Published:Updated:

“என்னைத் தூக்கில் போடுங்கள்!”

ஹெச்.ராஜா
பிரீமியம் ஸ்டோரி
ஹெச்.ராஜா

ஹெச்.ராஜா ஆவேசம்...

“என்னைத் தூக்கில் போடுங்கள்!”

ஹெச்.ராஜா ஆவேசம்...

Published:Updated:
ஹெச்.ராஜா
பிரீமியம் ஸ்டோரி
ஹெச்.ராஜா
தலைநகர் டெல்லியில், 20 நாள்களைக் கடந்து நடைபெற்றுவரும் விவசாயிகள் போராட்டம், மத்திய பா.ஜ.க அரசுக்குப் பெரும் தலைவலியாக மாறிவருகிறது. இந்த நிலையில், சமீபகாலமாக தடாலடி பேச்சுகளுக்குத் தனக்குத் தானே தடை விதித்துக்கொண்டு அமைதிகாத்து வரும் தமிழக பா.ஜ.க மூத்த தலைவர் ஹெச்.ராஜாவிடம் பேசினோம்...
விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

‘‘விவசாயிகளின் கோரிக்கைகளைப் பரிசீலிக்காமல், ‘போராட்டத்தில் நக்சலைட்டுகள் புகுந்துவிட்டனர்’ என்றெல்லாம் மத்திய அமைச்சர் பேசியிருக்கிறாரே..?’’

‘‘இது முதலில் விவசாயிகளின் போராட்டம் தானா? பாதாம், பிஸ்தாவில் ஆரம்பித்து பீட்ஸா, பர்கர், மசாஜ் சென்டர், வார்ம் டென்ட்... என்று பல கோடிகளைக் கொட்டி, `போராட்டம்’ என்ற பெயரில் கொட்டமடிக்கிறார்கள். மற்றபடி, இந்தச் சட்டத்தால் விவசாயிகளுக்கு என்ன பாதிப்பு என்று யாராவது இதுவரை தெளிவாகச் சொல்லியிருக்கிறார்களா?’’

“ஆம், இந்தச் சட்டங்கள் விளைபொருள்களுக்கான குறைந்தபட்ச ஆதார விலையையே அடியோடு ஒழித்துக்கட்டுவதாகச் சொல்கிறார்களே..?’’

‘‘குறைந்தபட்ச ஆதார விலைக்கான உத்தரவை மத்திய அரசுகள்தான் அந்தந்தக் காலகட்டங்களில் சூழலுக்கேற்ப அறிவித்துவருகின்றன. ‘அரசு அறிவித்துவரும் இந்த நடைமுறை ரத்து செய்யப்படும்’ என்று இந்தச் சட்டத்தில் எங்குமே சொல்லப்படவில்லை. தவிர, ‘குறைந்தபட்ச ஆதார விலைக்கான தற்போதைய நடைமுறை அப்படியே தொடரும்’ என்று பிரதமர் மோடியும் உறுதி கொடுத்திருக்கிறார்.’’

‘‘அதை, `சட்டரீதியாக உறுதிப்படுத்தாமல், வாய் வார்த்தையாக மட்டுமே மத்திய அரசு கூறிவருகிறது’ என்று விவசாயிகள் சொல்கிறார்களே..?’’

‘‘குறைந்தபட்ச ஆதார விலைக்கென்று தனிச் சட்டம் எதுவும் கிடையாது. எந்த நியாயமான போராட்டமாக இருந்தாலும், மத்திய அரசு அவர்களோடு பேசத் தயாராக இருக்கிறது. அதனால்தான் மத்திய உள்துறை அமைச்சரும், ‘சட்டத்தை வாபஸ் பெற முடியாது; மற்றபடி உங்கள் கோரிக்கை என்னவென்று சொல்லுங்கள்... பரிசீலிக்கிறேன்’ என்கிறார். அவரோடு பேச்சுவார்த்தை நடத்த வேண்டியதுதானே!’’

ஹெச்.ராஜா
ஹெச்.ராஜா

‘‘ஆனால், ‘எங்கள் கோரிக்கைகளை இந்த அரசு காதுகொடுத்து கேட்பதேயில்லை; அதனாலேயே பேச்சுவார்த்தை தோல்வியில் முடிகிறது’ என்கிறார்களே விவசாயிகள்?’’

‘‘புதிய வேளாண்மைச் சட்டங்களே வேண்டாம் என்று நீங்கள் சொன்னால், அதைக் காதுகொடுத்து கேட்க முடியாதுதான். பாகிஸ்தான், பங்களாதேஷிலிருந்து ஆவணம் எதுவுமின்றி எல்லை தாண்டி வந்த அந்நியனுக்குக் குடியுரிமை கொடுக்க வேண்டும் என்றால் கேட்க முடியுமா? அதேபோல்தான் இதுவும்!’’

‘‘நடைமுறையிலுள்ள ஒப்பந்தப் பண்ணை முறைகளே விவசாயிகளுக்குப் பாதகமாக இருக்கும்போது, இந்தப் புதிய சட்டம் ஒப்பந்தப் பண்ணையத்தை மேலும் விரிவுபடுத்தியிருக்கிறது என்பதும் விவசாயிகளின் குற்றச்சாட்டுகளில் ஒன்றாக இருக்கிறதே?’’

“இந்தச் சட்டத்தில் ‘விவசாயிகள், ஒப்பந்தப் பண்ணையத்தில்தான் விவசாயம் செய்ய வேண்டும்’ என்று எங்கேனும் சொல்லப்பட்டிருக்கிறதா? அப்படி இருந்தால் என்னைத் தூக்கில் போடுங்கள். ‘விரும்புகிற விவசாயிகள் பண்ணையத்தில் விவசாயம் செய்துகொள்ளலாம்’ என்றுதானே சட்டம் சொல்கிறது. ஏற்கெனவே, ஒப்பந்தப் பண்ணையத்தில் பாதுகாப்பற்ற நிலையில் விவசாயம் செய்துகொண்டிருந்ததால்தான், விவசாயிகளுக்குப் பாதுகாப்பை அளிக்கும்விதமாக புதிய சட்டங்கள் உருவாக்கப்பட்டிருக்கின்றன.’’

‘‘அப்படியென்றால், சட்டத்தின் இந்தப் பாதுகாப்பு அம்சங்கள் குறித்தெல்லாம் எதுவுமே தெரியாமல்தான் விவசாயிகள் போராடிக்கொண்டிருக்கிறார்களா?’’

‘‘விவசாயிகள் போராடவில்லை. முதலாளிகள் தூண்டிவிடுகிறார்கள். கமிஷன் மண்டி ஏஜென்ட்டுகள், பஞ்சாப்-ஹரியானா மாநில பாதல் குடும்பத்தினர், மகாராஷ்டிராவின் பவார் குடும்பத்தினர் ஆகியோர்தான் கமிஷன் மூலமாக ஆண்டுக்குப் பல்லாயிரம் கோடி ரூபாயைச் சம்பாதித்துவருகிறார்கள். இப்போது இந்தப் புதிய சட்டங்கள் அவர்களது கொள்ளைக்கு முற்றுப்புள்ளி வைத்திருப்பதால், அவர்கள்தான் காசு கொடுத்து விவசாயிகளைப் போராட வைத்திருக்கிறார்கள். 678 கோடி ரூபாய் சொத்து மதிப்பு என்று காட்டிய காங்கிரஸ் வேட்பாளர்தான், இந்தப் போராட்டத்தையே தலைமை தாங்கி வழிநடத்திவருகிறார் என்றால் பார்த்துக் கொள்ளுங்கள்.’’

‘‘ `போராட்டத்தை பாகிஸ்தான், சீனா உள்ளிட்ட நாடுகள்தான் தூண்டுவிடுகின்றன’ என்றெல்லாம் சொல்லி போராட்டத்தை திசைதிருப்புவதாகவும் விமர்சனங்கள் எழுந்துள்ளனவே?’’

‘‘கனடா தூண்டிவிடுகிறது என்பதுதான் அப்பட்டமாகத் தெரிகிறதே... கனடா பிரதமர் இந்த விஷயத்தில் தலையிட்டிருக்கிறார்தானே... இந்திய நாட்டின் உள்விவகாரத்தில் தலையிட அவர் யார்? போராட்டம் செய்பவர்களுக்கு பாதாம், பிஸ்தா அனுப்புவதும், மசாஜ் கருவிகள் அனுப்புவதும் கனடா பிரதமராகக்கூட இருக்கலாம்... யாருக்குத் தெரியும்! கனடாவின் கைக்கூலிகள்தான் இவர்கள்.’’

‘‘ஆம் ஆத்மி கட்சி, ‘அயல் கிரகத்தினர் போராட்டத்தைத் தூண்டிவிடுகிறார்கள் என்ற குற்றச்சாட்டை மட்டும்தான் பா.ஜ.க இதுவரை சொல்லவில்லை’ என்று கிண்டல் செய்திருக்கிறதே?’’

‘‘நீங்கள் வேறு... (சிரிக்கிறார்) கெஜ்ரிவால் சொல்வதையெல்லாம் கேட்கிறீர்கள்... அவருக்கெல்லாம் நான் பதில் சொல்லக்கூடிய அளவுக்கு அவர் ஒன்றும் தரமான மனிதர் அல்ல!’’

‘‘ `ரஜினிகாந்துடன் அர்ஜுனமூர்த்தி இணைந்ததன் பின்னணியில் பா.ஜ.க இல்லை’ என்று நீங்கள் சொல்லிவருவது நம்பும்படியாகவா இருக்கிறது?’’

‘‘கருணாநிதியையும் தி.மு.க-வையும் கடுமையாக விமர்சித்த தங்க தமிழ்ச்செல்வன், இன்று மு.க.ஸ்டாலின் பின்னால் நிற்கிறாரே... அப்படியென்றால், டி.டி.வி தினகரன்தான் அவரை அங்கு அனுப்பிவைத்தாரா? அவர் எப்படி அ.ம.மு.க-விலிருந்து வெளியேறி தி.மு.க-வுக்குப் போனாரோ அதேபோல், அர்ஜுனமூர்த்தியும் பா.ஜ.க-விலிருந்து விலகி ரஜினிகாந்த் பக்கம் போயிருக்கிறார். மற்றபடி இந்த விஷயத்தில் பா.ஜ.க-வுக்கு எந்தத் தொடர்பும் இல்லை!’’