Published:Updated:

மிஸ்டர் கழுகு: தள்ளிப்போகிறதா அ.தி.மு.க பொதுக்குழு?

எடப்பாடியுடன் நாராயணன்
பிரீமியம் ஸ்டோரி
எடப்பாடியுடன் நாராயணன்

‘அடடே’ திட்டத்தில் எடப்பாடி!

மிஸ்டர் கழுகு: தள்ளிப்போகிறதா அ.தி.மு.க பொதுக்குழு?

‘அடடே’ திட்டத்தில் எடப்பாடி!

Published:Updated:
எடப்பாடியுடன் நாராயணன்
பிரீமியம் ஸ்டோரி
எடப்பாடியுடன் நாராயணன்

கையில் கேப்பசீனோ, கழுத்தில் புதிய ரக ஹெட்செட், தலையில் ஸ்டைலாக கூலர்ஸுடன் பெல்ட் பக்கிளில் இருந்த ஸ்டார் டிசைனைச் சுற்றிக்கொண்டே ‘‘ஹாய்... ஹவ் ஆர் யூ?’’ என்றபடி வந்து அமர்ந்தார் கழுகார். ‘‘இரண்டு தொகுதி இடைத்தேர்தல் வேலைகளும் ஆரம்பித்துவிட்டன. இன்னமும் பழைய கெட்டப்பில் போனால் எல்லோருக்கும் தெரிந்துவிடுகிறது. அதுதான் இப்படி மாடர்னாகத் திரிகிறேன்’’ என்றவரிடம், ‘‘இடைத்தேர்தலில் கழகங்கள் என்ன செய்கின்றன?’’ என்று கேட்டோம்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer
மிஸ்டர் கழுகு: தள்ளிப்போகிறதா   அ.தி.மு.க பொதுக்குழு?

‘‘அ.தி.மு.க., தி.மு.க இரண்டு கட்சிகளுமே வேட்பாளர்களையும், தொகுதிப் பொறுப்பாளர்களையும் அறிவித்துவிட்டன. நாங்குநேரி தொகுதியில் காங்கிரஸ் கட்சி வேட்பாளரைத் தேர்வுசெய்யவே திணறிக்கொண்டிருந்த நேரத்தில், அந்தத் தொகுதிக்கும் தி.மு.க சார்பில் பொறுப்பாளர்களை அறிவித்து கதர் சட்டையினரை ஆச்சர்யபடுத்தி விட்டனர். இரண்டில் ஒரு தொகுதியை வென்றாக வேண்டும் என்று அ.தி.மு.க தரப்பினர் முழுமூச்சில் இருக்கிறார்கள். பூத் கமிட்டிக்கு முதல் ரவுண்டிலே 20,000 வழங்கலாம் என்று ஆலோசனை நடத்திவருகிறார்கள். தி.மு.க-வினர் முதல் ரவுண்டில் 10,000 வழங்க முடிவு செய்துள்ளார்கள்.’’

‘‘காங்கிரஸ் கட்சியில் வேட்பாளர் அறிவிப்பில் ஏன் இந்த இழுபறி?’’

‘‘வேறென்ன... கரன்சிப் பிரச்னைதான்! இதுவரையில் தேர்தல்களில் செலவை தி.மு.க பார்த்துக்கொண்டது. ஆனால், இந்த முறை முழுச்செலவையும் காங்கிரஸே பார்க்க வேண்டும் என்று சொல்லிவிட்டனர். தன் அண்ணன் குமரி அனந்தனை விருப்பமனு கொடுக்கச் செய்த வசந்தகுமார், மறுபுறம் தன் மகனுக்கு வாய்ப்பு கேட்டு டெல்லி கதவைத் தட்டியுள்ளார். `ஊர்வசி’ சோப் செல்வராஜின் மகன் அமிர்தராஜ் சீட் வாங்கப் போராடினார். வாரிசுகளுக்கு சீட் இல்லை என்று காங்கிரஸ் கட்சி தீர்மானமாக இருக்கிறது. இந்தக் களேபரங்களால் வேட்பாளரை அறிவிப்பதில் இழுபறி.”

‘‘இடைத்தேர்தல் பட்ஜெட் எவ்வளவாம்?’’

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

‘‘இரண்டு கட்சிகளுமே தேர்தல் பட்ஜெட் ஐம்பது கோடி ரூபாய் எனக் குறித்துள்ளன. அ.தி.மு.க சட்டமன்ற உறுப்பினர்கள் கூட்டத்தில் எடப்பாடி பேசும்போது, ‘செலவுத்தொகையை, பொறுப்பாளர்கள் பார்த்துக்கொள்வார்கள். அதைப் பற்றி நீங்கள் கவலைப்படாமல் வேலை செய்யுங்கள். ஒவ்வொரு ஓட்டும் நமக்கு முக்கியம். ஆயுதபூஜை விடுமுறை வருகிறது என ஊருக்குக் கிளம்பிவிட வேண்டாம். நீங்கள் பணியாற்றும் இடத்திலேயே காருக்கு பூஜை போட்டுக்கொள்ளுங்கள்’ என்று கொஞ்சம் அதிரடியாகவே உத்தரவுகளைப் பிறப்பித்துள்ளார் எடப்பாடி.’’

ஓ.பி.எஸ்-ஸுடன் முத்தமிழ்செல்வன்
ஓ.பி.எஸ்-ஸுடன் முத்தமிழ்செல்வன்

‘‘கோபமாகப் பேசினாரோ?’’

‘‘அதெல்லாம் இல்லை. ‘நாம் செய்யும் சில தவறுகள்தான் தோல்விக்குக் காரணம். திட்டமிட்டு வேலையைப் பாருங்கள். ஒவ்வொரு வாக்கும் நமக்கு மிக முக்கியம்’ என்று வகுப்பெடுத்துள்ளார்.’’

‘‘பன்னீர் என்ன சொன்னாராம்?’’

‘‘அவர் எதுவும் சொல்லும் சூழலில் இல்லை. தனக்கு நெருக்கமானவர்களிடம்கூட, ‘திட்டமிட்டு என்னை ஓரம்கட்டு கிறார்கள். எதற்கு நான் ஒருங் கிணைப்பாளராக இருக்கிறேன்’ என்று வருத்தப்பட்டுள்ளார்.’’

‘‘கே.பி.முனுசாமியும் இந்தக் கூட்டத்தில் கலந்துகொள்ள வில்லையே?’’

மிஸ்டர் கழுகு: தள்ளிப்போகிறதா   அ.தி.மு.க பொதுக்குழு?

‘‘கூட்டத்தில் கலந்துகொண்ட பலரின் கேள்வியும் அதுவாகவே இருந்தது. ஆனால், ஒரு மாதத்துக்கு முன்பாக அவர் வெளியூர் செல்லும் பயணத்திட்டத்தை வகுத்துவிட்டதால், கூட்டத்தில் கலந்து கொள்ளவில்லை என்கிறார்கள். ஆனால், அவரும் பன்னீரைப் போன்று மனவருத்தத்தில்தான் இருக்கிறார். சசிகலாவை எதிர்த்துக் குரல்கொடுத்தவர்களில் அவரும் முக்கியமானவர். இப்போது சசிகலாவுடன் எடப்பாடி தரப்பு கைகோத்திருப்பது தெரிந்து அவர் அமைதியாக இருக்கிறார் என்கிறார்கள் அவருக்கு நெருக்கமானவர்கள்.’’

‘‘என்ன சொல்ல வருகிறீர்கள்?’’

சசிகலா
சசிகலா

‘‘சசிகலா தரப்புக்கும் எடப்பாடிக்கும் இடையே அண்டர்ஸ்டாண்டிங் இருக்கிறது. அ.தி.மு.க-வின் பொதுக்குழுக் கூட்டம் இந்த ஆண்டும் நடைபெறுவது சந்தேகம். இதற்கு எடப்பாடி தரப்பிலிருந்து முட்டுக்கட்டை போடப்படுகிறது. சசிகலா சிறையிலிருந்து வெளியே வரும் வரை பொதுக்குழுவைத் தள்ளிப்போட்டுவிட வேண்டும் என்று எடப்பாடி திட்டமிடுகிறார். சசிகலா வந்த பிறகு அவரை கட்சிக்குள் கொண்டுவந்து அவருக்கு ஒரு பதவியை பொதுக்குழுவை வைத்து உருவாக்கத் திட்டமிடுகிறார்.’’

‘‘பலே திட்டமாக இருக்கிறதே!’’

‘‘இந்த விஷயம் பன்னீருக்குத் தெரிந்துதான் கோபத்தில் இருக்கிறாராம். பொதுக்குழுவைத் தள்ளிப்போட தேர்தல் ஆணையத்திடம் காரணம் சொல்ல வேண்டும். அதற்கு கே.சி.பழனிசாமி தாக்கல் செய்துள்ள வழக்கை காரணமாக்கப் பார்க்கிறார்கள். இப்போது பொதுக்குழுவைக் கூட்டினால் தேவையில்லாத சர்ச்சை ஏற்படும். சசிகலா வந்த பிறகு நடத்தினால் பொதுச்செயலாளர் பதவியைப் பெற்றுவிடலாம் என்று ஒரு திட்டத்தில் இருக்கிறார் எடப்பாடி.’’

‘‘இதற்கு வாய்ப்பு இருக்கிறதா?’’

‘‘உங்களுக்குத் தெரியாததா... அரசியலில் எதற்குத்தான் வாய்ப்பில்லை!’’

‘‘அப்படியென்றால் தினகரன் நிலை?’’

“சசிகலா என்ன முடிவுசெய்கிறார் என்று பார்த்த பிறகே அவரின் மூவ் தெரியும் என்கிறார்கள். ஒருபோதும் அ.ம.மு.க-வைக் கலைக்கும் எண்ணம் அவரிடமில்லை. சசிகலாவே வெளியே வந்து கலைக்கச் சொன்னால்கூட அதற்கு தினகரன் ஒப்புக்கொள்ள மாட்டார் என்றே சொல்கிறார்கள்.’’

‘‘ரஜினி, பிரசாந்த் கிஷோர் சந்திப்பு?’’

‘‘கட்சி ஆரம்பிப்பதில் ரஜினி உறுதியாக இருக்கிறார். அதற்காக பலரிடமும் அவர் ஆலோசனை பெற்றுவருகிறார். படப்பிடிப்புக்காக மகாராஷ்டிரம் போயிருந்த நேரத்தில், அங்கு உள்ள மூத்த அரசியல் பிரமுகர் ஒருவர்தான் இந்தச் சந்திப்புக்கு ஏற்பாடு செய்துள்ளார். ஏற்கெனவே மக்கள் நீதி மய்யம், அ.தி.மு.க போன்ற கட்சிகளுக்கு பிரசாந்த் கிஷோர் பணியாற்றிவருவதாகக் கூறப்பட்ட நிலையில், இப்போது ரஜினிக்கு ஆலோசனை வழங்கியுள்ளது அரசியல் வட்டாரத்தில் பரபரப்பை ஏற்படுத்தியுள்ளது.”

‘‘கமலின் ரியாக்‌ஷன் என்னவோ?’’

“ரஜினியின் இந்தச் சந்திப்பை, கமல் தரப்பும் தி.மு.க-வும் உன்னிப்பாகக் கவனித்துவருகிறது. 2021-ம் ஆண்டு சட்டமன்றத் தேர்தலுக்கு முன்பு ரஜினியின் அரசியல் என்ட்ரி எப்படிப்பட்ட தாக்கத்தை ஏற்படுத்தும், யாருடன் அவர் கூட்டணி அமைப்பார் என்றெல்லாம் தீவிரமாக ஆலோசனை செய்துவருகிறார்கள்’’ என்றபடியே சிறகை விரித்தார்.

மிஸ்டர் கழுகு: தள்ளிப்போகிறதா   அ.தி.மு.க பொதுக்குழு?

* பரம்பிக்குளம் - ஆழியாறு திட்டம், முல்லை பெரியாறு என கேரளா மற்றும் தமிழகம் இடையே தீர்க்கப்படாமல் ஏகப்பட்ட நீர் பங்கீட்டுப் பிரச்னைகள் இருக்கின்றன. முல்லை பெரியாறு அணை ஷட்டர்கள் இயங்குவது, அதிகாரிகள் குடியிருப்புகள்... எனப் பல்வேறு விஷயங்களுக்கு கேரள அரசுதான் மின்சாரம் கொடுக்க வேண்டும். முல்லை பெரியாறு அணையின் நீர்மட்டத்தை உயர்த்தும் விவகாரம் கிளம்பியதும் மின்சார சப்ளையை நிறுத்திவிட்டார்கள். கடந்த பல வருடங்களாக டீசல் மோட்டார்களைப் பயன்படுத்தி சமாளித்துவருகிறார்கள். இந்தப் பிரச்னைக்கும் தீர்வில்லை.

இதையெல்லாம் பற்றிப் பேசுவதற்காக கேரள முதல்வரிடம் கேட்டபோது, ‘நான் சென்னை வரட்டுமா?’ என்று அவர் கேட்டாராம். ‘வேண்டாம். நானே அங்கு வருகிறேன்’ என்று கிளம்பிவிட்டார் எடப்பாடி. திருவனந்தபுரத்தில் செப்டம்பர் 25 அன்று நடந்த பேச்சுவார்த்தையின்போது, இரு முதல்வர்களும் மனம்விட்டுப் பேசினார்களாம். `ஆண்டுக்கு ஒருமுறை இரு மாநில தலைமைச் செயலாளர்கள் அளவில் ஆய்வுக்கூட்டம் நடத்தலாம்’ என்று கேரள தரப்பில் சொல்லப்பட்டுள்ளது. ‘ஆறு மாதங்களுக்கு ஒருமுறை ஆய்வுக்கூட்டம் நடத்துவோம். அப்போதுதான் பிரச்னைகள் சீக்கிரம் தீரும்’ என்று எடப்பாடி சொல்ல, அது ஏற்றுக்கொள்ளப்பட்டுள்ளது. முடிவில், இரு மாநில அதிகாரிகள் குழு அமைக்கப்பட்டுள்ளது.

‘முல்லை பெரியாறு அணை பராமரிப்புக்கான மின் சப்ளையை, ஒரு வாரத்துக்குள் சரிசெய்துவிடுகிறோம்’ என்று உறுதிகொடுத்துள்ளாராம் கேரள முதல்வர். 1989-க்குப் பிறகு, அதாவது 30 ஆண்டுகளுக்குப் பிறகு, இரு மாநில முதல்வர்கள் நேரடியாகப் பேச்சுவார்த்தை நடத்தியிருப்பது குறிப்பிடத்தக்கது.

* வீட்டுவசதி மற்றும் நகர்ப்புற வளர்ச்சித் துறையில் இரண்டு பெண் உயரதிகாரிகள் ‘கூடுதல்’ கமிஷன் அடிப்பதில் ‘டெக்னிக்கலாக’ வீடுகட்டி அடிக்கிறார்கள் என்று பல சீனியர் ஐ.ஏ.எஸ் அதிகாரிகளே புகார் வாசிக்கின்றனர். ஐந்து ஆண்டுகளாக அதே இடத்தில் விடாமல் ஒட்டிக்கொண்டிருக்கும் அவர்கள் டிரான்ஸ்ஃபர், டெண்டர் உள்ளிட்ட விஷயங்களில் துறையின் உச்ச அதிகாரியின் கவனத்துக்கே கொண்டு செல்லாமல் சாதித்துக்கொள்கிறார்கள் என்கிறது கோட்டை வட்டாரம். விஷயம் கசிந்து விஜிலென்ஸ் தரப்பில் ரகசியமாக விசாரிக்கப்போக... அள்ள அள்ளக் குறையாத ‘அமிர்த’சுரபியாக இவர்கள் கடந்த ஐந்து ஆண்டுகளில் குவித்த பல கோடி சொத்துகளைக் கணக்கிட்டு, வடிவேலு பாணியில் ‘உஷ்ஷ்’ என்று டயர்டாகிறார்களாம் அதிகாரிகள்!

* பிரியாணிக்குப் பெயர்போன ஊரில், மாலை 6 மணிக்குமேல் அந்தப் பெண் அமைச்சரைப் பிடிக்க முடியவில்லையாம். ``அலைபேசியில் அழைத்தாலும் கிடைக்க மாட்டார்’’ என்கிறார்கள். அதையும் மீறி பேசினால்... அம்மணியின் வாய் குழறுகிறதாம்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism