Published:Updated:

மிஸ்டர் கழுகு: 11 பேர் பட்டியல் ரெடி! - களையெடுக்கத் தயாராகும் ஸ்டாலின்...

ஸ்டாலின்
பிரீமியம் ஸ்டோரி
ஸ்டாலின்

கள்ளக்குறிச்சி மாவட்டத்தில் அமைச்சர் பொன்முடியும், அவரின் மகன் கெளதம சிகாமணியும் கைகாட்டுபவர்களுக்குத்தான் டெண்டர் என்பது எழுதப்படாத விதியாக இருக்கிறதாம்.

மிஸ்டர் கழுகு: 11 பேர் பட்டியல் ரெடி! - களையெடுக்கத் தயாராகும் ஸ்டாலின்...

கள்ளக்குறிச்சி மாவட்டத்தில் அமைச்சர் பொன்முடியும், அவரின் மகன் கெளதம சிகாமணியும் கைகாட்டுபவர்களுக்குத்தான் டெண்டர் என்பது எழுதப்படாத விதியாக இருக்கிறதாம்.

Published:Updated:
ஸ்டாலின்
பிரீமியம் ஸ்டோரி
ஸ்டாலின்

‘‘கோட்டையிலிருந்து கிளம்பிவிட்டேன். சூடாக ஃபில்டர் காபியைத் தயார் செய்துவையும்’’ என்று கழுகாரிடமிருந்து ஃபேஸ்டைமில் தகவல் வந்தது. சற்று நேரத்தில் என்ட்ரி கொடுத்த கழுகாருக்கு பக்கோடாவுடன் காபியை நீட்டினோம். புன்முறுவலுடன் காபியைப் பருகிய கழுகார், “தி.மு.க தலைவர் ஸ்டாலின் கட்சிப் பணிகளில் வேகமெடுத்திருப்பது நிர்வாகிகள் பலரது வயிற்றில் புளியைக் கரைத்திருக்கிறது” என்றபடி செய்திகளுக்குள் நுழைந்தார்.

‘‘கட்சிப் பணிகளில் ஆர்வம்காட்டாத, சர்ச்சைகளில் அடிபடும் தி.மு.க மாவட்டச் செயலாளர்கள் மற்றும் மாவட்டப் பொறுப்பாளர்கள் 11 பேரின் பட்டியல் ஸ்டாலிடனிடம் இருக்கிறதாம். விரைவில் அவர்களைக் கட்டம்கட்டிவிட்டு, புதியவர்களை நியமிக்க முடிவெடுத்திருக்கிறதாம் அறிவாலயம். இந்த விஷயம் கசிந்ததால் கோஷ்டிகள் அதிகமிருக்கும் தஞ்சாவூர், கோவை, நெல்லை, தென்காசி, தூத்துக்குடி உள்ளிட்ட பல மாவட்டச் செயலாளர்களும் பொறுப்பாளர்களும் கிலியில் இருக்கிறார்கள்.”

பொன்முடி
பொன்முடி

‘‘சரிதான்... கள்ளக்குறிச்சி எம்.பி கெளதம சிகாமணியின் உதவியாளர் தி.மு.க-விலிருந்து சஸ்பெண்ட் செய்யப்பட்டிருக்கிறாரே?”

‘‘சில உள்குத்து வேலைகளின் வெளிப்பாடுதான் இந்த சஸ்பெண்ட் என்கிறார்கள். கள்ளக்குறிச்சி தெற்கு மாவட்டப் பொறுப்பாளர் வசந்தம் கார்த்திகேயனும், வடக்கு மாவட்டப் பொறுப்பாளர் உதயசூரியனும் எதிரும் புதிருமாக இருந்தவர்கள். அறிவாலயமே பலமுறை முயன்றும், இருவரையும் இணைக்க முடியவில்லை. இந்தநிலையில்தான் இப்போது அமைச்சர் பொன்முடியை எதிர்ப்பதற்காகவே திடீரென இருவரும் கரம் கோத்திருக்கிறார்களாம். கள்ளக்குறிச்சி மாவட்டத்தில் அமைச்சர் பொன்முடியும், அவரின் மகன் கெளதம சிகாமணியும் கைகாட்டுபவர்களுக்குத்தான் டெண்டர் என்பது எழுதப்படாத விதியாக இருக்கிறதாம். இதனால், வசந்தம் கார்த்திகேயனும் உதயசூரியனும் கடுப்பாகியிருக்கிறார்கள். இந்த ஆத்திரத்தில்தான், சமீபகாலமாக பொன்முடி கலந்துகொள்ளும் விழாக்களை இருவரும் வெளிப்படையாகவே புறக்கணிக்க ஆரம்பித்துவிட்டார்கள்.’’

‘‘ஓஹோ...’’

‘‘சமீபநாள்களாக உளுந்தூர்பேட்டை தி.மு.க எம்.எல்.ஏ மணிக்கண்ணனும் இவர்களுடன் சேர்ந்துகொள்ள, பொன்முடிக்கு எதிரான மூவரணி கள்ளக்குறிச்சியில் வலுப்பெற்றுள்ளது. இந்தச் சூழலில்தான், ‘கௌதம சிகாமணியின் உதவியாளரும், மாவட்ட தி.மு.க பொறியாளர் அணியின் அமைப்பாளருமான பாபு, டெண்டர் விஷயங்களில் அதிகாரிகளை மிரட்டுகிறார்’ என்று கட்சித் தலைமைக்கு மூவரணி போட்டுக்கொடுத்துவிட்டதாம். இதையடுத்தே, பாபு கட்டம்கட்டப்பட்டிருக்கிறார். இதனால், பொன்முடி கடும் அப்செட் என்கிறார்கள்!’’

உதயசூரியன், மணிக்கண்ணன், வசந்தம் கார்த்திகேயன்
உதயசூரியன், மணிக்கண்ணன், வசந்தம் கார்த்திகேயன்

‘‘சரிதான்... கோவை தென்றல் செல்வராஜின் பதவி பறிக்கப்பட்டதில் ஆர்.எஸ்.பாரதியின் பெயர் ஏன் உருளுகிறது?’’

‘‘2021 சட்டமன்றத் தேர்தலில் தோல்வியைத் தழுவிய பல தி.மு.க வேட்பாளர்கள், தங்கள் தோல்விக்கான காரணம் குறித்து தலைமைக்குப் புகார் அனுப்பியிருக்கிறார்கள். அந்தப் புகார்களை விசாரிக்கும் பொறுப்பு பாரதியிடம் ஒப்படைக்கப்பட்டிருக்கிறது. பொள்ளாச்சி தி.மு.க வேட்பாளர் வரதராஜன் கொடுத்த புகாரின் அடிப்படையில்தான், கோவை தெற்கு மாவட்டச் செயலாளர் தென்றல் செல்வராஜின் பதவியைப் பறிக்க பாரதி பரிந்துரைத்திருக்கிறார். மேலும், அந்தப் பதவியை வரதராஜனிடம் கொடுக்கவும் ஸ்டாலினிடம் சிபாரிசு செய்திருக்கிறார். ‘நடவடிக்கை எடுத்தது சரி... கட்சிக்குள் இப்போது வந்தவருக்கே சீட்டையும் கொடுத்து, அவருக்கு கட்சிப் பொறுப்பையும் கொடுத்தால் இத்தனை காலம் கட்சியிலிருந்தவர்கள் என்ன செய்வதாம்? ஆர்.எஸ்.பாரதி ஒருதலைபட்சமாகச் செயல்படுகிறார்’ என்று கோவையிலிருந்து தலைமைக்குக் கடிதங்கள் பறக்க ஆரம்பித்துள்ளன. இதனால், பாரதியின் விசாரணைப் படலத்தைத் தற்காலிகமாக நிறுத்திவைக்கச் சொல்லியிருக்கிறதாம் தலைமை.’’

‘‘ம்ம்... பட்ஜெட் கூட்டத்தொடர் தள்ளிப்போகலாம் என்கிறார்களே... நீர் ஏதும் கேள்விப்பட்டீரா?’’

மிஸ்டர் கழுகு: 11 பேர் பட்டியல் ரெடி! - களையெடுக்கத் தயாராகும் ஸ்டாலின்...

‘‘என் காதுக்கும் தகவல் வந்தது. பட்ஜெட் கூட்டத்தொடர் முடிந்தவுடன், முதல்வர் ஸ்டாலின் லண்டன் செல்வதாக இருந்தது. ஆனால், அந்தப் பயணத் திட்டத்தில் மாற்றம் இருக்கலாம் என்கிறார்கள்... ஜூலை 15-ம் தேதியே லண்டன் செல்ல இப்போது குடும்பத்தில் திட்டமிடுகிறார்களாம். இதற்காகத்தான், ஜூலை 3-ம் தேதி காலை சென்னை போரூரிலுள்ள தனியார் மருத்துவமனையில் முதல்வர் உடல் பரிசோதனை செய்துகொண்டார் என்றும் சொல்கிறார்கள். இந்தப் பரிசோதனை அறிக்கை லண்டனிலுள்ள மருத்துவமனைக்கு அனுப்பப்பட்டிருக்கிறதாம். இந்தப் பயணத் திட்டம் இறுதியானால், லண்டன் சென்றுவந்த பிறகு இந்த மாத இறுதியில் பட்ஜெட் கூட்டத்தொடரை ஆரம்பிக்கலாம் என்ற ஆலோசனையும் முதல்வர் அலுவலகத்தில் நடந்திருக்கிறது’’ என்ற கழுகாருக்கு நறுக்கிய கொய்யாப் பழங்களை நீட்டினோம். பழங்களைச் சுவைத்தபடி செய்திகளைத் தொடர்ந்தார் கழுகார்.

‘‘துணை நடிகை சாந்தினி கொடுத்த பாலியல் புகாரில் சிறையில் அடைக்கப்பட்ட முன்னாள் அமைச்சர் மணிகண்டனை, ஜூலை 4-ம் தேதி மதுரை அண்ணா நகரிலுள்ள அவரது வீட்டுக்கு அழைத்துவந்து விசாரணை நடத்தியிருக்கிறது போலீஸ். தான் வசித்த பகுதியில் குற்றவாளியாக அழைத்துவரப்பட்டதை நினைத்து மணிகண்டன் அப்போது தேம்பித் தேம்பி அழுதிருக்கிறார். தன் உறவுகளிடம், ‘உடுமலை ராதாகிருஷ்ணன் செய்த ஊழலை வெளியே சொன்னதால்தான், அந்த ஆத்திரத்தில் என்னை எடப்பாடி அண்ட் கோ பிரச்னையில் சிக்கவைத்துவிட்டது’ என்று புலம்பியிருக்கிறார்.’’

‘‘ம்ம்... தமிழ்நாடு காங்கிரஸ் கமிட்டியின் தலைவர் பதவிக்கு ரேஸ் ஆரம்பமாகிவிட்டது போலவே!’’

“ஆமாம். கார்த்தி சிதம்பரமும் திருநாவுக்கரசரும்தான் ரேஸில் முன்னிலையில் இருக்கிறார்கள். கடந்த வாரம் சத்தியமூர்த்தி பவனில் நடைபெற்ற நிர்வாகிகள் கூட்டத்தில், காங்கிரஸ் சட்டமன்றக்குழுத் தலைவர் செல்வபெருந்தகை பேசும்போது, ‘நம்மைவிட சீமான் கட்சி வேகமாக வளர்கிறது. சீமான் தமிழகத்துக்கே விஷச் செடியாக மாறிவருகிறார். அவருக்கு எதிரான அரசியலை நாம் வேகப்படுத்த வேண்டும்’ என்று சொன்னாராம். அப்போது மாநில காங்கிரஸ் கமிட்டி தலைவரான கே.எஸ்.அழகிரி குறுக்கிட்டு, ‘நம்ம கட்சிக்காரங்க ஒழுங்கா இருந்தாலே போதும். சமூக வலைதளங்கள்ல புகழ் தேடுனா போதும்னு பலரும் நினைக்கிறாங்க’ என்று மறைமுகமாகச் சிலரைக் குறிப்பிட்டு கடுகடுத்திருக்கிறார். கே.எஸ்.அழகிரியின் இந்த ஆத்திரத்துக்குக் காரணம், அறந்தாங்கிக்காரரின் டெல்லி மூவ்தானாம். கடந்த சில நாள்களாக டெல்லியில் முகாமிட்டு, தலைவர் பதவியைப் பிடிக்க திருநாவுக்கரசர் காய்நகர்த்திவருவதால் அழகிரி தரப்பு கோபத்தில் இருக்கிறது.’’

‘‘பாரதியார் பல்கலைக்கழக துறைத்தலைவர்கள் நியமனத்தில் பல்கலைக்கழக முக்கியப் புள்ளி ஒருவரும், பா.ஜ.க-வைச் சேர்ந்த முன்னாள் சிண்டிகேட் உறுப்பினருமான ஒருவரும் மோதிக்கொண்டார்கள். துறைத் தலைவர்கள் நியமனத்தில் விதிகள் மீறப்பட்டதாக பா.ஜ.க பிரமுகர் எழுப்பிய குற்றச்சாட்டை அந்த முக்கியப் புள்ளி மறுத்துவந்தார். இந்த விவகாரம் நீதிமன்றம் வரை சென்று, நியமனத்துக்குத் தடையும் விழுந்துவிட்டது. இதில் ஆத்திரமடைந்த முக்கியப் புள்ளி, பல்கலைக்கழகப் பதிவாளர் முருகன் ஓய்வுபெறும்போது, அவரை பா.ஜ.க-வில் இணையவைத்துவிட்டாராம். முருகனை பா.ஜ.க-வில் இணைத்தது மட்டுமல்லாமல், சிண்டிகேட் உறுப்பினராகவும் நியமித்துவிட்டால், பா.ஜ.க பிரமுகருக்குச் செக் வைக்கலாம் என்று அந்த முக்கியப் புள்ளி நினைத்திருக்கிறார். ஆனால், முருகன் கட்சியில் இணைந்தபோது துணைவேந்தர் அறையில் எடுக்கப்பட்ட படம் வெளியானதால், சிக்கலில் மாட்டியிருக்கிறது முக்கியப் புள்ளி தரப்பு” என்றபடி கிளம்ப ஆயத்தமான கழுகார்,

‘‘பாளையங்கோட்டை மத்தியச் சிறையில் சக கைதிகளால் அடித்துக் கொல்லப்பட்ட முத்து மனோவின் உடல் நீண்ட போராட்டத்துக்குப் பிறகு அடக்கம் செய்யப்பட்டிருக்கிறது. முத்து மனோ உடல்மீது தேவேந்திர குல வேளாளர் சமுதாயக் கொடியுடன் அரிவாள்வைத்து புதைத்திருக்கிறார்கள். அடக்கத்தின்போது அங்கிருந்த இளைஞர்கள் சிலர் ‘பழிக்குப் பழி வாங்குவோம்’ என்று சபதம் ஏற்றுள்ளதால், நெல்லை போலீஸார் உச்சகட்ட அலர்ட்டில் இருக்கிறார்கள்’’ என்றபடி சிறகுகளை விரித்தார்.

கழுகார் கான்ஃபிடென்ஷியல் நோட்

* மயிலாடுதுறை மாவட்ட முன்னாள் பிரதிநிதி ஒருவர், 10 கோடி ரூபாய் பெறுமானமுள்ள டெண்டர்களை எடுத்திருந்தாராம். இப்போது அந்த டெண்டர்களுக்கு சரியாக பில் பாஸ் செய்ய வேண்டுமென்றால், குறிப்பிட்ட தொகையை கமிஷனாகத் தர வேண்டும் என்று இந்நாள் பிரதிநிதி அழுத்தம் கொடுக்கிறாராம். கமிஷன் நிர்ணயிப்பதில் தகராறு நிலவுவதால், விவகாரம் பஞ்சாயத்தாகியிருக்கிறது.

* சென்னை மாநகரக் காவல்துறையில் கோலோச்சும் காவல்துறை உயரதிகாரி ஒருவருக்கு, தமிழ் அவ்வளவாகப் படிக்கத் தெரியாது. இதனால் தனக்கு வரும் கோப்புகள், குறிப்புகள் அனைத்தும் ஆங்கிலத்தில்தான் இருக்க வேண்டும் என்று கண்டிப்புடன் கூறியிருக்கிறாராம். இதனால், 50 வயதைத் தாண்டிய காக்கிகள் பலரும், ‘இந்த வயசுல எங்க போய் இங்கிலீஷ் கத்துக்குறது?’ என்று புலம்புகிறார்கள்.

* கோவையில் தற்போது சர்ச்சையில் சிக்கியுள்ள தேசியக் கட்சியின் பெண் பிரமுகர் ஒருவரைக் கண்டு தமிழக நிர்வாகிகளே அச்சப்படுகிறார்கள். குறுகியகாலத்தில் டெல்லியில் மூத்த தலைவர்களுடன் லாபி செய்ய ஆரம்பித்திருக்கும் அந்தப் பெண் பிரமுகர், ‘எனக்காக டெல்லியில் பேச எட்டு பேர் இருக்கிறார்கள். இங்கு பவராக இருக்கும் பெண் பிரமுகருக்கு நான்தான் எதிர்காலத்தில் போட்டி’ என்று தனக்கு நெருக்கமானவர்களிடம் கூறி மிரளவைக்கிறாராம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism