Published:Updated:

“எனது ஒட்டுமொத்த அறிவும் தமிழகத்துக்கே!” - ‘அடேங்கப்பா’ அர்ஜுனமூர்த்தி...

அர்ஜுனமூர்த்தி
பிரீமியம் ஸ்டோரி
அர்ஜுனமூர்த்தி

தமிழ்நாட்டில் திராவிடக் கட்சிகள் அல்லாத மாற்று அரசியல் வந்தால், சிறப்பாக இருக்கும் என்ற நம்பிக்கையில்தான் எனது அரசியல் வாழ்க்கையே தொடங்கியது.

“எனது ஒட்டுமொத்த அறிவும் தமிழகத்துக்கே!” - ‘அடேங்கப்பா’ அர்ஜுனமூர்த்தி...

தமிழ்நாட்டில் திராவிடக் கட்சிகள் அல்லாத மாற்று அரசியல் வந்தால், சிறப்பாக இருக்கும் என்ற நம்பிக்கையில்தான் எனது அரசியல் வாழ்க்கையே தொடங்கியது.

Published:Updated:
அர்ஜுனமூர்த்தி
பிரீமியம் ஸ்டோரி
அர்ஜுனமூர்த்தி
தனது அரசியல் வருகைக்காக, கால் நூற்றாண்டு காலம் பலரையும் காக்கவைத்து கதறவிட்டவர் ரஜினிகாந்த். அதில் லேட்டஸ்ட் ட்விஸ்ட்டாக கடைசி நாள்களில் ஒருங்கிணைப்பாளராக நியமிக்கப்பட்டு, ‘கல்தா’ கொடுக்கப்பட்டவர் அர்ஜுனமூர்த்தி. முன்னாள் பா.ஜ.க நிர்வாகியான இவர், புதிதாக அரசியல் கட்சியை ஆரம்பிக்கப் போவதாகக் களம் இறங்கியிருக்கிறார். அவரைச் சந்தித்தோம்...

“ரஜினிகாந்தே அரசியலிலிருந்து விலகிவிட்ட பிறகு, நீங்கள் புதிதாகத் தனிக்கட்சி ஆரம்பிப்பதன் நோக்கம் என்ன?’’

“தமிழ்நாட்டில் திராவிடக் கட்சிகள் அல்லாத மாற்று அரசியல் வந்தால், சிறப்பாக இருக்கும் என்ற நம்பிக்கையில்தான் எனது அரசியல் வாழ்க்கையே தொடங்கியது. ரஜினிகாந்த் அரசியலுக்கு வருகிறார் என்றதும், என் நம்பிக்கை அதிகரித்தது. அதனால்தான், அவருடன் இணைந்து பணியாற்ற முன்வந்தேன். ஆனால், ரஜினிகாந்த் அரசியலில் ஈடுபட முடியாத சூழல் ஏற்பட்டதால், நானே புதிதாக அரசியல் கட்சியை ஆரம்பிக்க முடிவு செய்துவிட்டேன்.’’

“உங்கள் புதிய கட்சிக்கு ரஜினியின் ஆதரவு இருக்கிறதா?’’

“ரஜினிகாந்தின் ஆசீர்வாதம் இருக்கிறது!’’

“ரஜினிகாந்த் தனது ரசிகர்களிடம், ‘விருப்பப்பட்ட கட்சிகளில் இணைந்து கொள்ளலாம்’ என்று சொல்லிவிட்ட பிறகு, யாரைக் குறிவைத்து கட்சி ஆரம்பிக்கிறீர்கள்?’’

“எனது அரசியலே புரட்சி சம்பந்தப்பட்டது! காமராஜர் காலத்தில்தான் அறிஞர் அண்ணா தி.மு.க-வை ஆரம்பித்தார். அந்த தி.மு.க-விலிருந்து பிரிந்துதான் அ.தி.மு.க-வை எம்.ஜி.ஆர் ஆரம்பித்தார். அந்த அ.தி.மு.க-வில் பிரிவு ஏற்பட்டபோதும்கூட ஜெயலலிதா நம்பிக்கையுடன் சேவல் சின்னத்தில் களம் இறங்கி வெற்றிபெற்றார். காங்கிரஸையும் பா.ஜ.க-வையும் எதிர்த்து கெஜ்ரிவால் வந்தார். அரசியலில் இந்தப் புரட்சிகள் நிகழ்ந்துகொண்டேதான் இருக்கும். இந்தப் புரட்சிகளின் மையக்கரு யார் என்பதுதான் இங்கே முக்கியம். அந்த மையக்கரு வலிமையானதுதானா என்பதை அது ஜனிக்கும்போதே கண்டுபிடிக்க முடியாது. அதன் வளர்ச்சியின்போதுதான் கண்டுபிடிக்க முடியும்.’’

“கட்சி ஆரம்பிக்கிறேன் என்று நீங்கள் அறிவித்ததும், ‘ரஜினி ரசிகர்கள் யார் வலையிலும் சிக்க மாட்டார்கள்’ என்று தமிழருவி மணியன் அறிக்கை வெளியிட்டிருக்கிறாரே?’’

“அரசியலில், எல்லோருமே தங்கள் கருத்துகளைச் சொல்வார்கள்தான்... அதையெல்லாம் நாம் தவறாக எடுத்துக்கொள்ளத் தேவையில்லை. ஆளுமை, உண்மை, எளிமை. இதுவே என் கொள்கை! இதில் யாருக்கெல்லாம் நம்பிக்கை இருக்கிறதோ, அவர்கள் என்னோடு பயணித்தால் போதும். ரஜினி ரசிகர்கள்தான் என்றில்லாமல், புதிய தமிழ்நாட்டை உருவாக்கும் இலக்கைக்கொண்ட அனைவருமே எங்களுடன் பயணிக்கலாம். இத்தனை காலம் திரட்டிவைத்திருந்த எனது ஒட்டுமொத்த அறிவையும் தமிழகத்துக்காகக் கொட்டக் காத்திருக்கிறேன்!’’

“எனது ஒட்டுமொத்த அறிவும் தமிழகத்துக்கே!” - ‘அடேங்கப்பா’ அர்ஜுனமூர்த்தி...

“ஆனால், உங்கள் முடிவு, ‘அரசியலுக்கு வரச்சொல்லி என்னை வேதனைப்படுத்தாதீர்கள்’ என்று சொன்ன ரஜினிக்கு, மறைமுக அழுத்தம் கொடுக்காதா?’’

“அதெப்படி அழுத்தம் கொடுக்கும்? அவருடைய ரசிகர் மன்றத்தில் நான் பொறுப்பிலிருந்து, புதிதாகக் கட்சி ஆரம்பித்தால் அது அவருக்கு அழுத்தம் கொடுக்கலாம். நான் ஏற்கெனவே வேறோர் அரசியல் கட்சியிலிருந்து வந்தவன்தானே...

தற்போதைய சூழலில், ரஜினியால் அரசியல் பயணத்தைத் தொடர முடியவில்லை எனும்போது, நான் என் பயணத்தைத் தொடர்கிறேன். இதில் அவருக்கு எந்த அழுத்தமும் வராது.”

“திராவிடக் கட்சிகளுக்கு மாற்று என்று நீங்கள் சொல்வதே, உங்கள் பின்னணியில் பா.ஜ.க இருக்கிறது என்ற சந்தேகத்தை வலுப்படுத்துகிறதே?’’

“என் பின்னணியில் நிச்சயம் பா.ஜ.க இல்லை. ரஜினியின் அரசியல் விலகலுக்குப் பிறகு மற்றவர்களாக இருந்தால், பயந்து ஓடியிருப்பார்கள்... ஆனால், நான் தமிழ்நாட்டு மக்கள்மீதுள்ள நம்பிக்கையில், துணிந்து கட்சி ஆரம்பிக்கிறேன்.”

“தமிழருவி மணியன் அரசியலிலிருந்து விலகியதைச் சுட்டிக்காட்டுகிறீர்களா?’’

“இல்லை. தமிழருவி மணியன் ஒருவித வேதனையில் அப்படியொரு முடிவை அறிவித்துவிட்டார். ரஜினி ரசிகர்களில் சிலருக்கு மாரடைப்பே வந்துவிட்டது, சிலர் தீக்குளிக்கப்போவதாகக் கூறினர். ஒரு ரசிகர் தனது ஆட்டோவையே எரித்தார். இதைவைத்துத்தான் சொன்னேன்.”

“பா.ஜ.க - அ.தி.மு.க கூட்டணிக்கு எதிராக உங்களுடைய பிரசாரம் இருக்குமா?’’

“மத்திய அரசு, மாநில அரசுகளின்மீது குற்றம் சுமத்த விரும்பவில்லை. 234 தொகுதிகளிலும் போட்டியிடுவோம். தமிழ்நாட்டுக்கு மாற்றம் கொடுக்கக்கூடிய எல்லா பிரசார உத்திகளும் எங்களிடம் இருக்கின்றன.’’

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism