Published:Updated:

சுப்புலட்சுமி ஜெகதீசன்: சட்டசபை தேர்தல்... ஒரு பார்வை! #TNelections2021

தி.மு.க., துணை பொதுச் செயலாளர் சுப்புலட்சுமி ஜெகதீசன்
தி.மு.க., துணை பொதுச் செயலாளர் சுப்புலட்சுமி ஜெகதீசன்

மொடக்குறிச்சி தொகுதியில் திமுக வேட்பாளராக தற்போது திமுகவின் துணை பொதுச் செயலாளராக உள்ள சுப்புலட்சுமி ஜெகதீசன் போட்டியிட்ட நிலையில், அவரை எதிர்த்து அதிமுக கூட்டணியில் இடம் பெற்றுள்ள பா.ஜனதா சார்பில் சி.கே. சரஸ்வதி களமிறக்கப்பட்டார்.

அதிமுக கூட்டணியில் இடம்பெற்ற பா.ஜனதாவும் திமுகவும் நேருக்கு நேர் மோதும் தொகுதி என்பதாலேயே திமுக துணைப் பொதுச் செயலாளர் சுப்புலட்சுமி ஜெகதீசன் போட்டியிட்ட மொடக்குறிச்சி தொகுதி, 2021 தேர்தலில் கவனம் ஈர்த்த தொகுதியாக இருந்தது.1967 முதல் இத்தொகுதியில் நடைபெற்ற தேர்தல்களில் இதுவரை திமுக 3முறையும், அதிமுக 7 முறையும், காங்கிரஸ் மற்றும் சம்யுக்தா சோசலிச கட்சி தலா ஒரு முறையும் வெற்றி பெற்றுள்ளன. 1977 ஆம் ஆண்டு அதிமுகவில் சேர்ந்து தனது அரசியல் வாழ்க்கையை தொடங்கிய சுப்புலட்சுமி ஜெகதீசன், அந்த ஆண்டு நடந்த சட்டமன்ற தேர்தலில் மொடக்குறிச்சி தொகுதியில் போட்டியிட்டு வெற்றி பெற்று அமைச்சராக பதவி வகித்தார். பின்னர் திமுகவில் சேர்ந்த அவர், 1989 ஆம் ஆண்டு தேர்தலில் ஈரோடு சட்டமன்ற தொகுதியில் போட்டியிட்டு எம்.எல்.ஏ ஆனார். அப்போது மாநில சமூக நலத்துறை அமைச்சராக பொறுப்பு வகித்தார். தொடர்ந்து கடந்த 1996-ம் ஆண்டு தேர்தலில் திமுக வேட்பாளராக மொடக்குறிச்சி தொகுதியில் போட்டியிட்டு வெற்றி பெற்றார் சுப்புலட்சுமி ஜெகதீசன்.

சுப்புலட்சுமி ஜெகதீசன்
சுப்புலட்சுமி ஜெகதீசன்

கடந்த 2016 ஆம் ஆண்டு சட்டமன்ற தேர்தலில், மொடக்குறிச்சி தொகுதியில் அதிமுக வேட்பாளர் வி. பி. சிவசுப்ரமணியன் 77,067 வாக்குகளுடன் வெற்றிபெற்ற நிலையில், அவரை எதிர்த்துப் போட்டியிட்ட திமுக வேட்பாளர் பி. சச்சிதானந்தம் 74,845 வாக்குகளைப் பெற்றுத் தோல்வியடைந்தார். இந்த முறை, மொடக்குறிச்சி தொகுதியில் திமுக வேட்பாளராக தற்போது திமுகவின் துணை பொதுச் செயலாளராக உள்ள சுப்புலட்சுமி ஜெகதீசன் போட்டியிட்ட நிலையில், அவரை எதிர்த்து அதிமுக கூட்டணியில் இடம் பெற்றுள்ள பா.ஜனதா சார்பில் சி.கே. சரஸ்வதி, அமமுகவின் டி.தங்கராஜ், மக்கள் நீதி மய்யத்தின் ஆனந்தம் ராஜேஷ் மற்றும் நாம் தமிழர் கட்சியின் ஜி. பிரகாஷ் உள்ளிட்டோர் முக்கிய வேட்பாளர்களாக போட்டியிட்டனர். தொகுதிக்கு பாஜக வேட்பாளர் புதியவர். அதிமுக வாக்குகளை நம்பியே களமிறக்கப்பட்டார். ஆனால், தொகுதி கூட்டணி கட்சிக்குப் பறிபோன விரக்தியில், தேர்தலில் அதிமுகவினர் சரிவர ஒத்துழைப்பு பார்க்கவில்லை என்ற தகவல் திமுகவுக்கு சாதகமானதாக கருதப்பட்டது. மேலும் கட்சியில் சீனியர் என்பதாலும், தேர்தலுக்கான நெளிவு சுளிவுகளை நன்கறிந்தவர் என்பதாலும், சுப்புலட்சுமி ஜெகதீசனின் வெற்றிக்கு அதிக வாய்ப்பு இருப்பதாக சொல்லப்பட்டது.

அடுத்த கட்டுரைக்கு