Published:Updated:

`ஆளத்தான் அதிகாரம் அளித்தார்கள்; நாட்டைத் துண்டாக்க அல்ல!’ - மக்களவையில் தகித்த சு.வெங்கடேசன் எம்.பி

மதத்தின் அடிப்படையில் எந்த முடிவும் எடுக்க இயலாது. எந்த மதத்தையும் பின்பற்றாத கடவுள் நம்பிக்கை அல்லாத நாத்திகர்களைப்பற்றி நீங்கள் என்ன சொல்கிறீர்கள் என்பதை நான் கேட்க விரும்புகிறேன்.

சு.வெங்கடேசன் எம்.பி
சு.வெங்கடேசன் எம்.பி

குடியுரிமை சட்டத் திருத்த மசோதா மக்களவையில் நேற்று இரவு நிறைவேறியது. நேற்று மக்களவையில் இந்தச் சட்டத் திருத்த மசோதா தொடர்பான விவாதம் நடைபெற்றது.

குடியுரிமை மசோதா விவாதத்தில் அமித் ஷா
குடியுரிமை மசோதா விவாதத்தில் அமித் ஷா

இந்த விவாதத்தில் கலந்துகொண்டு பேசிய மதுரை எம்.பி சு. வெங்கடேசன், ``இந்திய வரலாற்றில் இன்று மிகக்கொடிய நாள்'' என்றார். தொடர்ந்து பேசியவர், ``இந்தச் சட்ட திருத்தத்தை நாங்கள் முழுமையாக எதிர்க்கிறோம். இந்தியாவை அடுத்த பல ஆண்டுகள் அலைக்கழிக்கப்போகிற மிகக்கொடிய ஒரு சட்டம் இது. ஒரு மதச்சார்பற்ற நாடு மத அடிப்படையில் குடியுரிமை வழங்கிட இயலாது. அரசியல் சாசனத்திற்கு எதிரான ஒரு சட்டத்திருத்தம் இது. இந்தியா இதுவரை கடைப்பிடித்து வந்த மரபுகளுக்கு எதிரானது.

இந்திய அரசியல் முகப்புரையில் வழிபாட்டை வைத்து மக்களை வேறுபடுத்தவில்லை. ஆனால், இன்றைக்கு இந்தச் சட்டம் நிறைவேறினால் இந்தியா தனது மனிதாபிமானம் மிக்க கோட்பாட்டினை அதிகாரபூர்வமாகக் கைவிடுகிற ஒரு கொடிய நாளாக இது இருக்கும் என்று நான் இங்கு குறிப்பிடுகிறேன்.

`கிழித்தெறியப்பட்ட நகல்; ஆதரவு 311!’- மக்களவையில் நள்ளிரவில் நிறைவேறியது குடியுரிமை மசோதா

பாகிஸ்தான், வங்காள தேசம், ஆப்கானிஸ்தான் ஆகிய நாடுகளில் முஸ்லிம் அல்லாத மக்கள் மத ரீதியாக ஒடுக்கப்படுகிறார்கள் என்பது உண்மை. ஆனால், அது மட்டும் தானா ஒடுக்கப்படுவதற்கான கருவி என்பதை இங்கே நான் நினைவுபடுத்த கடமைப்பட்டிருக்கிறேன். அஹம்தியாஸ் உள்ளிட்ட பல குழுக்கள் அங்கே ஒடுக்கப்படுகிறார்கள். மலாலா ஏன் துரத்தப்பட்டார் என்பது உலகம் அறியும். வன்முறைக்கு மதம் மட்டுமே அளவுகோல் இல்லை. மதத்தின் அடிப்படையில் எந்த முடிவும் எடுக்க இயலாது. எந்த மதத்தையும் பின்பற்றாத கடவுள் நம்பிக்கை அல்லாத நாத்திகர்களைப்பற்றி நீங்கள் என்ன சொல்கிறீர்கள் என்பதை நான் கேட்க விரும்புகிறேன். மியான்மரைப்பற்றி இலங்கையைப் பற்றி நீங்கள் ஏன் பேச மறுக்கிறீர்கள்?

இலங்கையில் தமிழர்கள் மீதான தாக்குதலுக்கான அடிப்படை ``சிங்கள பௌத்த பேரினவாதம்” என்பதையும் நாம் அறிவோம். எனவே, இன்றைக்கு தமிழ்நாட்டில் 24 மாவட்டங்களில் 107 முகாமில் 59,716 பேர் 30 ஆண்டுகளுக்கு மேலாக இருக்கிறார்கள். அவர்களில் இங்கேயே பிறந்து வளர்ந்தவர்கள் இருக்கிறார்கள். அவர்களைப் பற்றியெல்லாம் நீங்கள் ஏன் மெளனம் சாதிக்கிறீர்கள்.

சு.வெங்கடேசன்
சு.வெங்கடேசன்

இந்தச் சட்டம் முஸ்லிம்களுக்கு எதிரானது, தமிழர்களுக்கு எதிரானது என்பதை இங்கே நாங்கள் சுட்டிக்காட்ட கடமைப்பட்டிருக்கிறோம். இந்தச் சட்டத்திருத்தம் அண்டை நாடுகளில் உள்ள அனைத்து இந்துக்களுக்கும் வெளிப்படையாக அழைப்பு கொடுக்கிறது. அதே நேரம் உள்நாட்டில் உள்ள முஸ்லிம்களுக்கு நேரடியான அச்சுறுத்தலையும் அவமானத்தையும் கொடுக்கிறது என்பதை நாங்கள் இந்த அவையில் பதிவு செய்கிறோம். நாட்டில் எழும் எத்தனையோ பிரச்னைகளைத் தீர்வு காண்பதற்கு பதிலாக எண்ணற்ற புதிய பிரச்னைகளை உருவாக்குகிற சட்டமாக இந்தச் சட்டம் இருக்கிறது.

இந்த நாடாளுமன்றத்தின் முகப்பில் சம்ஸ்கிருதத்தில் ஒரு வாக்கியம் எழுதப்பட்டிருக்கிறது. நாடாளுமன்ற உறுப்பினர்கள் அத்துணைபேரும் தினசரி அந்த வாக்கியத்தைக் கடந்துதான் நாம் உள்ளே நுழைகிறோம். அந்த வாக்கியத்தின் அர்த்தம் என்ன தெரியுமா? இந்தியா என்பது மத ஒடுக்குமுறைகளுக்கு ஆளாகியிருக்கும் யாராக இருந்தாலும் அவர்கள் யூதர்களாக இருந்தாலும், ஏமனைச் சேர்ந்தவர்களாக இருந்தாலும், பார்சிகளாக இருந்தாலும், ஆப்கானிஸ்தானத்தைச் சேர்ந்தவர்களாக இருந்தாலும், திபெத்தியர்களாக இருந்தாலும், வங்கதேசத்தைச் சேர்ந்தவர்களாக இருந்தாலும் அவர்கள் அனைவரும் இதை தங்கள் இல்லமாகக் கருதலாம் என்று அந்த வாக்கியம் சொல்லுகிறது. இந்தச் சட்டத்திருத்தம் நிறைவேறினால் அவர்கள் இந்தியாவை இல்லமாக ஒருபோதும் கருதமாட்டார்கள்.

இங்கே உள்துறை அமைச்சர் சொன்னார், அடுத்த நான்கரை ஆண்டுகளுக்கு ஆளுகிற அதிகாரத்தை மக்கள் எங்களுக்கு வழங்கி இருக்கிறார்கள் என்று சொன்னார்.

உண்மை; ஆளுகிற அதிகாரத்தைத்தான் மக்கள் உங்களுக்கு வழங்கியிருக்கிறார்களே தவிர இந்தியாவைப் பிளக்கிற அதிகாரத்தை, வெறுப்பின்பால் இந்தியாவை மோசமான நிலைக்குச் செலுத்துகிற அதிகாரத்தை உங்களுக்கு வழங்கவில்லை என்பதை இந்த நேரத்தில் தெரிவித்துக்கொள்கிறேன்” என்றார் ஆவேசமாக.