Published:Updated:

விஐபி தொகுதி: கரூர்... சேஃப்டி செந்தில் பாலாஜி!

செந்தில் பாலாஜி
பிரீமியம் ஸ்டோரி
News
செந்தில் பாலாஜி

எதிரெதிர் துருவங்களாக இருப்பதால், கடும் போட்டி நிலவுகிறது. செந்தில் பாலாஜிக்கு இது ராசியான தொகுதி.

அரசியலில் பரம வைரிகளான தற்போதைய போக்குவரத்துத்துறை அமைச்சர் எம்.ஆர்.விஜயபாஸ்கர் அ.தி.மு.க சார்பிலும், தி.மு.க சார்பில் முன்னாள் அமைச்சர் செந்தில் பாலாஜியும் கரூரில் நேருக்கு நேர் முட்டிமோதுகிறார்கள். அ.தி.மு.க-விலிருந்த காலத்திலிருந்தே செந்தில் பாலாஜிக்கும், எம்.ஆர்.விஜயபாஸ்கருக்கும் ஆகாது... எலியும் பூனையுமாக நிற்பார்கள்.

எம்.ஆர்.விஜயபாஸ்கர்
எம்.ஆர்.விஜயபாஸ்கர்

இப்போது, எதிரெதிர் துருவங்களாக இருப்பதால், கடும் போட்டி நிலவுகிறது. செந்தில் பாலாஜிக்கு இது ராசியான தொகுதி. கடந்த 2006 மற்றும் 2011 ஆகிய இரண்டு தேர்தல்களிலும் கரூர் தொகுதியில் போட்டியிட்டுத்தான் வெற்றிபெற்றார். ஆனால், கடந்த 2016-ம் ஆண்டு சட்டமன்றத் தேர்தலில் எம்.ஆர்.விஜயபாஸ்கருக்கு கரூர் தரப்பட, அரவக்குறிச்சியில் களம்காண வேண்டிய சூழல் செந்தில் பாலாஜிக்கு ஏற்பட்டது. அந்தத் தேர்தலில் அ.தி.மு.க சார்பிலும், பின்னர் 2019 இடைத்தேர்தலில் தி.மு.க சார்பிலும் அரவக்குறிச்சியில் வெற்றிபெற்றவர், இந்த முறை பழையபடி கரூருக்கு வந்திருக்கிறார்.

இருவரும் கொங்கு வெள்ளாளக் கவுண்டர் சமூகத்தைச் சேர்ந்தவர்கள் என்பதால் அந்தச் சமூகத்தைச் சேர்ந்த முக்கியஸ்தர்கள், ‘‘நீங்க ரெண்டு பேரும் ஜெயிச்சாத்தான் நம்ம சமூகத்துக்கு நல்லது. யாராச்சும் ஒருத்தர் அரவக்குறிச்சி தொகுதியில நில்லுங்கப்பா’’ என்று சமாதானம் பேசிப்பார்த்தார்கள். “முடியவே முடியாது” என்று இருவரும் மறுத்துவிட்டார்கள். இருவருக்குமே இங்கு வெற்றிபெற வேண்டியது கௌரவப் பிரச்னையாகிவிட்டதால், பிரசாரத்தில் அனல் பறக்கிறது... பணத்தைத் தண்ணீராக வாரி இறைக்கிறார்கள். “அ.தி.மு.க சார்பில் வீட்டுக்கு ஒரு பவுன் தங்கக்காசு... தி.மு.க சார்பில் ஓட்டுக்கு 5,000 ரூபாய்” என்றெல்லாம் பேச்சுகள் ரகளைகட்டுகின்றன.

பிரசாரத்தில் எம்.ஆர்.விஜயபாஸ்கர், “அரசு மருத்துவக் கல்லூரி, புகளூர் காவிரி தடுப்பணை, புதிய பேருந்து நிலையம், தேசிய நெடுஞ்சாலை எண் 7-ல் ஐந்து இடங்களில் மேம்பாலம் உள்ளிட்ட திட்டங்களை நிறைவேற்றியிருக்கிறேன்” என்று சொல்லி வாக்கு கேட்கிறார். செந்தில் பாலாஜியோ, “அவை அனைத்தும் நான் கொண்டுவந்தவை” என்று பதிலடி கொடுக்கிறார்.

விஐபி தொகுதி: கரூர்... சேஃப்டி செந்தில் பாலாஜி!

அ.ம.மு.க கூட்டணியில் போட்டியிடும் தே.மு.தி.க கரூர் மாவட்டப் பொருளாளர் கஸ்தூரி என்.தங்கராஜ், இரு மலைகளுக்கு இடையில் ஓடினாலும், அவர் பிரிக்கப்போவது அ.தி.மு.க வாக்குகளைத்தான். இது செந்தில் பாலாஜிக்கு சாதகமே. பணபலம், அரசியல் செல்வாக்கு என இருவருமே சமபலத்தில் இருந்தாலும், கடந்தமுறை வெறும் 441 வாக்குகள் வித்தியாசத்தில், பார்டரில்தான் பாஸ் செய்தார் எம்.ஆர்.விஜயபாஸ்கர். இது அவருக்கு மைனஸ். அ.தி.மு.க அதிருப்தி மனநிலையுடன், மேற்கண்ட காரணங்களையும் சேர்த்துக் கணக்கிட்டால் கடும் போட்டியிலும்கூட சேஃப்டி வளையத்தில்தான் இருக்கிறார் செந்தில் பாலாஜி!