Published:Updated:

தேர்தல் மெகா ஆஃபர்! - தங்கக்காசு... மட்டன் பார்சல்... மளிகை டோக்கன்... கோயில் பணம்...

தேர்தல் மெகா ஆஃபர்
பிரீமியம் ஸ்டோரி
தேர்தல் மெகா ஆஃபர்

அமைச்சர்கள் மற்றும் முக்கியப் பிரமுகர்கள் தொகுதிகளில் ஓட்டுக்கு 1,000 ரூபாய், மற்ற தொகுதிகளில் 500 ரூபாய் என்பது ஆளுங்கட்சியின் டெலிவரி ஃபார்முலா.

தேர்தல் மெகா ஆஃபர்! - தங்கக்காசு... மட்டன் பார்சல்... மளிகை டோக்கன்... கோயில் பணம்...

அமைச்சர்கள் மற்றும் முக்கியப் பிரமுகர்கள் தொகுதிகளில் ஓட்டுக்கு 1,000 ரூபாய், மற்ற தொகுதிகளில் 500 ரூபாய் என்பது ஆளுங்கட்சியின் டெலிவரி ஃபார்முலா.

Published:Updated:
தேர்தல் மெகா ஆஃபர்
பிரீமியம் ஸ்டோரி
தேர்தல் மெகா ஆஃபர்

ஒரு மாத காலமாக தமிழகத்தை அனல் பறக்கவைத்த சட்டமன்றத் தேர்தல் நடந்து ஓய்ந்துவிட்டது. தலைவர்களின் சூறாவளிப் பிரசாரம், ரெய்டு காட்சிகள், தேர்தல் ஆணையத்தின் கெடுபிடிகள் என எல்லாவற்றையும் தாண்டி, வாக்காளர்களிடம் பாதிப்பை ஏற்படுத்தும்விதமாக ‘பணம்’ என்ற பிரம்மாஸ்திரத்தை ஏவியிருக்கின்றன கட்சிகள். `தி.மு.க-வும், அ.தி.மு.க-வும்தான் இந்த அஸ்திரங்களை ஏவும்’ என்ற நினைப்பை இம்முறை இதரக் கட்சிகள் உடைத்திருக்கின்றன. ஊருக்கே உபதேசம் செய்யும் பா.ஜ.க., வாக்காளர்களுக்குத் தங்கக்காசு வழங்குவதில் ஆரம்பித்து, அச்சுறுத்தல் செய்வது வரை தன் அதிகாரத்தைவைத்து தாண்டவமாடியிருக்கிறது.

டெலிவரி ஃபார்முலா

கொரோனா நாள்களில் நிறைய பகுதிகளில் மளிகைச் சாமான்களை விநியோகம் செய்வதற்கு மகளிர் சுய உதவிக் குழுக்கள், தெருக்களில் இருக்கும் நலச் சங்கங்கள் போன்றவற்றை அரசியல்வாதிகள் பயன்படுத்தினர். கட்சிக்காரர்கள் மூலம் வீடு வீடாகச் சென்று ஓட்டுக்குப் பணம் தந்தால் பிரச்னையாகும் என நினைத்த நகர்ப்புற ஏரியாக்களில் இவர்களைப் பயன்படுத்திக் கொண்டனர். பணம் தருவது, டோக்கன் விநியோகம் செய்வது என இவர்கள் கச்சிதமாக முடித்தனர்.

அமைச்சர்கள் மற்றும் முக்கியப் பிரமுகர்கள் தொகுதிகளில் ஓட்டுக்கு 1,000 ரூபாய், மற்ற தொகுதிகளில் 500 ரூபாய் என்பது ஆளுங்கட்சியின் டெலிவரி ஃபார்முலா. ஓட்டு வாங்குவதில் சிக்கல் ஏற்படும் என நினைக்கும் ஏரியாக்களில் இந்த ஆஃபர் அதிகமானது. விழுப்புரம் மாவட்டத்தில் பெரும்பாலான தொகுதிகளில் இந்த ஏற்பாட்டைக் கவனித்துக்கொண்டது அமைச்சர் சி.வி.சண்முகம் தரப்பு. விழுப்புரம் தொகுதியில் ஓட்டுக்கு 1,000 ரூபாய் கொடுத்தனர். கூடவே, வீட்டுக்கு ஒரு மளிகை டோக்கனை விநியோகித்தனர். ‘குறிப்பிட்ட சில மளிகைக் கடைகளில் இதைக் கொடுத்து, 2,500 ரூபாய் பெறுமானமுள்ள மளிகைப் பொருள்களை வாங்கிக்கொள்ளலாம்’ என்று உறுதியளித்துச் சென்றனர். திருவொற்றியூர், ராயபுரம், ராஜபாளையம் ஆகிய தொகுதிகளிலும் இந்த மளிகை டோக்கன் ஃபார்முலாவை அ.தி.மு.க பின்பற்றியது.

பிடிபட்ட போலி டோக்கன்!

தமிழகத்திலேயே சென்னை, கோவைக்கு அடுத்து அதிகம் பணம் பிடிபட்டது சேலத்தில்தான். இருந்தாலும் அங்கும் பணம் விளையாடியது. கூடவே போலி டோக்கன்களும்! சேலம் மாவட்டத்திலுள்ள 11 சட்டமன்றத் தொகுதிகளிலும் ஏப்ரல் 5-ம் தேதி மதியத்திலிருந்து, எம்.ஜி.ஆர், ஜெயலலிதா, இரட்டை இலை படம் போட்ட டோக்கன்கள் மற்றும் ஜெயலலிதா, இரட்டை இலை படம் போட்ட டோக்கன்கள் என இரு வகையான டோக்கன்களை அ.தி.மு.க-வினர் விநியோகித்தனர். வாக்குப்பதிவு முடிந்து இரு தினங்கள் கழித்து சூப்பர் மார்க்கெட்களில் கொடுத்தால், எம்.ஜி.ஆர்., ஜெயலலிதா, இரட்டை இலை படம் போட்ட டோக்கன்களுக்கு 5,000 ரூபாய் மதிப்புள்ள பரிசுப் பொருள்களும், ஜெயலலிதா, இரட்டை இலை படம் போட்ட டோக்கன்களுக்கு 2,000 ரூபாய் மதிப்புள்ள பரிசுப் பொருள்களும் வழங்குவதாகக் கூறப்பட்டது.

இந்த டோக்கன் விநியோகம் தொடர்பாக தி.மு.க-வினர் மாவட்ட தேர்தல் கன்ட்ரோல் ரூமுக்குத் தகவல் கொடுத்தனர். ஆனால், டோக்கன் விநியோகம் முடிந்த பிறகே பறக்கும் படை சம்பவ இடங்களுக்கு வந்தது. சேலம் நான்கு ரோடு நாராயண பிள்ளை நகரில் டோக்கன் விநியோகம் செய்தவர்களை தி.மு.க-வினரே பிடித்து தேர்தல் பறக்கும் படையிடம் ஒப்படைத்தனர். ‘‘இந்த டோக்கனை நம்பி ஏமாறாதீர்கள்’’ எனத் தேர்தல் அதிகாரிகளே பேட்டி கொடுத்தனர்.

கெங்கவல்லி தொகுதியில் வேறுவிதமான டோக்கன் தரப்பட்டது. “டோக்கனுக்கு ஏற்றாற்போல வெள்ளிக்கொலுசு தருகிறோம். பட்டுப்புடவை தருகிறோம்” என்று அ.தி.மு.க-வினர் அளந்துவிட்டதைப் பார்த்து வாக்காளர்கள் வாய்பிளந்தனர். டோக்கன் விநியோகத்தைத் தடுக்கக் கோரி கெங்கவல்லி தி.மு.க வேட்பாளர் ரேகா ப்ரியதர்ஷினி சாலைமறியல் செய்ததால் பரபரப்பு ஏற்பட்டது. தேர்தல் பறக்கும் படையினர் வருவதற்குள் டோக்கன் விநியோகத்தை முடித்துக் கொண்டு அ.தி.மு.க-வினர் பறந்துவிட்டனர்.

தேர்தல் மெகா ஆஃபர்! - தங்கக்காசு... மட்டன் பார்சல்... மளிகை டோக்கன்... கோயில் பணம்...

மட்டன் பார்சல்!

சென்னையின் வில்லிவாக்கம், விருகம்பாக்கம் தொகுதிகளில் அ.தி.மு.க-வினர் ஒருபடி முன்னேறிப் போய் புதுமை செய்தனர். வீடு வீடாக ஓட்டுக்குப் பணம் தரும்போது, வீட்டுக்கு ஒரு டோக்கனை விநியோகித்தனர். ‘‘இந்த டோக்கனைக் குறிப்பிட்ட கறிக்கடையில் கொண்டு போய்க் கொடுத்தால் 700 ரூபாய் பெறுமானமுள்ள ஒரு கிலோ ஆட்டுக்கறி கிடைக்கும்’’ என்றனர். இதனால் கறிக்கடைகளில் எப்போதும் இல்லாத கூட்டம். தேர்தலுக்கு முந்தைய ஞாயிற்றுக்கிழமை அங்கெல்லாம் பல வீதிகளில் கறிச் சமையல் வாசம் மணமணத்தது.

“பணத்தை வாங்கிக் கொடுங்க!”

ஒரத்தநாடு தொகுதியில் அ.தி.மு.க துணை ஒருங்கிணைப்பாளர் வைத்திலிங்கம் போட்டியிடுகிறார். அங்கு ஓட்டுக்கு 2,000 ரூபாய் வீதம் பணப் பட்டுவாடா நடந்தது. இதில் பேய்கரம்பன்கோட்டை பகுதியில் தி.மு.க வாக்காளர்களை ஒதுக்கிவிட்டு பணம் கொடுத்துள்ளனர். அங்குள்ள சில பெண்கள் ‘எங்களுக்குப் பணம் வரவில்லை’ என்று ரகளையில் ஈடுபட்டதால், அவசர அவசரமாக ஒரு மூட்டையில் பணத்தை எடுத்து வந்து அவர்களுக்கும் கொடுத்தது அ.தி.மு.க தரப்பு. இங்கு அ.ம.மு.க வேட்பாளர் சேகர் தரப்பிலும் பணம் விநியோகிக்கப்பட்டது.

நாமக்கல் மாவட்டம், ராசிபுரம் தொகுதியில் தி.மு.க சார்பில் 500 ரூபாயும், அ.தி.மு.க சார்பில் 1,000 ரூபாயும் அளிக்கப்பட்டிருக்கிறது. விநியோகம் பரபரப்பாக நடந்த வேளையில், ஏப்ரல் 5-ம் தேதி காலை ராசிபுரம் டு புதுப்பட்டி சாலையிலுள்ள பட்டணம் கிராமத்தில், 50-க்கும் மேற்பட்ட மக்கள் திடீரென சாலைமறியல் செய்தனர். போலீஸாரும் தேர்தல் பறக்கும் படையினரும் பதறியடித்துக் கொண்டு வந்து விசாரித்தனர். ‘‘குறிப்பிட்ட சிலருக்கு மட்டும் அ.தி.மு.க-வுல ஓட்டுக்குப் பணம் கொடுத்துட்டு, எங்களை ஏமாத்திட்டாங்க. எங்களுக்குப் பணத்தை வாங்கிக் கொடுங்க” என்று போராட்டக்காரர்கள் சொல்லவும், போலீஸார் விக்கித்துவிட்டனர். பெரும்பாடுபட்டு கூட்டத்தைக் கலைத்திருக்கிறது போலீஸ்.

கோயில் பணம்... பா.ஜ.க புது ரூட்!

கன்னியாகுமரி தொகுதியின் மறைந்த எம்.பி வசந்தகுமார், ஓட்டுக் கேட்கச் செல்லும்போது ஒவ்வொரு கிராமக் கோயிலுக்கும் நிதியுதவி செய்வது வழக்கம். அதுதான் 2019 நாடாளுமன்றத் தேர்தலின்போது இரண்டரை லட்சம் வாக்குகள் வித்தியாசத்தில் அவர் வெற்றிபெறுவதற்குத் துணை புரிந்தது. அந்த பாணியை இப்போது கையில் எடுத்த பா.ஜ.க., கிராமங்களிலுள்ள கோயில் வளர்ச்சிக்காக 15,000 ரூபாய் முதல் ஒரு லட்சம் ரூபாய் வரை வாரி வழங்கியிருக்கிறது. `கிராமக் கோயில்களை குறிவைத்து பணப்பட்டுவாடா செய்ததால், கன்னியாகுமரி எம்.பி தொகுதி இடைத்தேர்தலில் வெற்றியடைந்துவிடலாம்’ என்று பொன்.ராதாகிருஷ்ணன் தரப்பு நம்பிக்கொண்டிருக்கிறதாம். காங்கிரஸ் தரப்பிலும் இதேபோல தாராளம் காட்டியிருக்கிறார்கள்.

காங்கிரஸ் - பா.ஜ.க இடையே நேரடி மோதல் நிகழும் ஊட்டி தொகுதியில் தாமரையை மலரச் செய்ய, கர்நாடக பா.ஜ.க நிர்வாகிகள் குழு ஊட்டியில் முகாமிட்டது. ஊட்டியில் செயல்பட்டு வரும் கர்நாடக மாநிலத்தைச் சேர்ந்தவரின் ஒரு தனியார் கல்வி நிறுவனம், ஒரு தனியார் நட்சத்திர தங்கும் விடுதி ஆகியவற்றைத் தங்கள் கட்டுப்பாட்டில் பா.ஜ.க நிர்வாகிகள் எடுத்தனர். ஒவ்வொரு கிராமத்திலிருந்தும் நம்பிக்கையான இரண்டு பேரைத் தேர்ந்தெடுத்து, அவர்கள் மூலமாக கிராமங்களில் பணப்பட்டுவாவை நடத்தினர்.

சென்னை துறைமுகம் தொகுதியில் ஓட்டுக்கு 1,000 ரூபாய் பணப்பட்டுவாடாவை பகலிலேயே நடத்தி முடித்தது பா.ஜ.க. இதை பா.ஜ.க தேர்தல் அலுவலகத்தில் வைத்தே பலருக்குக் கொடுத்ததுதான் ஹைலைட். இதை முடித்துவிட்டு, ‘தொகுதிக்குள் பணப்பட்டுவாடா அதிகரிக்க வாய்ப்பிருக்கிறது. துணை ராணுவப்படை பாதுகாப்பு வேண்டும்’ என பா.ஜ.க வேட்பாளர் வினோஜ் பி. செல்வம் தரப்பு மத்திய உள்துறையிடம் கேட்டதுதான் காமெடி.

தேர்தல் மெகா ஆஃபர்! - தங்கக்காசு... மட்டன் பார்சல்... மளிகை டோக்கன்... கோயில் பணம்...

மோடி படத்துடன் தங்கக்காசு!

புதுச்சேரியில் காரைக்கால் மாவட்டம், திருநள்ளாறு தொகுதியில் பா.ஜ.க சார்பில் போட்டியிடும் கோடீஸ்வரரான ராஜசேகரன் சார்பில் பெண் வாக்காளர்களுக்கு தலா ஒரு கிராம் தங்கக்காசும், ஆண் வாக்காளர்களுக்கு தலா 2,000 ரூபாயும் வழங்கியிருக்கிறார்கள். ஒரு வீட்டில் நான்கு பெண்கள் இருந்தாலும் நான்கு தங்கக்காசுகள் தந்துள்ளனர். சுரக்குடி கிராமம் அருகே தங்கக்காசுகளை பா.ஜ.க-வினர் விநியோகம் செய்து கொண்டிருந்தபோது, பறக்கும் படை அதிகாரிகள் யதேச்சையாக வந்துள்ளனர். பதறியடித்துக் கொண்டு தங்கக்காசுகளை அங்கேயே போட்டுவிட்டுப் பறந்தது பா.ஜ.க தரப்பு. தாமரை சின்னத்துடன் பிரதமர் மோடியின் படம் அச்சிட்ட அட்டை, ஒரு தங்கக்காசு மற்றும் 2,000 ரூபாய் பணம் வீதம் ஒரு பிளாஸ்டிக் கவரில் வைக்கப்பட்டிருந்தது. இப்படி 141 தங்கக்காசுகளையும், 95,000 ரூபாய் ரொக்கத்தையும் பறக்கும் படை கைப்பற்றியிருக்கிறது. `வேட்பாளர் மீது வழக்கு பதிய வேண்டாம்’ என்று மேலிட உத்தரவு வந்ததால், அடையாளம் தெரியாத மர்ம நபர்கள் தங்கக் காசுகளைப் போட்டுவிட்டு சென்றதாகக் காவல்துறை வழக்கு பதிந்திருக்கிறது.

தேர்தல் மெகா ஆஃபர்! - தங்கக்காசு... மட்டன் பார்சல்... மளிகை டோக்கன்... கோயில் பணம்...

தட்டிக் கேட்டால் ரெய்டு

தளி சட்டமன்றத் தொகுதியில் பா.ஜ.க வேட்பாளர் நாகேஷ் குமாருக்கு ஆதரவாக, கர்நாடகா பா.ஜ.க அமைச்சர்கள் மூலம் பணப்பட்டுவாடா நடைபெறுவதாக, அத்தொகுதியின் பொறுப்பாளரும் இந்தியக் கம்யூனிஸ்ட் கட்சியின் தேசியக்குழு உறுப்பினருமான மகேந்திரன் ஏப்ரல் 3-ம் தேதி குற்றம் சாட்டியிருந்தார். பிரசாரத்தை முடித்துக்கொண்டு அன்றிரவு தேன்கனிக்கோட்டை பேருந்து நிலையம் எதிரே ஒரு லாட்ஜில் அறையெடுத்துத் தங்கியிருக்கிறார் மகேந்திரன். நள்ளிரவு ஒரு மணியளவில், துப்பாக்கி ஏந்திய மூன்று துணை ராணுவப் படையினருடன் ஐந்து வருமான வரித்துறை அதிகாரிகள் மகேந்திரன் தங்கியிருந்த அறைக் கதவைத் தட்டியிருக்கிறார்கள். கிட்டத்தட்ட மிரட்டும் தொனியில் விசாரணை நடத்தியபடி, அறையைச் சல்லடையாகத் துப்பாக்கி முனையில் சோதனையிட்டவர்களுக்கு எதுவும் சிக்கவில்லை. வருமான வரித்துறையிலிருந்து வந்த பீகாரைச் சேர்ந்த ஓர் அதிகாரி, “எவ்வளவு பணம் வைத்திருக்கிறீர்கள்?” என்றிருக்கிறார். தன் பாக்கெட்டிலிருந்து 337 ரூபாயை எடுத்துக் கொடுத்த மகேந்திரன், “கைச்செலவுக்காக வைத்திருக்கிறேன்” என்று சிரித்தபடி சொல்லியிருக்கிறார். எதுவும் சிக்காத ஏமாற்றத்துடன் அவர்கள் வெளியேறினர். “பா.ஜ.க பணம் கொடுக்கிறது என்று பேசினாலே சோதனையா?’ என்று தோழர்கள் கொதித்தெழ, ஏரியாவே பரபரப்பாகிவிட்டது.

தேர்தல் மெகா ஆஃபர்! - தங்கக்காசு... மட்டன் பார்சல்... மளிகை டோக்கன்... கோயில் பணம்...

ஈடுகொடுத்த தி.மு.க!

பல தொகுதிகளில் ஆளுங்கட்சியினரைப் போலவே தி.மு.க வேட்பாளர்களும் சளைக்காமல் பணத்தை இறைத்தனர். சென்னை தி.நகர் தொகுதி தி.மு.க வேட்பாளர் ஜெ.கருணாநிதி சார்பில், ஒரு குடும்பத்துக்கு 1,000 ரூபாய் வீதம் கொடுத்திருக்கிறார்கள். சேப்பாக்கம்-திருவல்லிக்கேணியிலும் இதேபோல கொடுத்திருக்கிறார்கள். எல்லாவற்றையும் தூக்கிச் சாப்பிடும்விதமாக, ஸ்டாலின் போட்டியிடும் கொளத்தூர் தொகுதியில் வீடு வீடாகச் சென்று ஆதார் ஜெராக்ஸ் காப்பியை பெண்கள் வாங்கிச் சென்றனராம். அடுத்த அரை மணிநேரத்தில் குடும்பம் ஒன்றுக்கு மொத்தமாக 5,000 ரூபாய் தி.மு.க தரப்பில் வரவுவைக்கப்பட்டதாம். அமைச்சர் வேலுமணியின் தொண்டாமுத்தூர் தொகுதியிலும் ஐந்தாயிரம் ரூபாய் வரை அ.தி.மு.க தரப்பில் கொடுக்கப்பட்டுள்ளது.

ஆள், ஆட்சி, அதிகாரத்தை வைத்துக்கொண்டு டெல்லியும் தன் பங்குக்குத் தாண்டவமாடியிருக்கிறது. மக்கள் தீர்ப்பு என்னவென்பது மே 2-ம் தேதி தெரிந்துவிடும்.

******

சிக்கிய ஆவணங்கள்... கவலையில் தி.மு.க தலைமை!

ஏப்ரல் 2-ம் தேதி, தமிழகம் முழுவதும் தி.மு.க-வுக்கு நெருக்கமான 28 இடங்களில் வருமான வரித்துறை அதிகாரிகள் சோதனை நடத்தினர். குறிப்பாக ஸ்டாலின் மகள் செந்தாமரை சபரீசன் வீடு, கரூர் தி.மு.க வேட்பாளர் செந்தில் பாலாஜிக்குச் சொந்தமான இடங்கள், திருவண்ணாமலை தி.மு.க எம்.பி அண்ணாதுரைக்குச் சொந்தமான இடங்களில் ரெய்டு காட்சிகள் அரங்கேறின.

இந்த ரெய்டு குறித்துப் பேசிய வருமான வரித்துறை அதிகாரிகள் சிலர், “தமிழக வருமான வரித்துறை டைரக்டர் ஜெனரல் (விசாரணை) பொறுப்பை தற்போது கூடுதல் பொறுப்பாக கொல்கத்தா வருமான வரித்துறையின் டைரக்டர் ஜெனரலான பிரவீன் கண்காணித்து வருகிறார். தமிழகம் மற்றும் புதுச்சேரியில் நடத்தப்படும் சோதனைகள் அனைத்தும் அவரது கட்டுப்பாட்டுக்குள்தான் வருகின்றன. புகார்களை மட்டும் அடிப்படையாகவைத்து ரெய்டுகளை நடத்துமாறு பிரவீன் கூறுவதுதான் பல்வேறு குழப்பங்களை ஏற்படுத்துகிறது. தி.மு.க தொடர்புடைய 28 இடங்களில் நடத்தப்பட்ட ரெய்டும், ஒரு போன் கால் அடிப்படையில் நடத்தப்பட்டதுதான். `அந்த போன் கால் உண்மையா... பொய்யா... யாரிடமிருந்து வந்தது?’ என்ற எந்த அடிப்படைத் தகவலையும் விசாரிக்கவில்லை. பணம் எங்கிருந்து செல்கிறது என்பதை முதலில் தெரிந்துகொண்டு அந்த இடத்தில் ரெய்டு நடத்துவதே வழக்கம். கடந்த நாடாளுமன்றத் தேர்தலில் துரைமுருகன் மகன் தரப்பில் பணம் சிக்கியது அப்படித்தான். ஆனால், இம்முறை அப்படி எந்தத் தகவலையும் உறுதி செய்யாமல், எங்கு சோதனை நடத்துவது என்று திட்டமிடாமல், நேரடியாக வீடுகளில் சோதனை நடத்தியது தவறு. அதனால்தான் பெரிதாக எதுவும் சிக்கவில்லை.

இதைவிடக் கொடுமை, கடந்த வாரம் புதுச்சேரியில் இரண்டு இடங்களில் ரெய்டு நடத்த மேலிடத்திலிருந்து உத்தரவு வந்தது. அதிகாரிகளும் ரெய்டுக்குத் தயாராகி, சம்பந்தப்பட்டவர்கள் குறித்து விசாரித்திருக்கிறார்கள். அப்போதுதான், சம்பந்தப்பட்டவர் பா.ஜ.க வேட்பாளர் என்ற விவரம் தெரியவந்தது. அவசர அவசரமாக அந்த ரெய்டு கேன்சல் செய்யப்பட்டது. தி.மு.க தரப்பு மீது நடத்தப்பட்ட ரெய்டின்போது எஸ்.என்.ஜே டிஸ்டில்லரீஸுக்குச் சொந்தமான இடங்களிலும் சோதனை நடைபெற்றது. இந்தச் சோதனைக்கு முதல் நாள்தான், அந்த மதுபான ஆலையின் உரிமையாளர் ஜெயமுருகன், கன்னியாகுமரியில் அமித் ஷாவைச் சந்தித்துப் பேசியிருக்கிறார். மறுநாளே அவரிடத்தில் ரெய்டு நடைபெற, டென்ஷனான ஜெயமுருகன் பா.ஜ.க தலைவர்களிடம் புலம்பியிருக்கிறார்’’’ என்றனர்.

தேர்தல் மெகா ஆஃபர்! - தங்கக்காசு... மட்டன் பார்சல்... மளிகை டோக்கன்... கோயில் பணம்...

சபரீசன் வீட்டில் 12 மணி நேரம் நடத்திய சோதனைக்குப் பிறகு அங்கு பணம் ஏதும் சிக்கவில்லை. வெறும் 1.36 லட்சம் ரூபாய் மட்டுமே இருந்ததாக எழுதிக் கொடுத்துவிட்டு வந்திருக்கிறது வருமான வரித்துறை. சபரீசன் வீட்டிலிருந்து சில ஆவணங்களையும், அவரின் செல்போனையும் வாங்கிச் சென்றதாகக் கூறப்படுகிறது. செந்தில் பாலாஜி வீட்டில் நடத்தப்பட்ட ரெய்டிலும் எதுவும் சிக்கவில்லை. ஆனால், அண்ணா நகரில் கட்டட நிறுவனத்துக்குச் சொந்தமான இடங்களில் நடந்த சோதனையில், தி.மு.க குடும்பப் பிரமுகருக்கு எதிரான சில ஆவணங்கள் சிக்கியதாம். ஈ.சி.ஆர் சாலையில் அந்தக் கட்டட நிறுவனம் பிரமாண்டமாகக் கட்டிவரும் அடுக்குமாடிக் கட்டடத்தில், குடும்பப் பிரமுகருக்கு இருக்கும் தொடர்புகளை அந்த ஆவணங்கள் வெளிச்சமாக்கினவாம். மும்பையைச் சேர்ந்த பிரபல ரியல் எஸ்டேட் நிறுவனம், தமிழகத்தில் பெரும் நிறுவனங்களுக்கு இடம் வாங்கிக்கொடுக்கும் பணியைச் செய்கிறது. இந்த நிறுவனத்துக்கும், ரெய்டில் சிக்கிய கட்டட நிறுவனத்துக்கும் இடையே நடந்த சில பரிமாற்றங்களையும் வருமான வரித்துறையினர் கண்டறிந்துள்ளனர். ஆவணங்கள் சிக்கியதால், அண்ணா நகர் கட்டட நிறுவனத்தின் மீது தி.மு.க தலைமை ஏகக் கடுப்பில் இருக்கிறதாம்.

நம்மிடம் பேசிய தி.மு.க தலைவர்கள் சிலர், “சபரீசன், த்ரீ ஸ்கொயர் பாலா, அண்ணாநகர் மோகன் ஆகிய மூவருமே கட்சியின் கரன்சி விவகாரங்களில் தொடர்புடையவர்கள். அவர்கள் வீடுகளில் பெரிதாக ஏதும் சிக்கவில்லை என்றாலும், அங்கேயிருந்து ஆவணங்களை எடுத்துச் சென்றதால், கட்சித் தலைமை கவலையில் உள்ளது. தி.மு.க-வுக்கு யாரெல்லாம் நிதி வழங்குவார்களோ, அவர்கள் வீடுகளிலெல்லாம் தொடர்ந்து சோதனை நடந்திருக்கிறது” என்றனர்.