Published:Updated:

காங்கிரஸ் கட்சி இதுவரை கடந்து வந்த தலைவர் தேர்தல்கள்! - ஒரு ரவுண்ட்அப்

தரூர் Vs கார்கே

“கடந்த 136 ஆண்டுக்கால காங்கிரஸ் வரலாற்றில் நான்கு தேர்தல்கள்தான் நடந்துள்ளன. தற்போது நடந்திருப்பது ஐந்தாவது தேர்தல்.”

காங்கிரஸ் கட்சி இதுவரை கடந்து வந்த தலைவர் தேர்தல்கள்! - ஒரு ரவுண்ட்அப்

“கடந்த 136 ஆண்டுக்கால காங்கிரஸ் வரலாற்றில் நான்கு தேர்தல்கள்தான் நடந்துள்ளன. தற்போது நடந்திருப்பது ஐந்தாவது தேர்தல்.”

Published:Updated:
தரூர் Vs கார்கே

முக்கியமான அரசியல் நிகழ்வுகள் எந்த ஆண்டில், எந்தத் தேதியில், எந்த நேரத்தில் நடந்தன என்பது வரையில் தகவல்களை விரல்நுனியில் வைத்திருப்பவர் வழக்கறிஞர், அரசியலாளர் கே.எஸ்.ராதாகிருஷ்ணன். இவரின் சமூக வலைதளப் பக்கங்களைத் தொடர்ந்து கவனித்துவந்தாலே, இந்திய அரசியல் வரலாறு குறித்த அடிப்படைப் புரிதல் ஒருவருக்குக் கிடைத்துவிடும். அந்த வகையில் காங்கிரஸ் கட்சி தலைவர்களுக்கான தேர்தல்களை, சில வரலாற்று நிகழ்வோடு நம்மிடம் பகிர்ந்துகொண்டார்.

கங்கிரஸ் உருவான வரலாறு!

“இந்தியாவின் நாடாளுமன்ற உறுப்பினராக பிரிட்டிஷ் நாடாளுமன்றத்தில் இடம் பெற்ற தாதாபாய் நௌரோஜி, சிந்தனையாளர் கோபாலகிருஷ்ண கோகுலே, ‘சுயராஜ்யம் என்னுடைய பிறப்புரிமை’ என பிரகடனம் செய்த லோகமான்ய திலகர் போன்றோர் உத்தமர் காந்திக்கு முன்னால் இந்தியாவின் விடுதலைப் போராட்டத்தினை முன்னெடுத்தனர். ஆனால் இந்திய தேசிய காங்கிரஸ் என்ற கட்டமைப்பை ஆலன் ஆக்டேவியன் ஹியூம் துவக்கினார். அவரோடு மற்றொரு ஆங்கிலேயர் அன்னிபெசன்ட் அம்மையாரும் காங்கிரஸ் கட்டமைப்புப் பணியில் இருந்தார். அரவிந்தர் குற்றவாளி என்று அலிப்பூர் சிறை என கடந்து புதுச்சேரி வரும் வரை தேசிய விடுதலைப் போராட்டத்தில் அவருடைய பணிகள் இருந்தன.

பிபின் சந்திர பால் சந்தர், பாலகங்காதர திலகர், லாலா லஜபதிராய் போன்றோர் எல்லாம் விடுதலைப் போராட்டத்தின் முன்னோடிகள். இவர்கள் காங்கிரஸ் என்ற அமைப்பு காணாத நேரத்தில் விடுதலை வேள்வியை முன்னெடுத்தனர். ஆங்கிலேயர் ஆட்சிக் காலத்தில் இந்திய நிர்வாகப் பணியில் அதிகாரியாக (ஐ.சி.எஸ்) பணியாற்றிய ஆலன் ஆக்டேவியன் ஹியூம், ஆங்கிலேய அரசின் மக்கள் விரோதப் போக்கிற்கு எதிரான பண்பு உடையவராக இருந்தார். அதனால் அவர் தனது அரசுப் பதவியை 1882 – இல் துறந்தார். அவருடைய முன்முயற்சியால், இந்திய தேசிய காங்கிரஸ் என்ற அமைப்பு உருவாக்கப்பட்டது.

அதன் பிரதிநிதிகள் கூடிய முதல் மாநாடு 1885 டிசம்பர் 28 – இல் மும்பையில் நடந்தது. அதன் முதல் தலைவராக உமேஷ் சந்திர பானர்ஜி நியமிக்கப்பட்டார். பனாரஸ் இந்து பல்கலைக்கழகத்தின் நிறுவனர் மதன் மோகன் மாளவியா 1909-ல் நடந்த லாகூர் காங்கிரஸ் மாநாட்டிலும், அதன் பிறகு 1918 மற்றும் 1932–ல் நடைபெற்ற டெல்லி மாநாடுகளிலும், 1933–ல் நடந்த கல்கத்தா மாநாட்டிலும் நான்கு முறை காங்கிரஸ் தலைவராக ஏற்றுக்கொள்ளப்பட்டார். காங்கிரஸின் சின்னங்களாக நுகத்தடி பூட்டிய இரட்டைக்காளைச் சின்னம், இந்திரா காங்கிரஸ் பிளவுக்குப் பிறகு பசுவும் கன்றும், அதற்குப் பிறகு கைச்சின்னம் ஆகியவை இருந்துவருகின்றன.

உமேஷ் சந்திர பானர்ஜி
உமேஷ் சந்திர பானர்ஜி

காங்கிரஸ் கட்சி தலைவருக்கான தேர்தல்கள்!

அகில இந்திய காங்கிரஸ் கமிட்டி தேர்தல் ஐந்தாவது முறை நடந்து, நேற்று (19-10-2022) தேர்தல் முடிவுகள் அறிவிக்கப்பட்டுள்ளன. கடந்த 136 ஆண்டுக்கால காங்கிரஸ் வரலாற்றில் நான்கு தேர்தல்கள்தான் நடந்துள்ளன. தற்போது நடந்திருப்பது ஐந்தாவது தேர்தல். இதில் காங்கிரஸ் மூத்த தலைவர்களான மல்லிகார்ஜுன கார்கே, சசி தரூர் இருவரும் போட்டியிட்டனர். மொத்தம் பதிவான 9,500 வாக்குகளில் பெரும்பாலான வாக்குகளை மல்லிகார்ஜுன கார்க்கே பெற்று, வெற்றிபெற்றிருக்கிறார்.

சற்றுப் பின்னோக்கி வரலாற்றுரீதியாகப் பார்த்தால், 1938–ல் காங்கிரஸ் தலைவர் தேர்தலில் நேதாஜியும், பி.பட்டாபி சீதாராமய்யாவும் போட்டியிட்டனர். அதில் நேதாஜி வெற்றிபெற்றார். இரண்டாவது முறையாக 1950–ல் புருஷோத்தம் தாஸ் தாண்டன், காங்கிரஸ் மூத்த தலைவர் ஜெ.பி.கிருபளானியும் போட்டியிட்டனர். மூன்றாவது முறையாக 1997–ல் சீதாராம் கேசரி, சரத் பவார், ராஜேஷ் பைலட் ஆகிய மூவரும் போட்டியிட்டபோது, சீதாராம் கேசரி வெற்றிபெற்றார். சீதாராம் கேசரியும் தொடர்ந்து தலைவர் பதவியில் இருக்க முடியாமல், சோனியாவின் ஆதரவாளர்கள் நடந்துகொண்ட விதங்களையெல்லாம் அன்றைக்குப் பத்திரிகைகள் வெளியிட்டன. சீதாராம் கேசரியை செயல்படவிடாமல் தடுத்து, அவரைத் தரம்தாழ்த்தி நடத்திய நடவடிக்கைகளெல்லாம் செய்திகளாக வந்தவண்ணம் இருந்தன. நான்காவது முறையாக, 2000–ல் காங்கிரஸ் தலைவர் தேர்தலில் சோனியாவும், ஜிஜேந்திர பிரசாத்தும் போட்டியிட்டனர். சோனியா வெற்றிபெற்றார்.

நாட்டின் விடுதலைக்குப் பிறகு, அகில இந்திய காங்கிரஸ் கமிட்டியின் தலைவர்களாக, ஜே.பி.கிருபளானி (1946 -47), பி.பட்டாபி சீத்தாராமய்யா (1948 -49), புருஷோத்தம டாண்டன் (1950), பண்டித நேரு (1951 - 1954), யூ.என்.தேபர் (1955 -1959), இந்திரா காந்தி (1959), நீலம் சஞ்சீவ ரெட்டி (1960 -1963), காமராஜர் (1964 -1967), எஸ்.நிஜலிங்கப்பா (1968 -1969) இருந்தனர். அதற்குப் பிறகு காங்கிரஸில் இரண்டாகப் பிளவு ஏற்படுகிறது. இந்திரா காங்கிரஸின் தலைவராக ஜெகஜீவன்ராம் நியமிக்கப்படுகிறார். பின் சங்கர் தயாள் சர்மா, டி.கே.பரூவா, பிரமானந்தரெட்டி, இந்திரா காந்தி, ராஜீவ் காந்தி, நரசிம்மராவ், சீத்தாராம் கேசரியிலிருந்து சோனியா காந்தி வரை காங்கிரஸ் தலைவர்களாக இருந்த பட்டியல் மிக நீளமானது.

நேரு, இந்திரா
நேரு, இந்திரா

காங்கிரஸ் தலைவராக வெற்றிபெற்ற நேதாஜி:

காங்கிரஸ் கட்சியின் முதல் தலைவர் தேர்தலில் வெற்றிபெற்ற நேதாஜியை, தலைவராகச் செயல்படவிடாமல் ஆக்கியதெல்லாம் வரலாற்றின் கறுப்புப் பக்கங்களாக இருக்கின்றன. காந்தியின் வேட்பாளரான பட்டாபி சீதாராமையாவைத் தோற்கடித்ததால், நேதாஜி காங்கிரஸ் தலைவர் பதவியில் நீடிக்க முடியாமல் போனது. 1939 – இல் காங்கிரஸிலிருந்து விலகி, அகில இந்திய ஃபார்வர்ட் பிளாக் (ஐஎன்ஏ) போன்ற அமைப்புகளை அமைத்து இயங்கினார். பின்பு ஆங்கில அரசு பல வழக்குகளை அவர்மீது பதிவுசெய்தது. பாதுகாப்புச் சட்டத்தின் கீழும் அவர்மீது கடுமையாக வழக்கு பதிவுசெய்யப்பட்டது. அவர் நடத்திய ஏட்டைத் தடை செய்தது. இந்தக் காலத்தில் நேதாஜி மாகாண சட்டமன்ற உறுப்பினராக இருக்கிறார். அன்றைக்கு வங்கத்தில் பிரதமராக இருந்தவர் ஏ.கே.ஃபஸ்லுல் ஹக் (அப்போது முதலமைச்சர் பதவி கிடையாது).

சட்டமன்றத்தில் பங்கேற்க நேதாஜிக்கு அனுமதி மறுக்கப்படுகிறது. நேதாஜியின் கோரிக்கைகள் ஏற்கப்படாத இந்த நிலையில், வங்க மாகாண அரசுக்கு விரிவான கடிதம் ஒன்றை நேதாஜி எழுதுகிறார். அந்தக் கடிதம் தேசிய ஆவணக் காப்பகத்தில் பாதுகாப்பாக இப்போதும் இருக்கிறது. அந்தக் கடிதத்தில் சில பகுதிகள் வருமாறு:

“நியாயமாக நடந்துகொள்வீர்கள் என்ற நம்பிக்கையை முற்றிலும் இழந்துவிட்ட நிலையில் இந்தக் கடிதத்தை எழுதுகிறேன். எனது இரண்டு வேண்டுகோள்களை மட்டும் நிறைவேற்றித் தர வேண்டுகிறேன். இரண்டாவது கோரிக்கையை இந்தக் கடிதத்தின் முடிவில் சொல்கிறேன். முதல் வேண்டுகோள் என்னவென்றால், என்னுடைய நியாயமான கோரிக்கைகள் எவற்றையும் நீங்கள் ஏற்றுக்கொள்ளப்போவதில்லை. இந்தக் கடிதத்தை மட்டும் பத்திரமாக வைத்திருங்கள். இதை அரசின் ஆவணக் காப்பகத்தில் சேர்த்துவிடுங்கள்.

நீங்கள் தோற்கடிக்கப்பட்டு என் மக்கள் ஆட்சியைக் கைப்பற்றும்போது, அவர்கள் கையில் இந்தக் கடிதம் கிடைக்கட்டும். இந்தக் கடிதம் என் நாட்டு மக்களுக்கான என்னுடைய செய்தியும் என் அரசியல் நிலைப்பாடின் சாசனமும் ஆகும்” இப்படித் தொடங்கும் கடிதத்தில் தேசிய, சர்வதேசிய அரசியல் உதாரணங்களை ஒப்பிட்டு, தான் கைதுசெய்யப்பட்ட சூழலையும் தன் கோரிக்கைகளின் நியாயத்தையும் பற்றிக் கூறுகிறார்.

நேதாஜி, நேரு
நேதாஜி, நேரு

“மனிதனுக்கான. மிகப்பெரிய சாபம் என்பது அவன் அடிமையாக நீடித்திருப்பதே என்பதை மறந்துவிடாதீர்கள். அநீதியுடனும் தவறுகளுடனும் சமரசம் செய்துகொள்வதே மிகப்பெரிய குற்றம் என்பதை மறந்துவிடாதீர்கள். என்றும் மாறாத விதி எது என்பதை அறிந்துகொள்ளுங்கள். நீங்கள் உங்களுக்கான வாழ்வைப் பெற வேண்டுமென்றால், உங்கள் வாழ்க்கையைத் தியாகம் செய்துதான் ஆக வேண்டும். ஒப்பற்ற நற்குணம் என்பது, எது வந்தாலும் சமத்துவமின்மைக்கு எதிராகப் போராடுவதே!” மக்களுக்கான இந்தச் செய்தியைச் சொன்ன பிறகு தனது இரண்டாவது வேண்டுகோளைச் சொல்கிறார்:

“எல்லாக் கதவுகளும் அடைக்கப்பட்ட நிலையில், சிறைக் கைதிக்கு இருக்கும் ஒரே ஆயுதம் உண்ணாவிரதம்தான். 1940, நவம்பர் 29 முதல் சாகும் வரை உண்ணாவிரதம் தொடங்கப்போகிறேன். தடுக்கவோ, எனக்கு வலுக்கட்டாயமாக உணவூட்டவோ கூடாது. அதை நான் எப்பாடுபட்டேனும் தடுப்பேன். பின் குறிப்பு: எப்போதும்போலவே நான் உப்புக் கலந்த நீரை மட்டுமே எடுத்துக்கொள்வேன். அதையும் நிறுத்திக்கொள்ள வேண்டும் என எனக்குத் தோன்றும்போது நான் நிறுத்திவிடுவேன்.” ஆங்கில அரசின் உள்துறை அதிகாரி சர் ரிச்சர்ட் டாட்டென்ஹாம் (Sir Richard Tottenham) இந்தக் கடிதத்தைப் படித்து, இறுமாப்போடு கீழ்க்கண்ட குறிப்பை எழுதியுள்ளார்.

"I should say that the best place for this was the waste paper basket.'

அதாவது, "இது போய்ச் சேர்ந்திருக்க வேண்டிய சிறந்த இடம் குப்பைத்தொட்டிதான் என்று சொல்வேன்."

நேதாஜிக்கு என்ன ஆயிற்று என்று கேள்விக்குறிகள் தொடங்குகின்றன. உண்ணாவிரதம் தொடங்கினார்; வீட்டுக் காவலுக்கு மாற்றப்படுகிறார்; அங்கிருந்து தப்பித்து நான்கே மாதங்களில் ஜெர்மனியில் இருக்கிறார் என்று பல்வேறு தகவல்கள் இன்று வரை நேதாஜியின் இறுதிக்காலம் பற்றிய விடைகள் கிடைக்காமல் இருப்பது அனைவருக்கும் தெரிந்ததே.

தமிழ்நாட்டில் காங்கிரஸ்:

தமிழ்நாட்டைப் பொறுத்தவரை, காமராஜருடைய வழிகாட்டியாக இருந்த எஸ்.சத்தியமூர்த்தி தமிழ்நாடு காங்கிரஸ் தலைவர் பதவிக்குப் போட்டியிட்டபோது, இரு முறை 1936, 1939-ல் தோல்வியைக் கண்டார். இவரை எதிர்த்து பக்தவத்சலத்தின் தாய் மாமனார் சி.என்.முத்துரங்க முதலியார் போட்டியிட்டார். இரண்டாம் முறை ஓமந்தூர் ராமசாமி ரெட்டியாரிடம் 1939-ல் சத்தியமூர்த்தி தோல்வியைக் கண்டார். பிறகு 1940-ல் தி.நகர் இந்தி பிரசார சபாவில் நடந்த தேர்தலில் காமராஜரும், கோவையைச் சேர்ந்த சி.பி.சுப்பையாவும் போட்டியிட்டனர். காமராஜர் வெற்றிபெற்றார்.

காமராஜர்
காமராஜர்

காங்கிரஸ் 1969–ல் இரண்டாகப் பிளவுபட்டு, நிஜலிங்கப்பா, காமராஜர், நீலம் சஞ்சீவரெட்டி, அதுல்யா கோஷ் போன்ற தலைவர்களின் தலைமையில் ஸ்தாபன காங்கிரஸும், இந்திரா காந்தி தலைமையில் ஆளும் காங்கிரஸ் எனவும் இரண்டு பிரிவுகளாக இந்தியாவில் செயல்பட்டன. ஆனால் தமிழகத்தில் பெருந்தலைவர் காமராஜர் தலைமையில் இயங்கிய ஸ்தாபன காங்கிரஸ் வலுவாக இருந்தது. தமிழக இந்திரா காங்கிரஸில் எம்.பக்தவத்சலம், சி.சுப்பிரமணியம், முன்னாள் அமைச்சர் ராமையா போன்ற சிலர் மட்டுமே தலைவர்களாக இருந்தனர். காமராஜர் மறைவுக்குப் பிறகு ஸ்தாபன காங்கிரஸைச் சார்ந்த பெரும்பாலோர் இந்திரா காங்கிரஸில் இணைந்தனர். பா.இராமச்சந்திரன் அன்றைக்கு ஸ்தாபன காங்கிரஸ் தலைவர். அவரோடு இருந்த குமரி அனந்தன், தண்டாயுதபாணி போன்றோர் இந்திரா காங்கிரஸில் இணையவில்லை. பிறகு ஜனதா கட்சியில் அவர்கள் இணைந்தனர் என்பது வேறு விஷயம்.

மூப்பனார், ப.சிதம்பரம்
மூப்பனார், ப.சிதம்பரம்

கடந்த 1979 - 80 காலகட்டம் என்று நினைக்கிறேன். தமிழ்நாடு காங்கிரஸ் கமிட்டி தேர்தல் மயிலாப்பூர் சாய்பாபா திருமண மண்டத்தில் நடந்தது. அந்தத் தேர்தலில் தமிழ்நாடு காங்கிரஸ் தலைவர் தேர்தலில் பழ.நெடுமாறன், கருப்பையா மூப்பனார், தஞ்சை இராமமூர்த்தி மூவரும் போட்டியிட்டனர். எட்டு ஓட்டு வித்தியாசத்தில் நெடுமாறன், மூப்பனாரிடம் தோல்வியைக் கண்டார். நெடுமாறனின் நண்பர் தஞ்சை இராமமூர்த்தி ஏறத்தாழ ஏழு ஓட்டுகள் வாங்கியிருந்தார். தஞ்சை ராமமூர்த்தி தேர்தலில் போட்டியிடாமல் இருந்திருந்தால், நெடுமாறனிடம் உறுதியளித்தபடி, முன்னாள் சென்னை மாகாண சட்டப் பேரவைத் தலைவராக இருந்த செல்லப்பாண்டியன் வாக்களித்திருந்தால், இன்றைய காங்கிரஸின் நிலையே வேறு மாதிரி இருந்திருக்கும்.

கே.எஸ்.ராதாகிருஷ்ணன்
கே.எஸ்.ராதாகிருஷ்ணன்

அதேபோன்று, திண்டிவனம் இராமமூர்த்தி, என்.எஸ்.வி.சித்தன். ப.சிதம்பரம் போன்ற பலர் மூப்பனாருக்காகப் பணியாற்றினர். தேர்தலில் வெற்றிபெற்ற சிலர் தொடர்ந்து தலைமைப் பதவியை வகிக்க முடியாமல் போயிருக்கிறது. தகுதியுள்ள சிலர், சில காரணங்களால் தேர்தலில் தோல்வியைத் தழுவவேண்டிய சூழ்நிலையும் ஏற்பட்டுவிடுகிறது. அரசியலில் வெற்றிபெறுவதற்கு உழைப்பு மட்டுமல்ல, நேர்மை மட்டுமல்ல, அதைத் தாண்டி சில அக, புற காரணிகள் இருக்கின்றன என்பதையே எனது 52 ஆண்டுக்கால அரசியல் அனுபவம் சொல்கிறது” என்று தன் நினைவுகளோடு காங்கிரஸ் கட்சியின் தலைவருக்கான போட்டிகள் குறித்த வரலாற்று நிகழ்வுகளை பகிர்ந்துகொண்டார் கே.எஸ். ராதாகிருஷ்ணன்.