Published:Updated:

ரீ என்ட்ரி ரங்கசாமி!

ரங்கசாமி!
பிரீமியம் ஸ்டோரி
ரங்கசாமி!

சட்டசபைக்குள் நுழையும் வாய்ப்பை 40 ஆண்டுகளுக்குப் பிறகு பறிகொடுத்திருக்கிறது அந்தக் கட்சி

ரீ என்ட்ரி ரங்கசாமி!

சட்டசபைக்குள் நுழையும் வாய்ப்பை 40 ஆண்டுகளுக்குப் பிறகு பறிகொடுத்திருக்கிறது அந்தக் கட்சி

Published:Updated:
ரங்கசாமி!
பிரீமியம் ஸ்டோரி
ரங்கசாமி!

புதுச்சேரியில் நீண்ட காலம் ஆட்சி அதிகாரத்தில் இருந்த காங்கிரஸ், இந்தத் தேர்தலில் எதிர்க்கட்சி அந்தஸ்தைக்கூட பெற முடியாத நிலைக்கு மக்களால் புறக்கணிக்கப்பட்டிருக்கிறது. காங்கிரஸ் கட்சி வெறும் இரண்டு இடங்களையே பெற்றிருக்கும் நிலையில், ஆறு தொகுதிகளில் சுயேச்சை வேட்பாளர்கள் வெற்றிவாகை சூடியிருக்கிறார்கள். புதுச்சேரியில் பி.ஜே.பி நடத்திய அரசியல் சதுரங்க விளையாட்டால் காங்கிரஸ் ஆட்சி கவிழ்க்கப்பட்ட பிறகு நடைபெற்ற இந்தத் தேர்தலில், பி.ஜே.பி அங்கம் வகிக்கும் என்.ஆர்.காங்கிரஸ் கூட்டணி அதிக இடங்களைக் கைப்பற்றியிருக்கிறது.

புதுச்சேரி, காரைக்கால், மாஹே, ஏனாம் என நான்கு பிராந்தியங்களை உள்ளடக்கிய புதுச்சேரி சட்டசபை, 30 தொகுதிகளைக் கொண்டது. இந்தத் தேர்தலில் தேசிய ஜனநாயகக் கூட்டணியில் என்.ஆர்.காங்கிரஸ், பி.ஜே.பி., அ.தி.மு.க ஆகிய கட்சிகளும், மதச்சார்பற்ற முற்போக்குக் கூட்டணியில் காங்கிரஸ். தி.மு.க, வி.சி.க., இந்திய கம்யூனிஸ்ட் கட்சிகளும் போட்டியிட்டன.

ரீ என்ட்ரி ரங்கசாமி!

16 தொகுதிகளில் போட்டியிட்ட என்.ஆர்.காங்கிரஸ் பத்து இடங்களையும், ஒன்பது தொகுதிகளில் போட்டியிட்ட பி.ஜே.பி ஆறு இடங்களையும் கைப்பற்றியிருக்கும் நிலையில், போட்டியிட்ட ஐந்து தொகுதிகளிலும் அதிர்ச்சித் தோல்வியைத் தழுவியிருக்கிறது அ.தி.மு.க. இதன் மூலம் சட்டசபைக்குள் நுழையும் வாய்ப்பை 40 ஆண்டுகளுக்குப் பிறகு பறிகொடுத்திருக்கிறது அந்தக் கட்சி. அதேபோல், புதுச்சேரியில் 30 ஆண்டுகளுக்கும் மேலாக ஆளுங்கட்சியாக இருந்த காங்கிரஸ், இந்தத் தேர்தலில் எதிர்க்கட்சி அந்தஸ்தைக்கூட பெற முடியாத அளவுக்குத் தூக்கி வீசப்பட்டிருக்கிறது. ‘15 இடங்களில் போட்டியிடுகிறோம்’ என்று கூறிய அந்தக் கட்சி, வேட்பாளர் கிடைக்காமல் 14 தொகுதிகளில் மட்டும் போட்டியிட்டு, வெறும் இரண்டு இடங்களை மட்டுமே கைப்பற்றியிருக்கிறது. அதேசமயம், சமீபத்தில் நடைபெற்ற தேர்தல்களில் இரண்டு, மூன்று இடங்களைத் தாண்டாத தி.மு.க., 14 தொகுதிகளில் போட்டியிட்டு ஆறு இடங்களில் வெற்றிபெற்று எதிர்க்கட்சி அந்தஸ்தைப் பெற்றிருக்கிறது.

புதுச்சேரி அரசியல் வரலாற்றில் இதுவரை இல்லாத அளவுக்கு, ஆறு சுயேச்சை வேட்பாளர்கள் வெற்றிவாகை சூடியிருக்கிறார்கள். அதிலும் அவர்கள் வீழ்த்தியிருப்பது காங்கிரஸ், என்.ஆர்.காங்கிரஸ், பி.ஜே.பி உள்ளிட்ட கட்சிகளை என்பதுதான் ஹைலைட். ‘‘ஆறு பேரில் நான்கு பேர் ரங்கசாமியால் நிறுத்தப்பட்டவர்கள்தான். அதற்கும் காரணம் இருக்கிறது’’ என்று கண்சிமிட்டுகிறார்கள் என்.ஆர்.காங்கிரஸ் தொண்டர்கள்.

தட்டாஞ்சாவடி மற்றும் ஏனாம் என இரண்டு தொகுதிகளில் போட்டியிட்ட முன்னாள் முதல்வர் ரங்கசாமி, ஏனாம் தொகுதியில் படுதோல்வியைச் சந்தித்திருக்கிறார். அவரை வீழ்த்தியது கொல்லப்பள்ளி ஸ்ரீநிவாஸ் அசோக் என்ற சுயேச்சை வேட்பாளர்.

ஏனாம் தொகுதியில் முடிசூடா மன்னனாக வலம்வந்தவர் காங்கிரஸ் முன்னாள் அமைச்சர் மல்லாடி கிருஷ்ணாராவ். இந்தத் தேர்தலில் காங்கிரஸ் போணியாகாது என்று தெரிந்ததும், அந்தக் கட்சியிலிருந்து வெளியேறி ரங்கசாமி பக்கம் வந்தார். அத்துடன், ‘‘பிரசாரத்துக்குக்கூட நீங்கள் வர வேண்டாம். நான் கை காட்டுபவர்தான் இங்கு எம்.எல்.ஏ’’ என்று கூறி ரங்கசாமியின் ஆசையைத் தூண்டி, அவரை ஏனாம் தொகுதியில் களமிறக்கினார் மல்லாடி கிருஷ்ணாராவ். ஆனால், ‘‘ஏனாம் தொகுதியில் நின்றாலும் இங்குதான் எம்.எல்.ஏ-வாக இருப்பேன்’’ என்று தட்டாஞ்சாவடி தொகுதி மக்களிடம் ரங்கசாமி உருகியதை, அப்படியே தனது பிரசாரத்தில் போட்டுக்காட்டிய சுயேச்சை வேட்பாளர் ஸ்ரீநிவாஸ் அசோக், ரங்கசாமிக்கும் மல்லாடிக்கும் ஒருசேர விபூதியை அடித்து வெற்றி பெற்றிருக்கிறார்.

தேர்தல் முடிவுகள் வெளியானதும் புதுச்சேரி பி.ஜே.பி தேர்தல் பொறுப்பாளரான நிர்மல்குமார் சுரானாவைத் தொடர்புகொண்ட அக்கட்சி மேலிடம், ‘‘ரங்கசாமிக்குத்தான் பெரும்பான்மை இல்லையே... நாம ஆறு இடங்கள்ல ஜெயிச்சிருக்கோம். சுயேச்சைகள் ஆறு பேரையும் பர்ச்சேஸ் செஞ்சுடலாம். காங்கிரஸ் கட்சியில ரெண்டு எம்.எல்.ஏ-க்கள்தான். ஒருவரை உருவினா கட்சித்தாவல் தடைச்சட்டம் எடுபடாது. வழக்கம்போல மூணு நியமன எம்.எல்.ஏ-க்களைப் போட்டு ஆட்சியை அமைச்சுடலாமா?’’ என்று கேட்டதாம். அதற்கு, ‘‘ஜெயலலிதாவுக்கே தண்ணீர் காட்டியவர் ரங்கசாமிஜி. நாம இப்படி ஏதாவது செய்வோம்னு தெரிஞ்சுதான் அவங்க கட்சிக்காரங்களையே சுயேச்சையா நிக்கவெச்சு ஜெயிக்கவெச்சிருக்காரு. ஒருவேளை நாம அப்படி மூவ் பண்ணா, காங்கிரஸும் தி.மு.க-வும் அவரை சப்போர்ட் பண்ணிடுவாங்க. அப்புறம் ஜென்மத்துக்கும் நாம இங்கே காலூன்ற முடியாது. அதனால, ரெண்டு அமைச்சர்களை மட்டும் வாங்கிக்கலாம்’’ என்று அமைதியாகக் கூறியிருக்கிறார் நிர்மல்குமார் சுரானா. அதற்கு, ‘‘மூன்றாகக் கேட்டு முடியுங்கள்’’ என்று டெல்லியில் கூறியிருக்கிறார்களாம்.

ரீ என்ட்ரி ரங்கசாமி!

அதன் பிறகு ரங்கசாமியைச் சந்தித்த நிர்மல்குமார் சுரானா, கேபினெட்டில் மூன்று இடங்களைக் கேட்டிருக்கிறார். அதற்கு அவர் மறுத்துவிடவே, ‘‘துணை முதல்வர் பதவி...’’ என்று இழுக்க, ‘‘அந்தப் பேச்சுக்கே இடமில்லை’’ என்று அமைதியாகக் கூறிவிட்டாராம் ரங்கசாமி. அதற்குள் ‘‘பி.ஜே.பி முதல்வர் பதவியைக் கேட்கிறது. சுயேச்சைகளை வளைத்து தனித்து ஆட்சி அமைக்கப் பார்க்கிறது’’ என்று சமூக வலைதளங்களில் தகவல் பரவ, அலறியடித்துக்கொண்டு செய்தியாளர்களைச் சந்தித்த சுரானா, ‘‘முதல்வர் ரேஸில் பி.ஜே.பி இல்லை. ரங்கசாமிதான் முதல்வர்’’ என்று வதந்தியை முடித்துவைத்தார்.

அதையடுத்து 16 எம்.எல்.ஏ-க்களின் ஆதரவு கடிதத்துடன் துணைநிலை ஆளுநர் தமிழிசையைச் சந்தித்த ரங்கசாமி, ஆட்சி அமைக்க உரிமை கோரியிருக்கிறார். இருப்பினும், கடைசி நேர திருப்பங்களுக்குப் பஞ்சமிருக்காது என்பதே புதுச்சேரியில் அரசியல் வரலாறு!