தமிழ்நாடு அரசின் 2023-24 ஆண்டுக்கான பட்ஜெட்டை, கடந்த திங்களன்று சட்டப்பேரவையில் நிதியமைச்சர் பழனிவேல் தியாகராஜன் தாக்கல் செய்தார். அதில் தி.மு.க-வின் தேர்தல் வாக்குறுதியான, குடும்பத்தலைவிகளுக்கு மாதம் 1,000 ரூபாய் குறித்து, `தகுதியான குடும்பத்தலைவிகளுக்கு வரும் செப்டம்பர் மாதம் முதல் 1,000 ரூபாய் மாதந்தோறும் வழங்கப்படும்' என அமைச்சர் பழனிவேல் தியாகராஜன் அறிவித்தார்.
அதை விமர்சிக்கும் விதமாக, இணையதளத்தில் ஒரு வீடியோ பரவியது. அதையடுத்து, இணையதளத்தில் அந்த வீடியோவைப் பதிவிட்ட பிரதீப் என்பவரை போலீஸ் கைதுசெய்தது. இதற்கு பல்வேறு தரப்பிலிருந்து எதிர்ப்புகள் எழுந்தன. இந்த நிலையில், நாம் தமிழர் கட்சியின் ஒருங்கிணைப்பாளர் சீமான், `அரசின் குற்றம் குறைகளை விமர்சிப்போரை அரசியல் எதிரியாகக் கருதி அடக்குமுறையை ஏவுவதா?' எனக் கண்டனம் தெரிவித்து அறிக்கை வெளியிட்டிருக்கிறார்.
அந்த அறிக்கையில், ``குடும்பத்தலைவிகளுக்கு உரிமைத்தொகை வழங்கும் தி.மு.க அரசின் நிதிநிலை அறிக்கையின் அறிவிப்பை திரைப்பட நகைச்சுவைத் துணுக்கோடு பொருத்தி இணையத்தில் விமர்சித்ததற்காக பிரதீப் எனும் இளைஞரைக் கைதுசெய்திருப்பது ஏற்புடையதல்ல. மாற்றுக்கருத்துடையோரையும், அரசின் குற்றம் குறைகளை விமர்சிப்போரையும் அரசியல் எதிரிகளாகக் கட்டமைத்து, அவர்கள்மீது அடக்குமுறையைக் கட்டவிழ்த்துவிடும் தி.மு.க அரசின் கொடுங்கோல்போக்கு கடும் கண்டனத்துக்குரியது.
தேர்தல் அறிக்கையில், தமிழ்நாட்டிலுள்ள குடும்பத்தலைவிகள் அனைவருக்கும் உரிமைத்தொகை வழங்கப்படும்; இதன்மூலம், குடும்ப அட்டைதாரர்கள் அனைவரும் பயனடைவார்கள் எனக் கூறிவிட்டு, இப்போது தகுதியுள்ளவர்களுக்கு மட்டுமே உரிமைத்தொகை என தி.மு.க அரசு மாற்றிப்பேசி, தகுதி எனும் சொல்லாடலைப் புதிதாக இடைச்செருகும்போது எழும் விமர்சனத்தைத்தான், திரைப்படத்தின் நகைச்சுவைக்காட்சியோடு இணைத்து எள்ளல் செய்திருக்கிறார் தம்பி பிரதீப். கேலிச்சித்திரங்களின் நவீன பரிணாம வளர்ச்சிதான் இது போன்ற காணொளி நகைச்சுவைத்துண்டுகள்.
அதை சமூக வலைதளத்தில் பதிவிட்டதற்காகவே கைது நடவடிக்கை என்பது மிக மிக அதீதமானது. சமூகத்தைப் பிளவுபடுத்தும், மண்ணுக்கும், மக்களுக்கும் பெருங்கேட்டை விளைவிக்கும் எத்தனையோ பேரைக் கைதுசெய்ய மறுக்கும் தி.மு.க அரசு, எளிய மக்களின் விமர்சனங்களைச் சகிக்க முடியாது, அவர்களைக் கைதுசெய்து சிறைப்படுத்த எண்ணுவது ஜனநாயக விரோதமாகும்" என சீமான் கண்டனம் தெரிவித்திருக்கிறார்.
