மதுரை தி.மு.க-வை ஆட்டிவைக்கிறதா... அழகிரி விசுவாசம்..?

அ வர் கட்சியிலிருந்து நீக்கப்பட்ட பிறகு, அவர் ஆதரவாளர்களில் பலர் ஸ்டாலின் அணிக்குள் தஞ்சமடையவே... ‘இனிமேல் ஒரே அணிதான். அது ஸ்டாலின் அணிதான்’ என்று அமைதி ஆன மதுரை தி.மு.க-வில், திடீர் பஞ்சாயத்து வெடித்திருக்கிறது. மாவட்டப் பொறுப்புக் குழு ஆலோசனைக் கூட்டத்தில் அடிதடி வரை போக, உடன்பிறப்புகள் அதிர்ந்து கிடக்கிறார்கள்.

. மதுரை மாநகரை நிர்வாக வசதிக்காக இரண்டாகப் பிரித்திருந்த தி.மு.க தலைமை, கடந்த வருடம் அதைக் கலைத்துவிட்டு ஒட்டுமொத்த மாநகருக்கான பொறுப்புக் குழுவை அமைத்தது. வேலுச்சாமி, ஜெயராமன், டாக்டர் சரவணன், எஸ்ஸார் கோபி உள்ளிட்ட பத்து பேர்கொண்ட பொறுப்புக் குழுவுக்கு, தெற்கு மாநகரச் செயலாளராக இருந்த கோ.தளபதி தலைவராக நியமிக்கப்பட்டார். அப்போது முதலே அவர்மீது புகார்கள் குவிந்தன. அழகிரியின் தீவிர விசுவாசியாக இருந்த அவர், இப்போதும் அழகிரியுடன் தொடர்புவைத்திருப்பதாக சர்ச்சை எழுந்த நிலையில், பொறுப்புக் குழுக் கூட்டத்தில் கைகலப்பு ஏற்பட்டிருக்கிறது.

அந்தக் கூட்டத்தில் அப்படி என்னதான் நடந்தது? கூட்டத்துக்குச் சென்றிருந்த நிர்வாகிகளிடம் பேசினோம். ‘‘இந்திக்கு எதிராகப் போராட்டம் நடத்தப்படும் என்று ஸ்டாலின் அறிவித்திருந்தார் அல்லவா! அதற்கான ஆலோசனைக் கூட்டம், காக்கா தோப்பில் உள்ள கட்சி அலுவலகத்தில் நடந்தது. ஆலோசனை நடக்கும் என நிர்வாகிகள் காத்திருந்தனர். ஆனால், கோ.தளபதியோ ‘கட்சியினரை வார்டுவாரியாகத் திரட்டி வாருங்கள்’ என்று மட்டும் சுருக்கமாகப் பேசிவிட்டு, ‘மழை வருவதுபோல் இருக்கிறது. இத்துடன் கூட்டத்தை முடித்துக்கொள்வோம். கிளம்புங்கள்’ என்று கூட்டத்தை முடிக்கப்பார்த்தார். ‘இவ்வளவுதானா கூட்டம்? நிர்வாகிகளிடம் எந்தக் கருத்தும் கேட்க மாட்டீங்களா?’ என்று நிர்வாகிகள் கொந்தளித்தனர். அதன் பிறகு, ‘சரி... ஆளுக்கு அஞ்சு நிமிஷம் பேசுங்கள்’ என்றார். முன்னாள் மேயர் குழந்தைவேலு சிறிது நேரம் பேசினார். அடுத்ததாகப் பேசிய வடக்கு மாவட்ட முன்னாள் செயலாளரும் பொறுப்புக் குழு உறுப்பினருமான வேலுச்சாமி, ‘இதுதான் ஆலோசனைக் கூட்டமா?’ என்று ஆரம்பித்து, தன் குமுறல்களைக் கொட்டிவிட்டார். அதைத் தாங்கிக்கொள்ள முடியாமல் கோ.தளபதி வாக்குவாதத்தில் ஈடுபட்டார். வாக்குவாதம் முற்றி கைகலப்பாகிவிட்டது’’ என்றனர்.

. பொறுப்புக் குழு உறுப்பினர் வேலுச்சாமியிடம் பேசினோம், ‘‘நான் நாற்பது வருடங்களுக்கும்மேல் கட்சியில் இருக்கிறேன். கட்சியில் உள்ள இளம் வயது தம்பிகளைக்கூட ‘போ... வா...’ என மரியாதைக் குறைவாக அழைக்க மாட்டேன். ஆனால், பொறுப்புக் குழுத் தலைவராக உள்ள கோ.தளபதிக்கு, மரியாதை தெரியவில்லை. மதுரை மாநகராட்சியில் ஏகப்பட்ட பிரச்னைகள் இருக்கின்றன. அவற்றையெல்லாம் எதிர்த்து இவர் ஒரு போராட்டம்கூட நடத்தியதில்லை. அதனால் கட்சியினர் மிகவும் சோர்வடைந்துள்ளனர். இந்த நிலையில்தான், ஆலோசனைக் கூட்டத்தில் சலசலப்பு ஏற்பட்டது. ‘மதுரையில் கட்சி நிகழ்ச்சிகள் எழுச்சியோடு நடைபெறுவதில்லை. கட்சி நிகழ்ச்சிகளில் புரோட்டோக்கால் அடிப்படையில் நிர்வாகிகளின் பெயர்களைப் போடுவதில்லை’ என என் ஆற்றாமையை வெளிப்படுத்தினேன். அதை கோ.தளபதி மறுத்தார்.

. ‘தலைவர் கலந்துகொண்ட உங்கள் வீட்டு நிகழ்ச்சிக்கான அழைப்பிதழில்கூட நிர்வாகிகள் பெயரைப் போடவில்லை’ என்றேன். ‘அது என் குடும்ப நிகழ்ச்சி. என் இஷ்டம்’ என்று பதிலளித்தார். ‘அப்படியென்றால், ஒவ்வொரு வார்டு செயலாளருக்கும் 4,000 ரூபாய் கொடுத்து, வாகனம் எடுத்துவரச் சொன்னது ஏன்?’ எனக் கேட்டேன். உடனே, ‘அதை எவனும் கேட்கத் தேவையில்லை’ என்று மரியாதைக் குறைவாகப் பேசிவிட்டார். அதன் பிறகுதான் வாக்குவாதமானது. கோ.தளபதி, பொட்டு சுரேஷுடன் சேர்ந்து ஆதாயம் அடைந்தவர். அவருக்கு கட்சி நடைமுறை எதுவும் தெரியாது. தன் வீட்டுத் திருமணத்தை மதுரையில் நடத்தினால் சிலர் வருத்தப்படுவார்கள் என்பதால், சிவகாசியில் நடத்தியவர். இவரைப் போன்றோர் நிர்வாகியாக இருக்கும் வரை மதுரையில் கட்சி வளராது’’ என்றார்.

. கட்சி நிர்வாகிகள் சிலரிடம் பேசினோம். “கோ.தளபதி, இன்னும் அழகிரியின் விசுவாசியாகத் தான் இருக்கிறார். ஆளுங்கட்சி அமைச்சர்களோடும் இணக்கமாக இருக்கிறார். தன் மகன் திருமணத்தை மதுரையில் நடத்தினால் அழகிரி வருத்தப்படுவார் என்பதால், பெண் வீடான சிவகாசியிலேயே நடத்தி ஸ்டாலினை அங்கே வரவழைத்தார். இவர்மீது கட்சியில் எல்லோருக்கும் வருத்தமுள்ளது. இப்படியே போனால், மதுரையில் கட்சி காணாமல்போய்விடும்” என்றனர்.

புகார்கள் குறித்து பொறுப்புக் குழுத் தலைவர் கோ. தளபதியிடம் கேட்டோம், “கட்சின்னா சில கருத்துவேறுபாடுகள் இருக்கும். அதை சிலர் பெரிதுபடுத்துகிறார்கள். பல்வேறு நிகழ்ச்சிகளிலும், வேலூர் இடைத்தேர்தலிலும் நானும் வேலுச்சாமியும் ஒன்றாகத்தான் பணியாற்றினோம். அப்போதெல் லாம் எதுவும் சொல்லாமல் இப்போது ஏன் இப்படிச் சொல்கிறார் எனத் தெரியவில்லை. குழப்பம் ஏற்படுத்த அவதூறு பரப்புகிறார்கள். அவர்கள் சொல்லும் புகார்கள் அனைத்தும் ஆதாரமில்லாதவை. கட்சித் தலைமைக்கு, எல்லாம் தெரியும்” என்றார்.