Published:Updated:

`தமிழும் சம்ஸ்கிருதமும் கலையின் இரண்டு கண்கள்’ - அமைச்சர் பாண்டியராஜன்

கலிலுல்லா.ச

`தமிழ் மொழி மற்றும் சம்ஸ்கிருதத்தில் எது பெரியது என்று ஆராய்வதை விட இரண்டிலும் உள்ள நல்ல விஷயங்களை எடுத்து கொள்ளும் பக்குவம் நமக்கு வேண்டும்' என தமிழ் வளர்ச்சி மற்றும் தொல்லியல் துறை அமைச்சர் க.பாண்டியராஜன் தெரிவித்துள்ளார்.

பாண்டியராஜன்
பாண்டியராஜன்

12-ம் வகுப்பு ஆங்கில பாடப் புத்தகத்தில் இடம்பெற்றுள்ள ஒரு தகவல், புதிய சர்ச்சையை ஏற்படுத்தியிருக்கிறது. அந்தப் புத்தகத்தின் 142-வது பக்கத்தில், மொழிகள் மற்றும் அவை பயன்பாட்டில் இருந்துவரும் வருடம் தொடர்பான தகவல்கள் அளிக்கப்பட்டு, அவற்றை வரிசைப்படுத்தும்படி பயிற்சி ஒன்று அளிக்கப்பட்டிருக்கிறது. அதில், `தமிழ் கி.மு 300 முதல் பயன்பாட்டில் இருந்து வருவதாகவும், சம்ஸ்கிருதம் கி.மு 2000 முதலே பயன்பாட்டில் இருந்துவருவதாகவும் தகவல் அளிக்கப்பட்டிருக்கிறது.

பாடபுத்தகம்
பாடபுத்தகம்

இந்தத் தகவல்தான் புதிய சர்ச்சையை ஏற்படுத்தியிருக்கிறது. இந்நிலையில் சென்னை ஆழ்வார்பேட்டையில் உள்ள தனியார் கலையரங்கில் நடைபெற்ற நிகழ்ச்சி ஒன்றில் தமிழ் வளர்ச்சித்துறை அமைச்சர் க.பாண்டியராஜன் கலந்துகொண்டார்.

அப்போது செய்தியாளர்களிடம் பேசிய அவர்,``தமிழ் சம்ஸ்கிருதம் ஆகிய இரண்டு மொழிகளும் அழகிய கலை வடிவத்தை உள்ளடக்கிய இரண்டு மொழிகள். அவற்றுள் எந்த மொழி தொன்மையானது என்று ஆராய்வதைவிட இரண்டு மொழிகளிலும் உள்ள சிறப்புகளை கருத்தில் கொள்ளவேண்டும்.

அமைச்சர் பாண்டியராஜன்
அமைச்சர் பாண்டியராஜன்

சம்ஸ்கிருதத்தால் தமிழ் அழிந்து விடும் என்ற நிலை இல்லை. சம்ஸ்கிருத்ததை விட தற்போது நம்முடைய வார்த்தை பிரயோகங்களில் ஆங்கில கலப்புதான் அதிகம் உள்ளது” என்று அவர் தெரிவித்தார். முன்னதாக நிகழ்ச்சியில் பேசிய அவர், `தமிழும் சம்ஸ்கிருதமும் கலையின் இரண்டு கண்கள். இரண்டையும் தனித்து பார்க்கமுடியாது’ என்றார்.