Published:Updated:

புது ரத்தம் பாய்ச்சும் இளம் ஐ.ஏ.எஸ்-கள்! - ஸ்டாலின் தூவிய விதை...

தலைமைச் செயலகம்
பிரீமியம் ஸ்டோரி
News
தலைமைச் செயலகம்

கிராமங்களின் வளர்ச்சிக்கு ஒதுக்கப்படும் மத்திய, மாநில அரசுகளின் நிதி, ஊரக வளர்ச்சி முகமை மூலமாகத்தான் நிர்வகிக்கப்படும்.

ஐ.ஏ.எஸ்., ஐ.பி.எஸ் அதிகாரிகள் நியமனங்களில் பல்வேறு சர்ச்சைகள் வெடித்தாலும், சமீபத்தில் வெளியான மாவட்ட ஆட்சியர்கள் நியமனப் பட்டியல், ஐ.ஏ.எஸ் அதிகாரிகள் மத்தியில் பலத்த வரவேற்பைப் பெற்றிருக்கிறது. 20 மாவட்டங்களுக்கு மேல் துடிப்புமிக்க இளம் ஐ.ஏ.எஸ் அதிகாரிகள் மாவட்ட ஆட்சியர்களாக நியமிக்கப்பட்டுள்ளனர். ஆறு மாநகராட்சிகளின் நிர்வாகத்திலும் இளம் ஐ.ஏ.எஸ் அதிகாரிகள் நியமிக்கப்பட்டு புது ரத்தம் பாய்ச்சப்பட்டிருக்கிறது. கடந்த பத்தாண்டுகளாக மறுக்கப்பட்டிருந்த வாய்ப்பு, தற்போது தங்களுக்கு வழங்கப்பட்டிருப்பதாக உற்சாகப் பட்டாசு வெடிக்கிறார்கள் இளம் ஐ.ஏ.எஸ் அதிகாரிகள்!

புது ரத்தம் பாய்ச்சும் இளம் ஐ.ஏ.எஸ்-கள்! - ஸ்டாலின் தூவிய விதை...

ஆட்சிச் சக்கரத்தின் அச்சாணியை உறுதிப்படுத்தியிருக்கும் இந்த மாற்றம் எப்படிச் சாத்தியமானது என்று ஐ.ஏ.எஸ் அதிகாரிகள் சிலரிடம் பேசினோம். “ஐ.ஏ.எஸ் அதிகாரிகளாகத் தேர்வாகி வருபவர்கள் சப் கலெக்டர், மாவட்ட ஊரக வளர்ச்சி முகமை திட்ட இயக்குநர், மாவட்ட ஆட்சியர் எனப் படிப்படியாக அனுபவம் பெற்று பணியமர்த்தப்படுவார்கள். ஆனால், கடந்த பத்தாண்டுகளாகவே இந்த அனுபவம் பெறுவதற்கான வாய்ப்பு, இளம் ஐ.ஏ.எஸ் அதிகாரிகளுக்கு மறுக்கப்பட்டது. மாவட்ட ஆட்சியர்களாகத் தங்களுக்கு வேண்டப்பட்ட நபர்களையே அந்தந்த மாவட்ட அமைச்சர்கள் பணியமர்த்திக்கொண்டனர். சமூகப் பின்னணியை அடிப்படையாக வைத்தும் இந்த நியமனங்கள் நடந்தன. தங்களுக்குக் கிடைத்த மாவட்ட ஆட்சியர் பதவியை தக்க வைத்துக்கொள்ள, அமைச்சர்கள் எது சொன்னாலும் தட்டிக் கழிக்காமல் நிறைவேற்றுவது அப்படி நியமிக்கப்பட்ட அதிகாரிகளின் வழக்கமாக இருந்தது. இந்த நடைமுறைதான் இப்போது தகர்க்கப் பட்டிருக்கிறது.

கணேஷ் சுப்பிரமணியன்
கணேஷ் சுப்பிரமணியன்

தேனி, செங்கல்பட்டு, காஞ்சிபுரம், திருப்பத்தூர், வேலூர், திருவண்ணாமலை, கள்ளக்குறிச்சி உட்பட 20-க்கும் மேற்பட்ட மாவட்டங்களில் இளம் ஐ.ஏ.எஸ் அதிகாரிகள் மாவட்ட ஆட்சியர்களாக பணியமர்த்தப் பட்டுள்ளனர். திருநெல்வேலி, திருப்பூர், கோவை, சேலம், தூத்துக்குடி, மதுரை மாநகராட்சிகளின் ஆணையர்களாகவும் இளம் அதிகாரிகள் நியமிக்கப்பட்டுள்ளனர். இவர்களில் பெரும்பாலானோருக்கு வயது 40-க்கும் குறைவு. பத்து வருடங்கள் கழித்து, அரசின் கொள்கை முடிவுகளை எடுக்கும் இடத்தில் இவர்கள் அமரும்போது, மாவட்ட ஆட்சியர்களாக களப்பணியாற்றிய இவர்களின் அனுபவம், அரசின் திட்டங்களை ஆக்கபூர்வமாகச் செயல்படுத்துவதற்கு உறுதுணையாக இருக்கும்.

கிராமங்களின் வளர்ச்சிக்கு ஒதுக்கப்படும் மத்திய, மாநில அரசுகளின் நிதி, ஊரக வளர்ச்சி முகமை மூலமாகத்தான் நிர்வகிக்கப்படும். மாவட்ட அளவில் இதை நிர்வகிக்கும் திட்ட இயக்குநர் பொறுப்புக்கு, கடந்த ஆட்சியில் தங்களுக்கு வேண்டப்பட்டவர்களையே ஆட்சியாளர்கள் நியமித்தனர். இதனால், ஏராளமான முறைகேடுகளும் அரங்கேறின. இப்போது திண்டுக்கல், கடலூர், தஞ்சாவூர், தருமபுரி, திருவண்ணாமலை உட்பட 11 மாவட்டங்களில் திட்ட இயக்குநர் பொறுப்புக்கு இளம் ஐ.ஏ.எஸ் அதிகாரிகள் நியமிக்கப்பட்டுள்ளனர். இளம் வயத்திலேயே பொறுப்புள்ள பதவி கிடைத்திருப்பதால், அவர்கள் ஊழலுக்குத் துணை போகாமல் பொறுப்புடன் பணியாற்றுவார்கள் என்று நம்பப்படுகிறது. இப்படி இளம் அதிகாரிகள் நியமனத்தால், ஒத்த வயதுடைய இவர்கள் தங்களுக்குள் இயல்பாகக் கருத்துகளைப் பரிமாறிக்கொள்வதற்கும், நிர்வாகத்தை வலுப்படுத்துவதற்கும் முதல்வர் ஸ்டாலின் வழிவகை செய்துள்ளார்” என்றனர்.

புது ரத்தம் பாய்ச்சும் இளம் ஐ.ஏ.எஸ்-கள்! - ஸ்டாலின் தூவிய விதை...

“இளம் ஐ.ஏ.எஸ் அதிகாரிகள் நியமிக்கப்பட்டால் எப்படியான மாற்றங்கள் ஏற்பட வாய்ப்பு இருக்கிறது?” என்று கணேஷ் ஐ.ஏ.எஸ் அகாடமியின் நிர்வாக இயக்குநர் கணேஷ் சுப்பிரமணியனிடம் கேட்டோம். “ஒரு அரசுத் திட்டத்தைச் செயல்படுத்தும்போது ஏற்படும் சவால்கள், நடைமுறைச் சிக்கல்கள், கீழ்மட்ட அதிகாரிகளை அணுகும்விதம், மக்களின் எதிர்வினை உள்ளிட்டவற்றைக் களத்தில் இறங்கி வேலை செய்தால் மட்டுமே கற்றுக்கொள்ள முடியும். நிர்வாகம் என்பது தொடர்ச்சியாக இயங்க வேண்டிய அமைப்பு. மாவட்ட ஆட்சியர்களாக நியமிக்கப்பட்டவர்கள் தங்களின் அனுபவம் வாயிலாக, எதிர்காலத்தில் தங்களுக்குக் கீழ் பணியாற்றப்போகும் இளம் அதிகாரிகளுக்குத் தக்க ஆலோசனைகளை வழங்க முடியும். திட்டங்களைச் செயல்படுத்தும்போது ஏற்படும் நடைமுறைச் சிக்கல்களை புரிந்துகொள்ள முடியும். பத்தாண்டுகளுக்குப் பிறகு, தமிழக அரசின் நிர்வாகம் மேம்பட்டுச் சிறக்க புதிய விதையை அரசு தூவியிருக்கிறது. இதில் சவால்களும் இருக்கின்றன. துடிப்பான வயதிலேயே அதிகாரமிக்க பதவி கிடைத்திருப்பதால், அதிகாரத்தை எப்படிப் பயன்படுத்த வேண்டும் என்று, தமிழக அரசு அவர்களுக்கு நெறிப்படுத்தி வழிநடத்த வேண்டும்” என்றார்.

மாவட்ட ஆட்சியர்களாக நியமிக்கப் படுபவர்தான் அந்த மாவட்டத்தில் முதல் குடிமகன். 24 மணி நேரமும் இயங்க வேண்டிய பணி அது. தங்கள் பணியின்போது அரசியல்வாதிகளுடன் மல்லுக்கட்டுவது தொடங்கி சட்டம், ஒழுங்கு வரைக்கும் இவர்கள் பதில் சொல்ல வேண்டியிருக்கும். சவால்கள் நிறைந்த இந்தப் பணியில் இளம் அதிகாரிகளை நியமித்து, ஆட்சிச் சக்கரத்தின் பொறுப்பை ஒப்படைத்திருக்கிறது தமிழக அரசு. பொறுப்பை உணர்ந்து அவர்கள் செயல்பட வேண்டுமென்பதே அனைவரின் எதிர்பார்ப்பு!