மிஸ்டர் கழுகு: தமிழகத்துக்கு மூன்று மத்திய அமைச்சர்கள்

நிலம் கடந்த ‘நிவர்’ புயலின் சுவடாக, தூறல் தூறிக்கொண்டிருந்தது. குடையை மடக்கியபடி என்ட்ரி கொடுத்தார் கழுகார். சூடான இஞ்சி டீயைக் கழுகாருக்கு நீட்டிவிட்டு, ‘‘புயல் தடுப்புப் பணிகளில் முதல்வர் பழனிசாமி ஸ்கோர் செய்துவிட்டாரே?’’ என்றோம். டீயை உறிஞ்சிய கழுகார், ‘‘தன் குடையைத் தானே ஏந்தியபடி, செம்பரம்பாக்கம் ஏரியில் முதல்வர் நின்றிருந்ததைத்தானே சொல்கிறீர்?” என்று நக்கலடித்தவர், “முதல்வருக்குப் போட்டியாக துணை முதல்வர் பன்னீர்செல்வமும் முதல் ஆளாக தரமணியில் நிவாரணப் பொருள்களை அளித்தார். அதன் பிறகு, தி.மு.க தலைவர் ஸ்டாலினும் களமிறங்க வேண்டிய கட்டாயம் ஏற்பட்டதால், ‘மழையில் செல்ல வேண்டாம்’ என்று கிச்சன் கேபினெட் தடுத்தும் கேட்காமல், கொளத்தூர் தொகுதியில் நிவாரணம் கொடுக்கப் பயணமானாராம். எல்லாவற்றுக்கும் மேலாக பெரும் பாதிப்புகளை ஏற்படுத்தாமல் புயல் கரையைக் கடந்திருப்பது, அனை வருக்குமே ஆறுதலான விஷயம்’’ என்றபடி செய்திகளுக்குள் நுழைந்தார். . ‘‘பா.ம.க நிறுவனர் ராமதாஸ், ‘வன்னியர்களுக்குத் தனி இட ஒதுக்கீடு’ என்ற போராட்டத்தை அறிவித்திருப்பதே தேர்தல் அரசியலுக்கான முன்னோட்டம் என்கிறார்கள். மருத்துவரைச் சரிக்கட்ட பா.ஜ.க மூலமாக ரூட் போடுகிறாராம் எடப்பாடி. விரைவில் மத்திய அமைச்சரவை மாற்றியமைக்கப்படலாம். இந்த மாற்றத்தின்போது, மூன்று அமைச்சர் பதவிகள் தமிழகத்துக்கு ஒதுக்கப்படலாம். சட்டமன்றத் தேர்தல் நெருங்குவதால், கூட்டணிக் கட்சிகளை சரிக் கட்டவே பா.ஜ.க-வின் இந்த டீல் என்கிறார்கள். கோட்டா முறையில் இந்த இடங்கள் நிரப்பப்படவுள்ள தாகவும் தகவல்.’’

‘‘ஓ... யார் கோட்டாவில், யாருக்குப் பதவி கிடைக்கப் போகிறது?’’

‘‘பன்னீர் கோட்டாவில் அவர் மகனும், தேனி எம்.பி-யுமான ரவீந்திரநாத் குமாருக்கு மத்திய இணையமைச்சர் பொறுப்பு கிடைக்கலாம். நவம்பர் 21-ம் தேதி சென்னை வந்திருந்த அமித் ஷாவை ரவீந்திரநாத் தனிப்பட்டரீதியில் சந்தித்து பவ்யம் காட்டியதே இதற்கான பின்னணிதான் என்கிறார்கள். பிரதமர் மோடியின் குட் புக்கில் இடம்பெற்றிருக்கும் ஜி.கே.வாசனுக்கும் தனிப்பொறுப்புடன்கூடிய இலாகாவை ஒதுக்க டெல்லி முடிவெடுத்திருக்கிறதாம். காங்கிரஸ் வாக்குகளைப் பிரிப்பதற்கு வாசன் பயன்படுவார் என்பதால், இந்த மூவ் என்கிறது பா.ஜ.க வட்டாரம்.”

. ‘‘ஓஹோ... மற்றோர் அமைச்சர் பதவி யாருக்கு?’’

‘‘அநேகமாக அன்புமணிக்கு அமையலாம். தன்னுடைய கோட்டாவில் அன்புமணிக்கு வாய்ப்பளித்து, தைலாபுரத்தைச் சரிக்கட்ட எடப்பாடி தயாராகிவிட்டாராம். இதற்குப் பிரதி உபகாரமாக பா.ம.க-வுக்கு ஒதுக்கும் தொகுதிகளின் எண்ணிக்கையையும் கணிசமாகக் குறைத்துக்கொள்ள முடியும்; ‘வன்னியர் தனி இட ஒதுக்கீடு’ விவகாரத்தில் ராமதாஸின் குடைச்சலையும் குறைக்க முடியும் என்பதுதான் எடப்பாடியின் கணக்கு.”

‘‘சரிதான்...’’

‘‘உடல்நலக்குறைவால் மறைந்த சசிகலாவின் அண்ணனும், டி.டி.வி.தினகரனின் மாமனாருமான சுந்தரவதனத்தின் படத்திறப்பு விழா, சமீபத்தில் தஞ்சாவூரிலுள்ள டாக்டர் வெங்கடேஷ் வீட்டில் நடைபெற்றது. இதற்காக முதல்நாளே மன்னார்குடியிலிருந்து வந்த திவாகரன், விழாவுக்கான ஏற்பாடுகளை முன்னின்று செய்தார். இந்தச் சூழலில்தான், விழாவுக்கு தினகரன் வருவதற்கு அரை மணி நேரத்துக்கு முன்னதாகவே விருட்டென திவாகரன் கிளம்பிச் சென்றது உறவுகளுக்குள் இருக்கும் உரசலை வெளிப்படுத்தியது. ‘தினகரனின் மகள் திருமண வைபவத்திலாவது உறவுகளுக்குள் நிலவும் பூசல்கள் முடிவுக்கு வருமா?’ என்று மன்னார்குடி வகையறாக்கள் காத்திருக்கின்றன.”

‘‘தி.மு.க முகாமில் என்ன நடக்கிறது?’’

“தேர்தல் அறிக்கை தயாரிக்கும் குழு உறுப்பினரான கனிமொழி, குழுவின் எந்த ஆய்வுக் கூட்டங்களிலும் கலந்துகொள்ளாமல் தொடர்ந்து புறக்கணித்துவருகிறார். நவம்பர் 23-ம் தேதி நடந்த உயர்மட்ட செயல்திட்டக் குழுக் கூட்டத்திலும் அவர் கலந்துகொள்ளவில்லை. எல்லாம், தலைமை மீதான அதிருப்திதான் காரணமாம். ‘கட்சிக்காக கனிமொழி எவ்வளவோ செஞ்சிருக்காங்க. தென்மண்டல அமைப்பாளரா கூட பொறுப்பு கொடுக்காம கட்சிக்குள்ள அவரை ஓரங்கட்டுறாங்க. அப்புறம் எதுக்கு ரப்பர் ஸ்டாம்ப்போல இருக்கணும்னுதான் எந்தக் கூட்டத்துக்கும் அவங்க போறதில்லை’ என்று உஷ்ணமாகிறது மகளிரணி தரப்பு’’ என்ற கழுகாருக்கு, சூடான சமோசாக்களை தட்டில் வைத்து நீட்டினோம். சமோசாக்களை மென்ற படியே செய்திகளைத் தொடர்ந்தார்.

‘‘தாதுமணல் உற்பத்தியை மீண்டும் வி.வி.மினரல்ஸ் வைகுண்டராஜனுக்கே கொடுப்பதற்கான வேலைகள் கோட்டையில் ஆரம்பித்திருக்கின்றன. வி.வி.மினரல்ஸ் கம்பெனிக்கு எதிராக அரசுக்கு அளிக்கப்பட்ட ககன்தீப் சிங் பேடியின் அறிக்கை, மாவட்ட ஆட்சியர்கள் கொடுத்த அறிக்கைகளை ஆராயும் வேலைகள் நடக்கின்றன. சட்டமன்றத் தேர்தல் நெருங்குவதால், வெயிட்டான ஃபைல்களைத் தேடிப்பிடித்து கிளியர் செய்யும் வேலைகள் மும்முரமாகியிருக்கின்றனவாம்.”

‘‘அறுவடை சீஸன் அல்லவா!’’

‘‘இருக்கட்டும்... அமித் ஷா வருகைக்குப் பிறகு தமிழக பா.ஜ.க-வினர் உதறலில் இருக்கிறார்கள். நவம்பர் 21-ம் தேதி மாலை அமித் ஷாவுடன் நடந்த கட்சி நிர்வாகிகள் கூட்டத்தில், ‘நாம 28 தொகுதிகளில் தனித்து நின்னாலே ஜெயிச்சிடலாம்’ என்று சிலர் கூறியிருக்கிறார்கள். உடனே அமித் ஷா, ‘எந்தெந்தத் தொகுதிகள் அவை, அங்கெல்லாம் எந்தெந்தச் சமூகங்கள் பெரும்பான்மையாக இருக்கின்றன, யார் இப்போது எம்.எல்.ஏ?’ என்று அடுக்கடுக்கான கேள்விகளால் துளைத்துவிட்டாராம். ஆர்வக்கோளாறில் வாய்திறந்தவர்கள் திக்கித் திணறிவிட்டார்கள். ‘நான் ஏற்கெனவே பூத் அளவில் கட்சியைப் பலப்படுத்துங்கள் என்று சொன்னேன். அதையே நீங்கள் இன்னும் முழுமையாக முடிக்கவில்லை. முதலில் கட்சியை பலப்படுத்துங்கள். கூட்டணி குறித்தும், எந்தத் தொகுதியில் போட்டியிடுவது என்பது குறித்தும் நான் முடிவு செய்துகொள்கிறேன்’ என்று முகம் சிவந்த அமித் ஷாவைப் பார்த்து அரண்டுவிட்டார்கள் பா.ஜ.க நிர்வாகிகள். இந்த முறை 25 எம்.எல்.ஏ-க்களை சட்டமன்றத்துக்குள் அனுப்ப வேண்டும் என்று அமித் ஷா தீர்மானமாக இருக்கிறாராம். அதற்கேற்பதான் அவருடைய மூவ் இருக்கும் என்கிறது கமலாலய வட்டாரம்.’’

. ‘‘ஓஹோ...”

‘‘சென்னை எழும்பூரிலிருக்கும் கோ-ஆப்டெக்ஸ் தலைமையகத்தில், முக்கியப் பதவியிலிருக்கும் நான்கு பேர் வைத்ததுதான் சட்டமாக இருக்கிறதாம். இவர்களைத் தாண்டி துறையின் நிர்வாக இயக்குநரால்கூட எதுவும் செய்ய முடிவதில்லை என்கிறார்கள். நீண்டகாலமாக இந்த நான்கு பேரும் செய்துவரும் குளறுபடிகளால் நேர்மையான சில அதிகாரிகள் கொதித்துப்போயிருக்கிறார்கள். ‘தினமும் விற்பனை அங்காடிக்கு வருபவர்களுக்கு காபி வாங்கிக் கொடுக்கிறோம்’ என்று சொல்லியே மாதம் ஒன்றரை லட்சம் வரை பில் போடுகிறார்களாம். இதைத் தணிக்கைத் துறையினரும் கேள்வி கேட்காத வகையில், `சிறப்பு கவனிப்பும்’ நடக்கிறதாம்.

கோ-ஆப்டெக்ஸ் கடைகளுக்கு வாங்கப்படும் ஃபர்னிச்சர்கள், திரைச்சீலைகள் உட்பட அனைத்திலும் போலி பில்களின் ராஜ்ஜியம் கொடிகட்டிப் பறப்பதால், சிலந்திவலையில் மாட்டியதுபோல உழல்கிறது கோ-ஆப்டெக்ஸ் பட்டாம்பூச்சி’’ என்று கிளம்ப எழுந்த கழுகார்,

‘‘மதுரை பி.ஆர்.பி நிறுவனத்தின் கிரானைட் முறைகேடு தொடர்பாக தமிழக அரசுக்குப் பல்லாயிரம் கோடி ரூபாய் இழப்பு ஏற்பட்டதாக அறிக்கை கொடுத்திருந்தார் சகாயம் ஐ.ஏ.எஸ். இதைத் தொடர்ந்து, ‘கிரானைட் மாஃபியாக்களால் எனது உயிருக்கு அச்சுறுத்தல் இருக்கிறது. போதிய பாதுகாப்பு அளிக்க வேண்டும்’ என்று அரசுக்கு அவர் கடிதமும் எழுதியிருந்தார். இதையொட்டி, அவருக்கு போலீஸ் பாதுகாப்பு அளிக்கப்பட்டிருந்தது. இந்தநிலையில், சகாயத்துக்கு வழங்கப்பட்டிருந்த போலீஸ் பாதுகாப்பை அரசு திடீரென விலக்கிக்கொண்டிருப்பது ஐ.ஏ.எஸ் அதிகாரிகள் வட்டத்தில் சலசலப்பை ஏற்படுத்தியிருக்கிறது. ‘போலீஸ் பாதுகாப்பு விலக்கப்படுவதாக எந்தத் தகவலையும் அரசு சொல்லவில்லை. பழிவாங்கும் நோக்குடன் செயல்படுகிறார்கள்’ என்று குமுறுகிறது சகாயம் தரப்பு’’ என்றபடி சிறகுகளை விரித்தார் கழுகார்.

மிஸ்டர் கழுகு: தமிழகத்துக்கு மூன்று மத்திய அமைச்சர்கள்

கழுகார்

ஆ.முத்துக்குமார்Follow

க.பாலாஜி