Published:Updated:

1961-ல் ஆபரேஷன் விஜய்... 67-ல் பொது வாக்கெடுப்பு... 87-ல் தனி மாநிலம் - கோவா உருவான கதை!

கோவா
கோவா

தேசத்தின் பெரும்பான்மைப் பகுதிகள் ஆங்கிலேயரின் பிடியில் இருந்தாலும், பிரெஞ்சு ஆதிக்கத்திலும், போர்த்துக்கீசியர்களின் ஆதிக்கத்திலும் ஒன்றிரண்டு இடங்கள் இருந்ததுண்டு. அப்படி, இந்தியா சுதந்திரமடைந்த பின்னாலும், போர்ச்சுக்கீசியர்களின் கட்டுப்பாட்டில் இருந்த ஒரு நகரம்தான் கோவா.

தொடர்ச்சியான விடுமுறை, சுற்றுலா பிளான் என்றால், நிச்சயமாக அந்த இடத்தில் அதிகம் உச்சரிக்கப்படும் பெயராக 'கோவா'தான் இருக்கும். பள்ளிக்காலத்தில் தீட்டப்பட்ட கோவா டூர் பிளான், கைத்தடி ஊண்டும் காலத்திலும் நிறைவேறாமல் ஏக்கத்தோடு வாழும் வயதான இளைஞர்கள் பலர் உண்டு. கோவா டூர் கதைகளைப் பேசிப் பேசியே பொழுதைப் போக்கிய இளைஞர் கூட்டமும் ஏராளம். அந்தளவுக்கு இளைஞர்களின் கனவு நகரமாக விளங்குகிறது கோவா. இளைஞர்களுக்கு மட்டுமல்ல நம் இந்திய நாட்டுக்கே டூரிஸ்ட் கேப்பிட்டலாகவும் இருக்கிறது கோவா. அதிகமான கனிமவளம், தனிநபர் வருமானத்தில் முதலிடம் எனத் தனித்த பல சிறப்புகளைக் கொண்ட கோவா, தனி மாநிலமாக உருவான வரலாற்றைத்தான் நாம் இப்போது பார்க்கப் போகிறோம்.

கோவா, வடக்கில் மகாராஷ்டிரா மாநிலத்தையும், கிழக்கில் கர்நாடகா மாநிலத்தையும் தெற்கு திசையில் அரபிக்கடலையும் எல்லைகளாகக் கொண்டு ,மேற்கு கடற்கரையில் அமைந்துள்ள ஒரு அழகிய இடம். குறைவான பரப்பளவையும் குறைவான மக்கள் தொகையையும் கொண்டு இந்தியாவின் மிகச்சிறிய நான்காவது மாநிலமாக கோவா விளங்குகிறது. இங்கு, கொங்கனி, மராத்தி, போர்த்துக்கீசிய மொழிகளைப் பேசுகின்ற மக்கள் வாழ்ந்து வருகிறார்கள். பெரும்பான்மையாக இந்துக்களும், அதற்கடுத்தாக கத்தோலிக்கக் கிறிஸ்தவர்களும், கணிசமாக இஸ்லாமியர்கள் உள்ளிட்ட பிற மதத்தவர்களும் வாழ்ந்து வருகிறார்கள். பனாஜி இம்மாநிலத் தலைநகரம். வாஸ்கோடகாமா இங்குள்ள மிகப்பெரிய நகரமாகவும் இருக்கிறது.

ஜவஹர்லால் நேரு
ஜவஹர்லால் நேரு

இந்தியா விடுதலை அடைவதற்கு முன்பாக, தேசத்தின் பெரும்பான்மைப் பகுதிகள் ஆங்கிலேயரின் பிடியில் இருந்தாலும், பிரெஞ்சு ஆதிக்கத்திலும், போர்த்துக்கீசியர்களின் ஆதிக்கத்திலும் ஒன்றிரண்டு இடங்கள் இருந்ததுண்டு. அப்படி, இந்தியா சுதந்திரம் அடைந்த பின்னாலும், போர்ச்சுக்கீசியர்களின் கட்டுப்பாட்டில் இருந்த ஒரு நகரம்தான் கோவா. 1961 டிசம்பர் 19-ம் தேதி, ராணுவ நடவடிக்கையின் வாயிலாக இந்தியாவுடன் இணைக்கப்படுவதற்கு முன்புவரை கிட்டத்தட்ட, 450 ஆண்டுக்காலம் போர்ச்சுக்கீசியர்களின் கட்டுப்பாட்டில்தான் இருந்தது. 

அப்போது, பிரதமராக இருந்த ஜவஹர்லால் நேரு பலமுறை வேண்டுகோள் விடுத்தும், எச்சரித்தும் கொஞ்சம் கூட மசியவில்லை, கோவாவை ஆண்ட போர்ச்சுக்கீசிய அதிகாரிகள். 'நாங்கள் இம்மண்ணில் காலடி எடுத்துவைத்த போது இந்தியா என்கிற தேசமே இருக்கவில்லை. எங்களை, எங்கள் நாட்டில் இருந்து வெளியேறச் சொல்வது மிகப்பெரிய அநீதி' எனக் கொக்கரித்தனர் அவர்கள். போர்ச்சுக்கீசிய அதிகாரிகளின் இத்தகைய போக்கைக் கண்ட இந்திய அரசாங்கம் வேறு சில யுக்திகளைக் கையாளத் தொடங்கியது.

கோவாவில் வாழ்ந்த கிறிஸ்தவ மக்களில், பெரும்பாலானவர்களின் விருப்பம் போர்த்துக்கீசிய ஆட்சியாளர்களின் கீழ் வாழ்வதாகவே இருந்தது. இதனைப் பிடித்துக்கொண்ட இந்திய அரசாங்கம், அங்கு வாழ்ந்து வந்த இந்து மக்களை, போர்த்துக்கீசிய அரசுக்கு எதிராகத் தூண்டிவிட ஆரம்பித்தது. ஏற்கெனவே, கோவா மண்ணில் நிலைகொண்டிருந்த போர்த்துக்கீசியர்களிடமிருந்து, விடுதலை கேட்டுப் போராடிக்கொண்டிருந்த, கோவா காங்கிரஸ் கமிட்டிக்கும் ஆதரவளித்தது. அதுமட்டுமல்லாமல், அரசுக்கு எதிராக, பல புதிய இயக்கங்களையும் கோவா மண்ணில் உருவாக்கியது. 'யுனைட்டட் ஃபிரெண்ட் ஆப் கோவன்ஸ்' உள்ளிட்ட பல ஆயுத அமைப்புகளுக்கும் மறைமுகமாக உதவி செய்தது இந்தியா. கர்நாடகா, மகாராஷ்டிரா எல்லைகளின் வழியாக கோவாவுக்குப் பல்வேறு நெருக்கடிகளைக் கொடுத்துக்கொண்டே இருக்க, மக்களுக்கு எதிராகக் கடுமையான அடக்குமுறையைக் கட்டவிழ்த்துவிட்டனர், போர்த்துக்கீசிய ஆட்சியாளர்கள்.

போர்ச்சுக்கீசியர்களிடமிருந்து விடுதலை
போர்ச்சுக்கீசியர்களிடமிருந்து விடுதலை

அதன் காரணமாக, பொதுமக்கள் கண்மூடித்தனமாகத் தாக்கப்பட்டனர். பலர் காயமுற்றனர். சிலர் உயிரிழந்தனர். மிகப்பெரிய அளவில் கலவரம் வெடிக்க, இதற்காகத்தான் காத்திருந்தோம் என இந்தியப் படைகள் கோவாவுக்குள் நுழைந்தன. சுமார் நாற்பத்தைந்தாயிரம் படையினருடன் கோவாவுக்குள் நுழைந்த இந்தியப் படை, வெறும் எட்டாயிரம் பேருடன் இருந்த போர்ச்சுக்கீசிய படையினரை மிக எளிதாகக் கட்டுக்குள் கொண்டுவந்தது. வெறும் 36 மணி நேரத்தில், 30 வீரர்கள் உயிரிழப்புடன் இந்தியாவிடம் சரணடைந்தது போர்த்துக்கீசியப்படை. இந்திய இராணுவத்தின், இந்தப் படை நடவடிக்கை 'ஆபரேஷன் விஜய்' என்கிற பெயரில் மேற்கொள்ளப்பட்டது. இது இந்தப் பெயரில் நடைபெறும் இரண்டாவது ராணுவ நடவடிக்கை. இதற்கு முன்பாக, காஷ்மீரை இந்தியாவுடன் இணைப்பதற்காக, இந்தப் பெயரில் ராணுவ நடவடிக்கை மேற்கொள்ளப்பட்டது குறிப்பிடத்தக்கது. யூனியன் பிரதேசமாக இருந்துவந்த கோவா, 1987-ம் ஆண்டு மே 30-ம் தேதி இந்தியாவின் 25 வது மாநிலமாக மாற்றப்பட்டது. இன்றோடு கோவா மாநிலமாக உருமாறி, 33 ஆண்டுகள் நிறைவடைந்துவிட்டன. தொடர்ந்து, கோவாவின் சட்டமன்ற, நாடாளுமன்ற அமைப்பு முறைகளைப் பற்றிப் பார்ப்போம்.

``வெட்டுக்கிளிகள் பனை ஓலை பச்சையத்தைக்கூட  அரித்துவிடும்!''- சோ.தர்மன்

கோவா இந்தியாவுடன் இணைக்கப்பட்டு யூனியன் பிரதேசமாக பின்பு அதன் (டையூ, டாமன் உட்பட) முதல் முதலமைச்சராக, கோவா சுதந்திரப் போராட்ட வீரரான தயானந்த் பந்தோட்கர் தேர்ந்தெடுக்கப்பட்டார். இவர் 'மகாராஷ்டிரவாதி கோமந்தக்' எனும் கட்சியை நடத்தி வந்தார். இது சுருக்கமாக, எம்.ஜி.பி என அழைக்கப்பட்டது. யூனியன் பிரதேசமாக இருந்த காலத்தில், கோவாவை மகாராஷ்டிராவுடன் இணைக்க வேண்டும் எனப் போராடியவர் தயானந்த் பந்தோட்கர். கோவா தனி மாநிலமாக இருக்கவேண்டும் என 'ஐக்கிய கோவன் கட்சி' போராடியது. தொடர்ந்து 1967-ல் நடந்த பொதுவாக்கெடுப்பில் கோவா தனி மாநிலமாக நீடிக்க வேண்டும் என்றே பெரும்பாலான மக்கள் வாக்களித்தனர். தொடர்ந்து, தயானந்த் பந்தோட்கர் தன்னுடைய கோரிக்கையைக் கைவிட்டார். ஆனால், 1963-ம் ஆண்டில் நடைபெற்ற முதல் சட்டமன்ற மற்றும் நாடாளுமன்றத்  தேர்தலில் மகாராஷ்டிரா இணைப்புக் கோரிக்கையை முன்வைத்தே தயானந்த் பந்தோட்கர் வெற்றி பெற்றார் என்பதும் குறிப்பிடத்தக்கது.

தயானந்த் பந்தோட்கர்
தயானந்த் பந்தோட்கர்

அவரைத் தொடர்ந்து, அவருடைய மகள், சசிகலா பந்தோட்கர் முதல்வராகப் பதவியேற்றார். அதே நேரத்தில், தனிக் கோவா கோரிக்கையை முன்வைத்த ஐக்கிய கோவன் கட்சியும் காங்கிரஸ் கட்சியும் கணிசமான இடங்களில் தங்களின் வெற்றியைப் பதிவு செய்து வந்தன. தொடர்ந்து, சசிகலா பந்தோட்கர் காங்கிரஸ் கட்சியில் இணைந்தது, கட்சியில் ஏற்பட்ட குழப்பம் ஆகியவற்றின் காரணமாக மகாராஷ்டிரவாதி கோமந்தக் கட்சி மிகப்பெரிய சரிவைக் கண்டது. மறுபுறம் காங்கிரஸ் கட்சியின் எழுச்சியும் இங்குதான் ஆரம்பிக்கிறது.

1990-களுக்குப் பிறகு பாரதிய ஜனதாக் கட்சியும் வளர்ச்சி பெற கோவை தேசியக் கட்சிகளின் கட்டுப்பாட்டுக்குள் செல்ல ஆரம்பித்தது. முதன்முதலில் 1994-ல் நடைபெற்ற சட்டமன்றத் தேர்தலில், மகாராஷ்டிரவாதி கோமந்தக் கட்சியுடன் கூட்டணி அமைத்து நான்கு இடங்களில் வெற்றி பெற்றது பா.ஜ.க. தொடர்ந்து அசுர வளர்ச்சியடைந்த பா.ஜ.க, வடக்கு மற்றும் தெற்கு கோவா, நாடாளுமன்றத் தொகுதிகளைக் கைப்பற்றி, மக்களவையில் தங்களின் வெற்றிக் கணக்கை 1999-ம் ஆண்டில் தொடங்கியது. தொடர்ந்து இருபது ஆண்டுகளாக வடக்கு கோவா தொகுதியில் பா.ஜ.கதான் வெற்றி பெற்று வருகிறது. தெற்கு கோவாவைப் பொறுத்தவரை, 1999-க்குப் பிறகு, 2014-ல் ஒருமுறை வெற்றி பெற்றிருக்கிறது. பெரும்பாலும் காங்கிரஸின் கோட்டையாகத்தான் தெற்கு கோவா தொகுதி விளங்கி வருகிறது. 

1999 சட்டமன்றத் தேர்தலில், கோவா மக்கள் காங்கிரஸ் கட்சி ஆட்சி அமைக்க உதவி புரிந்ததுடன், சட்டமன்ற எதிர்க்கட்சியாகவும் அமர்ந்தது பா.ஜ.க. தொடர்ந்து காங்கிரஸ் கட்சியும் பிற மாநிலக் கட்சிகளும் மட்டுமே ஆட்சி புரிந்த வந்த கோவா மண்ணில் முதல்முறையாக 2000-ம் ஆண்டில் ஆட்சிக் கட்டிலில் அமர்ந்தது பா.ஜ.க. மனோகர் பாரிக்கர் கோவாவின் முதல்வரானார். தொடர்ந்து, 2005-2012 காங்கிரஸ் கட்சியும், 2012-தற்போது வரை பா.ஜ.கட்சியும் ஆட்சிக் கட்டிலை அலங்கரித்து வருகின்றன.

மனோகர் பாரிக்கர்
மனோகர் பாரிக்கர்

மனோகர் பாரிக்கர் மத்திய பாதுகாப்புத் துறை அமைச்சராகவும் பணியாற்றியவர். 2014-ம் ஆண்டு தேர்தல் பிரசாரத்துக்கு, பிரதமர் வேட்பாளராக நரேந்திர மோடியின் பெயரை, கோவாவில் நடைபெற்ற தேசிய நிர்வாகக் கூட்டம் ஒன்றில், முன்மொழிந்தவரும் இவர்தான். கணையப் புற்று நோயின் காரணமாக, இவர் கடந்த ஆண்டு மார்ச் மாதம் 17-ம் தேதி மறைவுற, சாவந்த் கோவா சட்டமன்றத் தொகுதியில் போட்டியிட்டு வெற்றிபெற்ற, பிரமோத் சாவந்த் முதல்வராகப் பதவி ஏற்றார். தற்போது வரை கோவாவின் முதல்வர் பதவியில் இருப்பவர் அவர்தான்.

கோவாவுக்கெனப் பல்வேறு சிறப்புகள் இருக்கின்றன. தனிநபர் வருமானத்தில் மற்ற மாநிலங்களை விட கோவாதான் முதலிடத்தில் இருக்கிறது. இந்தியாவின் சுற்றுலாத் தலைநகராகவும் அதிக கனிம வளங்களைக் கொண்ட மாநிலமாகவும் கோவா திகழ்கிறது. மற்ற பெருநகரங்களில் அமலுக்கு வருவதற்கு முன்பாகவே 'டூவிலர் டாக்சி' போன்ற விஷயங்கள் அறிமுகமானதும் கோவாவில்தான். இந்தியாவிலேயே பொது சிவில் சட்டம் அமலில் இருப்பதும் ஆசியாவில் உள்ள ஒரே கடற்படை விமான அருங்காட்சியகம் இருப்பதும் கோவாவில் மட்டும்தான்.

அடுத்த கட்டுரைக்கு