Published:Updated:

மூன்று பழனிசாமிகளும் முடங்கிக் கிடக்கும் உள்ளாட்சியும்!

எடப்பாடி கே.பழனிசாமி
பிரீமியம் ஸ்டோரி
எடப்பாடி கே.பழனிசாமி

‘உள்ளாட்சித் தேர்தலை நடத்த கால அவகாசம் வேண்டும்’ என்று மீண்டும் உச்ச நீதிமன்றத்தில் வாய்தா வாங்கியிருக்கிறது மாநிலத் தேர்தல் ஆணையம்.

மூன்று பழனிசாமிகளும் முடங்கிக் கிடக்கும் உள்ளாட்சியும்!

‘உள்ளாட்சித் தேர்தலை நடத்த கால அவகாசம் வேண்டும்’ என்று மீண்டும் உச்ச நீதிமன்றத்தில் வாய்தா வாங்கியிருக்கிறது மாநிலத் தேர்தல் ஆணையம்.

Published:Updated:
எடப்பாடி கே.பழனிசாமி
பிரீமியம் ஸ்டோரி
எடப்பாடி கே.பழனிசாமி

வார்டு எல்லை வரையறைகளை மாற்றும் பணி, 2011 மக்கள்தொகை அடிப்படையில் வாக்காளர் பட்டியல் தயாரிக்கும் பணி, இடையில் நடைபெற்ற நாடாளுமன்றத் தேர்தல் ஆகிய வற்றால் தேர்தலை நடத்த முடியவில்லை என்று காரணங்களை அடுக்கியது ஆணையம். நீதிமன்றத்தில் தேர்தல் ஆணையம் தொடர்ந்து சொல்லிவரும் இந்தக் காரணங்கள் நியாயமானவையா, உள்ளாட்சித் தேர்தலை நடத்தும் எண்ணம் தமிழக அரசுக்கு உண்மையிலேயே இருக்கிறதா, இல்லையா?

செந்தில் ஆறுமுகம்,  
சட்டப் பஞ்சாயத்து இயக்கம்
செந்தில் ஆறுமுகம், சட்டப் பஞ்சாயத்து இயக்கம்

‘இல்லை’ என்பதற்கு சாட்சியாக நிற்கிறது, ஒரு முக்கிய அதிகாரியின் பணியிடமாற்றம். உள்ளாட்சித் தேர்தலை நடத்த வேண்டிய பொறுப்பு மாநிலத் தேர்தல் ஆணையத்தின் கையில் இருக் கிறது. அப்படிப்பட்ட முக்கியத்துவமிக்க ஆணையத்தின் செயலாளராக இருந்த டி.எஸ்.ராஜசேகரை, சமீபத்தில் மதுரை ஆட்சியராகப் பணிமாற்றம் செய்துள்ளது தமிழக அரசு. உள்ளாட்சித் தேர்தலை நடத்தவேண்டிய நெருக்கடி நிலையில் உள்ள ஆணையம், இந்தப் பணிகளை மூன்று ஆண்டுகளாகக் கவனித்துவரும் ராஜசேகரை இடமாற்றம் செய்தது ஏன்?

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

கிராம ஊராட்சிகளில் 1,18,974, நகர்ப்புற உள்ளாட்சியில் 12,820 என மொத்தம் 1,31,794 பதவியிடங்களுக்கு தேர்தல் நடத்தி முடிக்க வேண்டும். ஏற்கெனவே தேர்தல் நடத்துவதில் ஆண்டுக்கணக்கில் தாமதம். இந்த நிலையில் ஆணையத்தின் செயலாளரை மாற்றுவது தேர்தல் நடத்தும் பணிகளைப் பாதிக்கும்; தேர்தல் தள்ளிப்போகும் என்பது தலைமைச் செயலருக்குத் தெரியாதா... இல்லை முதலமைச்சருக்குத்தான் தெரியாதா?

மூன்று பழனிசாமிகளும் முடங்கிக் கிடக்கும் உள்ளாட்சியும்!

ஆணையத்துக்கு புதிய செயலாளர் நியமிக்கப் பட்டதிலும் அரசின் அப்பட்டமான அலட்சியம் தெரிகிறது. பேரூராட்சிகள் இயக்ககத்தின் இயக்குநராகச் செயல்பட்டுவந்த எஸ்.பழனிசாமி, ஆணையத்தின் செயலாளராக நியமிக்கப் படுகிறார். அவரே பேரூராட்சி இயக்குநராகக் கூடுதல் பொறுப்பு வகிப்பார் என்றும் அறிவிக்கிறது அரசு. உள்ளாட்சித் தேர்தலை நடத்துவதே மிகப்பெரிய பணி என்றுள்ள தேர்தல் ஆணையத்தின் செயலாளராக இருக்கும் ஒருவர், பேரூராட்சி இயக்ககத்தின் இயக்குநராகவும் எப்படி முழுமையாகச் செயல்பட முடியும்?

மாநிலத் தேர்தல் ஆணையர் பதவியில் வேறு மாதிரியான சிக்கல். கடந்த இரண்டு ஆண்டுகள் ஆணையராகச் செயல்பட்டுவந்த மாலிக் பெரோஸ்கானின் பதவிக்காலம் முடிவுற்றவுடன், புதிய ஆணையராக ஆர்.பழனிசாமி கடந்த ஏப்ரலில் பொறுப்பேற்றார். தேர்தலை உடனடியாக நடத்த வேண்டும் என்ற உண்மையான அக்கறை இருந்திருந்தால், மாலிக் பெரோஸ்கானின் பணிக்காலத்தை நீட்டித்துத் தேர்தல் நடத்தி முடிக்கும்வரை அவரையே ஆணையராகத் தொடர வைத்திருக்கலாமே?

ஆளுங்கட்சிக்கு உள்ளாட்சித் தேர்தல் உடனடியாக நடத்தப்படுவதில் உடன்பாடில்லை என்ற அரசியல் காரணம் அனைவருக்கும் தெரிந்ததுதான். இந்தப் பின்புலத்தில், தேர்தல் ஆணையத்தின் ஆணையரையும் செயலரையும் மாற்றும் அதிகாரம் படைத்த தமிழக அரசின் விருப்பப்படிதான் ஆணையம் செயல்படும் என்பது சொல்லித் தெரிய வேண்டியதில்லை.

2016-ம் ஆண்டு அக்டோபர் மாதத்தில் மீண்டும் தேர்தல் நடத்தப்பட்டிருக்க வேண்டும். இன்றுவரை நடக்கவில்லை. உள்ளாட்சித் தலைவர்கள் செய்துவந்த பணிகளைத் தனி அலுவலர்கள் மூலம் கவனித்துக்கொள்ள முயற்சி செய்கிறது அரசு. 2016-ல் ஆறு மாதங்கள் என்று நிர்ணயிக்கப்பட்ட தனி அலுவலர்களின் பதவிக்காலம், ஒவ்வொரு ஆறு மாதங்களின் முடிவிலும் மீண்டும் நீட்டிக்கப்பட்டு வருகிறது (இப்போது டிசம்பர் 31வரை நீட்டிக்கப்பட்டுள்ளது).

எஸ்.பழனிசாமி, ஆர்.பழனிசாமி
எஸ்.பழனிசாமி, ஆர்.பழனிசாமி

மக்களால் தேர்ந்தெடுக்கப்பட்டவர்கள் பொறுப்பில் இருக்கும்போது மக்கள் உரிமையுடன் கேள்வி கேட்பார்கள்; அடுத்தத் தேர்தலில் ஜெயிக்க வேண்டும் என்ற காரணத்துக்காகவாவது உள்ளாட்சிப் பிரதிநிதிகள் மக்கள் பிரச்னைகளைத் தீர்ப்பதில் கவனம் செலுத்துவார்கள். கிராமத்தில் குடிநீர் வரவில்லை என்றால், பஞ்சாயத்துத் தலைவரின் வீட்டை மக்கள் உரிமை யுடன் முற்றுகையிடுவார்கள்; முறையிடு வார்கள். அதுபோல், தனி அலுவலரிடம் உரிமை கோர முடியுமா?

குடிநீர், சாலை, பாதாளச் சாக்கடை போன்ற அடிப்படைப் பிரச்னைகளுக்கு நிதி இல்லை என்று அடிக்கடி கையை விரிக்கிறது தமிழக அரசு. இந்தச் சூழலில், உள்ளாட்சித் தேர்தலை நடத்தாததால், தமிழகத்துக்குத் தரவேண்டிய நிதி ஒதுக்கீடு ரூ.3,852 கோடியை மத்திய அரசு நிறுத்தம் செய்துவைத்துள்ளது என்ற விவரம் வேதனை அளிக்கிறது. இந்த நிதி கிடைத்திருந்தால் ஆண்டுக்கு ரூ.1000 கோடிக்கு மேல் மக்கள் நலத் திட்டங்களை செயல்படுத்தி இருக்கலாம். மீண்டும் இந்த நிதி முழுமையாகக் கிடைக்குமா என்பது சந்தேகமே!

முதல்வர் எடப்பாடி பழனிசாமி, மாநிலத் தேர்தல் ஆணையர் ஆர்.பழனிசாமி, தேர்தல் ஆணைய செயலாளர் எஸ்.பழனிசாமி... இந்த மூன்று பழனிசாமிகளும் இணைந்து தேர்தலை நடத்தப்போகிறார்களா... இல்லை, உச்ச நீதிமன்றமே ஒரு தனி நீதிபதியை நியமித்து தமிழகத்தில் உள்ளாட்சித் தேர்தலை நடத்தப்போகிறதா என்பது இன்னும் சில மாதங்களில் தெரிந்துவிடும்!