Published:Updated:

அஸ்ஸாமில் தக்கவைக்குமா... மேற்கு வங்கத்தைக் கைப்பற்றுமா? - கௌரவப் பிரச்னையில் பா.ஜ.க

மோடி
பிரீமியம் ஸ்டோரி
News
மோடி

திரிணாமுல் காங்கிரஸுக்கும் பா.ஜ.க-வுக்கும் இடையே நடைபெற்றுவரும் யுத்தம், மேற்கு வங்கத்தைப் பதற்றத்தின் உச்சிக்குக் கொண்டுசென்றிருக்கிறது.

‘மேற்கு வங்கத்தில் மம்தா பானர்ஜி மீண்டும் ஆட்சியைப் பிடிப்பார்’ என்று பெரும்பாலான கருத்துக்கணிப்புகள் சொல்கின்றன. அஸ்ஸாமில் வலுவான கூட்டணியை அமைத்து, பா.ஜ.க-விடமிருந்து ஆட்சியைக் கைப்பற்ற நினைக்கிறது காங்கிரஸ். ஆனால், அங்கு இழுபறி சூழல் நிலவுவதாகப் பல கருத்துக்கணிப்புகள் சொல்கின்றன. இந்த இரண்டு மாநிலங்களின் தேர்தல் வெற்றியையும், பெரும் கௌரவப் பிரச்னையாகக் கருதுகிறது பா.ஜ.க. அஸ்ஸாமில் நடைபெற்றுவரும் ஆட்சியைத் தக்கவைத்துக் கொள்ளவும், மேற்கு வங்கத்தில் திரிணாமுல் காங்கிரஸிடமிருந்து ஆட்சியைக் கைப்பற்றவும் நான்கு கால் பாய்ச்சலில் பா.ஜ.க ஓடிக்கொண்டிருக்கிறது!

இந்த இதழ் வெளியாகும் நாளில், மேற்கு வங்கத்திலும் அஸ்ஸாமிலும் முதற்கட்டத் தேர்தல் ஆரம்பித்துவிடும். தமிழ்நாடு, கேரளா, புதுச்சேரி ஆகிய மாநிலங்களில் ஒரேகட்டமாக ஏப்ரல் 6-ம் தேதியும், அஸ்ஸாமில் மார்ச் 27, ஏப்ரல் 1, 6 என்று மூன்று கட்டங்களாகவும், மேற்கு வங்கத்தில் மார்ச் 27 முதல் ஏப்ரல் 29 வரை எட்டு கட்டங்களாகவும் தேர்தல் நடைபெறுகிறது. இவற்றில் அஸ்ஸாமும் மேற்கு வங்கமும்தான் பா.ஜ.க-வின் முக்கிய இலக்கு. இந்த இரண்டு மாநிலங்களிலும் பா.ஜ.க வெற்றிபெற வாய்ப்புகள் இருந்தாலும், பல சவால்களும் காத்திருக்கின்றன.

அஸ்ஸாம்

அஸ்ஸாமில் தருண் கோகோய் தலைமையிலான 15 ஆண்டுக்கால காங்கிரஸ் ஆட்சியை 2016-ல் அகற்றிய பா.ஜ.க., சர்பானந்தா சோனோவால் தலைமையில் ஆட்சியமைத்தது. தற்போது அந்த ஆட்சியைத் தக்கவைத்துக்கொள்ள பா.ஜ.க மெனக்கெடுகிறது. அஸ்ஸாமில் ஐந்து ஆண்டுகளுக்கு முன்பிருந்த அரசியல் சூழல் இப்போது மாறியிருக்கிறது. முக்கியமாக, கூட்டணிகளில் பெரிய மாற்றம் ஏற்பட்டிருக்கிறது. 2016-ம் ஆண்டு பா.ஜ.க தலைமையிலான கூட்டணியில் அஸ்ஸாம் கண பரிஷத், போடோ மக்கள் முன்னணி ஆகிய கட்சிகள் இடம்பெற்றிருந்தன. மொத்தம் 126 தொகுதிகளைக்கொண்ட அஸ்ஸாமில் பா.ஜ.க 60 தொகுதிகளையும் அஸ்ஸாம் கண பரிஷத் 14 தொகுதிகளையும் போடோ மக்கள் முன்னணி 12 தொகுதிகளையும் கைப்பற்றின. காங்கிரஸ் 26 தொகுதிகளை மட்டுமே பிடித்தது. தனிக் கூட்டணி அமைத்த அகில இந்திய ஐக்கிய ஜனநாயக முன்னணி (ஏ.ஐ.யு.டி.எஃப்) 13 இடங்களில் வெற்றிபெற்றது.

அப்போது தனியாக நின்ற ஏ.ஐ.யு.டி.எஃப்., இப்போது காங்கிரஸுடன் கூட்டணி அமைத்துள்ளது. பா.ஜ.க கூட்டணியிலிருந்த போடோ மக்கள் முன்னணி தற்போது காங்கிரஸ் கூட்டணிக்கு வந்துவிட்டது. அதனால், வாக்கு சதவிகித அடிப்படையில் காங்கிரஸ் தலைமையிலான மகா கூட்டணியின் பலம் சற்று அதிகரித்துள்ளது. ஆனாலும், இதைவைத்து காங்கிரஸ் கூட்டணி எளிதாக வெற்றிபெற்றுவிடும் என்று சொல்லிவிட முடியாது.

அஸ்ஸாமில் தக்கவைக்குமா... மேற்கு வங்கத்தைக் கைப்பற்றுமா? - கௌரவப் பிரச்னையில் பா.ஜ.க

அஸ்ஸாம் மக்கள்தொகையில் 35 சதவிகிதம் இஸ்லாமியர்கள். அவர்களில் பெரும்பாலோரின் ஆதரவைப் பெற்ற கட்சியாக ஏ.ஐ.யு.டி.எஃப் இருக்கிறது. பங்களாதேஷிலிருந்து குடிபெயர்ந்த இஸ்லாமியர்கள் தெற்கு அஸ்ஸாமிலுள்ள பரக் பள்ளத்தாக்கில் வசிக்கிறார்கள். அந்த வாக்குகளை காங்கிரஸ் கூட்டணி அள்ளிவிடும் என்றும், 23 சட்டமன்றத் தொகுதிகளைக்கொண்ட மேல் அஸ்ஸாம் பகுதியிலிருக்கும் பெரும்பான்மையான வாக்குகளை பா.ஜ.க பெற்றுவிடும் என்றும் கணிக்கப்படுகிறது. ஆகவே, இரு அணிகளுக்கும் இடையே கடும் போட்டி நிலவுகிறது.

அஸ்ஸாமில் சி.ஏ.ஏ-வுக்கு எதிராக நடைபெற்ற மிகப்பெரிய போராட்டம், வருகிற தேர்தலில் எதிரொலிப்பதற்கு வாய்ப்பு இருக்கிறது. அதைப் பொறுத்தும் பா.ஜ.க-வின் வெற்றிவாய்ப்பு தீர்மானிக்கப்படும். இந்த விவகாரம் பற்றித் தேர்தல் நேரத்தில் பேசாமல், அடக்கி வாசிக்கிறது பா.ஜ.க.

15 ஆண்டுக்கால காங்கிரஸ் ஆட்சியில் முதல்வராக இருந்த தருண் கோகோய் கடந்த ஆண்டு காலமானார். அவரின் மகன் கௌரவ் கோகோய் உள்ளிட்ட சிலரின் பெயர்கள் முதல்வர் பதவிக்கு அடிபடுகின்றன. பா.ஜ.க-வின் தற்போதைய முதல்வரான சர்பானந்தா சோனோவால் முதல்வர் வேட்பாளராக அறிவிக்கப்படவில்லை. ஐந்தாண்டுகளுக்கு முன்பாக காங்கிரஸிலிருந்து பா.ஜ.க-வுக்கு வந்த ஹிமந்தா பிஸ்வாஸ் சர்மா, அஸ்ஸாம் பா.ஜ.க-வின் முக்கிய முகங்களில் ஒன்றாக இருக்கிறார். வடகிழக்கு மாநிலங்கள் பலவற்றில் பா.ஜ.க ஆட்சி அமைவதற்குக் காரணமாக இருந்த இவரே, பா.ஜ.க மீண்டும் ஆட்சியைப் பிடித்தால் முதல்வராக்கப்படுவார் என்று சொல்லப்படுகிறது.

மம்தா பானர்ஜி
மம்தா பானர்ஜி

மேற்கு வங்கம்

இந்தியாவே இப்போது உற்றுநோக்கக் கூடியதாக மேற்கு வங்கத் தேர்தல் களம் இருக்கிறது. அங்கு ஆட்சியைக் கைப்பற்றுவதற்கு பிரதமர் மோடி, அமித் ஷா உள்ளிட்ட மத்திய அமைச்சர்கள், ஜெ.பி.நட்டா உள்ளிட்ட பா.ஜ.க தலைவர்கள், மிதுன் சக்கரவர்த்தி உள்ளிட்ட திரைப் பிரபலங்கள் என மிகப்பெரிய படையே களமிறங்கியிருக்கிறது. இந்தப் படையை எதிர்கொண்டபடி, கட்டுப்போட்டக் காலுடன் சக்கர நாற்காலியில் ஒற்றை ஆளாக மேற்கு வங்கத்தை வலம் வந்துகொண்டிருக்கிறார், திரிணாமுல் காங்கிரஸின் தலைவரான முதல்வர் மம்தா பானர்ஜி.

34 ஆண்டுகள் இடதுசாரிகளின் கோட்டையாக விளங்கிய மேற்கு வங்கத்தை, 2011-ல் மம்தா பானர்ஜி கைப்பற்றினார். 2016 தேர்தலிலும் அவர் வெற்றிக்கனியைப் பறித்தார். கடந்த பத்து ஆண்டுகளாக ஆட்சியதிகாரத்தில் இருந்துவரும் மம்தா, இந்தத் தேர்தலிலும் வெற்றிபெற்று ஹாட்ரிக் அடித்துவிட வேண்டும் என்று நினைக்கிறார். ஆனால், அரியணையிலிருந்து மம்தாவைக் கீழே இறக்கிவிட்டு, ஆட்சியைக் கைப்பற்றுவதற்கு பா.ஜ.க துடித்துக்கொண்டிருக்கிறது. 294 தொகுதிகளைக் கொண்ட மேற்கு வங்கத்தில், 200-க்கும் அதிகமான தொகுதிகளில் பா.ஜ.க வெற்றிபெறும் என்று அடித்துச்சொல்கிறார் மத்திய உள்துறை அமைச்சர் அமித் ஷா.

திரிணாமுல் காங்கிரஸுக்கும் பா.ஜ.க-வுக்கும் இடையே நடைபெற்றுவரும் யுத்தம், மேற்கு வங்கத்தைப் பதற்றத்தின் உச்சிக்குக் கொண்டுசென்றிருக்கிறது. 234 தொகுதிகளைக் கொண்ட தமிழ்நாட்டில் ஒரே நாளில் தேர்தல் நடைபெறுகிறது. 294 தொகுதிகளைக்கொண்ட மேற்கு வங்கத்துக்கு எட்டு கட்டங்களாகத் தேர்தல் நடைபெறுகிறது. அந்த அளவுக்கு மேற்கு வங்கத் தேர்தல் களம் பதற்றத்துக்குப் பஞ்சமில்லாமல் இருக்கிறது.

மேற்கு வங்கத்தின் இன்றைய அரசியல் பதற்றத்துக்கு ஒரு வரலாறு உண்டு. மேற்கு வங்கத்தில் 1977-ம் ஆண்டு நடைபெற்ற சட்டமன்றத் தேர்தலில் சி.பி.ஐ (எம்) தலைமையிலான இடது முன்னணி வெற்றிபெற்று ஆட்சியமைத்தது. அன்று தொடங்கி 2011 வரையில், தொடர்ச்சியாக ஏழு சட்டமன்றத் தேர்தல்களில் வெற்றிபெற்று மேற்கு வங்கத்தைத் தனது கோட்டையாக சி.பி.ஐ (எம்) வைத்திருந்தது. அப்போது காங்கிரஸ் கட்சியில் துடிப்புமிக்க இளம் தலைவராக மம்தா பானர்ஜி விளங்கினார். 1998-ம் ஆண்டு கருத்து வேறுபாடு காரணமாக காங்கிரஸ் கட்சியிலிருந்து விலகி, திரிணாமுல் காங்கிரஸ் என்ற புதிய கட்சியை மம்தா தொடங்கினார். 2007-ம் ஆண்டு நந்திகிராமில் விவசாய நிலங்களை அரசு கையகப்படுத்தியபோது, அதற்கு எதிராகப் போராடிய விவசாயிகள்மீது துப்பாக்கிச்சூடு நடைபெற்றது. அதில், 14 விவசாயிகள் கொல்லப்பட்டனர். அந்த விவகாரத்தைக் கையிலெடுத்துப் போராட்டங்களை நடத்திய மம்தா, 2011 சட்டமன்றத் தேர்தலில் ஆட்சியைக் கைப்பற்றினார். அதன் பிறகு ஆட்சியதிகாரத்தின் மூலமாக பல்வேறு அடக்குமுறைகளைக் கையாண்டு கம்யூனிஸ்ட்களை பலவீனப்படுத்தினார் மம்தா. தற்போது அதே ஸ்டைலில், திரிணாமுல் காங்கிரஸை பா.ஜ.க திணறடித்துக்கொண்டிருக்கிறது.

அஸ்ஸாமில் தக்கவைக்குமா... மேற்கு வங்கத்தைக் கைப்பற்றுமா? - கௌரவப் பிரச்னையில் பா.ஜ.க

அமைச்சர்கள், எம்.எல்.ஏ-க்கள் என ஏராளமானோரை திரிணாமுல் காங்கிரஸிலிருந்து பா.ஜ.க இழுத்துக்கொண்டது. அப்படி பா.ஜ.க-வுக்குச் சென்றவர்களில் முக்கியமானவர் மம்தா ஆட்சியில் அமைச்சராக இருந்த சுவேந்து அதிகாரி. அவர், மம்தாவின் வலதுகரமாகச் செயல்பட்டவர். எந்த நந்திகிராமை வைத்து மம்தா ஆட்சியைப் பிடித்தாரோ, அந்த நந்திகிராம் பகுதியில் செல்வாக்குமிக்கவர் சுவேந்து அதிகாரி. அங்கு பா.ஜ.க-வின் வேட்பாளராக நிறுத்தப்பட்டுள்ள சுவேந்து அதிகாரியை எதிர்த்துக் களமிறங்கி யிருக்கிறார் மம்தா.

நந்திகிராமில் மர்ம நபர்கள் தம்மைத் தாக்கியதாகவும், அதில் தமது கால் எலும்பு முறிந்துவிட்டதாகவும் மம்தா பரபரப்பைக் கிளப்பினார். தற்போது இடதுகாலில் கட்டுப்போட்டுக்கொண்டு சக்கரநாற்காலியில் மாநிலம் முழுவதும் அவர் பிரசாரம் செய்துவருகிறார். ஒருபுறம் பா.ஜ.க நடத்திவரும் தாக்குதல். இன்னொருபுறம் பலவீனமாகிவிட்ட இடதுசாரிகளும் காங்கிரஸுடன் கைகோத்துக்கொண்டு மம்தாவுக்கு எதிராகக் களமாடுகிறார்கள்.

உக்கிரமாக நடக்கும் தேர்தல் மோதலில் பிரதமர் மோடியும், முதல்வர் மம்தா பானர்ஜியும் மாறி மாறித் தாக்குதல் நடத்தி அரசியல் கண்ணியத்தைக் குழிதோண்டிப் புதைத்துக்கொண்டிருக்கிறார்கள்.