Published:Updated:

“ரஜினி பேசினால் தலைப்புச்செய்தி; நான் பேசினால் பெட்டிச் செய்தியா?”

Seeman
பிரீமியம் ஸ்டோரி
Seeman

கொட்டும் மழை. கொளுத்தும் வெயில் என திறந்தவெளி மேடையில் நின்று கொந்தளிக்கும் கோபக்கார இளைஞர், நாம் தமிழர் கட்சியின் தலைமை ஒருங்கிணைப்பாளர் சீமான்!

“ரஜினி பேசினால் தலைப்புச்செய்தி; நான் பேசினால் பெட்டிச் செய்தியா?”

கொட்டும் மழை. கொளுத்தும் வெயில் என திறந்தவெளி மேடையில் நின்று கொந்தளிக்கும் கோபக்கார இளைஞர், நாம் தமிழர் கட்சியின் தலைமை ஒருங்கிணைப்பாளர் சீமான்!

Published:Updated:
Seeman
பிரீமியம் ஸ்டோரி
Seeman

ண்ணுக்கெட்டிய தூரம்வரை தேர்தல் அறிகுறியே தென்படாத இந்தச் சூழலிலும், கழகங்களுக்கு எதிராக கலகம் பேசிவரும் ‘ஆங்ரிபேர்டு’ அண்ணன் சீமானைச் சந்தித்தேன்....

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

‘’ ‘திராவிட ஆட்சிகளால்தான் தமிழ்நாடு குட்டிச்சுவராகிவிட்டது’ என்கிறீர்கள் நீங்கள். ஆனால், மத்திய அரசோ, ‘தமிழகம்தான் முன்னேறிய மாநிலம்’ என்று சொல்லி உரிய நிதியைக்கூட தரமறுக்கிறது. இரண்டில் எது உண்மை?’’

‘’இந்தியாவே வளர்ச்சி பெறவில்லை என்றுதான் நாங்கள் சொல்கிறோம். இதில், தமிழ்நாடு வளர்ச்சி பெற்றுவிட்டது என்று அவர்கள் சொல்வதெல்லாம், நிதியைக் கொடுக்காமல் இருப்பதற்காகச் சொல்லப்படுவதுதான்.

இலவச அரிசியை வாங்கிச் சாப்பிட்டு வயிறு வளர்த்துதான் உயிர் பிழைக்க முடியும் என்ற வறுமை நிலையில்தானே இங்கே மக்களை வைத்திருக்கிறார்கள். மின்விசிறி, மாவு அரைக்கும் எந்திரம், மசாலா அரைக்கும் எந்திரம் என அடிப்படைத் தேவையைக்கூட என் உழைப்பின் ஊதியத்திலிருந்து பெற முடியாமல் இலவசத்தை எதிர்நோக்கி வைத்திருப்பதுதான் இந்தத் திராவிடக் கட்சிகளின் சாதனை!

 “ரஜினி பேசினால்  தலைப்புச்செய்தி; 
நான் பேசினால் பெட்டிச் செய்தியா?”

என் நாட்டின் தலைநகரில் பாதியளவுகூட இல்லாத சிங்கப்பூர், கல்வி, மருத்துவத் துறைகளில் உலகின் தலைசிறந்த நாடாக இருக்கிறது. ‘மத்தியில் கூட்டாட்சி, மாநிலத்தில் தன்னாட்சி’ என்று முழக்கம் வைத்தீர்களே.. இன்னும்கூட அதையெல்லாம் ஏன் பெறவில்லை? கல்வி, மருத்துவம், மின் உற்பத்தி என இருந்த உரிமைகளையும்கூட மத்திய அரசிடம் ஏன் கொடுத்தீர்கள்? ‘நீட்’டில் ஆரம்பித்து ‘ஒரே ரேஷன்’ திட்டம் வரை அனைத்தையுமே நீங்கள்தானே கையெழுத்து போட்டு ஆரம்பித்திருக்கிறீர்கள். இப்போது வந்து ‘நாங்களும் போராடுகிறோம், போராடுகிறோம்’ என்றால், என்ன அர்த்தம்?’’

‘’2009 நாடாளுமன்றத் தேர்தலின்போது, ‘தி.மு.க - காங்கிரஸ் கூட்டணியில் இணைந்து போட்டியிடுங்கள் என்று என்னை வலியுறுத்தியதே விடுதலைப் புலிகள்தான்’ என்கிறாரே திருமாவளவன்?’’

‘’அண்ணன் திருமாவளவன் இப்படி சொல்லியிருந்தால், அதை முதலிலிருந்தே அவர் சொல்லியிருந்திருக்க வேண்டும். ஏனெனில், போர் தொடங்குவதற்கு முன்பே அந்தக் கூட்டணியில்தானே அண்ணன் இருந்தார்? அதனால், அண்ணன் திருமாவளவனுக்கு என்ன சொல்லப்பட்டது என்று பேசவேண்டிய தேவை இங்கே இல்லை. ஏனெனில், இது அண்ணன் தம்பிக்கு இடையே தேவையற்ற கருத்து முரணாகிவிடும்.

‘எதிர்த்துப் போராடி வீழ்த்த வேண்டும்’ என்றுதான் எனக்குச் சொல்லப்பட்டிருக்கிறது. நான் என் எதிரியைத் தீர்மானித்துவிட்டேன். இந்த நாட்டில், தீய அரசியலின் தொடக்கமே தி.மு.க-தான். பேரறிஞர் அண்ணாவுக்குப் பிறகான தலைமையின் தொடக்கத்திலிருந்துதான் கேடுகெட்ட அரசியலே இங்கு உருவாகிறது.’’

‘’தி.மு.க-வை மிகக் கடுமையாக விமர்சிக்கும் நீங்கள், அ.தி.மு.க-வை அப்படி விமர்சிப்பதில்லையே ஏன்?’’

‘’அ.தி.மு.க என்பது என்ன.... தி.மு.க என்ற கொடுமையின் குழந்தைதானே அ.தி.மு.க.! ஒரு தாய்க் கழகத்தைவிடவும் சேய்க் கழகம் அதிக வாக்கு வாங்குகிறது என்றால், அதன் காரணம் என்ன? எம்.ஜி.ஆர்., ஜெயலலிதா மீது மக்களுக்கிருந்த பற்றா? இல்லை... கருணாநிதி மீதிருந்த வெறுப்பு! நாங்களும் தி.மு.க-வைத்தான் தாக்குவோம். அள்ள அள்ளக் குறையாத குப்பையெல்லாம் அங்கேதான் இருக்கிறது.’’

‘’சாதிக் கலவரங்களில் பாதிக்கப்பட்ட மக்களுக்கு ஆதரவாக களத்தில் நின்று கம்யூனிஸ்ட் கட்சியினர் குரல் கொடுக்கிறார்கள். ஆனால், நாம் தமிழர் கட்சி அப்படி குரல் கொடுப்பதாகத் தெரியவில்லையே?’’

‘’களத்தில் போய் நின்று அந்தப் பிள்ளைகளோடு பிரச்னைகளை அதிகமாக எதிர்கொண்டதே நாம் தமிழர் கட்சிதான். நான் போகாத இடங்களில்கூட என் பிள்ளைகள் அறிவுப் புரிதலோடு போய் நின்று போராடுகிறார்கள். தங்களுக்குள்ளேயே அடித்துக்கொள்ளும் அவர்கள் இருவருமே என் ரத்தம்தான். அங்கே நான் போய் யார் பக்கம் நிற்பது?

 “ரஜினி பேசினால்  தலைப்புச்செய்தி; 
நான் பேசினால் பெட்டிச் செய்தியா?”

ஏற்கெனவே சாதிக்கொரு கட்சி உருவாகிவிட்ட பிறகு, அவரவர் தன் சாதி சார்ந்து மக்களை உசுப்பேத்திக்கொண்டிருக்கும் சூழலில், இந்த விடயத்தை நாங்கள் மிகக் கவனமாகத்தான் கையாள வேண்டியிருக்கிறது.தேர்தலின்போது ஆதிக்குடிகளுக்கும் பெண்களுக்கும் அதிக இடங்களை ஒதுக்கிப் போட்டியிட வைத்த எங்கள் கட்சியை யாராவது பாராட்டி யிருக்கிறார்களா? வெற்றிகளைக் கொண்டாடும்போது மட்டும் ‘இது அண்ணா பூமி, பெரியார் மண்’ என்றெல்லாம் பேசுகிறவர்கள், சாதிப் பிரச்னையின்போதும் ஆணவக் கொலையின்போதும் மட்டும் தமிழ் தேசியத்தினரைக் கேள்வி கேட்பது என்ன நியாயம்?’’

‘’கடந்த வருடம் அரசியலுக்குள் வந்த கமல்ஹாசனும் உங்களுக்கு ஈடாக வாக்குகள் வாங்கியிருக்கிறாரே?’’

‘’கமல்ஹாசனுக்கு 65 வயது; இதில் 60 வருடங்களாக தொடர்ந்து நடிப்புக் கலை மூலமாக மக்களிடம் போய் சேர்ந்துகொண்டேயி ருக்கிறார். எனவே, இந்த 60 வருடங்களாக அவர் ஓர் இயக்கம் நடத்திவருவதாகத்தான் நீங்கள் இதைப் பார்க்கவேண்டும்.’’

‘’நீங்களும் திரைத்துறையில் இருந்து வந்தவர்தானே?’’

‘’நானும் இருந்தேன் என்றாலும்கூட, பின்னாலிருந்து இயக்கும் கலைஞனாக மட்டும்தானே இருந்தேன். ரஜினி, கமல், விஜயகாந்த் போல ரசிகர்களைச் சென்று சந்திக்கவில்லையே. அதனால்தான் அரசியலுக்குள் கமல் வருகிறபோதே, அவருக்கான பார்வையாளர்கள் அதிகம் என்று எண்ணி ஊடகமும் அவர் மீது மட்டுமே வெளிச்சத்தைப் பாய்ச்சுகிறது. ‘தேர்தலில் நான் போட்டி யிடவில்லை’ என்று ரஜினி காந்த் சொன்னால், அது தலைப்புச் செய்தியாக வருகிறது. ஆனால், ‘நான் போட்டியிடுகிறேன்’ என்று சொல்கிறேன். அதுவோ பெட்டிச் செய்தியாக வருகிறது.’’

‘’தேர்தல் அரசியலுக்குள் ரஜினிகாந்த் வருகிறபோதும் நாம் தமிழர் போன்ற கட்சிகளுக்கு அது பெரும் பின்னடைவாகத்தானே அமையும்?’’

‘’ரஜினியோ, தம்பி விஜயோ யார் வந்தாலும் தொடக்கத்தில் அப்படியொரு வரவேற்பு இருக்கும்.... ஒரு சிபாரிசு கடிதம்போல், தொடங்குவதற்கு சரியாக இருக்கும்; ஆனால் தொடர்வதற்கு...?’’

‘’விஜய்யின் அரசியல் பிரவேசத்தை ஆதரிக்கிற சீமானின் போக்கு, ரஜினிக்கு எதிராக விஜய்யை கொம்பு சீவிவிடும் வேலை என்கிறார்களே?’’

‘’ரஜினிக்கும் எனக்கும் எந்தச் சம்பந்தமும் இல்லை. ஆனால், விஜய் என் தம்பி. என் இனம் சார்ந்தவன். எனவே, விஜய் வந்து அரசியல் செய்வதென்பதில் எனக்கு மகிழ்ச்சிதான். எங்கள் அளவுக்கு கொள்கையில் விஜய், தீவிரம் காட்டுவாரா என்பதெல்லாம் எனக்குத் தெரியாது. மக்கள் அவருக்கு வாக்கு செலுத்தினால், பாராட்டுவேன். மாறாக எனக்கு வாக்களித்தால் நன்றி தெரிவிப்பேன். அவ்வளவுதான்!’’

‘’சிம்புதான் அடுத்த சூப்பர் ஸ்டார் என்று பேசிவந்த நீங்கள், இப்போது விஜய்தான் அடுத்த சூப்பர் ஸ்டார் என்கிறீர்களே... என்ன நடந்தது?’’

‘’விஜய், இப்போதே சூப்பர் ஸ்டார்தானே! இதை 2006-ம் ஆண்டிலேயே நான் சொல்லியிருக்கிறேன். தம்பி சிம்புவும் நல்ல ஆற்றல் கொண்ட இளைஞன்தான். அதனால்தான் ஓர் அண்ணனாக, ‘நீயும் உயர்ந்த இடத்துக்கு வந்துவிடடா...’ என்று சொல்லிச்சொல்லிப் பார்க்கிறேன்; வரமாட்டேன் என்கிறானே....’’