Published:Updated:

ஓரங்கட்டப்பட்ட உம்மன் சாண்டி, ரமேஷ் சென்னிதலா.. பற்றி எரியும் பட்டியல் விவகாரம்!

உம்மன்சாண்டி, ரமேஷ் சென்னிதலா
பிரீமியம் ஸ்டோரி
உம்மன்சாண்டி, ரமேஷ் சென்னிதலா

மாநில நிர்வாகிகளைக் கலந்தாலோசித்திருந்தால், இதைவிட நல்ல முடிவாக எடுத்திருக்கலாம். ஆனால், விவாதித்து முடிவெடுக்கப்படவில்லை

ஓரங்கட்டப்பட்ட உம்மன் சாண்டி, ரமேஷ் சென்னிதலா.. பற்றி எரியும் பட்டியல் விவகாரம்!

மாநில நிர்வாகிகளைக் கலந்தாலோசித்திருந்தால், இதைவிட நல்ல முடிவாக எடுத்திருக்கலாம். ஆனால், விவாதித்து முடிவெடுக்கப்படவில்லை

Published:Updated:
உம்மன்சாண்டி, ரமேஷ் சென்னிதலா
பிரீமியம் ஸ்டோரி
உம்மன்சாண்டி, ரமேஷ் சென்னிதலா

கேரள மாநில காங்கிரஸ் கட்சியில் ஏற்கெனவே இருந்த கருணாகரன், ஏ.கே.ஆண்டனி அணியின் அத்தியாயம் முடிவடைந்து, உம்மன்சாண்டி, ரமேஷ் சென்னிதலா அத்தியாயம் கடந்த இருபது ஆண்டுகளாக இருந்துவந்தது. இப்போது உம்மன்சாண்டி, ரமேஷ் சென்னிதலா அத்தியாயம் முடிவுக்கு வந்திருப்பதாகச் சொல்கிறார்கள் அரசியல் பார்வையாளர்கள்!

கேரளத்தில், கடந்த சட்டசபைத் தேர்தலில் காங்கிரஸ் தோற்றதையடுத்து மாநில காங்கிரஸ் தலைவர் முல்லப்பள்ளி ராமச்சந்திரன் மாற்றப்பட்டு, கே.சுதாகரன் நியமிக்கப்பட்டார். பதவியேற்றவுடனேயே ‘‘நான் கல்லூரி படிக்கும்போது, வகுப்பு புறக்கணிப்பு போராட்டம் நடத்தவந்த சி.பி.எம் பினராயி விஜயனின் நெஞ்சில் மிதித்து விரட்டினேன்’’ என்று பேட்டி கொடுத்து அரசியல் சர்ச்சையைக் கிளப்பினார். ‘வில்லங்கமும் விறுவிறுப்புமாக அரசியல் நடத்துவதுதான் கே.சுதாகரனின் சிறப்பு’ என அன்று தொண்டர்கள் சிலாகித்தார்கள். ஆனால், இப்போது புதிய மாவட்டத் தலைவர்கள் நியமனத்தில் காங்கிரஸ் கட்சிக்குள்ளேயே வில்லங்கமும் சர்ச்சையும் வெடித்திருப்பது, தொண்டர்களை மட்டுமல்லாமல் டெல்லி தலைமையையே அதிரவைத்திருக்கிறது.

கே.சுதாகரன், வி.டி.சதீசன்
கே.சுதாகரன், வி.டி.சதீசன்

பற்றி எரியும் பட்டியல் விவகாரம்!

மாநிலத் தலைவராகப் பதவியேற்று மூன்று மாதங்களாக புதிய நிர்வாகிகளை நியமிக்க முடியாமல் தவித்தார் கே.சுதாகரன். அவர் புதிய நிர்வாகிகள் பட்டியலை டெல்லிக்குக் கொடுப்பதும், அதில் சில `நோட்’ போட்டு மேலிடம் திருப்பி அனுப்புவதுமே வாடிக்கையாகத் தொடர்ந்தது. ஒருவழியாக ஆகஸ்ட் 28-ம் தேதி, கேரளத்தின் 14 மாவட்டங்களுக்கும் புதிய மாவட்டத் தலைவர்களின் பட்டியல் வெளியிடப்பட்டது. அதில் மாநிலத் தலைவர் கே.சுதாகரன், சட்டமன்ற காங்கிரஸ் எதிர்க்கட்சித் தலைவர் வி.டி.சதீசன் ஆகியோரின் ஆதரவாளர்களே முழுவதும் நியமிக்கப்பட்டார்கள். இது கேரள மாநில காங்கிரஸில் கோலோச்சிக்கொண்டிருந்த முன்னாள் முதல்வர் உம்மன்சாண்டி, முன்னாள் எதிர்க்கட்சித் தலைவர் ரமேஷ் சென்னிதலா ஆகியோருக்குப் பேரிடியாக அமைந்தது.

‘‘மாநில நிர்வாகிகளைக் கலந்தாலோசித்திருந்தால், இதைவிட நல்ல முடிவாக எடுத்திருக்கலாம். ஆனால், விவாதித்து முடிவெடுக்கப்படவில்லை” என வெளிப்படையாகவே அதிருப்தி தெரிவித்தார் உம்மன்சாண்டி. ரமேஷ் சென்னிதலாவும், ‘‘ `நிர்வாகிகள் நியமனம் சம்பந்தமாக ஆலோசனை நடத்துவோம்’ என உம்மன்சாண்டியிடமும் என்னிடமும் உறுதி கூறியிருந்தார்கள். ஆனால், கலந்தாலோசிக்கப்படாமலேயே நிர்வாகிகள் பட்டியல் வெளியிடப்பட்டிருக்கிறது’’ என்று விமர்சித்தார்.

இவர்களுக்கு வெளிப்படையாகவே பதிலளித்த காங்கிரஸின் துணைத் தலைவரும், எதிர்க்கட்சித் தலைவருமான வி.டி.சதீசன், ‘‘நானும் மாநிலத் தலைவர் கே.சுதாகரனும் ஒரு மூலையில் அமர்ந்து எழுதி டெல்லிக்குக் கொடுத்த லிஸ்ட் அல்ல இது. உம்மன்சாண்டியிடமும் ரமேஷ் சென்னிதலாவிடமும் இரண்டு முறை பேச்சுவார்த்தை நடத்தினோம். அவர்கள் இருவரும் தந்திருக்கும் பெயர்ப் பட்டியலை டெல்லியில் அப்படியே கொடுக்க வேண்டும் என்று அவர்கள் விரும்பலாம். அப்படிச் செய்ய வேண்டுமானால், நாங்கள் இந்தப் பதவியில் இருக்கவேண்டிய அவசியம் இல்லையே...’’ என்று காட்டமானார்.

மாநில காங்கிரஸ் தலைவர் கே.சுதாகரனோ, ‘‘பெரிய அளவில் விவாதம் நடத்தி முடிவெடுத்ததாக கேரள காங்கிரஸ் சரித்திரத்தில் எப்போதாவது நடந்திருக்கிறதா... அப்படி ஆலோசித்து, தீர்மானம் எடுத்ததாக ஏதாவது ஒரு சீனியர் தலைவர் சொல்ல முடியுமா? ஆனால், நாங்கள் அனைத்துத் தரப்பினரிடமும் ஆலோசனை கேட்டுத்தான் முடிவெடுத்தோம்’’ என்று தன் பங்குக்கு பதிலடி கொடுத்தார்.

“உம்மன்சாண்டியைக் கட்சியிலிருந்து நீக்க முடியுமா?’’

உம்மன்சாண்டியும் ரமேஷ் சென்னிதலாவும் அதிருப்தியை வெளிப்படுத்தியதும், அவரின் ஆதரவாளர்களும் மீடியாக்களைச் சந்தித்து பேட்டி கொடுக்கத் தொடங்கினார்கள். திருவனந்தபுரம் மாவட்டம், நெடுமங்காடு சட்டசபைத் தொகுதியில் காங்கிரஸ் சார்பில் போட்டியிட்ட பிரசாந்த், “தேர்தலில் நான் போட்டியிட்டபோது, என்னைத் தோற்கடிக்க வேண்டுமென்று எனக்கு எதிராக வேலை செய்தவர் நெய்யாற்றின்கரை சனல். அவருக்கு திருவனந்தபுரம் மாவட்டத் தலைவர் பதவி கொடுத்திருப்பது கண்டிக்கத்தக்கது’’ என்று ஆவேசமாகப் பேட்டியளித்தார். அதையடுத்து, அவர் கட்சியிலிருந்து நீக்கப்பட்டார். இதே போன்று தலைமையை விமர்சித்த முன்னாள் எம்.எல்.ஏ சிவதாஸன் நாயரையும் கட்சித் தலைமை நீக்கி நடவடிக்கை எடுத்திருக்கிறது.

நிர்வாகிகள் நியமனத்தை விமர்சித்து, பேட்டியளித்த மாநில காங்கிரஸ் முன்னாள் பொதுச்செயலாளர் கே.பி.அனில்குமாரும் கட்சியிலிருந்து நீக்கப்பட்டார். கட்சியிலிருந்து நீக்கிய பிறகும் கொந்தளித்த கே.பி.அனில்குமார், ‘‘எம்.பி-க்களும், எம்.எல்.ஏ-க்களும்தான் இப்போது கட்சியில் முடிவெடுக்கிறார்கள். அப்படியானால் கட்சி நிர்வாகிகள் எதற்கு? இந்த விஷயத்தில் என்னைவிட மிக மோசமாக உம்மன்சாண்டி விமர்சித்திருந்தார். அவரைக் கட்சியிலிருந்து நீக்க உங்களால் முடியுமா?’’ என்று கேட்டிருந்தார்.

ஓரங்கட்டப்பட்ட உம்மன் சாண்டி, ரமேஷ் சென்னிதலா.. பற்றி எரியும் பட்டியல் விவகாரம்!

புதிய நிர்வாகிகள் நியமனத்தில் அதிருப்தியடைந்த பாலக்காட்டைச் சேர்ந்த கோபிநாதன் உள்ளிட்ட சில நிர்வாகிகள் கட்சியிலிருந்து விலகுவதாக ராஜினாமா கடிதம் கொடுத்துள்ளனர். கேரளத்தில் ஒட்டுமொத்த காங்கிரஸிலும் புதிய நிர்வாகிகள் நியமனத்தில் சர்ச்சை நீடிப்பதால், இந்த விவகாரத்தில் ராகுல் காந்தி தலையிட்டு தீர்வுகாண முயல்கிறாராம்.

அணிகளில் சேராத சீனியர் நிர்வாகி ஒருவரிடம் பேசினோம். “கே.சுதாகரன், வி.டி.சதீசன் ஆகியோர்தான் காங்கிரஸில் புதிய அதிகார மையமாக மாறியுள்ளார்கள். 14 மாவட்டங்களையும் நான்காகப் பிரித்து, ஒவ்வொருவரும் தங்களின் ஆதரவாளர்களை நியமித்துக்கொள்ளலாம் என உம்மன்சாண்டியும் ரமேஷ் சென்னிதலாவும் கேட்டிருக்கிறார்கள். அதற்கு, ‘இதற்கு முன்பு நாங்கள் சொன்ன நிர்வாகிகளை நீங்கள் நியமிக்கவில்லையே...’ என்று கே.சுதாகரனும் வி.டி.சதீசனும் பதிலளித்திருக்கிறார்கள். ‘பிரச்னையைப் பெரிதாக்க வேண்டாம்’ என்று டெல்லியிலிருந்து அறிவுறுத்தியிருக்கிறார்கள். ‘இது பற்றி யாரும் மீடியாக்களிடம் பேசக் கூடாது’ என்று மாநிலத் தலைமை அறிவித்திருக்கிறது. ராகுல் காந்தி நேரடியாகத் தலையிட்டு நான்கு பேரிடமும் பேசிவருகிறார்’’ என்றார்.

சண்டையும் சச்சரவும் காங்கிரஸின் பரம்பரைச் சொத்து. அதைக் ‘கை’ விடுவார்களா?

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism