Published:Updated:

`நாங்கள் இருக்கும்வரை ஒருவரைக்கூட வெளியில் அனுப்ப முடியாது’ - மம்தா பானர்ஜி திட்டவட்டம் #CAB

குடியுரிமைச் சட்டத் திருத்தத்தை தங்கள் மாநிலத்தில் செயல்படுத்த அனுமதிக்க மாட்டோம் என மேற்குவங்க முதல்வர் மம்தா பானர்ஜி அறிவித்துள்ளார்.

மம்தா பானர்ஜி
மம்தா பானர்ஜி

குடியுரிமைச் சட்டத் திருத்த மசோதா எதிர்க்கட்சிகளின் எதிர்ப்புக்கு மத்தியில் மக்களவையிலும் மாநிலங்களவையிலும் நிறைவேற்றப்பட்டு சட்டமாக்கப்பட்டுள்ளது. மத்திய அரசு கொண்டுவந்துள்ள இந்தச் சட்டத் திருத்தத்துக்குத் தேசிய அளவில் உள்ள பெரும்பாலான எதிர்க்கட்சிகள் கடும் எதிர்ப்பு தெரிவித்து வருகின்றன. மேலும், இதை எதிர்த்து பல்வேறு மாநிலங்களில் பொதுமக்களும் சாலையில் இறங்கி போராட்டம் நடத்தி வருகின்றனர்.

போராட்டம்
போராட்டம்

இந்நிலையில், இந்தச் சட்டத் திருத்தத்தை எங்கள் மாநிலத்துக்குள் அனுமதிக்க மாட்டோம் எனச் சில மாநில முதல்வர்கள் எதிர்ப்பு தெரிவித்துள்ளனர். கேரள முதல்வர் பினராயி விஜயன், மேற்குவங்க முதல்வர் மம்தா பானர்ஜி உட்பட காங்கிரஸ் ஆளும் மாநில முதல்வர்களும் கண்டனம் தெரிவித்துள்ளனர்.

`மத பன்மைத்துவம், பாரபட்சம், ஜனநாயகம்' - குடியுரிமை மசோதாவுக்கு அமெரிக்கா, ஐ.நா-வின் ரியாக்ஷன் என்ன?

இதற்கிடையில் தன் மாநிலத்தில் குடியுரிமை சட்டத்தைச் செயல்படுத்த முடியாது என மம்தா பானர்ஜி திட்டவட்டமாக அறிவித்துள்ளார். இது பற்றி செய்தியாளர்களிடம் பேசிய அவர், ``எந்தச் சூழ்நிலையிலும் மேற்குவங்கத்தில் குடியுரிமை திருத்தச் சட்டத்தைச் செயல்படுத்த முடியாது. இங்கு இந்தியக் குடிமக்கள் பதிவேட்டுக்கான கணக்கெடுப்பை நடத்த அனுமதிக்க மாட்டோம். மசோதா நாடாளுமன்றத்தில் நிறைவேற்றப் பட்டிருந்தாலும் அதை நாங்கள் ஏற்க மாட்டோம்.

மம்தா பானர்ஜி
மம்தா பானர்ஜி

மாநிலங்கள் இதை அமல்படுத்த வேண்டும் என மத்திய அரசு கட்டாயப்படுத்த முடியாது. மத்திய அரசு நிறைவேற்றியுள்ள இந்தச் சட்டம் இந்தியாவைப் பிரித்துவிடும். நாங்கள் ஆட்சியில் இருக்கும்வரை இந்த மாநிலத்தில் உள்ள ஒரு நபரைக்கூட நாட்டைவிட்டு வெளியில் அனுப்ப முடியாது. குடியுரிமை திருத்தச் சட்டத்தை எதிர்த்து மாநிலம் முழுவதும் தொடர் போராட்டம் நடத்தப்படும்” எனக் கூறியுள்ளார்.

இதையடுத்து குடியுரிமை சட்டத் திருத்தத்தை எதிர்த்து மேற்கு வங்க ஆளும் கட்சியான திரிணாமுல் காங்கிரஸ் சார்பில் வரும் திங்கள்கிழமை, செவ்வாய்க்கிழமை ஆகிய இரு தினங்களிலும் மாநிலம் தழுவிய கண்டன பேரணி நடைபெறும் என மம்தா பானர்ஜி அறிவித்துள்ளார்.