Published:Updated:

`ஆதாரங்களை அழிப்பதைத்தான் முதல்வர் செய்துகொண்டிருக்கிறாரா?'- கொதித்த பினராயி விஜயன்

கேரளா முதல்வர் பினராயி விஜயன்
கேரளா முதல்வர் பினராயி விஜயன்

` `மாநிலத்தின் முதலமைச்சரும், தலைமைச் செயலாளரும் தீவைப்பதையும், ஆதாரங்களை அழிப்பதையும்தான் செய்துகொண்டிருக்கிறார்கள்’ எனச் சொல்லும் அளவுக்கு சென்றிருக்கிறார்கள். அது மாநில அரசியல் அமைப்பை அவமானப்படுத்தும் செயல்' என்கிறார் கேரளா முதல்வர் பினராயி விஜயன்.

திருவனந்தபுரம் யு.ஏ.இ தூதரக பார்சல் மூலம் தங்கம் கடத்திய வழக்கில் சிக்கிய ஸ்வப்னா சுரேஷ் கைதுசெய்யப்பட்டிருக்கிறார். அந்த வழக்கை சுங்கத்துறை, அமலாக்கத்துறை, என்.ஐ.ஏ உள்ளிட்ட மத்திய அரசு ஏஜென்சிகள் விசாரணை நடத்திவருகின்றன. விசாரணையின்போது ஸ்வப்னாவின் வங்கி லாக்கரிலிருந்து சுமார் ஒன்றரை கோடி ரூபாய் பணமும், சுமார் ஒரு கிலோ தங்கமும் எடுக்கப்பட்டது. அந்தப் பணம் குறித்து கேட்டதற்கு, `கேரள அரசு ஏழைகளுக்கு வீடு கட்டிக்கொடுக்கும் `லைஃப்’ திட்டத்தில் ஒப்பந்தம் எடுத்த நிறுவனத்திலிருந்து கிடைத்த கமிஷன் தொகை’ என்று கூறியிருக்கிறார் ஸ்வப்னா. இதனால் கேரள அரசின் லைஃப் திட்டத்தில் முறைகேடு நடந்ததாகப் புகார் எழுந்தது.

மேலும், தங்கம் கடத்தல் தொடர்பாக கேரள உயர்கல்வித்துறை அமைச்சர் ஜலீலுலுக்கும் தொடர்பு இருப்பதாக எழுந்த புகாரை அடுத்து ஜலீலிடம் விசாரணை நடத்தப்பட்டது. அவர், அரசு வாகனத்தில் குரான் எடுத்துச் சென்றதாகவும், தூதரக பார்சல் வழியாக பேரீச்சைப்பழம் கொண்டுவந்து சிறப்புப் பள்ளி குழந்தைகளுக்கு விநியோகித்ததாகவும் பல சிக்கல்களில் சிக்கியிருக்கிறார். அதேபோல், முதல்வர் பினராயி விஜயனின் முதன்மைச் செயலாளராக இருந்த சிவசங்கரனும், இந்த வழக்கில் சிக்கியதால், கேரள தலைமைச் செயலகத்திலிருந்து சில ஆவணங்களை விசாரணைக்காக என்.ஐ.ஏ கேட்டிருந்தது. இந்தநிலையில் கடந்த ஆகஸ்ட் மாதம் 25-ம் தேதி கேரள தலைமைச் செயலகத்தில் தீ விபத்து ஏற்பட்டது.

 ஸ்வப்னா சுரேஷ்
ஸ்வப்னா சுரேஷ்

அந்த தீ விபத்தில் தங்கம் கடத்தல் வழக்கில் சம்பந்தப்பட்ட முக்கிய ஆவணங்கள் எரிந்ததாகப் புகார் எழுந்தது. அந்தச் சமயத்தில் முதல்வர் பினராயி விஜயனுக்கும், தலைமைச் செயலாளருக்கும் தெரியாமல் இது நடந்திருக்காது என்றும், திட்டமிட்டு ஆதாரங்கள் அழிக்கப்பட்டிருப்பதாகவும் எதிர்க்கட்சிகள் குற்றம்சாட்டின. இது தொடர்பாக பத்திரிகைகளிலும், தொலைக்காட்சிகளிலும் செய்தி வெளியானது. இந்தநிலையில் நேற்று கேரள முதல்வர் தலைமையில் நடந்த அமைச்சரவைக் கூட்டத்தில், மீடியாக்கள் மீது பிரஸ் கவுன்சில் ஆஃப் இந்தியாவில் புகார் அளிப்பது என தீர்மானம் எடுத்திருக்கிறார்கள்.

கேரள தங்கம் கடத்தல் வழக்கு: லாக்கரில் இருந்த பணம், நகை... ஸ்வப்னாவுக்குக் கிடைத்தது எப்படி?

இது பற்றி கேரள முதல்வர் பினராயி விஜயன் செய்தியாளர்களிடம் கூறுகையில், ``கேரள அரசின் 'லைஃப் மிஷன்' திட்டத்தில் முறைகேடு நடந்தது குறித்து விசாரணை நடத்தப்படும். 20 கோடி ரூபாய்க்கான திட்டத்தில் இடைத்தரகர்கள் பணம் வாங்கியதாகத் தகவல் வந்திருக்கிறது. எனவே, அது குறிதது முதற்கட்டமாக விஜிலென்ஸ் விசாரணை நடத்தப்படும். லைஃப் மிஷன் திட்டத்தின் மூலம் சுமார் இரண்டு லட்சம் வீடுகள் பணி முடிந்து சமீபத்தில் திறக்கப்பட்டன. நவம்பரில் மேலும் 50,000 வீடுகள் கட்டி முடிக்கப்படவுள்ளன. லைஃப் வீடுகள் கட்டும் திட்டத்தில் முறைகேடுகள் கண்டுபிடிக்கப்பட்டால், கடும் நடவடிக்கை எடுக்கப்படும்.

கேரள தலைமைச் செயலகத்தில் தீ விபத்து
கேரள தலைமைச் செயலகத்தில் தீ விபத்து
கோப்புப் படம்

சரியான செய்திகளை வழங்கி மக்களிடம் விழிப்புணர்வு ஏற்படுத்தும் மீடியாக்களை பாராட்டுவதுடன், அவர்களுக்கு தேவையான பின் துணையும் வழங்குகிறோம். அதேசமயம் தலைமைச் செயலகத்தில் தீ விபத்து ஏற்பட்ட சமயத்தில் மாநில முதல்வர் மற்றும் தலைமைச் செயலாளர் முன்னிலையில் தீ வைத்ததாகக் கூறும் அளவுக்கு சில மீடியாக்கள் செய்தி வெளியிட்டன. அதுபற்றி சம்பந்தப்பட்டவர்களின் கவனத்துக்கு கொண்டு செல்ல வேண்டும் என்பதற்காகத்தான் அமைச்சரவை இந்தத் தீர்மானத்தை எடுத்திருக்கிறது.

`இந்த மாநிலத்தின் முதலமைச்சரும், தலைமைச் செயலாளரும் தீ வைப்பதையும், ஆதாரங்களை அழிப்பதையும்தான் செய்துகொண்டிருக்கிறார்கள்’ எனச் சொல்லும் அளவுக்கு சென்றிருக்கிறார்கள். அது மாநில அரசியல் அமைப்பை அவமானப்படுத்தும் செயல். இது நம்பிக்கையற்ற நிலையை ஏற்படுத்தும் செயல். அவதூறு கிளப்ப வாய்ப்பு உண்டா என ஆராய்வதுடன், பிரஸ் கவுன்சில் ஆஃப் இந்தியாவுக்கு புகாரும் அளிக்கப்படும்" என்றார்.

அடுத்த கட்டுரைக்கு