Published:Updated:

“தி.மு.க. இப்போது சரிந்துவிட்டது!”

பழ.கருப்பையா
பிரீமியம் ஸ்டோரி
பழ.கருப்பையா

“இந்த விமர்சனங்களை ஸ்டாலினிடம் நேரில் சொன்னீர்களா?”

“தி.மு.க. இப்போது சரிந்துவிட்டது!”

“இந்த விமர்சனங்களை ஸ்டாலினிடம் நேரில் சொன்னீர்களா?”

Published:Updated:
பழ.கருப்பையா
பிரீமியம் ஸ்டோரி
பழ.கருப்பையா

“என் மடியில் இருந்த அழுக்குமூட்டையை இறக்கிவைத்துவிட்டேன். இப்போது, வெறும் மடியாக இருப்பது மகிழ்ச்சியாக இருக்கிறது” உற்சாகமாகவும் சந்தோஷமாகவும் பேசுகிறார் தி.மு.க-விலிருந்து வெளியே வந்துள்ள மூத்த அரசியல்வாதியான பழ.கருப்பையா.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

“என்ன மாதிரியான எதிர்பார்ப்புடன் தி.மு.க-வில் சேர்ந்தீர்கள். ஏன் இப்போது விலகியிருக்கிறீர்கள்?”

“தி.மு.க-வில் சேர்வதற்கு எனக்குத் தயக்கம் இருந்தது. ஆனால், தி.மு.க-வுக்கு வருமாறு ஒரு பொதுமேடையில் கலைஞர் எனக்கு அழைப்பு விடுத்தார். ‘உங்களைப் போன்றவர்கள் திராவிட இயக்கத்தைக் காக்க வேண்டும். என் காலத்திலும், என் காலத்துக்குப் பிறகும்...’ என்று அவர் அழைத்தார். இவ்வளவு பெரிய வார்த்தைகளைச் சொல்லி அழைக்கிறாரே என்று தி.மு.க-வில் சேர்ந்தேன். தி.மு.க-வில் சேர்ந்த பிறகு, எனக்குச் சில எதிர்பார்ப்புகள் இருந்தன. ஆனால், கலைஞர் உடல்நிலை சரியில்லாமல் மருத்துவமனையில் அனுமதிக்கப்பட்டிருந்தார். அதன்பிறகு, ஸ்டாலின்தான் கட்சியை வழிநடத்தினார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

ஸ்டாலினையும் முக்கியத் தலைவர்களையும் வைத்துக்கொண்டு பல புதிய கருத்துகளைப் பேசினேன். உதாரணமாக, ‘இந்துசமய அறநிலையத்துறை’ என்பதை ‘திராவிட சமயங்கள் அறநிலையத்துறை’ என்று மாற்ற வேண்டும் என்று சொன்னேன். சைவம், வைணவம், முருக வழிபாடு, நாட்டுத்தெய்வங்கள் வழிபாடு, முன்னோர்கள் வழிபாடு போன்றவற்றின் அடிப்படையில்தான் நம் சமயங்கள் உள்ளன.வேதாந்தத்தை அடிப்படையாகக் கொண்ட இந்து சமயம், நம்முடைய சமயம் அல்ல. எனவே, ‘திராவிட சமயங்கள் அறநிலையத்துறை’ என இருக்க வேண்டும் என்று சொன்னேன். ஏதோ சொல்கிறார் என்ற நினைப்புடன் நான் சொன்னதை ஸ்டாலின் கேட்டுக்கொண்டார்.

“தி.மு.க. இப்போது சரிந்துவிட்டது!”
“தி.மு.க. இப்போது சரிந்துவிட்டது!”

அவ்வளவுதான். அங்கு கருத்துருவாக்கம் நடக்கவில்லை, அல்லது கருத்துருவாக்கம் செய்வதற்கான அறிவுத்திறன் உடையதாக தி.மு.க. இப்போது இல்லை. இந்து அணிதிரட்டல் இங்கு நடக்கிறது. ‘நாங்கள் இந்து அல்ல... தமிழ்நாட்டில் உள்ள நாங்களெல்லாம் திராவிட சமயத்தவர்’ என்று சொல்லுங்கள். அப்படிச் சொன்னால் உங்கள் பகுத்தறிவுக் கொள்கைக்கு மோசம் வந்துவிடும் என்றால், பகுத்தறிவுக் கொள்கையே உங்களுக்கு விளங்கவில்லை என்றே அர்த்தம்.”

“பா.ஜ.க எதிர்ப்பு, மதச்சார்பின்மை போன்ற கொள்கைகளில் தி.மு.க-வும் உறுதியாகத்தானே இருக்கிறது. பா.ஜ.க அரசுக்கு எதிராக தி.மு.க எம்.பி-கள் தொடர்ந்து வீரியமாகப் போராடிக்கொண்டுதானே இருக்கிறார்கள்?”

“அப்படிச் சொல்ல முடியாது. தி.மு.க-வுக்கு மக்களவையில் 38 எம்.பி-க்கள் இருக்கிறார்கள். மூன்றாவது பெரிய கட்சியாக அது இருக்கிறது. அப்படியிருக்கும்போது, அது செயல்படும் விதமும் கருத்துகளை முன்வைக்கும் விதமும் வேறு மாதிரியாக இருக்க வேண்டும். காஷ்மீர் துண்டாடப்படுகிறது. ஆனால், ‘ஃபரூக் அப்துல்லாவை விடுதலை செய்’ என்று இவர்கள் ஆர்ப்பாட்டம் செய்கிறார்கள். அதுவும் முக்கியம்தான். ஆனால், அதையும்தாண்டி மிகப்பெரிய தொடர் போராட்டங்களை இவர்கள் நடத்தியிருக்க வேண்டும். காந்தியின் சிந்தனைக்குப் பிறகுதான் மொழிவழி தேசியம் என்பது பிறந்தது. அதைச் சிதைப்பதுதான் பா.ஜ.க-வின் முதன்மையான நோக்கம். காரணம், இன உணர்வு என்பது இந்து அணிதிரட்டலுக்கு எதிரானது. முஸ்லிம்களும் கிறிஸ்தவர்களும் இந்தியாவிலிருந்து வெளியேற்றப்பட வேண்டியவர்கள் அல்லது இரண்டாம்தரக் குடிமக்களாக நடத்தப்பட வேண்டியவர்கள் என்பது பா.ஜ.க-வின் நிலைப்பாடு. அதற்கு மொழிவழி உணர்வு தடையாக இருக்கிறது. எனவே, மாநிலங்களை உடைக்க வேண்டும் என்று நினைக்கிறார்கள்.”

“அதைத் தி.மு.க. கடுமையாக எதிர்த்துக்கொண்டுதானே இருக்கிறது?”

“எதிர்ப்பு என்பது ஒரு நாள் அறிக்கையாகவோ, ஒரு நாள் போராட்டமாகவோ மட்டும் இருக்கக் கூடாது. இந்தி எதிர்ப்பைக் காலமெல்லாம் சொல்வதைப்போல, பிற்படுத்தப் பட்டோர் நலனைக் காலமெல்லாம் பேசுவதைப்போல இந்தப் பிரச்னையையும் பார்க்க வேண்டும். ஆனால், நீட் தேர்வுக்கு எதிராகப் பேசிய அளவுக்குக்கூட, காஷ்மீர் விவகாரத்தைத் தி.மு.க பேசவில்லை.”

“கார்ப்பரேட் கம்பெனியைப்போல தி.மு.க செயல்படுவதாகக் குற்றம்சாட்டியிருந்தீர்களே?”

“பணத்துடன் வருபவர்களுக்குத்தான் தி.மு.க-வில் முன்வரிசையில் இடம் தரப்படுகிறது. அதனால்தான், பிரசாந்த் கிஷோர் போன்றவர்களை வேலைக்கு வைத்து, பல நூறு கோடி ரூபாயை அள்ளிக்கொடுக்கிறார்கள். இது, பொய்மையின் மீது கட்டப்படும் மாளிகை!”

“தி.மு.க. இப்போது சரிந்துவிட்டது!”

“இந்த விமர்சனங்களை ஸ்டாலினிடம் நேரில் சொன்னீர்களா?”

“தி.மு.க-விலிருந்து விலகுவதற்கு முன்பாக ஸ்டாலினைச் சந்தித்தேன். ‘பணம் வைத்திருப்பவர்களுக்கு மட்டுமே தி.மு.க-வில் முக்கியத்துவம் அளிக்கப்படுகிறது’ என்பது உட்பட என் விமர்சனங்களை எல்லாம் சொன்னேன். சிரித்தபடியேதான் என்னுடன் பேசிக்கொண்டிருந்தார். என் விமர்சனங்களுக்கு அவர் என்ன பதில் சொன்னார் என்பதை நான் சொல்வது நேர்மையாக இருக்காது. ஓர் அறிவு இயக்கமாக இருந்த தி.மு.க., இப்போது சரிந்துவிட்டது.”

“எடப்பாடி பழனிசாமி ஆட்சி எப்படி இருக்கிறது?”

“இலவசங்களையும் பணத்தையும் கொடுத்து ஓட்டு வாங்குவது, பிறகு ஆட்சிக்கு வந்து பணத்தைக் கொள்ளை யடிப்பது, இந்த இரண்டைத் தவிர இந்த இரு திராவிடக் கட்சிகளுக்கு வேறு எதுவும் தெரியாது. இது ஒரு நச்சுச்சுழல். இதற்கெல்லாம் மாற்றாக ஓர் அமைப்பு எழ வேண்டும், ஒரு வலிமையான தலைவன் எழ வேண்டும்.”

“ரஜினியைச் சொல்கிறீர்களா?”

“அந்த பஸ் எந்த ஊருக்குப் போகப்போகிறது என்று இன்னும் போர்டே போடவில்லை. 2021-ல் பஸ் புறப்படும் என்று சொல்லியிருக்கிறார். புறப்படும் நேரத்தில் அந்த பஸ் எந்த ரூட்டில் போகும் என்று தெரியும்.”

“நடிகர் விஜய்யும் அரசியல் ஆர்வத்தை வெளிப்படுத்திவருகிறாரே?”

“யார் வேண்டுமானாலும் வரட்டும். முதலில் உங்கள் வண்டி எங்கே போகிறது என்பதைச் சொல்லுங்கள். உங்கள் கொள்கையைச் சொல்லுங்கள். இது ஒரு மதச்சார்பற்ற நாடு. நான் மதச்சார்பற்றவன் என்று சொல்லுங்கள். யாராக இருந்தாலும் முதலில் அவர்களின் கொள்கை என்ன என்று சொல்லட்டும்.”

அரை நூற்றாண்டு அரசியல் பயணம்!

ந்திய தேசிய காங்கிரஸில்தான் பழ.கருப்பையாவின் அரசியல் பயணம் தொடங்கியது. 1969-ம் ஆண்டு காங்கிரஸ் பிளவுபட்டபோது, காமராஜர் தலைமையிலான சிண்டிகேட் காங்கிரஸில் இணைந்த அவர், காமராஜர் மறைவுக்குப் பிறகு 1975-ல் ஜனதா கட்சியில் சேர்ந்தார். ஜனதா கட்சி பிளவுபட்டபோது, ஜனதா தளத்தில் இணைந்தார். பிறகு, அதிலிருந்து விலகி 1988-ம் ஆண்டு தி.மு.க-வில் சேர்ந்தார்.1992-ல் ம.தி.மு.க-வை வைகோ தொடங்கியபோது, அதில் தன்னை இணைத்துக்கொண்ட பழ.கருப்பையா, பின்னர் அதிலிருந்து விலகி காங்கிரஸில் சேர்ந்தார். பின்னர், 2010-ம் ஆண்டு அ.தி.மு.க-வில் இணைந்து, 2011-ம் ஆண்டு நடைபெற்ற சட்டமன்றத் தேர்தலில் துறைமுகம் தொகுதியில் போட்டியிட்டு எம்.எல்.ஏ-வாகத் தேர்வானார். 2016-ம் ஆண்டு துக்ளக் ஆண்டு விழாவில் பேசிய பழ.கருப்பையா, ஜெயலலிதா ஆட்சியைக் கடுமையாக விமர்சித்ததால் அ.தி.மு.க-விலிருந்து நீக்கப்பட்டார். ராயப்பேட்டையில் உள்ள பழ.கருப்பையாவின் வீடு தாக்கப்பட்டது. பிறகு, எம்.எல்.ஏ பதவியை அவர் ராஜினாமா செய்தார். 2016-ம் ஆண்டு கருணாநிதி அழைப்பின் பேரில் தி.மு.க-வில் இணைந்த அவர், தற்போது அதிலிருந்து விலகியுள்ளார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism