சொல்வது தவறு. அவர் சி.பி.எம் இளைஞர் அமைப்பான ஜனநாயக வாலிபர் சங்கத்தின் (டி.ஒய்.எஃப்.ஐ) தேசியத் தலைவர். 25 ஆண்டுகளாக அரசியல் களப்பணியில் இருக்கிறார். அதேபோல், மீண்டும் மக்களுக்கு நல்லாட்சி வழங்கவே கட்சி சில முடிவுகளை எடுத்துள்ளது. அதைச் சிலர் வேண்டுமென்றே விமர்சிக்கிறார்கள்’’ என்றார்.

சி.பி.எம் மாநிலச் செயலாளர் (பொறுப்பு) விஜயராகவனிடம் பேசினோம். ‘‘கட்சியின் அமைப்புரீதியான, அரசியல்ரீதியான முடிவு இது. பல்வேறு அம்சங்களையும் யோசித்துத்தான் இந்த முடிவை எடுத்துள்ளோம். கே.கே.ஷைலஜாவை மீண்டும் அழைக்க வேண்டும் எனச் சமூக வலைதளங்களில் உயர்ந்துவருவதாகக் கூறப்படும் பிரசாரங்கள் எங்கள் கவனத்துக்கு வரவில்லை’’ என்றார்.

விமர்சனங்களுக்கு அப்பால், புதியவர்களுக்கு வாய்ப்பு வழங்கப்பட்டதும், மூன்று பெண்கள் அமைச்சரவையில் சேர்க்கப்பட்டதும் கேரள மக்களிடையே வரவேற்பைப் பெற்றிருக்கின்றன!

****

வீணா ஜார்ஜ் - ஆர்.பிந்து - சிஞ்சு ராணி
வீணா ஜார்ஜ் - ஆர்.பிந்து - சிஞ்சு ராணி

மூன்று பெண்கள்:

கடந்த ஆட்சியில் இரண்டு பெண்கள் அமைச்சராக இருந்த நிலையில், இந்த முறை மூவருக்கு வாய்ப்பு வழங்கப்பட்டுள்ளது. இவர்களில் வீணா ஜார்ஜ், பத்திரிகையாளர். 15 ஆண்டுகளாகப் பத்திரிகையில் பணியாற்றிய பிறகு அரசியலுக்கு வந்தவர். ஆர்.பிந்து, அகில இந்திய ஜனநாயக மாதர் சங்கத்தின் தேசிய செயற்குழு உறுப்பினர். சி.பி.எம் மாநிலச் செயலாளர் (பொறுப்பு) விஜயராகவனின் மனைவி இவர். சி.பி.ஐ கட்சியைச் சேர்ந்த ஜே.சிஞ்சு ராணி, மூன்றாவது பெண் அமைச்சர்.

 பினராயி விஜயனுக்கு குட்டு! - பரபரக்கும் கேரளாவின் புது அமைச்சரவை

‘‘கடமையைச் செய்தேன்!’’ - கே.கே.ஷைலஜா

‘‘கட்சி தீர்மானித்து எனக்கு அமைச்சராக வாய்ப்பு வழங்கியது. அதைச் சிறப்பாகச் செய்ததில் எனக்கு திருப்தி உள்ளது. புதிய அணியினர் மிக சிறப்பாகச் செயல்படுவார்கள் என நான் நம்புகிறேன். எனக்கு அமைச்சர் பதவி இல்லாததால், கொரோனாவுக்கு எதிரான போராட்டத்தில் எந்தப் பின்னடைவும் ஏற்படாது. கொரோனாவுக்கு எதிரான போராட்டம் நான் தனியாக நடத்தியது அல்ல. நிறைய அதிகாரிகளும் பொதுமக்களும் சேர்ந்து முன்னெடுத்த நடவடிக்கை அது. சுகாதாரத்துறை அமைச்சராக இருந்ததால், அந்தக் கடமையை நிறைவேற்றினேன்.’’