Published:Updated:

மிஸ்டர் கழுகு: சசிகலா விடுதலை ட்வீட்... ‘ஸ்மைலி’ போட்ட ஓ.பி.எஸ்

மிஸ்டர் கழுகு
பிரீமியம் ஸ்டோரி
மிஸ்டர் கழுகு

தி.மு.க-வில் முன்னாள் அமைச்சர்கள் பலர்மீதும் வழக்குகள் நிலுவையிலிருக்கின்றன. தேர்தல் நெருங்கிவரும் நேரத்தில் இந்த வழக்குகளால் ஏடாகூடமாக எதுவும் நடந்துவிடுமோ என்று முன்னாள் மாண்புமிகுக்கள் அச்சத்திலிருக்கிறார்கள்.

மிஸ்டர் கழுகு: சசிகலா விடுதலை ட்வீட்... ‘ஸ்மைலி’ போட்ட ஓ.பி.எஸ்

தி.மு.க-வில் முன்னாள் அமைச்சர்கள் பலர்மீதும் வழக்குகள் நிலுவையிலிருக்கின்றன. தேர்தல் நெருங்கிவரும் நேரத்தில் இந்த வழக்குகளால் ஏடாகூடமாக எதுவும் நடந்துவிடுமோ என்று முன்னாள் மாண்புமிகுக்கள் அச்சத்திலிருக்கிறார்கள்.

Published:Updated:
மிஸ்டர் கழுகு
பிரீமியம் ஸ்டோரி
மிஸ்டர் கழுகு
“முகக்கவசத்தையே ஆயுதமாக்கிவிட்டாரே?” என்ற கேள்வியுடன் ஹேங்அவுட்ஸ் ஸ்கிரீனில் தோன்றினார் கழுகார். ஆர்வத்துடன், “யாரைச் சொல் கிறீர்?” என்றோம். மாம்பழத்துண்டுகளை சுவைத்தபடி நமது ஆர்வத்தை ரசித்த கழுகார், “அந்தக் கதையைப் பிறகு சொல்கிறேன்” என்று கண்டுக் கொள்ளாதவர்போல செய்திகளுக்குள் தாவினார்.

“சாத்தான்குளம் லாக்அப் மரணங்கள் அ.தி.மு.க-வுக்குக் கடும் சரிவை ஏற்படுத்திவிட்டன. எட்டு தென் மாவட்டங்களில் அ.தி.மு.க-வுக்கு எதிரான மனநிலை வலுத்திருப்பதாக முதல்வருக்கு உளவுத்துறை அறிக்கை அளித்திருக்கிறதாம். ஏற்கனவே புதிய தமிழகம் கிருஷ்ணசாமி முறைத்துக் கொண்டுவிட்டார். முக்குலத்தோர் சமுதாயத்தில் கணிசமானோர் சசிகலா மற்றும் டி.டி.வி.தினகரனை ஆதரிக்கின்றார்கள். இந்தநிலையில் சாத்தான்குளம் விவகாரமும் அரசியல்ரீதியாக அ.தி.மு.க-வை பதம்பார்த்திருப்பதாகக் கூறுகிறதாம் அந்த அறிக்கை.”

“முதல்வருக்கு கடைசி எச்சரிக்கை விடுத்துள்ளாரே தி.மு.க தலைவர் ஸ்டாலின்?”

“முதல்வர் எடப்பாடி பழனிசாமி கோவையில் செய்தியாளர்களை சந்தித்தபோது, ‘கொரோனா விவகாரத்தில் எதிர்க்கட்சித் தலைவர் அரசுக்கு என்ன ஆலோசனை சொல்லியிருக்கிறார்... நோயை வைத்து அரசியல் செய்கிறார் ஸ்டாலின்’ என்று காட்டமாகப் பேசினார். ஆனால், `தி.மு.க தரப்பிலிருந்து அரசுக்கு ஆலோசனை அளிக்கும்ரீதியாக நாள்தோறும் அறிக்கைகள் வெளியாகிக் கொண்டிருக்கின்றன. இதனால், முதல்வரின் வார்த்தைகள் ஸ்டாலினை அப்செட் ஆக்கிவிட்டன’ என்கிறார்கள். அதனால்தான், ‘கடைசி எச்சரிக்கை’ என்று காணொளி வெளியிட்டுள்ளார் ஸ்டாலின். ‘கடந்த மூன்று மாதங்களில் 50-க்கும் மேற்பட்ட அறிக்கைகளை நான் கொடுத்திருக்கிறேன். அதையெல்லாம் கவனத்தில் கொள்ளாமல் முதல்வர் பேசியிருக்கிறார்’ என்று நீண்ட பட்டியலையும் அந்தக் காணொளியில் புகார் வாசித்துள்ளார்.”

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

“ஆளுங்கட்சிக்கு எதிரான அஸ்திரம் என்று சொல்லும்!”

“அஸ்திரம் என்றதும் நினைவுக்கு வருகிறது. பன்னீர்செல்வம் உள்ளிட்ட 11 சட்டமன்ற உறுப்பினர்கள் வழக்கை மார்ச் மாதமே உச்ச நீதிமன்றம் முடித்துவைத்தது. ஆனால், அந்த வழக்குக்கு மீண்டும் உயிர்கொடுத்து சபாநாயகர் முடிவெடுக்க வேண்டிய நெருக்கடியையும் தி.மு.க உருவாக்கிவிட்டது. இதனால், தி.மு.க மீது எடப்பாடி ஏக கோபத்தில் இருக்கிறாராம்.”

“எடப்பாடியின் கடுப்புக்கு இதுவும் ஒரு காரணம் என்று சொல்லும்!”

“கடந்த வாரம் லஞ்ச ஒழிப்புத்துறையின் முக்கிய அதிகாரி ஒருவரை அழைத்த முதல்வர், தி.மு.க முன்னாள் அமைச்சர்கள் மீதான சொத்துக்குவிப்பு வழக்குகளின் நிலை குறித்துக் கேட்டிருக்கிறார். ‘சிறப்பு நீதிமன்றம், உயர் நீதிமன்றம், உச்ச நீதிமன்றம் என வழக்குகள் கிடப்பில் இருக்கின்றன’ என்று அந்த அதிகாரி பதில் சொல்லியிருக்கிறார். ‘கிடப்பில் கிடந்து என்ன பிரயோஜனம்... லஞ்ச ஒழிப்புத்துறை என்னதான் செய்துகொண்டிருக்கிறது? இந்த வழக்குகளையெல்லாம் வேகப்படுத்துங்கள். சட்டத்துறைக்குக் கடிதம் எழுதி வழக்குகளை விசாரணைக்குக் கொண்டுவாருங்கள்’ என்று முதல்வர் சீறினாராம்.”

“சரியான போட்டிதான்.”

ஸ்டாலின் - எடப்பாடி பழனிசாமி - வேலுமணி
ஸ்டாலின் - எடப்பாடி பழனிசாமி - வேலுமணி

“ஆமாம். தி.மு.க-வில் முன்னாள் அமைச்சர்கள் பலர்மீதும் வழக்குகள் நிலுவையிலிருக்கின்றன. தேர்தல் நெருங்கிவரும் நேரத்தில் இந்த வழக்குகளால் ஏடாகூடமாக எதுவும் நடந்துவிடுமோ என்று முன்னாள் மாண்புமிகுக்கள் அச்சத்திலிருக்கிறார்கள்” என்ற கழுகார், இஞ்சித் துண்டுகள் மிதக்கும் தாளித்த மோரை ரசித்துப் பருகியபடி தொடர்ந்தார்.

“கோவைக்குச் சுற்றுப்பயணம் செய்தபோது அமைச்சர் வேலுமணியுடன் ஒரு மணி நேரத்துக்கும் மேலாக முதல்வர் ஆலோசனை செய்துள்ளார். அப்போது சில முக்கிய முடிவுகள் எடுக்கப்பட்டனவாம். சாத்தான்குளம் விவகாரம் சர்வதேச அளவில் சமூக வலைதளங்களில் கவனம் பெற்றது முதல்வரை கவலைக்குள்ளாக்கியிருக்கிறது. ‘அ.தி.மு.க ஐ.டி விங்கை நான்கு மண்டலங்களாகப் பிரித்தும் பலன் இல்லை. இதற்கு பதிலடி தந்திருக்க வேண்டாமா?’ என்று ஐ.டி விங் நிர்வாகிகளைக் கடிந்தாராம் முதல்வர். அ.தி.மு.க ஆட்சியை உதயநிதி ஸ்டாலின் தொடர்ந்து தனது ட்விட்டர் பக்கத்தில் விமர்சிக்கிறார். இவர் பதிவுகளை வைரல் ஆக்குவதற்கென்றே தி.மு.க-வில் ஒரு தனி டீம் இயங்குகிறது. அ.தி.மு.க-வில் அப்படி எதுவுமே செய்யவில்லை என்று கடுப்பில் இருக்கிறாராம் முதல்வர்!”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

“உதயநிதி என்றதும்தான் நினைவுக்கு வருகிறது... தி.மு.க-வில் கனிமொழிக்கும் உதயநிதிக்கும் இடையே உரசல் ஏற்பட்டிருக்கிறதாமே?”

ஜெயராஜ் குடும்பத்துக்கு ஆறுதல் கூறும் உதயநிதி...
ஜெயராஜ் குடும்பத்துக்கு ஆறுதல் கூறும் உதயநிதி...

“உறவுக்குள் உரசலெல்லாம் சகஜம்தானே... சாத்தான்குளம் போலீஸ் தாக்குதலில் இறந்தவர்களின் குடும்பத்தினருக்கு நேரில் சென்று ஆறுதல் சொன்னார் கனிமொழி. மறுதினமே உதயநிதியும் நேரில் சென்று அந்தக் குடும்பத்தினருக்கு ஆறுதல் சொன்னார். இதில்தான் இருதரப்புக்கும் உரசல் ஏற்பட்டுள்ளதாம். ‘மக்கள் பிரதிநிதியாக இல்லாத உதயநிதி பயணிப்பதற்கு இ பாஸ் எப்படிக் கிடைத்தது? கனிமொழிக்கு எதிராகப் போட்டி அரசியல் செய்யவே ஸ்டாலின் குடும்பம் உதயநிதியை வம்படியாக அனுப்பியிருக்கிறது’ என கனிமொழியின் ஆதரவாளர்கள் கொந்தளிக்கிறார்கள்!”

கனிமொழி
கனிமொழி

“கனிமொழியின் ரியாக்‌ஷன் என்ன?”

“வழக்கம்போல அவர் எதையும் கண்டுகொள்ள வில்லையாம். சாத்தான்குளம் மரணத்துக்கு நீதி கேட்கும் வாசகத்தை முகக்கவசத்தில் அச்சடித்து, அவற்றை மக்களிடம் விநியோகிக்கச் சொல்லியிருக் கிறாராம். ‘தூத்துக்குடி மக்களிடம் இந்த முகக்கவசங்கள் அரசியல்ரீதியாக பெரிய மாற்றத்தை உருவாக்கும்; அக்கா முகக்கவசத்தையே ஆயுதமாக்கிவிட்டார்’ என்கிறார்கள் மகளிர் அணியினர்!”

“ஓஹோ... இதைத்தான் ஓப்பனிங் கொடுத்தீரோ?” என்றோம். புன்முறுவல் பூத்த கழுகார், டி.வி-யில் ஒளிபரப்பான ‘சாத்தான்குளம் ஜெயராஜ் குடும்பத்துக்கு ரஜினி அலைபேசியில் ஆறுதல்’ பிரேக்கிங் நியூஸை கவனித்தார். அவரது பார்வையை கவனித்த நாம், “ரஜினி ஆறுதல் தெரிவிக்கவில்லை என்கிறார்களே?” என்றோம்.

விருட்டெனத் திரும்பிய கழுகார், “அது தவறு. ஜெயராஜ் மருமகன் அகஸ்டின் மூலமாக அந்தக் குடும்பத்தினரிடம் ரஜினி பேசினாராம். கமலும் வீடியோ காலில் ஜெயராஜ் குடும்பத்தினருக்கு ஆறுதல் கூறியுள்ளார். `ரஜினிக்கு எதிராக தி.மு.க ஐ.டி விங்தான் இப்படிச் சர்ச்சையைக் கிளப்புகிறது’ என்று ரஜினி தரப்பு முஷ்டியை முறுக்குகிறது.”

“சசிகலா விவகாரமும் விஸ்வரூபம் எடுத்திருக்கிறதே?”

“ `க்ளைமாக்ஸ் நெருங்கிவிட்டது’ என்கிறார்கள். ‘பா.ஜ.க மேலிடத்தின் சம்மதம் பெறாமல் ஆச்சாரி ட்வீட் போட்டிருக்க மாட்டார்’ என்று சசிகலா தரப்பு நம்புகிறதாம். இந்தத் தகவல் வெளியே வந்ததும், சில அமைச்சர்கள் இடையே அலைபேசி உரையாடலும் நடந்திருக்கிறது. சசிகலாவுக்கு சென்னையில் சொந்தமாக வீடு இல்லை. ஜெயலலிதாவின் போயஸ் தோட்ட இல்லத்துக்கு எதிரே இருந்த மனையில் இப்போதுதான் வீடு கட்டுகிறார்கள். சசி விடுதலையாகி வந்தால் தங்குவதற்கு சென்னையின் மையப்பகுதியில் ஒரு வீட்டையும் பார்த்துவருகிறார்களாம்.”

ஓ.பன்னீர்செல்வம்
ஓ.பன்னீர்செல்வம்

“ஓ.பி.எஸ் ஹேப்பி என்கிறார்களே!”

“ஆச்சாரியின் ட்வீட்டை கட்சியின் சீனியர் ஒருவர் துணை முதல்வர் பன்னீர்செல்வத்துக்கு வாட்ஸ்அப்பில் அனுப்பினாராம். பதிலுக்கு, ‘ஸ்மைலி’ ரிப்ளையாக வந்ததாம். மேலும், சசிகலாவுக்கு வேண்டப்பட்ட மற்றும் தனக்கும் நெருக்கமான ஒருவரிடம் பேசும்போது, ‘சின்னம்மா மேல எப்பவுமே எனக்கு வருத்தம் இருந்ததில்லை. என் வருத்தமெல்லாம் தினகரன் மேலதான். அவர் என்னைச் சீண்டாம இருந்திருந்தா எடப்பாடி மாதிரியெல்லாம் துரோகம் பண்ணியிருக்க மாட்டேன். என் விசுவாசம் இந்த உலகத்துக்கே தெரியும். இப்பக்கூட சின்னம்மா வெளியே வர்றது எனக்கு ஹேப்பிதான்’ என்று சொன்னாராம்!” என்றபடி ஹேங்அவுட்ஸிலிருந்து விடைகொடுத்தார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism