Published:Updated:

ஜனநாயகம் குறித்துப் பாடம்; புதுச்சேரி ரெஃபரன்ஸ்!’ - காங்கிரஸை விமர்சித்த மோடி

பிரதமர் மோடி
பிரதமர் மோடி

`உச்ச நீதிமன்றம் உத்தரவிட்ட பிறகும் புதுச்சேரியில் உள்ளாட்சித் தேர்தல் நடத்தப்படவில்லை’ என்று பிரதமர் மோடி கருத்து தெரிவித்திருக்கிறார்.

ஜம்மு-காஷ்மீர் மக்களுக்கு இலவச மருத்துவக் காப்பீட்டுத் திட்டமான ஆயுஷ்மான் பாரத் திட்டத்தை, பிரதமர் மோடி காணொலி வாயிலாகத் தொடங்கிவைத்தார். இந்தத் திட்டத்தின் மூலம் ஒரு குடும்பத்துக்கு ஐந்து லட்சம் ரூபாய் வரை காப்பீடு கிடைக்கிறது. திட்டத்தைத் தொடங்கிவைத்துப் பேசிய பிரதமர் மோடி, ``ஜம்மு-காஷ்மீர் யூனியன் பிரதேசமாக மாற்றப்பட்ட ஓராண்டில் உள்ளாட்சித் தேர்தல் நடத்தப்பட்டிருக்கிறது. மாவட்ட வளர்ச்சித் தேர்தலின் மூலம் ஜம்மு-காஷ்மீரில் ஒரு புதிய அத்தியாயம் எழுதப்பட்டிருக்கிறது.

டெல்லியில் சிலர் ஜனநாயகம் குறித்து நாளுக்கு நாள் எனக்குப் பாடம் எடுக்கிறார்கள். ஜனநாயகவழியில் நடக்கவில்லை என்று எங்களைக் குற்றம் சாட்டுகிறார்கள். ஆனால், காங்கிரஸ் ஆட்சி செய்யும் புதுச்சேரி யூனியன் பிரதேசத்தில் இன்னும் தேர்தல் நடத்தப்படவில்லை’’ என்றார்.

ஜம்மு-காஷ்மீர் உள்ளாட்சித் தேர்தல்: 75 இடங்களில் வெற்றி - பா.ஜ.க-வுக்கு வளர்ச்சியா, பின்னடைவா?

காங்கிரஸின் குற்றச்சாட்டுக்கு பதிலளிக்கும்விதமாகப் பேசிய பிரதமர் மோடி, ``உச்ச நீதிமன்றம் உத்தரவு பிறப்பித்த பின்னரும் புதுச்சேரியில் தேர்தலை நடத்தாமல் இருப்பது ஜனநாயகத்தைப் பின்பற்றும் செயல் அல்ல.

நிகழ்ச்சியில் பிரதமர் மோடி
நிகழ்ச்சியில் பிரதமர் மோடி

முந்தைய பத்து ஆண்டுக்காலமாக ஆட்சியிலிருந்தவர்கள் எல்லையோரப் பகுதிகளின் வளர்ச்சிப் பணியில் கவனம்செலுத்தவில்லை. ஜம்மு-காஷ்மீரில் படிப்படியாக அனைத்து வகையான வளர்ச்சிப் பணிகளையும் மத்திய அரசு செய்துவருகிறது" என்று கூறினார்.

அடுத்த கட்டுரைக்கு