``எங்கள் தலைவர் ஸ்டாலின் `2,500 ரூபாய் போதாது. 5,000 ரூபாய் கொடுக்க வேண்டும்’ என்று சொல்லியிருக்கிறார். இந்தப் பணம் வாக்குகளாக மாறும் என்று எண்ணித்தான் ஆளுங்கட்சி கொடுக்கிறது. ஆனால், இது எதுவுமே வாக்குகளாக மாறாது. நான் கிராமம், நகரம் என்று அனைத்து இடங்களுக்கும் பயணிக்கிறேன். மக்களை நேரடியாகக் களத்தில் சந்திக்கிறேன். இந்த ஆட்சிமீது மக்கள் வெறுப்போடு இருக்கிறார்கள். ஆட்சி மாற்றத்தை எதிர்நோக்கிக் காத்திருக்கிறார்கள். கடந்த 10 வருடங்களாக எந்த முன்னேற்றமும் தமிழகத்தில் ஏற்படவில்லை. பல அமைச்சர்கள் பத்து வருடங்களாக ஒரே துறையிலிருந்தும், அந்தத் துறைகள் முன்னேறவில்லை. அடுத்து, மத்திய அரசாங்கம் சொல்வதற்கெல்லாம் தலையாட்டிக்கொண்டிருக்கிறார்கள். தமிழகத்திலுள்ள பல பொதுத்துறை நிறுவனங்களில், வட மாநிலத்தவர்களின் ஆதிக்கம் அதிக அளவில் இருக்கிறது. அவர்களைத்தான் அதிகம் வேலைக்கும் எடுத்திருக்கிறார்கள். எங்கும், எதிலும் ஊழல்... இதையெல்லாம் தமிழக மக்கள் துளியும் ரசிக்கவில்லை. ஆளுங்கட்சி எவ்வளவு பணம் கொடுத்தாலும், மக்களிடம் உள்ள வெறுப்புணர்வைப் போக்க முடியாது. வரும் தேர்தலில் வெற்றி பெறப்போவது தி.மு.க-தான்!”

``இந்தப் பணம் வாக்குகளாக மாறும் என்று நாங்கள் செய்யவில்லை. மக்களிடம் வாங்கும் சக்தி அதிகரிக்க வேண்டும் என்று எல்லோரும் சொன்னார்கள். அமர்த்தியா சென் முதல் இங்குள்ள ஸ்டாலின் வரை பலரும் மக்களுக்கு நேரடியாகப் பணம் தர வேண்டும் என்று சொன்னார்கள். அதைத்தான் நாங்கள் செய்கிறோம். இதில் தவறு எதுவுமில்லை. அம்மா இருக்கும்போது பொங்கல் பரிசாக 100 ரூபாய் கொடுத்தார்கள். அதன் பிறகு வந்த அண்ணன் எடப்பாடியார் 1,000 ரூபாயாக உயர்த்திக் கொடுத்தார். இப்போது 2,500 ரூபாயாக மேலும் உயர்த்திக் கொடுக்கவிருக்கிறார். கொரோனா காலத்தில் மக்களிடம் பணப்புழக்கம் குறைந்திருக்கிறது. வாங்கும் சக்தியை அதிகரிக்கும் கருவியாகத்தான் இந்தப் பொங்கல் பரிசைப் பார்க்கிறோம். நாங்கள் போகும் இடங்களிலெல்லாம் மக்கள் எங்களை மகிழ்ச்சியோடு வரவேற்கிறார்கள். மீண்டும் அ.தி.மு.க ஆட்சிதான் என்று சொல்லத் தொடங்கிவிட்டார்கள். ஆனால், எதிர்க்கட்சிகளோ... நாங்கள் திரும்ப வந்துவிடுவோமோ என்ற பயத்தில், எதற்கெடுத்தாலும் விமர்சனம் செய்கிறார்கள். மக்கள் இதை நல்ல நிதிநிலை மேலாண்மையாகத்தான் பார்ப்பார்களே தவிர, வாக்குக்குப் பணம் கொடுக்கிறார்கள் என்று யாரும் நினைக்க மாட்டார்கள். இது தேவையற்ற கருத்துருவாக்கம் என்று நினைக்கிறேன்!’