Published:Updated:

‘மாஸ்டர்’க்கு கிளாஸ் எடுத்த மத்திய அரசு!

‘மாஸ்டர்’க்கு கிளாஸ் எடுத்த மத்திய அரசு!
பிரீமியம் ஸ்டோரி
‘மாஸ்டர்’க்கு கிளாஸ் எடுத்த மத்திய அரசு!

இந்தியாவில் கொரோனாவால் பாதிக்கப் பட்டவர்கள் ஒரு கோடிக்கும் மேற்பட்டவர்கள். சுமார் ஒன்றரை லட்சம் மரணங்கள் நிகழ்ந்துள்ளன.

‘மாஸ்டர்’க்கு கிளாஸ் எடுத்த மத்திய அரசு!

இந்தியாவில் கொரோனாவால் பாதிக்கப் பட்டவர்கள் ஒரு கோடிக்கும் மேற்பட்டவர்கள். சுமார் ஒன்றரை லட்சம் மரணங்கள் நிகழ்ந்துள்ளன.

Published:Updated:
‘மாஸ்டர்’க்கு கிளாஸ் எடுத்த மத்திய அரசு!
பிரீமியம் ஸ்டோரி
‘மாஸ்டர்’க்கு கிளாஸ் எடுத்த மத்திய அரசு!
ஹெல்மெட் அணியாமல், செல்போனில் பேசிக்கொண்டே நோ என்ட்ரியில் ட்ரிபிள்ஸ் வரும் அலட்சியம் பலருக்கு உண்டு. தங்கள் உயிர் பற்றியோ, அடுத்தவர்கள் உயிர் பற்றியோ கவலைப்படாத அலட்சியம் அது! அதேமாதிரி அலட்சியம் அரசுக்கே இருந்தால் என்ன ஆகும்? ‘தியேட்டர்களில் 100 சதவிகிதம் பார்வையாளர்களை அனுமதிக்கலாம்’ என அரசாணை போடவைக்கும். ‘மாஸ்டர்’ பட விவகாரத்தின் பின்னணியில் அதுதான் நடந்திருக்கிறது!
‘மாஸ்டர்’க்கு கிளாஸ் எடுத்த மத்திய அரசு!

‘மாஸ்டர்’ அரசியலை அடுத்துப் பார்ப்போம். முதலில் கொரோனாவை முன்வைத்து சில விஷயங்களைப் பார்க்கலாம்.

`தமிழக அரசின், தியேட்டர்களில் 100 சதவிகிதம் பார்வையாளர்களை அனுமதிக்கும் முடிவு ஆபத்தானது’ என்கிறார்கள் டாக்டர்கள். இப்போதுதான் கொரோனா தொற்றும், உயிரிழப்புகளும் கணிசமாகக் குறைந்திருக்கின்றன. கடந்த டிசம்பர் மாதம் முதலே நிலைமை பரவாயில்லை. தினசரி வரும் புதிய நோயாளிகளைவிட, தினமும் குணமடைந்து வீடு திரும்புவோர் எண்ணிக்கை அதிகரித்திருக்கிறது. கொரோனாவால் அதிகம் பாதிக்கப்பட்ட நாடுகளில் உயிரிழப்பு மிகக் குறைவாக இருப்பது இந்தியாவில்தான். தினசரி மரணங்களின் எண்ணிக்கை 300-க்கும் கீழே குறைந்திருக்கிறது.

ஆனால், சில உண்மைகளை நாம் மறந்துவிடக் கூடாது. இந்தியாவில் கொரோனாவால் பாதிக்கப் பட்டவர்கள் ஒரு கோடிக்கும் மேற்பட்டவர்கள். சுமார் ஒன்றரை லட்சம் மரணங்கள் நிகழ்ந்துள்ளன. கொரோனா நோயாளிகளில் 63 சதவிகிதம் பேர் ஆண்கள். கொரோனா தாக்கி மரணமடைந்தவர்களில் 70 சதவிகிதம் பேர் ஆண்கள். அதிகம் வெளியிடங்களில் புழங்குபவர்கள் என்பதால், ஆண்களே அதிகம் பாதிக்கப்படுகிறார்கள். தியேட்டர்களுக்குப் படம் பார்க்க வருவோரிலும் ஆண்களே அதிகம் என்பதையும் கவனிக்க வேண்டும்.

மக்கள் ஒன்று கூடினால்...

அரங்குகளில் மக்கள் கூடினால் என்ன ஆகும்? சாம்பிளுக்குச் சில சம்பவங்கள்...

 கொரோனா தொற்று பரவிய ஆரம்ப நாள்களில் பயோஜென் என்ற மருந்து நிறுவனம், அமெரிக்காவில் இரண்டு நாள் கருத்தரங்கை நடத்தியது. அதில் பங்கேற்றவர்களில் சிலருக்குக் கொரோனா தொற்று இருந்தது. அவர்கள் மூலம் படிப்படியாக 2,45,000 பேருக்கு கொரோனா தொற்றியதாக ஆய்வில் தெரியவந்திருக்கிறது.

 பெல்ஜியம் நாட்டின் மோல் நகரில், முதியோர் இல்லத்தில் கிறிஸ்துமஸ் அன்று கிறிஸ்துமஸ் தாத்தா வேடம் அணிந்து வந்தவருக்கு கொரோனா தொற்று. முதியோர் இல்லத்தில் 75 பேருக்கு இப்போது கொரோனா வந்துவிட்டது.

உத்தரகாண்ட்டின் டேராடூன் நகரில் ஒரு திருமணம். மண்டபத்தில் மகிழ்ச்சி அலையுடன் இணைந்து கொரோனாவும் பரவியது. மணமகன் குடும்பத்தில் எல்லோருக்கும் கொரோனா வந்துவிட்டது. இரண்டு முதியவர்கள் இறந்துவிட்டனர்.

இந்தியாவுக்கும் ஆஸ்திரேலியாவுக்கும் மெல்போர்ன் நகரில் நடைபெற்ற இரண்டாவது கிரிக்கெட் டெஸ்ட் போட்டியைப் பார்க்க வந்த ரசிகர் ஒருவருக்குக் கொரோனா இருந்தது பிறகுதான் தெரியவந்தது. அவர் அருகில் அமர்ந்து போட்டியைப் பார்த்தவர்களை இப்போது தேடிக்கொண்டிருக்கிறார்கள்.

மக்கள் கூட்டமாகச் சேரும் இது போன்ற நிகழ்வுகளை ‘சூப்பர் ஸ்ப்ரெடர் நிகழ்வுகள்’ என்கிறார்கள். ஒருவரிடமிருந்து நிறைய பேருக்கு நோய்த் தொற்றும் ஆபத்தை இவை அதிகரிக்கின்றன. பிரிட்டனில் வேகமாகப் பரவி அச்சத்தை ஏற்படுத்திவரும் ‘உருமாறிய கொரோனா’ வைரஸ் இந்தியாவுக்கும் இப்போது வந்துவிட்டது. சாதாரண கொரோனா வைரஸைவிட 70 சதவிகிதம் அதிவேகத்துடன் பரவுகிறது இது. இந்தப் புதிய வைரஸால் கொரோனா இரண்டாவது அலை பரவுமோ என்ற அச்சம் ஏற்பட்டிருக்கிறது. இதன் காரணமாகவே, ‘புத்தாண்டு உள்ளிட்ட கொண்டாட்டங்களில் கூட்டம் சேர்வதைத் தவிர்க்க வேண்டும்’ என மத்திய அரசு அறிவுறுத்தியிருந்தது. இப்படியான நிலையில், தியேட்டர்களில் நெருக்கியடித்துக்கொண்டு அமர்ந்தால் என்ன ஆகும்?

50 சதவிகிதப் பார்வையாளர்களுடன் தியேட்டர்களைத் திறந்து படங்களைத் திரையிட பல மாநிலங்கள் அனுமதித்துள்ளன. ஜனவரி 5-ம் தேதி முதல் தியேட்டர்களை இப்படித் திறக்க கேரள அரசு அனுமதி அளித்தது. விஜய் படங்களுக்கு, தமிழகம்போலவே கேரளாவிலும் மார்க்கெட் உண்டு. கேரளாவையும் நம்பியே ‘மாஸ்டர்’ ரிலீஸுக்குத் தேதி குறித்தார்கள். ஆனால், ‘தியேட்டர்களைத் திறப்பதில்லை’ என்று கேரள திரைப்பட வர்த்தக சபை முடிவெடுத்துள்ளது. வரிச் சலுகை, மின் கட்டணச் சலுகை உள்ளிட்ட பல விஷயங்களைக் கேரள திரையரங்கு உரிமையாளர்கள் கேட்கிறார்கள். அரசு அவற்றைச் செய்து கொடுத்தால் மட்டுமே தியேட்டர்களைத் திறக்க முடியும் என அவர்கள் உறுதியாக இருக்கிறார்கள்.

இந்தியாவில் கொரோனா தடுப்பூசி போடும் பணி, பொங்கல் நேரத்தில் தொடங்கிவிடும். ஆரம்பத்தில் இது கொரோனா முன்களப் பணியாளர்களுக்கே முன்னுரிமை அடிப்படையில் போடப்படும். எல்லோருக்கும் தடுப்பூசி கிடைக்க இன்னும் சில மாதங்கள் ஆகலாம். தடுப்பூசி குறித்த சந்தேகங்களும் குழப்பங்களும் நிலவிவரும் நிலையில், அது எந்த அளவுக்குக் கொரோனாவிலிருந்து பாதுகாப்பு அளிக்கும் என்பதை உறுதியாகக் கூற முடியவில்லை.

தற்கொலை முயற்சி... மருத்துவர் உருக்கம்!

இந்தச் சூழலில் நடிகர்கள் விஜய்க்கும், சிம்புவுக்கும், தமிழக அரசுக்கும் புதுச்சேரி ஜிப்மர் மருத்துவமனையில் பணிபுரியும் டாக்டர் அரவிந்த் ஸ்ரீனிவாஸ் ஃபேஸ்புக்கில் எழுதிய ஒரு பதிவு பெருமளவில் பகிரப்பட்டது.

‘நான் களைத்துப்போயிருக்கிறேன். என்னைப்போல ஆயிரக்கணக்கான மருத்துவர்கள், மருத்துவப் பணியாளர்கள், காவல்துறையினர், தூய்மைப் பணியாளர்கள் சோர்வாக இருக்கிறார்கள். எதிர்பாராத நேரத்தில் கொரோனா ஏற்படுத்திய பாதிப்பைக் குறைப்பதற்காக நாங்கள் களத்தில் இறங்கிக் கடுமையாக உழைத்துக்கொண்டிருக்கிறோம். எங்கள் பணியை மிகைப்படுத்திக் கூறவில்லை. எங்கள் முன் கேமராக்கள் இல்லை. எந்த அதிரடிக் காட்சிகளும் இல்லை. நாங்கள் ஹீரோக்கள் இல்லை. எங்களுக்கு நிம்மதியாக மூச்சுவிட அவகாசம் கொடுங்கள். சிலரின் சுயநலத்துக்கும் பேராசைக்கும் நாங்கள் பலியாக விரும்பவில்லை. பெருந்தொற்று காலம் இன்னும் முடியவில்லை. இன்றுவரை மக்கள் பலியாகிக்கொண்டிருக்கிறார்கள். இந்தநிலையில் நூறு சதவிகித இருக்கைப் பயன்பாட்டுக்கு அனுமதி தருவது தற்கொலை முயற்சி. இன்னும் சொல்வதானால் அது படுகொலை...” என்று நீள்கிறது அவரது பதிவு.

பிரிட்டனில் மீண்டும் ஊரடங்கு அமலாகியுள்ளது. இன்னும் சில ஐரோப்பிய நாடுகள், இஸ்ரேல், தென் ஆப்பிரிக்கா எனப் பல நாடுகள் மீண்டும் ஊரடங்கைக் கொண்டுவந்துள்ளன. கொரோனாவைவிட ஊரடங்குதான் நம்மை அதிகம் பாதித்தது. இன்னொரு ஊரடங்குச் சூழலை செயற்கையாக உருவாக்கும் விபரீத விளையாட்டு வேண்டாம்!

‘மாஸ்டர்’க்கு கிளாஸ் எடுத்த மத்திய அரசு!

மத்திய உள்துறைக் கடிதம்... பின்னணி என்ன?

‘மாஸ்டர்’ படத்தை தியேட்டரில் 100 சதவிகித இருக்கைகள் அனுமதியுடன் வெளியிடுவதற்காக அமைச்சர் கடம்பூர் ராஜூ தொடங்கி எஸ்.பி.வேலுமணி வரை விஜய் தரப்பு அணுகியது. இறுதியாக, வேலுமணியின் முயற்சிக்குப் பிறகு, கடந்த டிசம்பர் 27-ம் தேதி இரவு முதல்வரை நேரில் சந்தித்துப் பேசினார் விஜய். அதன் பிறகே தியேட்டர்களில் 100 சதவிகித இருக்கைகளுக்கு அனுமதி அளித்து, அரசாணை வெளியிட்டது தமிழக அரசு. இது குறித்து 3.1.2021 தேதியிட்ட ஜூ.வி இதழில் ‘மிஸ்டர் கழுகு’ பகுதியில் எழுதியிருந்தோம்.

இப்படி முதல்வர் அனுமதியளித்ததன் பின்னணியிலும் ஒரு விஷயத்தைச் சொல்கிறார்கள். இது குறித்து நம்மிடம் பேசிய இதன் உள்விவரங்களை அறிந்த சிலர், “முதல்வர் - விஜய் சந்திப்பு நிகழ்ந்த நேரத்தில், ரஜினி கட்சி தொடங்குவது உறுதியாக இருந்தது. இதனால், இந்தச் சந்திப்பைத் தனக்குச் சாதகமாக மாற்றிக்கொள்ள நினைத்தார் முதல்வர். ஒருவேளை ரஜினி வந்தாலும், கூடவே விஜய் ரசிகர்களின் ஆதரவும் தங்கள் கட்சிக்குக் கிடைக்கும் என்பதே அப்போது எடப்பாடியின் திட்டமாக இருந்தது. அதற்கேற்ப ‘தேர்தல் நேரத்தில் உங்களுக்கு உறுதுணையாக இருப்போம்’ என்று விஜய் தரப்பிடமிருந்தும் உத்தரவாதம் பெறப்பட்டது.

இதற்கிடையில் தியேட்டர் தரப்பு, மால் தரப்பிடமும் ‘வெயிட்டான’ பேச்சுவார்த்தைகள் நடைபெற்றன. இதை, சென்னையிலிருக்கும் பிரபல மால் உரிமையாளர் ஒருவர் அப்படியே தன் நண்பரான மத்திய அமைச்சருக்கு பாஸ் செய்ய... சுதாரித்துக்கொண்டது மத்திய அரசு. தவிர, எடப்பாடி - விஜய் சந்திப்பு, அதன் பிறகு வெளியான அரசாணை இவற்றையெல்லாம் உன்னிப்பாக கவனித்துவந்த தமிழக பா.ஜக தரப்பிலும் சிலர் சில அரசியல் கணக்குகளைக் குறிப்பிட்டு, டெல்லிக்குத் தகவல் அனுப்பினார்கள்” என்றார்கள்.

இதையடுத்துத்தான், ஜனவரி 6-ம் தேதி மத்திய அரசின் உள்துறைச் செயலாளர் அஜய் பல்லா, தமிழக தலைமைச் செயலாளர் சண்முகத்துக்கு, ‘தியேட்டர்களில் 100 சதவிகித இருக்கைகளுக்கு அனுமதி அளித்திருப்பது, கடந்த ஆண்டு டிசம்பர் மாதம் மத்திய உள்துறை வெளியிட்ட உத்தரவை நீர்த்துப்போகச் செய்திருக்கிறது. பேரிடர் மேலாண்மை சட்ட விதிமுறைகளை மாநிலங்கள் மற்றும் யூனியன் பிரதேசங்கள் நீர்த்துப்போகச் செய்யக் கூடாது. அவற்றை அனைத்துவிதத்திலும் நடைமுறைப்படுத்த வேண்டும்’ என்று கடிதம் எழுதியிருக்கிறார். எனவே, தமிழக அரசின் தியேட்டர்களில் 100 சதவிகித இருக்கைகளுக்கு அனுமதி எந்நேரமும் ரத்து செய்யப்படலாம்.

‘மாஸ்டர்’க்கு கிளாஸ் எடுத்த மத்திய அரசு!

யாருக்குச் சவால்விடுகிறார் விஜய்?

இப்போது மட்டுமல்ல... ‘மாஸ்டர்’ படம் ஷூட்டிங் தொடங்கியதிலிருந்தே அரசியல் சர்ச்சைகள் கச்சைகட்ட ஆரம்பித்துவிட்டன. விஜய் வீடு உட்பட பல இடங்களில் ரெய்டு நடத்தப்பட்டது. ரெய்டின் மறுநாள் ஷூட்டிங் ஸ்பாட்டில் விஜய் எடுத்துப் போட்ட செல்ஃபிக்கு ஏகப்பட்ட ரெஸ்பான்ஸ். அடுத்ததாக, கடந்த 2020 பொங்கலன்று வெளியான ஃபர்ஸ்ட் லுக் போஸ்டரிலும் வாயில் கைவைத்து விஜய் ‘உஷ்ஷ்ஷ்...’ என்று சொன்னதற்கு, ‘ரசிகர்களே... இப்போதைக்கு அமைதியாக இருங்கள்’ என்று ஒரு கூட்டமும், ‘எதிரிகளை எச்சரிக்கிறார்’ என்று ஒரு கூட்டமும் குறியீடு சொல்ல ஆரம்பித்தன.

இந்தநிலையில்தான், இப்போதைய பஞ்சாயத்து களைகட்டியிருக்கிறது. ஜனவரி 6-ம் தேதி மாலை 6 மணிக்கு விஜய் தரப்பு வெளியிட்ட ‘மாஸ்டர்’ பட வாய்ஸ் புரொமோவில் ‘இதுக்கு முன்னாடி இங்க வந்தவன்லாம் உயிர் பயத்துல ஓடிப்போயிருக்கலாம். ஆனா, என் கதையே வேற... முடிஞ்சா தொடச் சொல்லுடா பார்ப்போம்’ என்று விஜய் ஏக வசனம் பேசினார். இந்த புரொமோவை எப்போது தயாரித்தார்கள் என்று தெரியாது. ஆனால், இந்த புரொமோ வெளியானதற்கு சில மணி நேரம் முன்புதான் மத்திய அரசு, தியேட்டரில் 100 சதவிகித இருக்கை அனுமதிக்கு எதிர்ப்பு தெரிவித்து தமிழக அரசுக்குக் கடிதம் எழுதியிருந்தது. இந்த நிலையில், `விஜய் ‘முடிஞ்சா தொடச் சொல்லுடா பார்ப்போம்’ என்று சவால்விடுவது யாரை நோக்கி...’ என்று கேட்கிறார்கள் அரசியல் பார்வையாளர்கள். இதற்கு பதிலடி கொடுக்கும் விஜய் ரசிகர்கள் தரப்போ, “அரசியலுக்கு நோ சொன்ன ரஜினி மாதிரி இல்லை எங்க தலைவர்... அதான் அப்படியொரு புரொமோ” என்று கெத்து காட்டுகிறார்கள்.

மேலும் அவர்கள், “மோடி தொடங்கி எடப்பாடி, ஸ்டாலின் வரை அரசியல் கட்சித் தலைவர்கள் அனைவருமே போராட்டம், பொதுக்கூட்டம் என்று தினமும் சமூக இடைவெளியைக் கடைப்பிடிக்காமல் கூட்டம் போடும்போது, தியேட்டரில் 100 சதவிகித இருக்கைக்கு மட்டுமே தடை ஏன்?” என்றும் கேள்வி எழுப்புகிறார்கள். இதற்கு எதிர்க்குரல் கொடுக்கும் சமூக ஆர்வலர்களோ, “அரசியல் தலைவர்கள் தினமும் கூட்டத்துக்கு வந்து கலந்துகொள்கிறார்கள். அதுபோல விஜய்யும் மக்களோடு மக்களாகத் தியேட்டர்களில் வந்து அமரத் தயாரா?” என்கிறார்கள்.

ஜெயசீலன்
ஜெயசீலன்

இது குறித்து விஜய் ரசிகர் மன்ற முன்னாள் மாநிலத் தலைவர் ஜெயசீலனிடம் பேசினோம். “தமிழகத்தில் கொரோனா கட்டுக்குள் வந்துவிட்டது. அதனால், தியேட்டருக்குச் சென்றால் நோய்த் தொற்று பரவும் என்பது தவறு. தமிழகத்தில், சினிமா தொழில் முற்றிலும் சீரழிந்துவிட்டது. சினிமா தொழிலாளர்கள் பல லட்சம் பேர் வேலையின்றி தவிக்கிறார்கள். இதையெல்லாம் மனதில் வைத்துத்தான் எங்கள் தலைவர் விஜய், முதல்வரைச் சந்தித்து தியேட்டரில் 100 சதவிகித இருக்கைகளுக்கு அனுமதி கேட்டார். தியேட்டரில் படம் பார்க்க வருபவர்களுக்கு சானிடைஸர் தெளிக்கப்போகிறார்கள். முகக்கவசம் இருந்தால் மட்டுமே தியேட்டருக்குள் அனுமதிப்பார்கள். விஜய்யைப் பிடிக்காத எதிரிகள் ‘மாஸ்டர்’ படத்தை ஜெயிக்கவிடாமல் தடுக்கச் செய்யும் சதி இது” என்றார். இப்படியான சூழலில்தான், எடப்பாடி தரப்புக்கும், எதிர்காலத்தில் அரசியல் கனவில் இருக்கும் விஜய் மற்றும் ‘மாஸ்டர்’ தரப்புக்கும் கிளாஸ் எடுக்கும் விதமாக, மத்திய அரசு இப்படி மூவ் செய்திருப்பதாகக் கூறுகிறார்கள், தமிழக அரசியல் களத்தை உற்றுநோக்குபவர்கள்.

இந்த அரசியல் கணக்குகளையெல்லாம் தாண்டி, ‘சினிமா வணிகம் முக்கியமா, மக்களின் உயிர் முக்கியமா...’ என்பதை அனைத்துத் தரப்பினரும் சிந்திக்க வேண்டும். அதுவே ஆரோக்கியமானதும்கூட!

“முதல்வர் இறுதி முடிவு எடுப்பார்”

‘மாஸ்டர்’க்கு கிளாஸ் எடுத்த மத்திய அரசு!

தமிழ்நாடு தியேட்டர் மற்றும் மல்டிப்ளெக்ஸ் திரையரங்குகளின் உரிமையாளர்கள் சங்கத்தின் தலைவர் திருப்பூர் சுப்பிரமணியத்திடம் இது பற்றிக் கேட்டோம். “தற்போது தமிழகத்தில் பெரும்பாலான வணிகச் செயல்பாடுகளுக்கு அனுமதியளிக்கப்பட்டிருக்கிறது. அந்த வகையில், திரையரங்குகளிலும் 100 சதவிகித பார்வையாளர்களை அனுமதித்த தமிழக அரசின் முடிவை நாங்கள் வரவேற்கிறோம். அதற்கு மத்திய அரசுத் தரப்பிலிருந்து சில பாதுகாப்பு விதிமுறைகளைச் சுட்டிக்காட்டியிருக்கிறார்கள். தமிழக முதல்வர் இது குறித்து விவாதித்து, இறுதி முடிவு அறிவிப்பார். அதுவரை, நாங்கள் கருத்து சொல்ல விரும்பவில்லை.”

“உள்ளரங்குகளில் மக்கள் கூட வேண்டாம்!”

‘மாஸ்டர்’க்கு கிளாஸ் எடுத்த மத்திய அரசு!

மத்திய சுகாதாரத்துறையின்கீழ் வரும் ஐ.சி.எம்.ஆர் அமைப்பின் தமிழகப் பிரிவு துணை இயக்குநரான பிரப்தீப் கவுர், கொரோனா தொடர்பான ஆராய்ச்சிகளை உன்னிப்பாக கவனித்துவருபவர். தமிழக அரசின் முடிவு குறித்து அவர் ட்விட்டரில், ‘தனிமனித இடைவெளி இல்லாமல், மூடிய அரங்கில் இருந்தால் கொரோனா வைரஸ் தீவிரமாகப் பரவும். இத்தகைய இடங்களுக்கு மக்கள் செல்வதைத் தவிர்க்க வேண்டும்’ என்று பதிவிட்டிருந்தார்.

பிரப்தீப் கவுரைச் சந்தித்துப் பேசினோம். “மத்திய சுகாதாரத்துறையின் வழிகாட்டுதல் மற்றும் தமிழக அரசின் தீவிர நோய்த் தடுப்பு நடவடிக்கைகளால் கொரோனா பரவல் இப்போதுதான் கொஞ்சம் குறைந்திருக்கிறது. இதுவே பெரிய விஷயம். தியேட்டர் விஷயத்தில் கொஞ்ச காலம் காத்திருக்கலாம் என்பதே என் கருத்து. இப்போது பிரிட்டனிலிருந்து உருமாற்ற வைரஸ் வந்திருக்கிறது. இது ஆஸ்திரேலியா, இத்தாலி, ஸ்வீடன், பிரான்ஸ், ஸ்பெயின், சுவிட்சர்லாந்து, ஜெர்மனி, கனடா, ஜப்பான், சிங்கப்பூர் உள்ளிட்ட பல நாடுகளுக்கு வேகமாகப் பரவியிருக்கிறது. இந்தியாவிலும் இதுவரை 71 நபர்கள் பாதிப்படைந்துள்ளனர். ஆரம்பகட்ட ஆய்வு முடிவுகள் நோயின் விளைவுகளில் பெரிய மாற்றம் இல்லை என்று கூறினாலும், இது குறித்த ஆய்வுகள் மேலும் தேவைப்படுகின்றன. அதனால், நோய்த் தடுப்பு வழிமுறைகளைப் பின்பற்றுவது அவசியம். தற்போது நாம் பயன்படுத்தும் மருந்துகள் அல்லது வரவிருக்கும் தடுப்பூசிகள் இந்த உருமாறிய வைரஸுக்கு வேலை செய்யுமா என்பதும் ஆய்வுக்குரியது. இப்படியான சூழலில் உள்ளரங்குகள் மற்றும் நெரிசலான இடங்களில் வைரஸ் வேகமாகப் பரவக்கூடும். அத்தகைய இடங்கள் தவிர்க்கப்பட வேண்டும்’’ என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism