Published:Updated:

விழுப்புரம் பஞ்சாயத்து... வில்லங்க பன்னீர்... விழிபிதுங்கும் எடப்பாடி!

பன்னீர்செல்வம், எடப்பாடி பழனிசாமி
பிரீமியம் ஸ்டோரி
பன்னீர்செல்வம், எடப்பாடி பழனிசாமி

‘வியூகப் பிழை’ என்று சண்முகம் இப்படிப் பேசுவதற்கு ஒரு வலுவான காரணம் இருக்கிறது.

விழுப்புரம் பஞ்சாயத்து... வில்லங்க பன்னீர்... விழிபிதுங்கும் எடப்பாடி!

‘வியூகப் பிழை’ என்று சண்முகம் இப்படிப் பேசுவதற்கு ஒரு வலுவான காரணம் இருக்கிறது.

Published:Updated:
பன்னீர்செல்வம், எடப்பாடி பழனிசாமி
பிரீமியம் ஸ்டோரி
பன்னீர்செல்வம், எடப்பாடி பழனிசாமி

“சில தவறான வியூகங்களால்தான் நாம் சட்டமன்றத் தேர்தலில் தோற்றோம்!” என்று அ.தி.மு.க ஒருங்கிணைப்பாளர் ஓ.பன்னீர்செல்வம் வீசியிருக்கும் குண்டு, கட்சிக்குள் ஒரு போர்க்களத்தை உருவாக்கியிருக்கிறது. கடந்த அக்டோபர் 3-ம் தேதி, விழுப்புரத்தில் நடைபெற்ற அ.தி.மு.க வேட்பாளர்கள் அறிமுகக் கூட்டத்தில்தான் இந்த குண்டை வீசியிருக்கிறார் பன்னீர். இதே கருத்தைத்தான் பன்னீருக்கு முன்னதாகப் பேசிய முன்னாள் அமைச்சர் சி.வி.சண்முகமும் அதே மேடையில் கூறியிருந்தார். பன்னீர் அதை வழிமொழிந்து பேசியதற்குப் பின்னால் பல நுட்பமான விஷயங்கள் இருக்கின்றன என்கிறது அ.தி.மு.க வட்டாரம்!

விழுப்புரம் பஞ்சாயத்து... வில்லங்க பன்னீர்... விழிபிதுங்கும் எடப்பாடி!

சி.வி.சண்முகம் சீறியதன் பின்னணி?

2021 சட்டமன்றத் தேர்தலில், அ.தி.மு.க கூட்டணியில் பா.ம.க இடம்பெற்றதை வெற்றிக்கு பலமாகப் பார்த்தார் எடப்பாடி. ஆனால், கூட்டணியில் பா.ம.க இருப்பதைத் தனக்கு பலவீனமாகப் பார்த்தார் சி.வி.சண்முகம். இதுதான், ‘நம் வியூகம் தவறானது’ என்று அவர் வெடித்ததற்குக் காரணம் என்கிறார்கள் விவரமறிந்தவர்கள். நம்மிடம் பேசிய விழுப்புரம் மாவட்ட அ.தி.மு.க நிர்வாகி ஒருவர், “வன்னியர் சமூகத்தினர் கணிசமாக வாழும் பகுதிகளில், ஒரு வன்னியர் சமூகக் கட்சியை நாமே வளர்த்துவிட்டால், அ.தி.மு.க-விலுள்ள வன்னியர்களுக்கு என்ன மரியாதை இருக்கிறது என்பதுதான் சி.வி.சண்முகத்தின் கோபத்துக்குக் காரணம். தவிர, விழுப்புரம் சட்டமன்றத் தொகுதியில் சண்முகம் தோற்றதற்கு பா.ம.க-வின் உள்ளடி வேலையும் ஒரு காரணம் என்று பொருமுகிறது அவர் தரப்பு. உள்ளாட்சித் தேர்தல் பிரசாரத்தின்போது, தனக்கு நெருக்கமானவர்களிடம் மனம்விட்டு சண்முகம் சில விஷயங்களைப் பேசியிருக்கிறார். அப்போது, ‘ஏற்கெனவே பா.ஜ.க-வைக் கூட்டணியில் கொண்டுவந்ததால், சிறுபான்மையினர் வாக்குகளை இழந்தோம். பா.ம.க-வை உடன் வைத்துக்கொண்டதால், நமக்குக் கிடைக்கவேண்டிய பட்டியலின, வன்னியரல்லாத இதர சமூகத்தினரின் வாக்குகள் தி.மு.க-வுக்குச் சென்றுவிட்டன.

வன்னியர்களுக்கான 10.5 உள் இட ஒதுக்கீட்டுக்குச் சட்ட முன்வடிவைக் கொண்டுவந்ததே நான்தான். ஆனால், அதற்கான பலனை பா.ம.க தட்டிச் சென்றுவிட்டது. ‘கடைசி நேரத்தில் வன்னியர் உள் இட ஒதுக்கீட்டை அறிவிக்க வேண்டாம்’ என்று தலைமையிடம் எவ்வளவோ சொன்னேன். என் பேச்சை யாரும் கேட்கவில்லை. இப்போது, உள் இட ஒதுக்கீடு பா.ம.க-வால்தான் கிடைத்ததாகவும், அதற்கு அரசாணை வெளியிட்டதாக தி.மு.க-வும் பெயர்தட்டிச் சென்றுவிட்டார்கள்’ என்று வருத்தப்பட்டிருக்கிறார். இந்த வருத்தம்தான், விழுப்புரம் நிர்வாகிகள் கூட்டத்தில் ஆக்ரோஷமாக வெடித்துவிட்டது. 2006 சட்டமன்றத் தேர்தல் அன்று, பா.ம.க-வினரால் சண்முகத்தின் வீடு மீது நடத்தப்பட்ட கொடூரத் தாக்குதல் சம்பவத்தையும் அவர் இன்னும் மறக்கவில்லை” என்றார்.

‘வியூகப் பிழை’ என்று சண்முகம் இப்படிப் பேசுவதற்கு ஒரு வலுவான காரணம் இருக்கிறது. ஆனால், சண்முகத்தின் குற்றச்சாட்டுக்கு விளக்கமளிக்கவேண்டிய கட்சியின் ஒருங்கிணைப்பாளரான பன்னீரே இந்தக் கருத்தை ஏன் வழிமொழிந்தார்... அதற்குப் பின்னால் இருக்கும் காரணங்கள் என்னென்ன?

விழுப்புரம் பஞ்சாயத்து... வில்லங்க பன்னீர்... விழிபிதுங்கும் எடப்பாடி!

‘விழுப்புரம் பஞ்சாயத்து’ - வில்லங்க பன்னீர்!

கொடநாடு வழக்கு, தன் ஆதரவாளர்களான வேலுமணி, எம்.ஆர்.விஜயபாஸ்கர், வீரமணியைச் சுற்றி ரவுண்டு கட்டும் லஞ்ச ஒழிப்புத்துறை எனப் பல்வேறு சிக்கல்களால் ‘வீக்’ ஆகிப்போயிருக்கிறார் எடப்பாடி பழனிசாமி. பல்வேறு முக்கியத் தருணங்களில் எடப்பாடியின் ராஜதந்திரத்திடம் மீண்டும் மீண்டும் ஏமாந்த பன்னீர், இந்தத் தருணத்தைத் தனக்குச் சாதகமாக்கிக்கொள்ளப் பார்க்கிறார். விழுப்புரத்தில் பன்னீர் வீசிய குண்டுக்குப் பல்வேறு காரணங்களை அடுக்குகிறது அ.தி.மு.க தரப்பு. நம்மிடம் பேசிய பன்னீர் ஆதரவு அ.தி.மு.க சீனியர்கள் சிலர், “தேர்தல் கூட்டணியை முடிவு செய்வதில் தன்னை ஒரு பொம்மையாக மட்டுமே எடப்பாடி அண்ட் கோ பயன்படுத்தியதை பன்னீர் ரசிக்கவில்லை. தே.மு.தி.க-வை எப்படியும் கூட்டணிக்குள் கொண்டுவர பன்னீர் கடுமையாக முயன்றார். அதற்கு எடப்பாடி உடன்படவில்லை. தே.மு.தி.க-விடம் கூட்டணிப் பேச்சுவார்த்தை நடத்திய கழகத் துணை ஒருங்கிணைப்பாளர் கே.பி.முனுசாமி, அந்தக் கட்சி கூட்டணிக்குள் வந்துவிடாதபடி செய்துவிட்டார். அன்றைக்கு அ.தி.மு.க-வின் தேர்தல் வியூக ஆலோசகராக இருந்த சுனில், தனக்குச் சாதகமான ஓர் அணியைக் கட்டமைக்க மட்டுமே விரும்பினார். எடப்பாடியை முன்னிலைப்படுத்திய சுனில் தரப்பு, கட்சியை காலிசெய்துவிட்டது. இதெல்லாம் பன்னீரின் மனதில் நீங்கா வடுவாகத் தங்கிவிட்டது.

தேர்தல் சமயத்தில் 10.5 சதவிகித வன்னியர் உள் இட ஒதுக்கீட்டை அறிவிக்க வேண்டாமென பன்னீர் எவ்வளவோ தடுத்துப் பார்த்தார். அதை எடப்பாடி கேட்கவில்லை. இந்த உள் இட ஒதுக்கீடு அறிவிப்பால்தான், தென் மாவட்டங்களில் அ.தி.மு.க-வுக்குப் பெரிய அடி விழுந்ததாக இதர சமுதாயத்தைச் சேர்ந்த கட்சி நிர்வாகிகளிடம் கொந்தளிப்பு ஏற்பட்டுள்ளது. அக்டோபர் 2-ம் தேதி திருப்பத்தூரில் நிர்வாகிகள் கூட்டத்தை முடித்துவிட்டு பன்னீர் கிளம்பியபோது, ‘ஓர் எதிர்க்கட்சியாக நாம் இன்னும் செயல்படவே இல்லை. கொங்கு ஆதிக்கத்தில்தான் கட்சி இருக்கிறது. நீங்கள் இப்படியே மெளனமாக இருப்பது சரியா?’ என நிர்வாகிகள் சிலர் அவரிடம் கேட்டிருக்கிறார்கள். அனைத்துக்கும் பதிலளிப்பதுபோலத்தான் விழுப்புரம் கூட்டத்தில், ‘நம் ஆட்சி சரியாகத்தான் சென்றது. குறை சொல்வதற்கு ஒன்றுமில்லை. ஆனால், சில தவறான வியூகங்களால்தான் நாம் ஆட்சியை இழந்தோம்’ என்று குண்டை வீசியிருக்கிறார் பன்னீர்.

விழுப்புரம் மேடையில் சண்முகத்தை வைத்துக்கொண்டே இப்படி பன்னீர் பேசியதற்கு இன்னொரு காரணமும் உண்டு. தன் ஆதரவாளராக இருந்த முன்னாள் எம்.பி லட்சுமணனை விழுப்புரத்தின் ஒரு பகுதிக்கு மாவட்டச் செயலாளராக்க முயன்றார் பன்னீர். அதற்கு சண்முகம் உடன்படவில்லை. அந்தக் கோபத்தில் தி.மு.க-வுக்குச் சென்ற லட்சுமணன், 2021 சட்டமன்றத் தேர்தலில் விழுப்புரம் தொகுதியில் தி.மு.க சார்பில் களமிறங்கி, சண்முகத்தைத் தோற்கடித்தார். ‘நான் சொன்னதைக் கேட்டிருந்தால் நீங்கள் தோற்றுப்போயிருப்பீர்களா? என்று மறைமுகமாக சண்முகத்தை இடித்துரைத்த பன்னீர், ‘எடப்பாடி தரப்பின் தவறான வியூகத்தால்தான் கட்சி தோற்றது’ என்பதைச் சொல்வதாக மற்றொருபுறம் சண்முகத்தை தாஜாவும் செய்துவிட்டார். ‘வியூகப் பிழை’ என்ற குண்டை வீசியெறிந்து, எடப்பாடிக்கு எதிரானவர்களை யெல்லாம் தன் பக்கம் ஒருங்கிணைக்க முயல்கிறார் பன்னீர். அடுத்த சில மாதங்களில் அ.தி.மு.க பொதுக்குழு கூட்டப்பட்டாக வேண்டும். அதற்கு முன்னதாக அவைத்தலைவர் யாரென்பதை அறிவித்தாக வேண்டும். பொதுக்குழுவுக்கு முன்னதாக, கொடநாடு வழக்கில் ஒருவேளை எடப்பாடி தரப்புக்குச் சிக்கல் வந்தால், அந்த வாய்ப்பைத் தனக்குச் சாதகமாக்கிக்கொள்வதே பன்னீரின் திட்டம். இதையெல்லாம் கணக்கு போட்டே, விழுப்புரத்தில் வியூகப் பிழை என்ற வில்லங்கக் குற்றச்சாட்டை முன்வைத்தார் பன்னீர்” என்றனர்.

விழுப்புரம் பஞ்சாயத்து... வில்லங்க பன்னீர்... விழிபிதுங்கும் எடப்பாடி!

பன்னீரை இயக்கும் சசிகலா?! - விழிபிதுங்கும் எடப்பாடி!

பன்னீரின் இந்த அதிரடிக்கு சசிகலாவின் ‘சப்போர்ட்’டும் இருப்பதாகச் சொல்லப்படுகிறது. எடப்பாடியின் தாயார் மரணத்துக்கு இதுவரை இரங்கல் தெரிவிக்காத சசிகலா, பன்னீரின் மனைவி மறைவுக்கு நேரில் சென்று ஆறுதல் சொன்னதை தங்களுக்கான நம்பிக்கையாகப் பார்க்கிறது பன்னீர் தரப்பு. நம்மிடம் பேசிய அ.தி.மு.க முன்னாள் அமைச்சர் ஒருவர், “சசிகலா நேரடி அரசியலில் குதிப்பதற்கு ஒருபோதும் மத்திய பா.ஜ.க அனுமதிக்கப் போவதில்லை. ஒவ்வொரு முறையும் சசிகலா அரசியல் என்ட்ரி கொடுக்க முயலும்போதெல்லாம், வருமான வரித்துறை மூலமாக செக் வைக்கிறது மத்திய அரசு. இதனால், பன்னீரைக் கட்டுப்பாட்டில் எடுத்து அ.தி.மு.க-வை மறைமுகமாகத் தன் கன்ட்ரோலுக்குக் கொண்டுவரத் திட்டமிடுகிறார் சசிகலா.

தங்கள் தரப்புக்கு நெருக்கடி முற்றுவதால், அது குறித்துப் பேசுவதற்குச் சமீபத்தில் பிரதமர் மோடி, உள்துறை அமைச்சர் அமித் ஷாவின் அப்பாயின்மென்ட் கேட்டது எடப்பாடி தரப்பு. அதற்கு டெல்லி இன்னும் நேரம் வழங்கவில்லை. ‘2024 நாடாளுமன்றத் தேர்தல் வரையில் அ.தி.மு.க தலைவர்களை இப்படியே குழப்பத்தில் வைத்திருப்போம். அப்போதுதான் நாம் சொல்வதை அவர்கள் கேட்பார்கள்’ என்று முடிவெடுத்திருக்கிறது டெல்லி. இது புரிந்து, கையறுநிலையில் இருக்கிறார் எடப்பாடி. சசிகலாவின் மறைமுக ஆதரவுடன், இதுதான் சமயம் என எகிறி அடிக்கிறார் பன்னீர்” என்றார்.

பன்னீரின் இந்த குண்டு வீச்சுக்கு எடப்பாடி தரப்பு என்ன பதில் வைத்திருக்கிறது? எடப்பாடிக்கு நெருக்கமான வடமாவட்ட எம்.எல்.ஏ ஒருவரிடம் பேசினோம். “எடப்பாடியைப் பழிவாங்க வேண்டும் என்பதற்காகவே, சட்டமன்ற வேட்பாளர் தேர்வில் பன்னீர் ஏக குழப்பங்களைச் செய்தார். அவருக்கு வைத்திலிங்கமும் ஒத்துழைத்தார். தேர்தலின்போது தென் மாவட்டங்களைச் சேர்ந்த 31 தொகுதிகளுக்கான செலவுப் பொறுப்பை பன்னீர் தரப்பு கவனித்துக்கொள்வதாகச் சொல்லியிருந்தது. ஆனால், அவர் சரிவர செலவு செய்யாததுதான் தோல்விக்கே காரணம். தேர்தல் முடிவுக்குப் பிறகு, சென்னை தலைமைக்கழகத்தில் நடந்த கூட்டத்தில், ‘எனக்கு ஒரு ரூபாய்கூட செலவுக்கு வரவில்லை. என் சொந்தக் காசைப் போட்டுத்தான் பிரசாரம் செய்தேன்’ என்று வெடித்தார் சோழவந்தான் அ.தி.மு.க வேட்பாளர் மாணிக்கம். இத்தனைக்கும் அவரது தொகுதி தேனி பாராளுமன்றத் தொகுதியில் வருகிறது. இப்படித்தான் பல தொகுதிகளிலும் பன்னீர் தரப்பு ஒத்துழைக்காததால் கட்சி தோற்றது. கொடுத்த வாக்குறுதியைக் காப்பாற்ற முடியாத பன்னீரெல்லாம் இப்போது வியூகப் பிழை என்று பேசுவது கேலிக்கூத்தானது’’ என்றார்.

விழுப்புரம் பஞ்சாயத்து... வில்லங்க பன்னீர்... விழிபிதுங்கும் எடப்பாடி!


‘வியூகப் பிழை’ என்ற குற்றச்சாட்டு குண்டை எறிந்து எடப்பாடி தரப்புக்கு செக் வைத்திருப்பதோடு, உள்ளாட்சித் தேர்தலில் அ.தி.மு.க-வுக்குப் பின்னடைவு ஏற்பட்டால், அதற்கு எடப்பாடியின் கடந்தகால வியூகங்களே காரணம் எனக் கணக்கு எழுதி, கட்சியைத் தன் கன்ட்ரோலுக்குக் கொண்டுவரப் பார்க்கிறார் பன்னீர். கொடநாடு வழக்காலும், டெல்லியின் மௌனத்தாலும் விழிபிதுங்கிப்போயிருக்கிறார் எடப்பாடி. சசிகலா சைலன்ட்டாக சந்தர்ப்பங்களை சாதகமாக்கிக் கொண்டிருக்கிறார். உள்ளாட்சித் தேர்தல் முடிவுகளுக்குப் பிறகு, அ.தி.மு.க-வுக்குள் போர்க்களம் தீவிரமடையும் என்கிறது அ.தி.மு.க வட்டாரம்!

*****

இவர்கள் என்ன சொல்கிறார்கள்?

“அடிபட்ட பாம்பாகக் கிடந்த பன்னீருக்கு, கொடநாடு விவகாரம் ஒரு வாய்ப்பைக் கொடுத்துள்ளது. இந்த விவகாரத்தில் எடப்பாடி, வேலுமணி உள்ளிட்டவர்களுக்குச் சிக்கல் வரும். அது தனக்குச் சாதகமாக இருக்கும் என பன்னீர் நினைக்கிறார். ஆனால், இந்த விவகாரத்தில் பன்னீரையும் உள்ளிழுக்கும் வேலையை எடப்பாடி செய்யாமல் விட மாட்டார். அதேபோல, பொதுக்குழுவை நவம்பரில் கூட்டும் எண்ணம் எடப்பாடியிடம் இருந்திருக்கிறது. ஆனால், ‘இப்போது பொதுக்குழுவையே கூட்ட வேண்டாம்’ என்கிற எண்ணத்தில் அவர் இருப்பதாகச் சொல்கிறார்கள்.” - கே.சி.பழனிசாமி, முன்னாள் எம்.பி.

கே.சி.பழனிசாமி
கே.சி.பழனிசாமி
ரவீந்திரன் துரைசாமி
ரவீந்திரன் துரைசாமி

“ஜெயலலிதாவால் புறக்கணிக்கப்பட்ட ஜோதி முத்துராமலிங்கம், சேதுராமன் இவர்களெல்லாம் தேர்தலில் போட்டியிட சீட் கொடுத்தது யார்... கும்பகோணம் ராமநாதனுக்குக் கொடுக்கவேண்டிய வேட்பாளர் சீட்டை வாண்டையாருக்கு வழங்கச் சொன்னது யார்? நாங்குநேரியில் வெற்றிபெற்ற ரெட்டையார்பெட்டி நாராயணனுக்கு சீட் கொடுக்காமல், தன் ஆதரவாளர் ஒருவருக்கு சீட் வாங்கிக் கொடுத்தார் பன்னீர். அந்தத் தொகுதியில் அ.தி.மு.க தோற்றது. இது தவறான வியூகமா... எடப்பாடியை முதல்வர் வேட்பாளராக முன்மொழிந்ததைத் தவறெனச் சொல்கிறாரா பன்னீர்? எது வியூகப் பிழை என்பதை அவர்கள்தான் சொல்ல வேண்டும்!” - ரவீந்திரன் துரைசாமி, அரசியல் விமர்சகர்.

******

20 எம்.எல்.ஏ-க்கள்... மாற்றுத் தலைமை?

“சமீபத்தில் சசிகலா தஞ்சாவூருக்குச் சென்றிருந்தபோது, அவரை அ.தி.மு.க துணை ஒருங்கிணைப்பாளர் வைத்திலிங்கத்துக்கு நெருக்கமானவர்கள் சந்தித்துப் பேசியிருக்கிறார்கள். இந்தச் சந்திப்புக்குப் பிறகு, வைத்திலிங்கத்தின் அணுகுமுறையிலும் மாற்றங்கள் தெரிகின்றன. சுமார் 20 அ.தி.மு.கழக எம்.எல்.ஏ-க்களிடம் தொடர்ச்சியாகப் பேசிவரும் வைத்திலிங்கம், ஒரு மாற்றுத் தலைமையாகத் தன்னை முன்னிறுத்த முயல்கிறார்” என்கிறார் அ.தி.மு.க-வின் முன்னாள் அமைச்சர் ஒருவர்.