சிங்கப்பூரில் போதைப்பொருள் கடத்தலுக்கு எதிராக கடுமையான சட்டங்கள் அமலில் இருக்கின்றன. உலக நாடுகள் பலவும் இதற்கு எதிர்ப்பு தெரிவித்துவருகின்றன. ஆனால், அந்த நாடு தனது நிலைப்பாட்டில் உறுதியாக இருக்கிறது. கொரானாவுக்குப் பிறகு மரண தண்டனை நிறைவேற்ற ஆரம்பித்ததால், பொதுமக்கள் வீதிகளில் இறங்கிப் போராடியது குறிப்பிடத்தக்கது. இந்த நிலையில் கஞ்சா கடத்தியதாக சிங்கப்பூரில் தமிழரான தங்கராஜ் என்பவருக்கு அடுத்த வாரம் தூக்கு தண்டனை நிறைவேற்றப்படவிருக்கிறது.

முன்னதாக 2018-ம் ஆண்டில், 1 கிலோ கிராம் (2.2 பவுண்டுகள்) கஞ்சாவைக் கடத்த சதிசெய்ததாக உயர் நீதிமன்றத்தால், தங்கராஜ் சுப்பையா குற்றவாளி எனக் கண்டறியப்பட்டு அவருக்குக் கட்டாய மரண தண்டனை விதிக்கப்பட்டது. இந்த ஆண்டு மரண தண்டனை நிறைவேற்றப்படுவது இதுவே முதன்முறையாகும். இவர் தமிழகத்தைப் பூர்வீகமாகக் கொண்டவர். இவரின் உறவினர்கள் சுமார் ஐந்து தலைமுறைகளுக்கு முன்பு சிங்கப்பூருக்கு இடம்பெயர்ந்திருக்கிறார்கள். தற்போது அரசின் இந்த முடிவுக்கு பொதுமக்களும், சமூக ஆர்வலர்களும் கடும் எதிர்ப்பு தெரிவித்துவருகிறார்கள்.

"நியாயமான விசாரணை இல்லை..."

இது குறித்து தங்கராஜ் சுப்பையாவின் மூத்த சகோதரி லீலாவதி, மருமகள் சுபாஷினி ஆகியோர் ஊடகங்களிடம் பேசுகையில், ``தங்கராஜ் எந்தத் தவறும் செய்யவில்லை என்று எங்களுக்குத் தெரியும். ஆரம்பத்திலிருந்தே அவரது வழக்கை மறுபரிசீலனை செய்ய நீதிமன்றத்தை நாங்கள் வலியுறுத்துகிறோம். அவர்கள் அவ்வாறு செய்தால் நாங்கள் மிகவும் நன்றியுள்ளவர்களாக இருப்போம்.

நீதிமன்றத்தில் நாங்கள் பல விஷயங்களை எழுப்ப வேண்டியிருக்கிறது. நியாயமான விசாரணை இல்லை. அதனால் நாங்கள் மிகவும் மனஉளைச்சலுக்கு ஆளாகியிருக்கிறோம். தற்போது ஒரு கிலோ கஞ்சா கடத்தலில் ஈடுபட்டதற்காக தங்கராஜுக்கு தூக்கு தண்டனை நிறைவேற்றுவதாக, எங்களுக்கு அரசு அனுப்பிய கடிதத்தில் தெரிவிக்கப்பட்டிருக்கிறது.

"ஏழைகளுக்கு நியாயமற்றதாக..."

ஆனால், அவர் அதைத் தொட்டதே இல்லை. தூக்கு தண்டனை நிறைவேற்ற வேண்டாம் என்று அதிபர் அலுவலகத்தில் கருணைக் கடிதங்களைச் சமர்ப்பித்திருக்கிறோம். அதை அவர் திறந்து படித்து, அவற்றைத் தீவிரமாகப் பரிசீலிப்பார் என்ற உத்தரவாதம், எங்களுக்குத் தேவை" என்றனர்.

கடந்த ஆண்டில் 11 பேருக்கு தூக்கு:

இது குறித்து சமூக ஆர்வலர்கள், "புதன்கிழமை (ஏப்ரல் 26) தங்கராஜ் தூக்கிலிடப்பட்டால், ஆறு மாதங்களுக்குப் பிறகு சிங்கப்பூரில் நிறைவேற்றப்படும் முதல் மரண தண்டனை இதுவாகும். கடந்த ஆண்டு மார்ச் மாத இறுதியிலிருந்து அக்டோபர் மாதத்துக்குள் 11 பேர் தூக்கிலிடப்பட்டனர்.

2014-ம் ஆண்டில் தங்கராஜ் போதைப்பொருள் உட்கொண்டதற்காக கைதுசெய்யப்பட்டார். பின்னர் அவர் கஞ்சா விநியோகத்தை ஒருங்கிணைக்க பயன்படுத்தப்பட்ட தொலைபேசி எண் மூலம் இரண்டு போதைப்பொருள் கடத்தல்காரர்களுடன் குற்றச் செயலில் இணைக்கப்பட்டார்.

"இது மிகவும் பயங்கரமானது..."

வழக்கறிஞர் இல்லாமல் விசாரிக்கப்பட்டதால் தங்கராஜுக்கு நீதி கிடைக்கவில்லை என்கிறார்கள் அவர் உறவினர்கள். ஒரு கிலோ கஞ்சாவைக் கடத்தும் முயற்சியில் ஈடுபட்டதற்காக, `ஒரு மனிதன் விரைவில் தூக்கிலிடப்படலாம்' என்ற எண்ணம் அதிகார வரம்புகளில் குற்றமற்றது அல்லது சட்டபூர்வமாக்கப்படுகிறது.

இது மிகவும் பயங்கரமானது. மரண தண்டனைக் கைதிகளின் குடும்பங்களுக்கு அவர்களின் கருணை மனுக்கள் ஏன் நிராகரிக்கப்படுகின்றன என்பதற்கான காரணங்களைக் கூறுவதில்லை. இதனால் அவர்களின் மனுக்களுக்கு எவ்வளவு கவனம் செலுத்தப்பட்டது என்று தெரியவில்லை.

சமரசமற்ற போர்:

தங்கராஜ் தற்போது சிங்கப்பூரில் மரண தண்டனை விதிக்கப்பட்ட 50 பேரில் ஒருவர். அவர்களில் பெரும்பாலானோர் வன்முறையற்ற போதைப்பொருள் குற்றங்களுக்காகத் தண்டிக்கப்பட்டவர்கள் மற்றும் சிறுபான்மை இனக் குழுக்களிலிருந்து வந்தவர்கள்.

"மிகக் கடுமையான குற்றங்களுக்கு..."

அகிம்சைவாத போதைப்பொருள் குற்றங்களுக்கான மரண தண்டனைகளை, சிங்கப்பூர் பல தசாப்தங்களாக நிறைவேற்றியது, சர்வதேச சட்டத்தின் மீறல் என்பது தெளிவாகிறது. மரண தண்டனை மிகக் கடுமையான குற்றங்களுக்கு மட்டுமே நிறைவேற்றப்பட வேண்டும்" என்றனர்.

இது குறித்து சிங்கப்பூரில் இருக்கும் சமூக ஆர்வலர் கோகிலா அண்ணாமலையிடம் பேசினோம். ``தமிழ்நாட்டைப் பூர்வீகமாகக் கொண்டவர் தங்கராஜ் (46). இவர் சிங்கப்பூரில் வசித்துவருகிறார். 1,017.9 கிராம் கஞ்சாவைக் கடத்தியதாகக் கூறி 2018-ம் ஆண்டு அக்டோபரில் மரண தண்டனை விதிக்கப்பட்டது.

"ஏற்கெனவே காவலில்..."

ஆனால், கஞ்சாவை தங்கராஜ் தொடவே இல்லை. அவருக்கு எதிரான வழக்கு பெரும்பாலும் சூழ்நிலை மற்றும் அனுமானங்களை அடிப்படையாகக் கொண்டது. மத்திய போதைப்பொருள் தடுப்புப் பிரிவினரால் கைதுசெய்யப்பட்ட இருவரின் மொபைல்களில் தங்கராஜுவின் எண் இருந்தது.

அதன் அடிப்படையில்தான் அவர் இந்தக் குற்றத்தில் தொடர்புபடுத்தப்பட்டார். இருப்பினும், இந்த வழக்கில் தொடர்புடைய நேரத்தில் தங்கராஜ் ஏற்கெனவே ஒரு தனி குற்றத்துக்காக காவலில் இருந்தார். மேலும், அவரது மொபைல் போன்கள் பகுப்பாய்வுக்காக மீட்கப்படவில்லை.

"நியாயமாக நடக்கவில்லை..."

விசாரணை உரிய செயல்முறையுடனும் நியாயமாகவும் நடக்கவில்லை. சிங்கப்பூரில் வழக்கமான நடைமுறைப்படி, சட்ட ஆலோசகர் வராமல் தங்கராஜுவிடம் போலீஸார் விசாரணை நடத்தினர். மேலும், அவரது வாக்குமூலத்தைப் பதிவுசெய்யும்போது தமிழ் மொழிபெயர்ப்பாளர் தேவை என அவர் விடுத்த கோரிக்கையும் நிராகரிக்கப்பட்டது.  

விசாரணை அதிகாரியின் கேள்விகளையோ அல்லது பதிவுசெய்யப்பட்ட அறிக்கையை தனக்கு மீண்டும் வாசிக்கும்போது சரியாகப் புரிந்துகொள்வதில் சிக்கல் இருப்பதாக அவர் கூறினார். விசாரணைக்கு, சாட்சி வாக்குமூலங்கள், தொலைபேசி பதிவுகளும் தங்கராஜ் தரப்புக்கு தெரிவிக்கப்படவில்லை.

"வழக்கறிஞர் கிடைக்கவில்லை..."

கஞ்சா வைத்திருந்ததாகக் கூறப்படும் தங்கராஜுவின் கூட்டுச் சதிகாரரான மோகன் வாலோ என்பவர் கைதுசெய்யப்பட்டார்.  499.99 கிராம் கஞ்சா (கஞ்சா கடத்தலுக்கான கட்டாய மரண தண்டனைக்கு 500 கிராம் வரம்புக்குக் கீழே 0.01 கிராம்) வைத்திருந்த காரணத்துக்காக அவர் வைத்திருந்த குற்றத்தை ஒப்புக்கொண்டார்.

தங்கராஜ் தனது வழக்கை மறுஆய்வு செய்யக் கோரி 2022-ம் ஆண்டின் இறுதியில் ஒரு விண்ணப்பத்தைத் தாக்கல் செய்தார். அவருடைய குடும்பத்தினர் எவ்வளவோ முயற்சி செய்தபோதிலும், அவர்களுக்காக வாதாட ஒரு வழக்கறிஞரைக் கண்டுபிடிக்க முடியவில்லை.

"அரசின்மீது பயம்..."

அரசுக்கு பயந்துகொண்டு யாரும் வழக்கை எடுக்க முன்வரவில்லை. இந்த ஆண்டின் தொடக்கத்தில் அவரது விண்ணப்பம் தள்ளுபடி செய்யப்பட்டது. தங்கராஜுக்கும் அவரின் குடும்பத்தினருக்கும் ஆதரவாக கடந்த 23-ம் தேதி ஒற்றுமை நிகழ்வு ஒன்றை நடத்தினோம். இதில் கலந்துகொண்டவர்கள் கருணை மனுக்களைத் தயார் செய்தனர்.

பின்னர் 59 கடிதங்கள் சிங்கப்பூர் அதிபரின் அதிகாரபூர்வ இல்லம் மற்றும் அலுவலகமான இஸ்தானாவுக்கு வழங்கப்பட்டன. அவர்கள் எங்களுக்கு எந்த பதிலும் வழங்கவில்லை. ஆனால், செய்தியாளர்களிடம் உரிய சட்ட விதிகளின்படிதான் தண்டனை வழங்கப்பட்டிருக்கிறது எனத் தெரிவித்திருக்கிறார்கள்" என்றார்.