Published:Updated:

`30 ஆண்டுகள் ஆகிவிட்டன, மகிழ்ச்சி; ஆனால்..!’ - தாராளமயமாக்கலை நினைவுகூரும் மன்மோகன் சிங்

மன்மோகன் சிங்
மன்மோகன் சிங்

1991-ல் மேற்கொள்ளப்பட்ட சீர்திருத்த நடவடிக்கைகள் வறுமையில் தவித்த  மக்களின் வாழ்க்கை நிலையை மேம்படுத்தியதாகக் குறிப்பிட்டுள்ள மன்மோகன் சிங், இனி வரும் வளர்ச்சிப் பாதை, 1991 பொருளாதார நெருக்கடி காலகட்டத்தைக் காட்டிலும் மோசமாக இருப்பதாக எச்சரித்திருக்கிறார்.

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

1991-ல் பிரதமராக இருந்த ராஜீவ் காந்தி கொல்லப்பட்ட பின்னர், கடுமையான பொருளாதார நெருக்கடிக்கு மத்தியில் பி.வி.நரசிம்ம ராவ் பிரதமராகப் பதவியேற்றபோது, பொருளாதார நிபுணரான மன்மோகன் சிங்குக்கு அமைச்சரவையில் நிதியமைச்சர் பதவி வழங்கப்பட்டது. அந்த நேரத்தில் பொருளாதார நெருக்கடியில் இந்தியா தத்தளித்துக்கொண்டிருந்தது. அதனால், இந்திய தேசத்தைப் பொருளாதார நெருக்கடியிலிருந்து மீட்டெடுத்து, கரை கொண்டு வந்து சேர்க்க வேண்டிய கடமையும் பொறுப்பும் மன்மோகன் சிங்குக்கு இருந்தன. பதவியேற்ற கையோடு, சில வாரங்களில் மன்மோகன் சிங் தாக்கல் செய்த முதல் பட்ஜெட் ஒட்டுமொத்த இந்தியாவையும் திரும்பிப் பார்க்கவைத்தது.

விக்டர் ஹ்யூகோவின், `ஒரு சிந்தனைக்கான நேரம் வந்துவிட்டதென்றால் உலகின் எந்த ஒரு சக்தியாலும் அதைத் தடுக்க முடியாது’ என்ற புகழ்பெற்ற தத்துவத்தை அவையில் முன்மொழிந்துவிட்டு, காங்கிரஸின் தூண்களான ராஜீவ் காந்தி, இந்திரா காந்தி, நேரு ஆகியோர் மேற்கொள்ளாத மாபெரும் சீர்திருத்த நடவடிக்கையை மன்மோகன் சிங் அறிவித்தார். பொருளாதாரத்தை மீட்டெடுக்க ஒரே வழி நாட்டின் பொருளாதாரக் கொள்கையை மாற்றியமைப்பது மட்டும்தான் என்று கூறிவிட்டு, புதிய பொருளாதாரக் கொள்கையை முன்வைத்தார்.

நரசிம்ம ராவ் - மன்மோகன் சிங்
நரசிம்ம ராவ் - மன்மோகன் சிங்

1991-ல் மன்மோகன் சிங் தலைமையில் மேற்கொள்ளப்பட்ட பொருளாதார சீர்திருத்த நடவடிக்கைகள் மிகவும் மோசமான நிலையிலிருந்த இந்தியப் பொருளாதாரத்தை மீட்டெடுத்தன. மக்கள் வாழ்வாதாரத்திலும், தொழில்துறைகளிலும் மிகப்பெரிய மாற்றங்கள் நிகழ்ந்தன. மேலும், இந்தியாவின் உற்பத்தி, சேவை, தகவல் தொழில்நுட்பத் துறைகள் உள்ளிட்டவை மிகப்பெரிய வளர்ச்சியைக் கண்டன. மன்மோகன் சிங்கின் பொருளாதார தாராளமய நடவடிக்கை இன்று வரையிலும் மிகப்பெரிய பொருளாதார சீர்திருத்த நடவடிக்கையாகப் பொருளாதார நிபுணர்களால் பார்க்கப்பட்டுவருகிறது.

இந்தநிலையில், பொருளாதார தாராளமயக் கொள்கையின் மூலம் இந்தியப் பொருளாதாரம் மீட்டெடுக்கப்பட்டு இன்றுடன் 30 ஆண்டுகள் நிறைவடைவதை முன்னிட்டு, அதை நினைவுகூர்ந்து முன்னாள் பிரதமர் மன்மோகன் சிங் அறிக்கை ஒன்றை நேற்றைய தினம் வெளியிட்டிருக்கிறார்.

அந்த அறிக்கையில், ``இந்தியாவில் கொரோனா நோய்த்தொற்றால் உயிரிழந்தவர்களின் குடும்பத்தினருக்கு ஆழ்ந்த இரங்கலைத் தெரிவித்துக்கொள்கிறேன். நாட்டு மக்கள் அனைவரும் உரிய வழிமுறைகளைப் பின்பற்றி தங்களை நோய்த்தொற்றிடமிருந்து தற்காத்துக்கொள்ள வேண்டும். இந்தியாவில் 30 ஆண்டுகளுக்கு முன்பு என்னுடைய தலைமையில் தாராளமயமாக்கல் நடவடிக்கை மேற்கொள்ளப்பட்டதை இப்போது நான் நினைவுகூர்கிறேன்.

`இந்தியப் பொருளாதார மாற்றத்தின் சிற்பி!' -  ஒபாமா நினைவுக் குறிப்பில் மன்மோகன் சிங்

அப்போது என்னுடைய முதல் பட்ஜெட் உரையில் நான், விக்டர் ஹ்யூகோவின், `ஒரு சிந்தனைக்கான நேரம் வந்துவிட்டதென்றால், உலகின் எந்த ஒரு சக்தியாலும் அதைத் தடுக்க முடியாது’ என்ற புகழ்பெற்ற தத்துவத்தை அவையில் முன்மொழிந்திருந்தேன். ஆனால், இன்று 30 வருடங்களுக்குப் பிறகு நாம் கடந்து வந்த பாதையைத் திரும்பிப் பார்க்கும்போது, நாம் இன்னும் வெகுதூரம் தொடர்ந்து பயணிக்க வேண்டும் என்று நினைக்கிறன்.

பொருளாதார சீர்திருத்தங்களின் காரணமாக, கடந்த மூன்று தசாப்தங்களில் இந்தியாவின் மகத்தான பொருளாதார வளர்ச்சியைப் பெருமையுடன் திரும்பிப் பார்ப்பது மிகுந்த மகிழ்ச்சியைத் தருகிறது. ஆனால் கொரோனா தொற்றால் சமீபகாலத்தில், நாம் சந்தித்துக்கொண்டிருக்கும் பாதிப்புகளின் காரணமாக இந்தியா மிகப்பெரிய பொருளாதார நெருக்கடிக்குத் தள்ளப்பட்டிருப்பதைக் கண்டு மிகவும் வருத்தமடைகிறேன். அதேபோல், இந்தியாவின் பொருளாதார முன்னேற்றத்துடன் ஒப்பிடும்போது, சுகாதாரம், கல்வித் துறைகளின் வளர்ச்சி மிகவும் குறைவாகவே இருக்கிறது. அதன் காரணமாக, நாம் ஏராளமான உயிர்களை இழந்துவிட்டோம்.

பொருளாதார வளர்ச்சி
பொருளாதார வளர்ச்சி

இன்று இந்தியாவின் பொருளாதாரம் 3 ட்ரில்லியன் அளவுக்கு உயர்ந்திருக்கிறது. ஆனால், இது நாம் மகிழ்ச்சி அடைவதற்கான நேரமல்ல. ஆராய்ந்து, சிந்தித்து, செயல்பட வேண்டிய நேரம். தற்போதைய பொருளாதாரச் சூழலில், 1991 நெருக்கடி காலகட்டத்தைவிடவும்,வளர்ச்சியை நோக்கி முன்னேறும் நமது பாதை மிகவும் மோசமாக இருக்கிறது. ஒவ்வோர் இந்தியருக்கும் ஆரோக்கியமான, கண்ணியமான வாழ்க்கை உறுதிப்படுத்தப்பட வேண்டும். அதற்கு, நம்முடைய முன்னுரிமைகள் மறுபரிசீலனை செய்யப்பட வேண்டும்.

 மன்மோகன் சிங் Vs ஹர்ஷ் வர்தன் - அரசின் கடிதமா... அரசியல் கடிதமா?

1991-ம் ஆண்டு மேற்கொள்ளப்பட்ட பொருளாதார சீர்திருத்த நடவடிக்கைகளுக்குப் பின்னர், இந்த 30 ஆண்டுகளில் அடுத்தடுத்த அரசாங்கங்களின் கீழ் இந்தியா பலகட்டங்களாக முன்னேறியிருக்கிறது. இன்று இந்தியா மிகப்பெரிய பொருளாதாரத்தைக்கொண்ட நாடாக உயர்ந்திருக்கிறது. கோடிக்கணக்கான புதிய வேலைவாய்ப்புகளை உருவாக்கி, அதன் மூலம் நாட்டு மக்களை வறுமையின் பிடியிலிருந்து மீட்டிருக்கிறோம். இந்த முயற்சியை மேற்கொள்ள எனக்கு வாய்ப்பு கிடைத்ததை நினைத்து நான் மிகவும் பெருமைப்படுகிறேன், மகிழ்ச்சியடைகிறேன்" என்று மன்மோகன் சிங் தனது அறிக்கையில் குறிப்பிட்டுள்ளார்.

`அன்புள்ள பிரதமர் மோடிக்கு..’ - கொரோனாவை கட்டுப்படுத்த மன்மோகன் சிங் சொன்ன 5 யோசனைகள்
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு